السلامُ عليكم و رحمة الله
و كانت بعد موقف ٍ قديم ٍ تذكرته..
و خلاصةُ القول : إرحموا من فقد عقلهُ ..!!
قال : خرّ السقف .. قلت :انّ البلا من ساسه = قال : إنّ الدين .. قلت استبدَلوا قانونه
قال : "فيما كانَ ظُلمٌ يقتضي إتعاسَه" = والتفَت للبدر يبكي و الملا يبكونه
مقدمة القصيده عباره عن قصه..
هي أشبه بخيال و أوهام ( مَجنون ) و ليست أكثر ..
في سديم ٍ راح ظلمه يقتفي نبراسه=لين صار النور كنّه شبّة ٍ مدفونه
وسوَس الشيطان وادري وش ورى وسواسه = يا ضمير ٍ غاب و الاّ خطوة ٍ ملعونه
وانحدر من فوق عرش ٍ ينتفض حرّاسه = (مارج ٍ من نار) واقبل و الحرس يحدونه*1
لابس الياقوت تاج و في يمينه ماسه = و البريم يْجرّ خلفه كبرياء الجونه *2
أشّر لـْ مرزاب روح المحتبي في كاسه = وانفتح له قلب شاعر و انفضح مكنونه*3
مدّ لي يسراه تحمل من دلايل باسه = راس وعث ٍ في مكان الكفّ والاّ دونه*4
ما تحرّك فيّ ساكن لين ردّ احساسه = من ورى الجدران يروي قصة المجنونه
وانّها في قصر (سَيْزَم) صافحت (مِرجاسَه)= بنت ( نمرود الإراش) و اختها (مزفونه)*5
باليمين و زال عن كفّ الملك نقراسه = لنّ باليمنى سلام و كفّها ميمونه
وابتعد هالصوت يترك للصدى انفاسه="إنّ فيما كانَ عِلماً للألى يروونَه"
ردّ باستحياء :عُذراً .. يعتذر جُلاّسه = عن خطاه و مدّ كفّ ٍ كنّها أرجونه*6
والتحفت الموت غربه و افترشت لْباسه = في حمى سلطان ذيك المملكه و ظعونه
وانقضت ساعات ليل ٍ ضمّني هوجاسه = بالمنام و شفت شمسه بالقمر مقرونه
أشرقت من عين ٍ كلب ٍ و القمر من راسه = و اجتمع لي كلّ مارد .. خوفهم يخفونه
جاب لي سيّدهم احْدَعْشَر جنين و طاسه = رُوسهم بالشيب تلعن خاين المفتونه
قال : خرّ السقف .. قلت :انّ البلا من ساسه = قال : إنّ الدين .. قلت استبدَلوا قانونه
قال : "فيما كانَ ظُلمٌ يقتضي إتعاسَه" = والتفَت للبدر يبكي و الملا يبكونه
بعدها ما شفت شيٍّ غير هالحساسه = دمعتين و طيف بسمه بالشفا مسجونه
بنت آدم في ملاك و خدّها من ناسه = يشتكي لي ضيم سرّ ٍ كلهم يقرونه
تسكن الاوهام بيت ٍ زيَّنت مِجلاسه = ضحكة الانذال و الاّ دمعة المحزونه
لا اشتكت من زيف حلم و تمتَمَت محتاسه = ما لقت يا كود صرخات العَتَب مسنونه
حقها محدود حتى للبكا مقياسه = حقها مجحود لنّ العاقله مآمونه
كل شيّ ٍ حشَّموه و طرْفها لو داسه = هاتكين الستر محدن يسعف المطعونه*7
كنّها لا جات طفل ٍ يستحي من ياسه =ضيّع الآمال واقبل دامعات عيونه
في رضاه الحبر ينزف مرضي ٍ قرطاسه = و القصيد يهلّ غيث ٍ من حلاة مْزونه
وان زعل ما غضّ جفن ٍ واهتنى بنعاسه = لين يرضِي من غلاته كلّ من يرضونه
شذّبَت شريان قلبي واخلَفَت مرواسه = و الجَمَتْني يوم تسأل شجْرة الزيتونه
ليش ما في الكون غيري بايع ٍ لاحساسه = ليش كلٍ راح يضحك لا لقى المجنونه
إخوتي
هذهِ بعض المفردات
و ليس هذا إفصاحٌ بمعناها بقدر ما ما هو إيضاحٌ لِمقصدي بها :
1 ـ مارجٍ من نار : شيطان و الجنّ كما ورد في كتاب الله في سورة الرحمن مخلوقة من مارج ٍ من نار .
2 ـ البريم : نوعٌ من أجود أنواع الخيوط. و الجونه : من أنواع القماش الفاخر .
3 ـ المِرزاب : قفل الباب أو ما يُقفل و يُفتَح به ِ الباب .
4 ـ وعْث : بفتح الواو و العين الساكنه : حيّه أو ثعبان .و هيَ ليست فصيحه .
5 ـ سيزم و مرجاسه و نمرود الإراش و مزفونه : أسماء خياليّه لا وجودَ لها و هي هُنا لـِ ملوك الجانّ .
6 ـ الأرجونه : نوعٌ من الزينه تستخدم لدى النساء قديما ً و هي جميلة المنظر .
7 ـ يقولون لا يُداسُ لهُ على طَرَف .. و يقصدون بهِ : المَنَعه و العزّه .
و قلتُ هُنا طرْف بسكون الراء لـ ِ يكون المعنى غير المعنى المُتعارف عليه و أحبَبت إيضاح ذلك .
" الكلام بينَ هذهِ الأقواس"...." فصيح و ليس عاميّا ً .
و لكم تحيّتي
(( قصـّة المجنونـه )) بالصوت !!
