☻ حايل بعد حيي

**العتيبي** · 09-05-2007, 02:44 AM

^
^
^

والله إن تبطين عظم ياسويسرا

سلام الله عليكم ورحمته وبركاته .. أيها الشعب الزكرتي الطيب

والله يسعد أيامكم بالمحبّة ويعطّر بالجَمال أوقاتها

اقتباس:

:: نزهه خارج البيت ومعك كاميرتك معلقة في رقبتك ::

من زمان كانت الكاميرا ماتفارقني ومعي على طول لأي مكان أروح له

وكنت هاوي التصوير ومتولع فيه وأتفنن بألتقاط الصور والمناظر الطبيعية

هالكلام لما كانت الكاميرات على قد الحال والأفلام تحميض <<< مغبّر

طبعاً تغيّرت الكاميرات وتطوّرت فنون التصوير وأنا مازلت بمكاني

ألتهيت بمجالات أخرى وللأسف أهملت هالهواية وماحاولت أطوّرها

بس ولله الحمد في هالقسم ــ قسم الدريشة ــ حصلت على اللي أبيه

وصرت أتابعه وتصفحت كثير من المواضيع لمبدعيننا الكبار في هالقسم

وأستفدت منهم كثير الله يعطيهم ألف عافية ويارب نشوف لهم مواضيع أكثر وأكثر

^
^
^

كل هالمقدمة عشان يعلمكم إنه داج بالتصوير

المهم أحبابي هذي مجموعة صور من تصويري محتفظ فيهم من فترة

لمكان أسمه المسطاح في شمال شرق منطقة حايل

وطبيعته خليط من التلال الرملية والتلال الصخرية

ووقت إلتقاط الصور كان الجو ملبد بالغيوم السوداء

واللي تنبئ بسقوط المطر

فجأة بدت ترعد وتبرق وبدت حبات البرد بالسقوط وزاد سقوطها حتى صارت كثيفة مرة

وأبتلت الأرض وبدت الأودية الصغيرة بالجريان .. ياالله يالجو وقتها شعور مايوصف

فحبيت من خلال هالموضوع ــ الأول لي بالدريشة وعسى ماهوب الأخير ــ حبيت

أعرض لكم بعض الصور اللي ألتقطتها وتشوفون شيء من حايل

بس لا تسألوني عن درجة الإضاءة أو الزاوية أو البعد البؤري <<< مصورهم بالجوال

وما لي غناة عن رأيكم ونقدكم وملاحظاتكم ... فديتكم

ــ بسمـ اللهـ ــ

واللي حاب يشوف اللي قمت بتصويره بلقطة فيديو

[عفواً يمكن مشاهدة الروابط للمسجلين فقط للتسجيل اضغط هنا]

إن شاء الله تعجبكم الصور وتحوز على رضاكم

ولا تحرموني ردودكم وآراؤكم

فمان الله

m o b d a · 09-05-2007, 03:06 AM

لا لا لا لا ..

تقلب المواجـع ..

يا عزوتي يا حايل ..

آه بس

الله لا يهينك أخوي العتيبي ..

صور رائعه .. لو إنها بكاميرا فوتوغرافيه .. كان .. يا ما كان ..

الله يجزاك خير أخوي ..

**غرشة فينتو** · 09-05-2007, 03:46 AM

واخوان شمر هلن لي يا بعد حيي

وش ذا الابداع وش ذا العكوس يا العوتيبي

ما ادري هو الزين بارض حايل والا بتصويرك

والظاهر انه اندمجوا مع بعض وصار ابداع اقوى الجميع >>افتح يا سمسم ابوابك

يا بعد تسبدي يا ذا الديار

ترى حايل حبي الثاني عقب الحسا (لعيون بيش ) >>>اقلبي خشتس الظاهر قلبتس أطلس السعودية

شوكرا كثر جمال حايل وكرم اهلها يابو عتب

**سفيرة الحزن** · 09-05-2007, 05:06 AM

دام اتجاهك شمال مودعك حاجه ** سلم على حايل وسلم على شمر

يااااااااااا بعد حيي وميتي وملي وكلي يااااااا <--- ارركدي

لا انا إذا شفت حايل تتعب اعصابي

العتيبي .. بصراحه بداية جميله ولو اني احس في تكرار بالصور

إلا انا تبقى حلوه وبدايه موفقه بالحيل بالحيل

الله يعطيك العافيه

**شوشو .. وبس** · 09-05-2007, 12:47 PM

(( قلب ينبض ))

(( قلب يرقع ))

(( قلب حالت امه حاله ))

.. .. ..

حـــــــــــــــــــــــــــــــــــــــــــ ـــــــايل

انا مو من حايل

بس قلبي يحبها ويحب اهلها وكل من له طرف فيها

جعل من لامني فيكم ينلام

انا رحت لها مره وحده ومن زمااااااااااااااااااان

ولا طولنا يومين بس ماشفت شي

المهم هنا

ان حايل اطلق مكان

لو هي شهبا ومافيها ولا شجره برضو تظل اكوس وحده في الحته

ياويل حالي على الشمــــــــــــــــــامره اروح انا ملح

<< وربي معد تستحي

.. .. ..

كني نسيت الصور

العتيبي

تسلم يدينك صور ولا اروع

لو كانت الصور كانت لديره ثانيه كان وريتك النقد

بس اسمحلي هنا انا مقدر اتكلم

انا بطلع قبل اخربها اكثر من كذا

موضوع مافيه زيه

فوتك بعافيه

الخاتمة · 09-05-2007, 04:14 PM

والله مرتفعة اسهم حايل واهلها
من قدها وقدهم

العتيبى

والله خطير تصويرك

وكامرة الجوال مسوية شغل <<< بترفع معنوياتك

بصراحة مناظر طبيعية جميلة

ومهما وصفنا الاحساس يكون احساسك اجمل بما انك عشت الجو

ان تصل متأخرا خيرا من ان لا تصل ابدااا

لا تحرمنا جديد كامرت جوالك !!

دمت بود

*someone* · 09-05-2007, 06:11 PM

وعليكم السلام والرحمة

يالله ان تحييه بداره يالعتيبي

ماشاء الله ماشاء الله شو هالزين

بصراحه حايل ديره واهلها أهل الكرم والجود

-_-_-_-

ماشاء الله المناظر خيال والشلالات ودك من يجلس تحتها <<<

تصوير جميل ماشاء الله

تمنيت الصور تكون بكاميرا فوتوغرافيه عشان تشبع الألوان

في حركه حلوه لو سويتها وقت ماصورت الشلال وهي انك تخلي سرعة الشاتر بطيئة
وتطلع المويه منسابه <<<

يعني ( تكون انسيابيه ) بتطلع خيال

أخوي وفقت بأختيار المناظر

بالتوفيق أخوي العتيبي

**شباب في رحله** · 09-06-2007, 01:31 AM

ماكنهم سحبوا على الصور وقاموا يمدحوون

عاد انا بخالفهم

وبنسى حايل وفي روايه اخرى حائل

اول شي الصور مو وقتها ابدا

الله يهديك تدري اننا سايحين من ذا الرطوبه وانت جايب لنا ذا الصور

اللي ترد الروح

علشان كذا باجل الرد الين يجينا الربيع ان شاء الله

<< استريح للاخر

عتيبي تعجبني انك شخص تحب تسوي كل شي

ياخي حبلي خشمك

على ذا الصور تخيلت نفسي لابس ذاك الهويف وادووج بين ذا الشلالات

واحس اني ابو سنان <<< مدري وش تبي

عقبال مانشوف لك صور بكاميرا الكل يتمناها

وانت تجيك هديه ذا الكاميرا وتدهر ادهار ملعون صلايب

<<< تحمس

فديت رعامتك ابو عتب وبس

بنت الشيوخ · 09-06-2007, 02:53 PM

اااااااااالله

صدق اللي قالوا صيفنا بالمملكة غير وغير <<لايكثر

والله صووور ترد الروووح يابعدي ياحايل اثاريتس زينه

اجل بنجيكم نتبرد عندكم ونشم هواء يرد الروح << ماكفاها هواء الطايف

تسلم يمين صورت وعرضت ..

مبدع حد النخاع اخي العتيبي ..

حفظك الله اينما حللت ..

ولاحرمنا جديدك ..

**العتيبي** · 09-07-2007, 04:40 PM

m o b d a ,,

أرحب ياهلااا وغلاااا

اقتباس:

المشاركة الأصلية كتبت بواسطة m o b d a [عفواً يمكن مشاهدة الروابط للمسجلين فقط للتسجيل اضغط هنا]

لا لا لا لا ..

تقلب المواجـع ...

أقلب مواجع ليش

لايكون لك ذكريات مؤلمة بحايل

اقتباس:

المشاركة الأصلية كتبت بواسطة m o b d a [عفواً يمكن مشاهدة الروابط للمسجلين فقط للتسجيل اضغط هنا]

يا عزوتي يا حايل ..

آه بس..

ياعزوتي أنت

لا دامك قلت ياعزوتي أجل ذكرياتك بحايل ماهيب مؤلمة

اقتباس:

المشاركة الأصلية كتبت بواسطة m o b d a [عفواً يمكن مشاهدة الروابط للمسجلين فقط للتسجيل اضغط هنا]

الله لا يهينك أخوي العتيبي ..

صور رائعه .. لو إنها بكاميرا فوتوغرافيه .. كان .. يا ما كان ..

الله يجزاك خير أخوي ..

ولايهينك حبيبي

وإن شاء الله تشوف التصوير اللي على أصول في القريب

مشكور حبيبي على ردك ونورت الموضوع

دمت بكل مودّة

**العتيبي** · 09-07-2007, 04:55 PM

ياهلااااا وغلاااااا غرشة فينتو

الله يحييك خيتي

والله ياجاء وقتك برمضااان

اقتباس:

المشاركة الأصلية كتبت بواسطة غرشة فينتو [عفواً يمكن مشاهدة الروابط للمسجلين فقط للتسجيل اضغط هنا]

واخوان شمر هلن لي يا بعد حيي

صح لساااااااانتس وصح كلك

اقتباس:

المشاركة الأصلية كتبت بواسطة غرشة فينتو [عفواً يمكن مشاهدة الروابط للمسجلين فقط للتسجيل اضغط هنا]

وش ذا الابداع وش ذا العكوس يا العوتيبي

ما ادري هو الزين بارض حايل والا بتصويرك

والظاهر انه اندمجوا مع بعض وصار ابداع اقوى الجميع >>افتح يا سمسم ابوابك

هذا بس من ذوقك الله يحفظك

والزين في حايل وحايل كل الزين

والحمدلله اللي جازت لك الصور

اقتباس:

المشاركة الأصلية كتبت بواسطة غرشة فينتو [عفواً يمكن مشاهدة الروابط للمسجلين فقط للتسجيل اضغط هنا]

يا بعد تسبدي يا ذا الديار

ترى حايل حبي الثاني عقب الحسا (لعيون بيش ) >>>اقلبي خشتس الظاهر قلبتس أطلس السعودية

تسلم تسبيدتك غرشة والحسا وحايل عينين في راس

ولاتهون بقية مدن مملكتنا الغالية >> من كتاب الوطنية

اقتباس:

المشاركة الأصلية كتبت بواسطة غرشة فينتو [عفواً يمكن مشاهدة الروابط للمسجلين فقط للتسجيل اضغط هنا]

شوكرا كثر جمال حايل وكرم اهلها يابو عتب

والشكر لك غرشة على حضورك وتعليقك

عسى الله مايحرمنا من طلتك الحلوة

دمت بكل خيرِ

**بيـــــــــش** · 09-07-2007, 05:10 PM

اعلانات المنتدى