البارحـه غنّيـت يــوم الفـكـر شــاش=وأسرجـت قيـفـان البـيـوت الجزيـلـه
مانيب أجيب ابيات شعرى على ماش=شاعـر ولا اجـيـب البـيـوت الهزيـلـه
يا نفس شومى واعتلى فوق مبـداش=ومـبـداش روس النايـفـات الطـويـلـه
احداش عـن درب المقفيـن واحـداش=عـن غلطـة الجاهـل وعـن كـل ميـلـه
جعل الردى يفـداش والـلاش يفـداش=واهل الحكـى واهـل النفـوس الثقيلـه
يـا غلطـة الجهّـال وشـلـون ننـسـاش=وشـلـون ننـسـى بـيـن ليـلـه ولـيـلـه
المسألـه ماهـيـب تصـويـر وافــلاش=المـسـألـه غـايــه ولـيـسـت وسـيـلـه
يـا شلّـة الجـهّـال مــا عــاد منـهـاش=لا وصلـت الـدعـوى لــراس الفتيـلـه
يا خيّلا البل طشت والـراس لا طـاش=مـاهـوب راكــد لـيـن يشـفـى غليـلـه
حنّا هـل الوقفـه مـن الطـاش للطـاش=نـاقـف الــى بـــار العـمـيـل بعمـيـلـه
حنّـا عـذاب القـوم مسـرى ومغـبـاش=اهـل القنـا واهـل السيـوف الصقيـلـه
علومنـا ماهـيـب فــى راس قــرواش=ماهـيـب فــى راس الخـبـل والحليـلـه
إلــى نويـنـا الـشــى يـنّــاش يـنّــاش=نـاتـى عـلـى قــبّ المـهـار الاصيـلـه
تاريخنا ماهوب فـى طـاش مـا طـاش=تاريخـنـا يـمـطـر ســـوات المخـيـلـه
مــا عنـدنـا هـافــى ولا عـنـدنـا لاش=يـكـرم نـبـانـا عـــن دروب الـرذيـلـه
والمهره اللى عرشهـا داخـل الجـاش=مــا مثلـهـا فــى نـاقـضـات الجـديـلـه
حـنّـا لـهـا بافعالـنـا سـتــر وفـــراش=حـن سترهـا مـن دون برقـع وشيـلـه
حـنّـا لـهـا مـحـزم ومـدفـع ورشــاش=مــن الجـنـوب الـيـن حــد المسـيـلـه
يـا خلطـة العنبـر بعـد مــا كشفـنـاش=مــع الـهـوى رحـتـى بلـيّـا حصـيـلـه
تسـدّحـى والـلـى تـســدح بـطـريـاش=اقـصـى علـومـه بـيـن قـالــه وقـيـلـه
مثل القصب لو يجتمع داخل اغـراش=يــذوب لا مــن المـطـر ســال سيـلـه
هـذا كلامـى وافهـمـوا زبـدتـه كــاش=والـهـرج دايــم زبـدتــه فـــى قلـيـلـه
امّـا يعيـش الــراس بالـعـز لا عــاش=وإلاّ مــمــات الــعــز دون الـقـبـيـلـه