مرحبتين
كل عام وانتم بخير ..
الساعة 10 رجعت من عيدنا الخطير .. اللي مهوب زي السنة اللي فاتت ولا اللي قبلها ولا اللي قبلها ... الخ
ابتدى عيدنا بالسلام الشيباني الساعة 6:45 ص .. تلاه سلام على عيال الا عمام واحفاد الاعمام وباقي الشله الساعة 49: 6 ص
عند الساعة 7:03 ص .. قام احد الشيبان باخبارنا حكاية من سالف العصر والاوان .. ايام اول والتعب والكد والحش والسفر والغوص .. ثم تدرج في القصة لغاية عمله في ارامكو مرورا بعهد الطفرة .. ثم استقراره وعائلته بحي الصالحية بالرياض .. ثم انتقالهم لحي الملز .. ثم الى حي الريان
وطبعا يتخلل الحكاية فواصل من الصمت المطبق من قبل القاص العزيز .. هذهـ الفواصل من طولها بالامكان استغلالها لأخذ غفوهـ
الطريف بالموضوع ان العم كل سنة يقول لنا نفس هالقصة .. مدري هو ينسى ولا يستهبل
عند الساعة 7:19 ص .. دخل علينا ابن العم الاصغر مستهلا بكشرته العزيزة كلمة " اقلطوا " .. الشباب راحوا للمغاسل .. والشيبان راحو دايركت للمقلط .. ما يحتاج يغسلون .. متوضين لصلاة العيد
عند الساعة 7:23 ص .. جلس الجميع حول البوادي .. وصارو يدقون من هاللحم والشحم
عاد أنا جايب معي كيسة خبز توست وعلبة جبن كيري .. بس ما خلوني افتحهن
عند الساعة 7:29 ص .. اكتشفت وبدون سابق معياد .. ان الله ابتلاني بواحد زايدة عنده الحشيمة للناس وقاعد جنبي .. وصار يقطع من هاللحم ويحط بحافتي .. هو يحط وانا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل .. هو يحط وأنا آكل ..
خلاااااااااااااااااااااااااااص يا اخي .. قالوا لك نمر قاعد يتعيد معكم 
عند الساعة 7:33 ص .. كنت منسدح على ظهري بالمقلط .. واغني " ظلموهـ "
عند الساعة 7:40 ص .. جلسنا نتقهوى .. وجلسوا عيال العم يسولفون لنا عن مكة وكيف كانت في العشر الاواخر .. وبعض الحكايات والطرائف .. عاد انا استاذنت على اساس ابروح اتعيد عند خوالي
عند الساعة 8:45 ص .. وصلت لبيت الخوال ..
عند الساعة 8:49 ص .. بدأ السلام الشيباني .. تلاه بعد ذلك السلام على ابناء الخال والخالات ..
عند الساعة 8:51 .. قال الخال لواحد من عياله " قم قل للحريم يطلعن .. علاووي ما تعيد " .. بس حلفت عليه انا انه ما يقول لهن شي وقلت له اني متعيد عند العم قبل شوي " لو يدري اني ماكل خروف لحالي كان ما قال كذا " .. قال " إلا لازم تذوق عيدنا .. قلت لا والله يا خال انا جاي اسلم عليكم واعايدكم وتكفين القهوة الله يطول بعمرك
عند تمام الساعة 9:00 ص .. جلسوا يسولفون .. وواحد من عيال الخال بدأ يسولف لنا عن مكة .. بغيت افلقه بالبياله اللي بيدي .. يا اخي خلاص يعني ما يدل مكة الا انتم !
سبحان الله بالمجالس دايم ما يسولف الا المطاوعه .. الزكرتيه يسكتون ما يسولفون !
عند الساعة 9:11 ص .. دخل علينا هندي .. وقاموا كلهم يسلمون عليه ويبوسونه .. وش السالفه .. بدينا نعايد السواقين ؟
يوم جاء عندي وامد يدي بس " مهوب غرور بس ما تعودت ابوس هنود " .. عاد الرجال مد بوزه وعطيته بوستين .. وبغيت اعطيه مفتاح السيارة اقول شف السيارة عند الباب سوي غسيل ميه ميه
عند الساعة 9:12 ص .. جلس ابو هنود وتمدد .. وجاء واحد من عيال الخال وصب له قهوه .. والثاني يجيب له بقلاوه وشكلاطه .. وش السالفة يا جماعة ؟
عند الساعة 9:12:33 ص .. سألت ولد خالتي اللي قاعد جنبي .. " لنا اقارب من نيودلهي " .. عاد قعد يوزع ابتسامات شوي .. ثم قال لي هذا نسيب خالك عبد الله !
انا عندي خبر ان ابو عابد متزوج هندية .. بس ما توقعت ولا بحلم الليل انه يجيب اخوها يتعيد معنا .. يا حبيبي
عند الساعة 9:25 ص .. استاذنت ..
عاد قعدت ادور شوي بشوارع الرياض .. واشوف هالعالم وهم مشخصين .. وخصوصا البنات الصغار لابسات نفاش وحركات
كيف يقضي Mr.3lawee عيدهـ ؟!
مشاركة: كيف يقضي Mr.3lawee عيدهـ ؟!
