الصـورة

كانت الصوره جميله ... و كان في الصوره طفل
و خلفنا كانت مره تلبس عباه
و اطرف الصوره ولد يضحك صباه
و قربنا حطت حمامه .... قربها حطت حمامه
تذكرين اش كثر كانت ابسط الاشياء تثير الانتباه
و في البعيد احتفظت الصوره بمنظر مهر جامح
و في البعيد فاخر الصوره شخوص بلا ملامح
تذكرين ايش كثر كان
الوقت ... شفاف و ... حنون و ... طيب و ... مبهج و ... دافي متسامح
و كان في الصوره و هذا اجمل اللي كان في الصوره ... طباعك
نظرتك و الشيطنه في داخل عيونك جنونك ... و اندفاعك
بسمتك لما تطوقني ذراعك
اذكر انك قبل ندخل هذي الصوره في لحظه التفتي لي و قلتي قول احبك
قلت اخاف ليا تكلمت احرم اذني من سماعك
كانت الصوره جميله ... كنتي في احلى نفانيفك
كأن الصبح ضيفك
او كأنك من كثر ما كنتي انتي كنتي طيفك
كنتي في اكثر مواعيدك وفا
و كنت انا في ايديني دفا
كانت الصوره جميله ... و كان في الصوره طفل


____________


عصفورتين وشمس

على حد العطش أرسـم فمي غيمة وخمس أطفال
وعلى حد الظلام أشعل يدي عصفورتين وشمس
مكاني مو مكاني والزمـان يشـوفني أشـكال
اجي مرة صراخ أقوى من الحكمة ومرة همس
انا كرهي خبال ولا عشقت أعشـق بعد بخبـال
ولا اعرف الوسط بين الحلول وذي طبيعة نفس
وانا عشقي لباكر ولاجل ذا باركض رفيق ظـلال
وفي زوادتي تـمر النخيـل اللي زرعني أمـس
معي في الذاكـرة بنتٍ توصيني بمشط وشـال
وصوت أمي يوصي لا تجي ربعك بخاطر عمس
وانا أمـك لاتنـام بـليلةٍ وأنت خلي البـال
وخل أدنى طموحك لانظرت لنجمتين اللمس
وانا امك لاصعدت إصعد مثل دعـوة فقير الحال
ولامنك نـزلت إنـزل مثل غيثٍ بيحيي غرس
وعلى حد العطش إرسم فمك غيمة وخمس أطفال
وعلى حد الظلام إشعل يدك عصفورتين وشمس


_____________


لعب عيال

هنا نجلس احسن او هنا .. وين ماتبغين
انا احب ذاك الركن لكن على اية حال
هنا احسن ارمي معطف الفرو للتخمين
وفيه تعرفين ان انا احب هذا الشال
علامك ؟ علامك ساكته ليه ماتحكين
تبين ابتدي حاضر على امرك براحة بال
على نفس ذي الطاوله من ثلاث سنين
رمت بنت دبلتها الذهب وانكسر رجال
تمسك بها وحاول وحاول وحاول لين
بلا لين. كان يحاول بكافة الاشكال
وشدت يدها وارتفع صوتها وبعدين
انا لازم امشي وانت يكفيك لعب عيال
على احر من قلب انهدم حاول المسكين
وعلى اقل من مهل الندم باعدت تختال
هنا مات حب ويبس قلب وتملت عين
من الملح واندفنت حكاية فرح وامال
وجيتي تبين نرجع اللي مضى اللحين
انا من ثلاث سنين بطلت لعب عيال