يامكثرين الهرج لااسمع ولااجيب=تريحوا من فضلكم واسمحوا لي
تريحوا لاتلحقون المشاهيب=على الردى ماني شفوق عجولي
بالعقل والصبر ادب النفس تاديب=والا لها مده تصول وتجولي
خلج ترازم في سياج المحاديب=مافيهن اللي بالعقال معقولي
اشد وطية زور من شمخ النيب=اليا ضاع مفعول الحيل والحلولي
انا لاقلت ارتب القول ترتيب=حتى يجي كي على فك قولي
اليا ارسلت لافكار القريحه مناديب=ترايعن من عقب ماهن جفولي
لكن مالي من وراها مكاسيب=لو كان عشاق القشر صفقوا لي
مامستفيد الا العدو والاجانيب=ولاني مطيع مقرقعين الطبولي
خليتها تعطي فجوج مجاديب=جربا تجود في رسنها مهبولي
والله لااجنب دام لي درب تجنيب=من شرهة حشام الرفاقه خجولي
لو انها بين النحر والتلابيب=من الحيا وجهي مهوب مغسولي
طبع لنا نشب عليه ونشيب=وطبيعةٍ لعلها ماتزولي
على الجماعه للجماعه مواجيب=الا جهلوا قدر الرفيق الهتولي
ماني على ربعي قريب محاضيب=ادناة مايخليني اسرج خيولي
ان جات من طيب شقاها على الطيب=لو انها اعوج من رقبة الذلولي
وان جات من مسكين منطق واساليب=حطيتها بين الثرى والنعولي
لاحركت شعره ولاطلعت شيب=ولاضيقت صدري ولاطق جولي
وان كان في صبري على ميلهم عيب=العيب تفتيش الصرر والحثولي
لاقمت تذكر في رفيقك عذاريب=وتبين عيوبه لذولي وذولي
صبرك على ربعك علاج وتطابيب=يقصر حبال السالفه لاتطولي
حتى مايلقا في طرفها مقاضيب=كرّاه خير وللمشاكل ميولي
واليا بليت بتايه شره صعيب=يقول انا العراف وانت الجهولي
قل الله الله ياحصان الاطاليب=يالفاهم العالم عطيب الفعولي
هذا الكلام اللي مافي صحته ريب=لانيب لاحولك ولانتاب حولي
حصان وبن حصان طيب مجاذيب=وبالمعرفه رجل محلي ودولي
خله يروح يخطي الدرب ويصيب=يقول مابالناس عرضي وطولي
والفرق ماهو باللحى والاشانيب=الفرق بين الناس فرق العقولي
كم واحد تحسن به الظن ويخيب=السن يضحك والفواد معلولي
واللي غدت به كلمة مالها غيب=ماهو من اطيب ربعي اللي غدولي
يالله عساها صيحة في قفا ذيب=وقلع النيا بيني وبينه يحولي
الرجل مايغصب على الطيب تغصيب=اليا صار ماهو دل ضمن الدلولي
ومن عادة اللي طيبه يحضر ويغيب=لاطالت الرفقة زهوق ملولي
واليا بلنك غبر الايام بصحيب=في مستوى طيبه صعود ونزولي
اعرف ترى الدنيا دروس وتجاريب=والكامل الله والنقا للرسولي
لاتصير مشذاب يقص العراقيب=خله وراع الاوله وش يقولي
اخذت حكمه من كلام اللواعيب=للطيب ناس وللعذارى فحولي

بالنهار لياتعلت كبر فرخ الحمام=دونها الاف المسافات تزويها زوي
وان تغطلس بينك وبين رؤيتها الظلام=كن في روس اجنحتها مشاهيب بدوي

بيني وبينه مسافات وحدود ونظام=واحد ٍ فرقاه شاويتن فوادي شوي

مايبرد واهج الشوق وشعور الهيام=غير سرداً تطوي البعد بالسرعه طوي
بديها من خلف ماهوب مثله من امام=مستوي في حال وبحال ماهو مستوي
خشمها عبرود طلقه وموخرها بهام=رافعه راعيه بأشارة ٍ ماتنغوي
لابدو دعاء السفر واعلنو ربط الحزام=ورشادات الامن لو ترتطم والا تهوي
واستلمها واحد ٍ خبرته عشرين عام=كبتن ٍ بالله وبكتابه إيمانه قوي
مسلم ٍ عنده خبر بالحلال وبالحرام=جابله ربي على الدين وسلوكه سوي
وصعدت مثل اشقر ٍ فوق جول الصيد حام=لمراوحها مع الجو لجه وحدوي
مثل مايدوي صدى صوت رعاد الغمام=صوتها صداه عبر الفضا يدوي دوي
صنعة اللي ماعرفوا لاصلاة ولاصيام=شعب ٍ أكثرهم ماهو عارف ٍ منهو ذوي
بالنهار لياتعلت كبر فرخ الحمام=دونها الاف المسافات تزويها زوي
وان تغطلس بينك وبين رؤيتها الظلام=كن في روس اجنحتها مشاهيب بدوي
دوبهم دكو عن دلاله الربع الحشام=تحتها من وقدة السمر جمر ٍ مجثوي
دايم وربعه على جلسة ٍ عنده حيام=ابلج ٍ لين جنابه لربعه وحموي
مالي الا هي لياجا للاشواق أحتدام=وقامت الذكرى على القلب تكويني كوي
لي شهر وشوي عيني محاربها المنام=ودي احضر جوازي وادورلي خوي
بيني وبينه مسافات وحدود ونظام=واحد ٍ فرقاه شاويتن فوادي شوي
بس ابا ازوره مثل مايزارون الكرام=لين عيني من قباله وشوفه ترتوي
لو بغيت اصبر واكابر واقول اني تمام=ذيب حبه بين جرد المحاديب يعوي
كان مالي في دروب الهوا شف ومرام=لين شفته واشهد انه هواة المهتوي
ياسلام الله على السلهمه والابتسام=وياسلام الله على اللي مابيله مطروي
كن مالله حط في منطقة خصره عظام=وكن غيره ماحتوى مثل ماهو محتوي
لاقعد ماوده يقوم ولياقام قام=تلوي اعناق البشر قومته يمه لوي
تقل بين اعلا الجسم واسفل الجسم انقسام=شي من جسمه مرتب وشي ٍ فوضوي
استلمني في جبروته اشر استلام=لين طيّح معنويات راس المعنوي
الغرام ليابطش فيك ملعون الرسام=مايعرف هذا قبيلي وهذاك خلوي
يكبر الرجال امام المهمات الجسام=ويصغر الرجال امام الجمال الانثوي
مايحتمل نظرة العين وارخاي اللثام=لو باسه باس رحمة حياة بن جلوي

ياراكب اللي مافي فخامته هرجه=وعلى جبينه رموز لدولة انتاجه
جيبٍ ركونه قدم.. واخلاف مدرجه=يطوي سراميد جرد البيد منهاجه
ودك تغني ليامنه عطا الفرجه=(يامل قلبٍ يسج وفيه دولاجه)
الوقت دوّار والايام مندرجه=كم طيبٍ حوّله من عالي ابراجه
لياقام وقتك يقلط عوره..وعرجه=وازريت تصبر على عوجاه..وزعاجه
أمتس حبل اللزوم وقلة الخرجه=ودورّ رفيق الرخا حجه لمخراجه
نصه حزام الظهر بالساعه الحرجه=اللي للأصحاب دايم يضحك حجاجه
على يديه اعتبر كربتك منفرجه=مثل الدوا اللي (يدس) لحزة الحاجه
تجيه مشدوده اعصابك ومنحرجه=وتروح من عنده اعصابك بثلاجه
وان قيل بالله من ؟ قل مابها هرجه=مسلط..ليامن كلٍ عد ماواجه

الشعر باربوع دخنه نورّت سرجه=وطرى على ابن لعبونه..ومجماجه
لافي من المعدن الصافي سبك جرجه=واجاد بالشعر مدخاله ومخراجه
على المثاليه المعروفه الزرجه=أبدع بسبكٍ وحبك وزين ديباجه
هاواه ومع اوسع ابوابه دخل برجه=وبصف سرج البلاغه نورّ سراجه
ماهوب شعرٍ حديثٍ مايلٍ سرجه=قشرٍٍ دروبه عن الاسناع منعاجه
أهل الحداثه بعضهم نافضٍ خرجه=وباب الشعر مايعرف رموز مزلاجه
والشعر إله مكمنٍ ماينفتح درجه=الا مع اللي يعرف يزاوج ازواجه
وجمهورهم مدفعٍ يكبس بلا درجه=فيهم مرض شبهةٍ مايعرف اعلاجه
حط الذكيه سو ى بالحكم..والحرجه=ويقارن الجعد ابن درهم بابن ماجه
ولافي من اللي تروي الرمح ابو زرجه=تنطح محيط الخطر لاهاجت امواجه
ربعٍ لياصار عند اقطيهن حرجه=في طيب الافعال للضيقات فراجه

وين انت ياللي كل ماتهب ذكراك=توقد فتيل الشوق وتذوب الاضلاع
تعااااال واجلس صبلي من شفاياك=هيل الكلام اللي تصبه بالاسماع
مدري متى اشبع من سوالفك وارواك=ياللي سواليفك خزامى .. ونعناع
عن كل من حولي تاخذني لدنياك=واندم على وقتٍ قبل لاعرفك ضاع
تزهر حياتي في حضورك ولاماك=مثل المطر تزهر من حضوره القاع
ساق الهوى مركب غرامي لمرساك=ماعاد ينفع به مجاديف وشراع
مره .. حاولت اجرب القلب وانساك=وارتعت قبل القلب يدري ويرتاع
عطني حضورك..وقطع دروب فرقاك=لايهب للفرقاء على القلب ذعذاع
مايستحق يعيشبه كود شرواك=قلبٍ يضمك حب..ويضمك اوجاع