التضحيـه والهطـاقـه

**عميد الزكرتية** · 01-14-2007, 11:42 AM

السلااااام عليكم

اخواني واخواتي الزكرتية

عنوان محاظرتنا اليوم

التضحية بين الزوجين من آجل حياتن افضل

وسنتناول اثناء محاظرتنا مجموعة عناصر وهي :

التعريف العلمي لمفهوم التضحية

التضحيه السلبيه والتضحيه الايجابيه

معايير التضحيه بين الزوجين

اقوال العلماء في هذه المسأله

هل التضحيه هي نفسها التنازل

واذا كانت الاجابة سلبيه فمن هو التنازل

وهل التنازل هو نفسه التسامح والتساهل

واذا كانت الاجابه سلبيه فمن هم هؤلاء الاخوه

اخواني واخواتي لايجي في بالكم اني بأسرد عليكم تعاريف

واذكر معايير وفلسفات مالها اول من آخر

لااااااااااااع والف لااااااااااع

هذه ليست فلسفتي في الحياة انما فلسفتي في الحياه

عيش على السجيّه تسلم من الآسيّه <<

ولكن في البدايه ابي اذكر بعض الامثله عن الحب والتضحيه

وش رايكم نتجاذب اطراف الحديث عن الحب لنعرف اين نحن رايحيين

نتجاذب اطراف الحديث << احب هالكلمه واتخيل اطراف الحديث مربوطه في حبل

وحنا جالسين على جال الضو على شكل دويره

وكل واحد منّا ماسك طرف الحبل وفي فمه زقاره

ونبتسم لبعض ابتسامه خفيفه ونسحب الحبل بشويش

وابو لا لا يبتسم من بعيـــــــــد ويـجــر الحبل بقوّه

:: وقـفـــه ومحـــراف ::

الحب بالمختصر هو عندما تصبح سعادة شخص آخر ضرورية لك

وهو الحب الذي قصده شكسبير في مسرحيته (( روميو وجولييت ))

وغنته أم كلثوم وما تغنى به عبد الحليم حافظ وعبد الوهاب

والحب الذي ترك من أجله ادوارد الثامن أهم وأغلى عرش ملكي في العالم وهو عرش انكلترا

وما فعله تشارلز حينما أحب كاميليا وعرّها معها رغم كل الصعوبات

نخرج من الأمثلة السابقة بعنصر أساسي وهو (( الاهتمام ))

فالاهتمام هو أهم عنصر ومن دون الاهتمام يصبح الحب مجرد رغبة أو نزوة

هناك حب الوصول الى هدف أو الى مطمع ويزول بزوال المؤثر

انما الحب الحقيقي بيعيش ياحبيبي

بيعلمنا نسامح لغزيّل ولراجح

بيعلمنا دايماً في ايامنا اللي قايّه << سـقــهـــا

والاكيد ان تكامل الشخص المحبوب يمنعنا من أن نستغله بطريقة أنانية

والموقف اللي بذكره فيه شي من الاستغلال والتضحيه

وبعد ما اذكره ودي تقولون لي

هل هذا حب او تضحيه او هطاقة

:: الموقف ::

في يوم من الايام كنت عند واحد من الجماعه

او كنت بالأحرى ساكن عنده لفترة من الزمن

وفي ليلة كنّا جالسين نطالع التلفزيون ونتابع فلم ملعوون خيّر

وكنّا منشدين مع الفلم انا وياه مادرينا

الا الباب مفتوح ودخلوا علينا عياله الغثيثين

هم ثلاثه اكبر واحد عمره اربع سنين واصغر واحد عمره سنه

وجلسوا في حضنه الثلاثه

واحد توسد فخذه الايمن والثاني توسد فخذه الايسر

الثالث انسدح بين رجلينه وهو اصغرهم وكبر النتــفه

قام الكبير يأشر بسبابة يده اليمنى على التلفزيون ؟؟؟

انا نغزني قلبي !!!

ودريت انه يبي سبيس تون

رجعنا نتابع الفلم بصمت

شوووي ونزل اصبعه !!

قلت اشوى انه تلايط

وقلت في نفسي ليه انا كذا يمكن اني ظالمه

يمكن انه يأشر على رضاعته الفاضيه اللي فوق التلفزيون

يمكن المسكين جوعان

واخذ شوي واشر مررة ثانيه بيده اليسرى

اثاري الحبيب تعب ونزّل يده اليمنى

ثم رفع يده اليسرى وأشّر على التلفزيون مرره ثانيه

قال ابوه وش تبي يا بابا ؟؟

قال بابا ابي كراتين !!

ابوهم طبعاً بدون تردد حطّه على سبيس تون وزلّب امي

وانا في بيتهم مقدر اقول شي

المهم عقب ما حطّه على سبيس تون

قام يطالع فيهم ابوهم بنظرة ابوّه هطافيّه

وهم يطالعون فيه ويتمغطون عند رجلينه << التمغط اعلى درجات الوناسه عند المبزره

قام ابوهم يطالع في ويقول خلنا نسولف احسن

وقمنا نسولف الين دخنا وجانا النوم وعياله عيونهم مبققه على الكراتين

اخذت اشوي انا اتابع الكراتين وذكرت حاجه

وجيت بقولها لابوهم

ويوم طالعت فيه الا هو نص نايم وكانت الساعه وحده ونص فاليل

قلت في نفسي هذي هطاقه مهب ابوّه وحنيّه

لاتقولون انت الغثيث انا ساكن عندهم والمجلس يعتبر لي

هم الغثيثين

المهم ناديته و فتح عيونه قلت له رح ارقد وراك دوام قال

ياخي احس أن عيالي مبسوطين على السدحه

وخاشين جوّ مع الكراتين ما ابغى اخرب عليهم << ام العفن

هذي والله الرخامه << طبعاً قلتها في قلبي لاني احترمه

قلت له ليه ماتوديهم عند امهم قال يا خي هم تاركينها وجايين عندي

وبعدين امهم وش تحمّل لاتحمل ؟؟ (وجه حياة الفهد)

كل شي على راسها

من يوم تقوم الين ترقد وهي تكرف في البيت

((مع العلم ان عندهم خدامه))

وقال في نهاية حديثه اللي هو بداية حديثنا : هذي تضحيه

وانا اقول سلاااماات ياالتضحيه

انت موظف وزوجتك مهب موظفه

التضحيه تقع على غاربها الله لايهينها

وجاء في بالي هالعنوان التضحيه والهطاقه

الحقيقه ان التضحيه والهطاقه يفرق بينهم شعره

نفس شعرة معاويه

والذهين اللي مايقطعها ولايرخيها

والا تجي علووم

وشـكـراً على حسـن استمـاعكم

**nAmLaT nAjD** · 01-14-2007, 12:39 PM

(ضحكة كبيره)

كبيره من جد

برستيجي في المكتب راح ملح

البنات يسولفون من جد والفت عليهم واضحك

<< شكوا في اخلاقياتي

:

اول شي ماشالله تبارك تبارك الله

الله يتمم على ابوهم

وعسا كلن يخلي له

واللي ماعنده يعطيه

من وجهة نظري الصغنطوطه على قدي

خاصه اني ماخضت تجربة الابوبه بعد << والا ناويه تخوضينها؟

>> ايه فيه مشروع تسليف شنب

ماعلينا ..

وجهة نظري اشوفه موقف طبيعي جداً وبالاصح حلو

يفترض نشوفه في كل بيت

هو ماضحى بمستقبله .. والا ضحى بهالكم ساعة كل يوم

كل مافي الامر ان فطافيطه

جو عنده برغبتهم

مهب قايلن لهم طسوا

لو تكلمنا عن الموقف بالتفصيل

سالفة سبيس تون ماحبيتها واجد

مب عشانك

بس لانه ماجاز لي المبدأ

يعني انت مقيم عنده لفتره يعني تمون وصرت من حمام الدار

ماله داعي الرسميات وشاور ولا تشاور (من وجهة نظري وانتو بكيفك)

بس الفكرة انه غلط تربوي الابو يطاوع عياله في الصغيره والكبيرة

كان ممكن يحطها لهم شوي بعد مايعطيك خبر (لاحظ مب يشاورك)

وبعدها يرجع الفلم ويفهمهم ان هذا دور بابا << عندنا هالحركه في البيت

:

اما بالنسبه لنومتهم على رجلة وتقديرة لشغل مرته

انا اشوف الرجال ابخص

وهو عارف وش هي منشغله فيه

والاهم انه هو مشتهي ينومهم عنده ويريح مرته وكثر خيرة

:

الفكرة الاهم في الموضوع بالنسبه لي

(من شب على شيئ شاب عليه)

لما يتربون الاطفال من صغرهم على التضحية

والزوجة تتعود من زوجها التقدير

راح يصير البيت كله يتعامل مع بعضه بالمثل

مجتمعنا للاسف فيه الكثير من الجلافة

لازم نعالجه بمواقف زي كذا

الخلاصه من وجهة نظري

والخاصة جداً

والمبنية على تطلعات فقط وليس تجربه

اشوفها تضحيه او ان صح التعبير موقف حلو

يفترض يكون طبيعي في بيوتنا

يعطيك العافيه عمو العميد

موضوع فكرتة روعة وقصتة توسع الصدر

مع السلاحف

سلطان الحوطي · 01-14-2007, 02:30 PM

وعليكم السلام ورحمة الله وبركاته

ابى ادخل على فى الموضوع... من وجهة نظرى الشخصيه اذا عندى ضيفان زالا قرايب والا خويا... ما احب اى بزارين عندنا يقعدون ، لأن راعى البيت موهو فاضي يداديهم وهو عنده رجال !! الأصل ام العيال تنتبه لهم...موضوع سبيس تون ما اراح اعلق عليه لأن انا نمله فيه..

**شقرديه** · 01-14-2007, 06:09 PM

وعليكم السلام والرحمه

يامرحبا في ذمتي ياعميد الزكرتية>>ماتقلد ترحيبة المنتدى

يالله أنت تحييه

اقتباس:

هل التضحيه هي نفسها التنازل

أتوقع ومن وجهه نظري الشخصية >>لايكثر بس

أن الفرق بين التضحية والتنازل

أن التضحية تنبع من الشخص نفسه بمعنى يتخذ هالقرار بإرادته

أما التنازل قد يجبر الإنسان عليه

اقتباس:

وهل التنازل هو نفسه التسامح والتساهل

واذا كانت الاجابه سلبيه فمن هم هؤلاء الاخوه

والله هالأخوة هم وجيه سفرة مثلك وشرواك

>>وحده متوهقه ماتدري وش تقول

على كل حال أن طلع معي فرق بينهن مالك الاّ من يجي ويسدحه

والحين نجي لخويك أبو العوال

أولا بزارين اعمارهم على أربع سنين وسنتين وسنة>>وش دراتس أن الثالث عمره سنتين

وش يسهرهم الى الساعة وحدة هذولا المفروض الساعة 9(بالكثير)نايمين الله لايهينهم>>ترى موب هذا مقصد الرجال

مسألة أن الرجال يمسك عياله عن أمهم ما أشوف فيها شي

موب ضارة يمسكهم كم ساعة بغض النظر عن كون أمهم موظفة أولا

يمكن أمهم هذاك اليوم تعبانة

وإذا كان الأب يتعب في الدوام هي عليها مسؤولية البيت

وتبقى مسؤولية الأطفال مشتركة

للأسف فيه بعض الأباء يتخلون عن دورهم وكل العبء يقع على راس الأم

سواء في التربية أو المذاكرة أو مساهرهم إذا كان واحد منهم تعبان

مرة كنا نتاقش عن مشاركة الزوج لزوجته

قلت مافيها شي إذا أخذ الرجال ولده ساعة في الليل إذا كان الطفل تعبان

عشان ترتاح أمه وخاصة إذا كانت موظفة وما نامت

والزوج ما شاء الله عليه طاقها نومه كل الظهر

أنا كملت كلامي والاّ ما كملته بغت أمي تجدعني في منقل الفحم

قالت مابقى الاّ هي طويلين الشوارب يصالون البزارين

وأمهم نايمة

قلت يمه أنا قلت ساعة ماقلت الليل كله قالت ولو>>ياحبيلتس ياميمتي

هذا من جهه

أما مسأله أن عياله يتسدحون على رجلينه هذا راجع له

لأنه هو مشتهي يخليهم

لكن أنه يغير القناة على سبيس تون

هذي غلطان فيها

لو كان بروحه يغيرها على راحته

لكن بما أن فيه شخص ثاني يطالع معه التلفزيون

وهو موب متحمس له

كان قعد يلعب عياله أو قال عمكم يناظره

بطريقة يزرع في داخل طفله أنه يتعلم احترام الغير

هذا اللي في راسي اللي مافيه الاّ الفلس

واذا جا معي شي مالك الاّ اللي يوطوط نوبتن ثانية

خطوة عزيزة يالعميد

وعساها مهيب تالي الدخلات للصالة

والله يعطيك العافية

**بيـــــــــش** · 01-14-2007, 07:25 PM

وعليكم السلام ورحمة الله وبركاته

أحب يدي وجه وقفا اني مانيب بنتك بابا عميدو

أجل الرجال يفيض حنان وعطف وأنت تقول انها رخامة !!

نلقاها في الجنة ان شاء الله

ودي أحوس في دهاليز الموضوع وسكيكه الآن الآن وليس غداً ولكن ...

آي برجع بإذن واحد أحد

(وش رايكم بهاللون طيب؟) >> إرضاء الناس غاية لاتدرك

ويذ الاجازة >> يعني اللي قلت له برجع يذكرني تكفون لاتنسون

**سحابة حب** · 01-15-2007, 12:04 AM

مساااء الخير

حياااااك الله عميدنا ،، و ماشاء الله موضووع مرتب و حلو

مالك حق عندك هالاسلوب ،، و ماتنزل مواضيع ،،

انت مطالب بموضوع كل شهر

شوف تصرف الاب فيه موقف ايجابي و موقف سلبي ،، و نظرتك للأمور سلبيه >> مقهوورة منك

نجي لنظرتك ،،

الحين انت شايف تعاطف الزوج مع زوجته هطاقه

طيب خلينا منطقين ،، و نتخيل ان الخدامه مساعده ،، و لاتقوم بالدور الاساسي

هي ام غير موظفه عندها 3 اولاد اكبرهم 4 سنين ،، يعني مابينهم إلا حمل البطن ،،

يعني مجهود يهد جبل لوحده ،، >> مسؤولية مدارة الاولاد و مراعاتهم ،،

و كل ولد منهم مشروع لوحده،، و اختراع ،، و لاحظ من كلامك ،، انهم دعل ،،

يعني يتعبون و يزهقون

مجهود البيت ،، و اللي فيه ضيف دائم ،، يعني مسؤولية طبخ و تحضير ،،

كان ممكن يكون اسهل لو مافي البيت إلا زوجها و اولادها

و تخيل بعد هذا كله لازم انها تستقبل زوجها و تبتسم في وجهه و تراعي خاطره و تهتم فيه

فـ الله يجزاه كل خير ،، انه حاس فيها و بالمسؤولية اللي قايمه فيها

بعدين الشغل برا مب كل الحياة ،، يعني مثل ما الدوام كرف و تعب ،، الشغل في البيت كرف و تعب

بعدين ليه انت متخيل ان الاولاد لما يجلسون في حضن ابوهم و ينامون عليه ،، انها تضحيه ،،

زي ما الأم لها دور في التربية ،، الأب بعد له دور لا يقل عن دور الام ،،

و كون الاولاد يجون ينامون بحضن ابوهم معناه ان نجح لو نسبياً في انه يحقق تواصل مع اولاده ،،

لا تقول الاولاد صغار ،، لأني بقول لك هذا اول الطريق عشان تصير علاقه قوية و عاطفيه بين الاب و اولاده

نجي لتصرف الاب ،،

الايجابي ،، هو سعة صدره و تقبله لاولاده ،، و هذا شيء نادر بين رجالنا ،،

احتمال من البيئة ،، مهما كان الاب يحب اولاده ،،

يصور نفسه بانه له هيبه و شخصيه تمنعه من حضن اولاده ،، او انهم ينامون في حضنه

طبعا هو تساهل بشكل كبير ،، المفروض يقول لأبنه يا بابا ،، انا و عمو عميد ،، قاعدين نتابع ،،

و ما نحب احد يقطع علينا ،، مثل ما انت ما تحب احد يقطع عليك فلم الكرتون اللي تتابعه حنا هنا مانحب احد يقطع علينا ،، كذا يعطيه مبدأ احترام الغير ،، و انه ما يفرض رغباته و اختياراته على غيره

انا اشووف التربية من اصعب الاشياء اللي ممكن الواحد يسويها في حياته ،،

لأنك تشكل حياة غيرك ،، و تحكم عليها إما بالنجاح او الفشل ،،

عميدنا ،،

موضوع تشكر عليه ،، يمكن تفلسفت عليك واجد ،، بس عاد تحملنا ،،

**ماشي الحال** · 01-15-2007, 07:07 AM

السلام عليكم

العميد ما تلاحظ ان البنات عاطفيين حيييل

تصدق مافيها شي حتى لو يغير لعياله

اذا كانوا وصخين مافيها شي

وانت وجهن ما يستحي قاط وجهك عند الرجال

وما تبيه يصير طيب مع عياله

كذا كأنك تعديت على شخصيته وطريقته في التربيه

ما ناقص الا تقوله

مرتك تلبس عباة راس او عباة كتف ؟

صدقني هو ما سوّى كذا الا تصريفه

عشان تفارقه يالناااشب

لا يكون الى الحين جالس تنافس عياله على الريموت

شف عندي فكره

خل الريموت عندك يومين والبزران يوم

^
^

ترى هذا رد جزء من شخصيتي قاعد يضحك

يعني اتركوه يولي

بالنسبه للموضوع

بقول رايي على السريع

لاني احس الموقف اللي ذكرته يعتبر قناعات شخصيه

يعني وجهات النظر فيه ترجع للاشخاص نفسهم

وما نقدر نقول عنها مسلّمات لا بد منها ...

طبعاً اذا بنقيس على موقف الاب مع عياله

وموقفك من ابوهم لا بد نستنتج بعض الاشياء

لانك ما وضحتها عشان تكتمل الصوره

مثلاً علاقتك مع ابوهم ؟

هل فيها ميانه توصل انك تقوله رجع على الفلم

وصرفهم بأي شي او ما توصل ؟

وعياله يوم جاو يتابعون التلفزون عنده

يعني ماعندهم تلفزون داخل ؟

او عندهم وجاو عند ابوهم لأي سبب كان

ومادام ما قدامنا الا الموقف اللي ذكرته

راح ارد بناءاً عليه

شف انا اتوقع ان الابو ما حط في باله

انك بتنظر للتصرف اللي سوّاه مع عياله

غير نظرته هو

اللي هي ان الامر عادي ابو يحب عياله

ومايبي يشوفهم يصيحون

انت يمكن حماسك مع الفلم

خلاّك تنظر للموضوع من زاويه ثانيه

وهذا دايم هو اساس الاختلافات بين الناس

( شخص يقول كلمه او يتخذ تصرف وتلقاه يؤخذ على غير معناه اللي يقصده هو )

عن نفسي واللي اشوفه بالغالب

ان البزران اذا جاو المجلس

سواءا كانوا موجودين فيه اخوان

او خويا ابوهم

يجلسون شوي ويوديهم ابوهم داخل

وان قالوا نبي القناه الفلانيه قالهم امشوا داخل

هذا اللي اشوف انه الانسب

بس يمكن خويك له وضع استثنائي مانعرف خفاياه

وحتى لو ماله وضع غير

صعبه اني اقول تصرفه تصرف هطاقه او تضحيه

يمكن يحب عياله بس جايب المرض لزوجته

المقصد ان الهطاقه او التضحيه

مانقيسها من خلال الموقف هذا

لنفرض انت تشوفه هطق

زوجته تشوفه راعي تضحيه

وانا اشوفه في مواقف ثانيه مهب هطق

ويمكن العكس انت تشوفه يضحي وزوجته تشوفه هطق

يعني الصفه لما نطلقها على شخص

راح تكون هي الصفه البارزه من تصرفاته

ويلاحظها اللي حوله ...

عميدنا صدقني موضوعك من القلائل

ولا تهون باقي المواضيع

اللي احس انه ينطبق على قسم الصاله

اقصد في الموقف وسجيّة الطرح

الله يعطيك العافيه ولا تقاطعنا يالدرو

**عميد الزكرتية** · 01-15-2007, 10:26 AM

اررررحبـي يانملة نجــد

يالله حيــّها

اقتباس:

(ضحكة كبيره)

كبيره من جد

برستيجي في المكتب راح ملح

البنات يسولفون من جد والفت عليهم واضحك

جعله دوووووووم إن شــاء الله

مهب برستيجتس اللي جعله يروح ملح

اقـصــد الضحكــه

اقتباس:

وجهة نظري اشوفه موقف طبيعي جداً وبالاصح حلو

يفترض نشوفه في كل بيت

هو ماضحى بمستقبله .. والا ضحى بهالكم ساعة كل يوم

كل مافي الامر ان فطافيطه جو عنده برغبتهم

مهب قايلن لهم طسوا

محــد قالهم طسوا

هم يسرحون ويمرحون فالمجلس عندي طول اليوم

والدليل رضاعاتهم من العصر فوق التلفزيون

<< والله لو انه تلفزيونكم

يا اخوان سبق وقلت ان المجلس يعتبر بيتي

لحــد يفهم اني غثيث

اقتباس:

لو تكلمنا عن الموقف بالتفصيل

سالفة سبيس تون ماحبيتها واجد

مب عشانك بس لانه ماجاز لي المبدأ

يعني انت مقيم عنده لفتره يعني تمون وصرت من حمام الدار

السطر الاخيـر من كلام نملة نجـد موجـه لماشي الحال

اقتباس:

ماله داعي الرسميات وشاور ولا تشاور (من وجهة نظري وانتو بكيفك)

بس الفكرة انه غلط تربوي الابو يطاوع عياله في الصغيره والكبيرة

كان ممكن يحطها لهم شوي بعد مايعطيك خبر (لاحظ مب يشاورك)

وبعدها يرجع الفلم ويفهمهم ان هذا دور بابا << عندنا هالحركه في البيت

صــح عليك

ارضاء الابناء في كل شي غلط تربوي وغايةٌ لاتدرك

انتي تقولين يغيّر على سبيس تون شوي ويرجع على الفلم

نملة الظاهر انك ماتعرفين بزران الرجال مثلي

فيهم ملاغة وعليهم طريقة فالبكيــّه تقهـر

يتمغطون ويتسدحون وحالــه

اقتباس:

اما بالنسبه لنومتهم على رجلة وتقديرة لشغل مرته

انا اشوف الرجال ابخص

وهو عارف وش هي منشغله فيه

والاهم انه هو مشتهي ينومهم عنده ويريح مرته وكثر خيرة

الساعه تشير الى منتصف اليل

وش راح تكون مشغوله فيه ورجالها عندي

المفروض انها تنوم عيالها

اقتباس:

الفكرة الاهم في الموضوع بالنسبه لي

(من شب على شيئ شاب عليه)

لما يتربون الاطفال من صغرهم على التضحية

والزوجة تتعود من زوجها التقدير

راح يصير البيت كله يتعامل مع بعضه بالمثل

مجتمعنا للاسف فيه الكثير من الجلافة

لازم نعالجه بمواقف زي كذا

الخلاصه من وجهة نظري

والخاصة جداً

والمبنية على تطلعات فقط وليس تجربه

اشوفها تضحيه او ان صح التعبير موقف حلو

يفترض يكون طبيعي في بيوتنا

يفترض يكون طبيعي بس بينهم

يعني هي تضحي عليه وهو يضحي عليها بكيفهم

انا وش دخلني

<< بديت احس اني انا الغثيث

انا يوم حطيت نفسي محله وقعدت افكر

قلت في نفسي والله ما اسويها

صحيح لازم يكون فيه تضحيه بين الزوجين

بس المفروض انه شال عياله ودخلهم عند امهم

وحطه على سبيس تون

لكن شكل ام العيال جالسه تطالع يوميات ستار اكاديمي

اقتباس:

الفكرة الاهم في الموضوع بالنسبه لي

(من شب على شيئ شاب عليه)

لما يتربون الاطفال من صغرهم على التضحية

اتوقع بالطريقة هذي يانمله

بيتربون عياله على الدلع ويصيرون سامجين

اقتباس:

يعطيك العافيه عمو العميد

موضوع فكرتة روعة وقصتة توسع الصدر

مع السلاحف

الله يعافيك يانملة نجــد

وعساك دوم في سعـة صدر

مع بزران الحارة

**عميد الزكرتية** · 01-15-2007, 10:38 AM

ارررحب ياسلطان

كيف حالك

اقتباس:

المشاركة الأصلية كتبت بواسطة سلطان الحوطي [عفواً يمكن مشاهدة الروابط للمسجلين فقط للتسجيل اضغط هنا]

وعليكم السلام ورحمة الله وبركاته

ابى ادخل على فى الموضوع... من وجهة نظرى الشخصيه اذا عندى ضيفان زالا قرايب والا خويا... ما احب اى بزارين عندنا يقعدون ، لأن راعى البيت موهو فاضي يداديهم وهو عنده رجال !! الأصل ام العيال تنتبه لهم...موضوع سبيس تون ما اراح اعلق عليه لأن انا نمله فيه..

اكيــد يابو ابجاد

اذا فيه ريجيل ماراح يجون عياله

بس هذي جلسة اخويه يعني هو مثل اخوي

مافيه احد غريب

ويمون هو وعياله علي وعلى المجلس

اقتباس:

موضوع سبيس تون ما اراح اعلق عليه لأن انا نمله فيه..

وش السالفه

**عميد الزكرتية** · 01-15-2007, 11:48 AM

ارررحبي ياشقــرديّه

يالله حيـّها

اقتباس:

أولا بزارين اعمارهم على أربع سنين وسنتين وسنة>>وش دراتس أن الثالث عمره سنتين

وش يسهرهم الى الساعة وحدة هذولا المفروض الساعة 9(بالكثير)نايمين الله لايهينهم

بيـّض الله وجهتس ياشقرديه

اقتباس:

مسألة أن الرجال يمسك عياله عن أمهم ما أشوف فيها شي

عـودنا في خنفس دنفس

على طاري خنفس دنفس

مررة واحد من الشيبان وهو طالع من صلاة المغرب

قابل جاره من اهل الحسا وسلم عليه

قال الشايب وشلونك يافلان عساك طيب

قال الرجال بخير الله يسلمك

وشلونك انت وشلون الاهل

قام الشايب وسحب يده بقوه من الرجال

وقال عودنا في خنفس دنفس

صحيح بعض الناس مالهم داعي

يجيك واحد يسأل عن الاهل وهو مافيه بينه وبينهم ايّ قرابه

وانا ما اداني اللي لاقعدت انشده عن حاله

طمر وقال وشلون الوالده

يعرفك مايعرفك قايلها قايلها

حتى مايقول وشلون الوالد وشلون الوالده

لا ؛؛ على طول يطمر هناك (( وشلون الوالده ))

لعنبوا ذا الراس ماعاد بق

اعلانات المنتدى