السلام عليكم ورحمة الله


لا تقولون وش عند الشيخه مسنتره في الصاله

لانها مرتع العائله كـ كل وانا احب التجمعات اللي تحمل طابع يتميز بـ كذا << تورطت مالقيت كلمه تكمل الجمله


المهم

امس كان في بالي موضوع بس قررت اخليه بعدين لاني حطيت عيني على موضوع ثاني دايم يقهرني

وهو


اسلوبنا في التربيه



ماراح اقول انه اسلوب بدائي لان جدانا بدائيين وتربوا احسن تربيه

ولا راح اقول حضاري لان فهمنا للحضاره هو الترف وعدم المبالاه بأي شي..

لكن بقول اسلوب قاصر قريب من التخلف ولا احد يطير عيونه






محمد يكلم صديقه : امس رحنا محل ألعاب وشريت لعبتين
(وهو كذاب امس منطق في بيتهم)

الأب بعد ماخلص محمد مكالمته : ليش ياوليدي تكذب الكذب حرام بعدين ربي يحطك في النار

محمد : توبه يبه معد اكذب (صوت الولد وهو يستغفر )



يدق التليفون يرد محمد يصير عمه يبي ابوه

محمد : يبه عمي يبيك

الأب : قله طالع

محمد : ابوي يقولك طالع



ألحين محمد يقتدي بأبوه والا يسمع كلامه؟؟؟؟

هذا موقف يومي في حياتنا ولا احد يقول لا سواء اب او ام او اخت..





لمى : تجين نلعب؟

ياسمين : كوه

لمى معها قرطاسه بيضاء : ياسمين خذي هذا يخليك قويه

ياسمين ( تشمه كنه مخدرات) !!!



قسم بالله ان هالموقف صاير قدام عيوني

اطفال بدال مايكون لعبهم عرايس ولبس وعزايم وفرح يصير تدمير !!

هذا طبعا اولا واخيرا راجع لنا لاننا سمحنا لهم يتفرجون على مثل كذا مشاهد
ونربيهم على هالعادات اللي بتصير روتين






دحوم ياخذ لعبة هيوفه ..

هيفاء : ياملعون هاتها !!

الاخو الكبير عبدالله : وش هالألفاظ يا كلبه



لا تعليق




الام تصحي الابو : قم ود العيال المدارس

الابو : منكده علي نومي ومصحيتني في اجازتي عشان اوديهم موب لازم خلهم ينامون

الام : يابن الحلال السواق مسافر ومابي اعودهم على الاهمال

الابو : انقلعي قلعتس الله قلت مانيب موديهم


وانقلعت الام المسكينه لولدها الصغير سمعته يصيح..

تنادي الشغاله وتحط الولد عندها وتروح تسرفع في الشوارع لين تالي الليل والبيت في ابليس









هيوفه مره ثانيه ( خلصت الاسماء )

هيوفه تحوس وتدوس المطبخ وتجي امها تدبجها مع ظهرها لين تفحط صياح

الام : بسم الله على بنيتي

وتاخذها بالاحضان ويكبر راس هيوفه وترد لامها حرة الطقه وتدبجها


تصير والا ماتصير ؟؟؟







شيختهم (اناااا) : يمه وش رايتس تخلين تربية ذا النتفه علي (اخر العنقود)

امي : الله يعافيتس تريحيني بعد

اخر العنقود غلطت غلط فادح تستاهل الهواش وبما ان شيختهم تعهدت بالتربيه لاززم توجهها فهاوشتها تروح ركض ذا النتفه لامي

اخر العنقود : ماما شوفي شيختهم هاوشتني (مع شوية دموع)

امي : شيختهم وراتس على اختس جعلتس وجعلتس وطراخ (موب صوت كف )

الفقيره الى الله شيختهم : امحق تربيه








خالد : يبه لو سمحت بطلع مع العيال للثمامه

الاب : انثبر اقعد في البيت

خالد : يبه تكفى كل العيال بيروحون وش معنى انا كني حرمه جالس في البيت

الأب : مير الحريم احسن منك انت ووجهك

خالد : انا رجال

الاب : وترادني يالحمار لابارك الله فيك ولا في ام جابتك وطرخ (كف وهو قايم )



خالد يبكي مسكين

وش ضاره لو خلاه ينبسط مع العيال؟
او على الاقل رفض بدون تجريح وبطرقه مقبوله..








الام : ناصر .. نوره تبون غدا ؟

ناصر ونوره : لايمه بنطلب شيبس وشوكلاته من البقاله

الام : بسلامتكم

وتجي البقاله ويزرطون من ذا الاكل اللي يسمن ويعور الاسنا ويدهور الصحه










هذي مواقف بسيطه من اساليب تربيتنا الخاطئه
واللي احنا بنتحمل عواقبها اذا كبروا وفشلونا في كل مكان

واذا فات الفوت معد ينفع الصوت
وان الغصون اذا عدلتها اعدلت

من جد يعني الى متى واحنا نتدهور في اساليبنا ..
والكلام موجه لكل اب وام واخ واخت


نحبهم بس بحدود
ونعطيهم حريتهم برضو بحدود
نعاقبهم بالمعقول
ونعطيهم برضو بالمعقول...





لازم ننتبه لهالشي قسم بالله ودي اتبنى كل البزران واربيهم من القهر اللي فيني

اذا كبروا على هالعادات وهالمواقف وحده من الثنتين يا يعذبونا او يعذبونا وفي النهايه بنتعذب..

ما اظن ان فيه احد يتمنى ان عياله او اخوانه ما يكونون من احسن مايكون
لكن مافيه شي يجي بالساهل ..



وش رايكم في الألوان بس

__________________

لي باك

مالتس خلق قرقه

__________________

اي تدرين دوام بكره وقرف

نفضى ونرد علاتس

__________________


مليـــــــون شكر لا تكفــي يا مبدعتنا الرقيقه ريمـــــووو

هلا

قريت ردك ع الطاير لاني لازلت منصدمه من

طاح قلبي قسم (وجه ينرحم)

__________________

بااااك

هلا شيختهم الظاهر انتي تحبين تجلسين بعد المطر

عند البلكونه والهواء يداعب غرتك الي مافيه امل

لو يجي عج او اعصار انها تتحرك او تطير لان غرتك

عباره عن اسيام ممدوده وتناظرين السماء

تترقبين ظهور قوس قوزح على هالالوان --> ساامجه وربي

باختصار ومن غير ماطول التقنيات والتكنلوجيا والتقدم الكل يفهمه

بصور خاطئه علشان كذا صار هالجيل جيل يالله لك الحمد وربي

يندر فيه الصالح حتى الراي الصحيح صار مختلف فيه مثال واحد

بس التصوير قبل مبت فيه انه حرام وهالحين صار فيه اختلافات

انه نحت انه تماثيل والتصوير العادي حلال .. صار كل الي يبي

يحلل شي يدور حجه مادري وش تبي ... ويسير ورائها ..

غير كذا المدرسه لها دور كبير ورب البيت اعرف مدرسات

مالهم لزمه الهم داعي مايعتبرون مربين اجيال لان المدرس

هو الي يغرس المبادىء والاخلاق في نفوس ابنائنا .. بس

وش تقولين مافيه امانه بالتدريس .. اضيفي الى جو البيت ماحد

بيهتم ان اصغر الامور بتاثر على عقلية البزران .. يعني مثال

صغنن اخوي بالروضه وكانت معه بنت جارتنا وهج وكل يوم معها

وبعفويه اخواني يمزحون معه ويقولون تحبها بنعرسك علاها

والولد راح لها وفي الباص يقول لها وهج تتزوجيني قالت له عيب

ياحمار وخذ ياكف على وجهه يعني بزر وش عرفه بالواضيع

قال ابي اصير زي توم يوم يحب القطوه ويجيب لها اكل >> مدمن توم وجيري

يعني نقدر نقول الاعلام المدرسه البيت الرفقه كلها تشكل اخلاق اطفالنا

رجال المستقبل والله بجد لازم نلتفت لهم ونشد معهم لانهم اساسا

مو مهتمين .. يظنون الحياه بس لعب وضحك فيه اشياء اهم بتصير

وهم الي بيستلمونها عننا .. ماحلانا وحنا ناخذهم لمراكز تحفيظ القران

والعصاري نجلسهم بالمسجد مع حدى الشيوخ ونكافئهم على

عطائهم مازلت اذكر في العطله السابقه ولد عمره 12 سنه ماشاء

الله عليه بين رجال حافظ القران الكريم ومكرمينه ويننا عنهم

الله يعين .. بربرنا واجد وكان ودنا نبربر اكثر بس الدوام ساد نفسي

يسلمووووووو

اي والله بربرتي واجد ( وجه نايم)

ليباك بعدين

__________________

بصراحه اعجبني اسلوب طرحك للموضوع

في عدة مواقف افضل من كتابة دسمه باسلوب تملل القارئ ومايكمل الموضوع


بس قبل ارد ياليت تفسريلي



كوه ؟ <--- يعني ايش ؟ كوره ؟

وش تشم بالضبط ؟






مافهمت !!

يعني الام طمحت وزعلت ودشرت بيتها وعيالها عشان الابو ماودا عياله المدرسه ؟؟!!!

انتظر ردك ...

__________________
[عفواً يمكن مشاهدة الروابط للمسجلين فقط للتسجيل اضغط هنا]

حتى انا نفس كلام نور الدنيا
ولي بااااااااااااااك كبر خشتك

__________________

Motion of Emotion

^
^
^
موشن

__________________
[عفواً يمكن مشاهدة الروابط للمسجلين فقط للتسجيل اضغط هنا]

شيختهم ،،


موضوعك خطير ،، و مصدر خطورته ،، إنك تتكلمين عن تنشئة جيل ،،



خليني اقول لك شيء ،،


تربيت انا و اختي على مبدأ أن الكلام ( الغير لائق ) شيء محرم ،، يعني حتى يا حمارة ،، يا كلبه ،، كلي ×× ،، و اللعن >> اسفه على ذكر هالألفاظ ،، كنا ننضرب عليها ،،

و كبرنا و في ما تستخدم نهائياً في البيت ،، و تعودنا إننا نستهجنها حتى برا البيت


كبرت و طلعت من بيئة امي و ابوي الله يحفظهم ،، و شفت بيوت تطبق اللي قلتيه

فيه موقف صار قدام عيوني ،، و بصراحه قهرني



عائلة ام ،، و اب و 3 اطفال دخلوا محل حلويات ليلة العيد ،،، و كان المحل مرتب الشوكلاته بطريقه مغرية ،،


قرب الطفل الصغير و ملى جيوبه من الشوكلاته >> بالسرقه ،، مع ان الشوكلاته موضوعه في النص عشان يوزعونها على اللي يدخلون المحل ليلة العيد ،،

لما طلعوا اكتشف الاب ان ابنه سرق الشوكلاته ،، ضحك و ضرب على ظهره ،، و قال الولد هذا عفريت ما ينأكل له حق ،، احسن يا بابا خليك كذا


^
^

لو طلع الولد حرامي ،، نلوم مين ..؟؟






الكلاااام يطووول ،، و اكيد برجع مره ثانيه ،،>> ما طلعت اللي بقلبها


بس توني راجعه و راي مية موضوع ارد عليها



شيختهم ،، نورتي القسم يا قمر

__________________