من عسكريم التوت للعلك ابوريال..!
==========================
عهـدي بهـا قبـل تلبـس عبايـة
وأنا بعد قبل لا ألبس شماغ وعقـال

طفلين نتهجـى حـروف الهجايـة
الله ياماأجمـل سواليـف الأطفـال

كانت لنا في كـل شـارع حكايـة
وكنا نقـول علـوم ماهيـب تنقـال

وكنت أتقاسـم معاهـا مـا معايـة
من(عسكريم)التوت للعلك ابو ريال

وكانت بعكسـي شاطـرة بالقرايـة
تقراء جـزء عـم وطـه والأنفـال

وأنا لكـالله مـن مـواري غبايـة
مدري أبو نقطه هو الذال أو الـدال

وكانت لأبوية تشتكي مـن شقايـة
وتعلمة كيف أربـط البـاب بحبـال

ياما على ظهري كسر من عصايـة
يقولي : خلك وأنـا أبـوك رجـال

وأمي تقول :أدع لولـدك بالهدايـة
خوفي تصيبة من كثر الضرب بهبال

وأنا لا شفتها من أول الدرب جايـة
مدري انا الي ملت او الدرب مال؟

أحس قلبي يرتجـف فـي حشايـة
ماكنة إلا ضيـف لا هـز فنجـال

ياما من ( السعلو )تخبـت ورايـة
لا خو فوها فية ثم شافـت ضـلال

تقـول: خلـك حبيـبـي معـايـة
وأستانس ألعب عندها دور الأبطـال

وأغار حتى مـن عيـون أصدقايـة
لا طالعوها قلت :تكفوووون ياعيـال
.................................................. ...

للشاعر/محمد النفيعي

__________________

حس الرهايف وش يقرب لك مرهف الاحساس ؟ >> طس بس

وش جايبه لنا اليوم ؟

اهااا قصيده

ياسلام ياسلام

<< لا ياشيخ يعني مدرعم على وين ؟


قصايد ذكريات الطفوله تجي خفيفه على النفس

والاغلبيه يتقبلونها

والشاعر محمد النفيعي الظاهر كان يحب وحده يومهم صغار

واسوأ خبر يوم جاها وقال تراني بلغت

<< يألف من الراس

انا منيب شاعر بس احس الوزن فيه شي

مثلاً : خوفي تصيبة من كثر الضرب بهبال

لو استبدلها بـ : خوفي يصيبه من كثر ضربك هبال

وأيضاً ( وجه ناشب )

وأنا لا شفتها من أول الدرب جايـة << الشدة على الياء خربت الوزن

وختمة القصيدة كأنها ناقصه او بالمعنى مالها ختمة


وارجع اقول كلها وجهة نظر

يمكن انا اطلع كلي على بعضي منيب موزون


منورتنا حس الرهايف >> يرحب هنا تعبان يروح الملحق

وان شاء الله نشوف تواجدتس أكثر وأكثر


يعطيتس العافيه

__________________
( دعوه للـعناد والتمسك بالرأي )

ليس كل ما هو شائع صحيح ..!

يعافيك اخوي ..ماشي الحال ..

نورت ..الصفحه بطلتك .. اختك حس الرهايف ..

__________________