السلام عليكم ورحمة الله وبركاته
ادري اول ما شفتوا العنوان تطايرت عيونكم قلتوا
هذا من جده ولا يبي يشدنا من العنوان لا والله اللي قريتوه صحيح
في يوم من الايام كنت جالس انا وفهد الدب ونتكلم
في السفر وعلوم الدير وطرا ديرت الربع و قال الديره رخيصه ويمدحونها
ومن يومها وانا ادوج في هالمنتديات والمواقع حتى صديق سئلته
عندنا سيرلنكي في الدوام بهذلته بالاسئله تصدقون اني ما توقعت
ان عندهم فنادق خمس نجوم !!
المهم مالكم في طولت الهرج رحت لمكاتب سياحه
الا اسعارهم لاهي رخيصه ولا قاله الله
يوم شفت الاسعار كذا قلت اشوف مكاتب السياحه
اللي هناك عن طريق النت
اسوي سيرتش عن مكاتب سياحه في الديره الحيه
ويطلع لي كم مكتب عاد انا حكمت على المكاتب
من مواقعهم على النت اللي موقعه يجمل قلت
اكيد انه يجمل وطلبت البكج اللي انا
حاطه في بالي وكان كالتالي :
اول ليله في كولمبو في فندق الهيلتون
ثاني ليله دامبولا منتجع امايا ليك
ثالث ليله كاندي فندق امايا هلز
رابع ليله كاندي فندق فوناس فولز
خامس ليله نوراليا فندق تي فاكتوري
سادس ليله نوراليا فندق تي فاكتوري
سابع ليله بنتوته فندق تاج اكسوتيكا
طبعاً ردو علي واسعارهم كانت تفرق عن
بعض من مئة دولار الى ثلاث مئة دولار
ومني ومنهم اللي حصلت على
افضل سعر وكان البكج يتظمن الاقامه في غرفه دبل ((
المدام معي )) مع الافطار والسياره بالسواق
سعر البكج
1060 $ لشخصين ((
بدون التذاكر ))
اما بالنسبه للتذاكر فكان الحجز الدمام - ابوظبي - كولمبو.... مدة الانتظار في مطار ابوظبي لمدة ساعه
سعر التذكره في حدود 1600 للشخص على طيران الاتحاد
طيران الاتحاد ممتاز ولا ارى ان فيه اي عيوب والحمد لله ما كان فيه اي تأخير
..........
:: مدة الاقلاع ومسارها ::
اقلعت الطائره الساعه 10:35 مساء بتوقيت السعوديه وكان الوصول الساعه 12:40 بتوقيت ابوظبي
اقلعت من ابوظبي 01:30 صباحاً من ابوظبي وكان الوصول في كولمبو الساعه 07:40 بتوقيت كولمبو
مدة الطيران اربع ساعات وكانت الاربع ساعات ممتعه والبرامج على الطائره ممتعه والاكل لذيذ (( ياويل ماشي على الاكل ))
نزلت في المطار وكان مطارهم ممتاز بالنسبه لمستواهم والجوازات تتم قرائتها الكترونياً
:: بداية الرحله ::
بعد التفتيش والتختيم وجدت السواق في الانتظار وكان اسمه ريشه مسلم
وذلك بناءً على طلبي وكان خلوق ملم بالاماكن السياحيه ..
:: طبيعة الشعب ::
بالنسبه للشعب السيرلنكي محترمين الى اقصى درجه يبتسمون للسياحه ويقابلونك بكلمتهم الترحيبيه :
ايــبــون التي تقال لك عند وصول الفندق وعند دخول المطعم وعند استقلال التكسي بالعربي في كل محل
.........
::بالنسبه للبلد ونظرتي للبلد ::
الطبيعه : شي غير طبيعي لكن البلد ينقصه بعض التطور ,, من المشاهد التي تراها في كل مكان الكلاب والغربان الكلاب تنتشر في كل مكان لدرجة ان الكلب مسندح على الخط ولا همه سياره ولا سيكل ولا دباب ولا تك تك
الطرق : ضيقه (( هالحين بيجيني ماشي راعي الفريزن ويقعد يتفلسف على الـ ض والـ ظ ,,, ياعمي طير ادج ماده كانت عندي العربي ))
وتلقى على الخط سياره ورجال وسيكل ودباب كلهم على الخط والسفر من مدينه الى مدينه تبعد 200 كيلو ياخذ من 4 الى 6 ساعات لان السفر يكون على سرعه ما تعدى 60 ,, صدق او لا تصدق ان السواق وصل 80 وعطوه مخالفه ,,لكن راح تستمتع بالطريق لان الطبيعه على مايقولون خلابه الشلالات على يمينك ويسارك والامطار ليل نهار وهالاشياء الغريبه اللي تشوفها اللي جالس عند بوذا وباسطـ(ن) يدينه يتعبد واللي رافعـ(ن) وزرته ويغسل هدومه في الشارع
واللي مسوي روميو وجولييت وقصة حب (( حلالاه من ودا سلف هناك وزوجه سيرلنكيه طرقا ))
::بالنسبه للمدن اللي زرت ورأيي ::
كولمبو
ماتنفع بريال ونصيحتي للي يبي يروح ينزل في المطار
ولا يروح لكلمبو يروح لمدينه
جنب المطار اسمها اذا ماني غلطان نيقمبو
لأن العاصمه زحمه ولا فيها اي شي اللي يبي يروح
للعاصمه يخليها اخر ليله
دامبولا
اللي فيه شدت مشي يروح يعني اللي يقدر يمشي يروح لها لان فيها صخرة سيقيريا وانا ما رحت للصخره لان ظروفي ماتسمح ولا انصح فيها لان الطريق متعب ولا تسوى لكن على الطريق توجد منطقه تشتهر بزراعة الكاجو
تقدر تشتري الكاجو الطازج لكن سعره تقريباً نفس السعر هنا
كاندي
جنت الله في ارضه من اجمل ما رأت عيني على وجه الارض من ناحية الطبيعه وفيها حديقه مشهوره والدخول برسوم بحوالي
300 روبيه اي حدود
10 ريال سعودي
وفيها مصنع للاحجار الكريمه للي يبي يشتري
ولا يمنع انك تروح له بدون ماتشتري
فيها المعابد اللي مازرتها لانهم رفضو يدخلون
زوجتي لانها متغطيه يقولون اكشفي وتدخلين..
نوراليا
نفس طبيعة كاندي و اجمل بقليل وتوجد فيها الشلالات بكثره والشاي
يغطي المنطقه يعني كل ماترفع عينك تحصل مصنع شاي
يوجد فيها ايظاً حديقه جميله او بالاصح حديقتين
وفيها مصانع الشاي اللي تقدر تدخلها ويعلمونك كيف يصنعون الشاي و وش افضل انواع الشاي ((
لا يطلبون منك اي مبلغ لكن البخشيش واجب))
الطريق بين
نوراليا و
بنتوته من اجمل الطرق اللي مشيت فيها لجمال المناظر
يوجد على الطريق محل للقوارب المطاطيه في نهر ((
قوارب المغامرات ))
بنتوته
مدينه ساحليه شواطئها جميله صوات امواج المحيط على كيف كيفك <-- وش رايكم بالتعبير؟؟
فندق تاج اكسوتيكا رااااااااااايق واحسن ما عجبني فيه مطعمه وعلى فكره ترا في مطاعم سيرلانكا كلها البوفيه المفتوح اذا كان غالي راح يكلفك 15$ هذا اذا كان غالي
سعرهم الطبيعي في حدود الـ
10$ والاكل برا الله يديم النعمه ((
تصدقون ان فطور اهل البلد كاري سمك, كاري لحم, كاري دجاج وفي البوفيهات فيه قسم خاص بالاكل السيرلنكي ))
في مدينة
بنتوته يوجد قارب تستأجره ياخذ بك لفه في النهر يكلف
20$ دولار للساعه ولا له هم كم عددكم سواء واحد او عشره
وفيه قارب اسفله يكون زجاج علشان تفرج على
المناظر الي تحت القارب <-- هذا ما جربته
فيه قوارب صيد وسعرها ارخص من كذا وترا
المكاسر ينفع معهم في كل مكان
يعني يقولك بميه قل له بـ
70 وراح يخفض لك حطو تحت في كل مكان خطين لانه من جد في كل مكان
مدينة يالا
وهذي ما جيتها لكن يقولون فيها السفاري لكن
الشباب اللي راحو لها يقولون انها ما تسوى المشوار لانها في الجنوب..
المدن الساحليه بشكل عام يمدحونها ..
انا انصح بنوراليا وكاندي اللي يبي يروح يدقق
على هالمدينتين لانهم قمه في
الطبيعه ولا عسير الا في عسير
شكلي طولت عليكم راح انزل الصور هالحين وراح اشرح تحت كل صوره :
والله ما كان ودي ابدء بهالصوره لكن لاني ودي ابدء حسب ترتيب الرحله
هذي صورة معبد وهو مشهور واسمه ناسيه والله لانه ماهمني لكن يقولون ان هالبليه مطلي بذهب
اما هذا فهو منظر للبركه قبل المغرب في فندق امايا ليك في دامبولا
بعد مارجعت حصلتهم منظفين الغرفه وكاتبين هالكلمتين الحلوه على السرير
( الكتابه باوراق الاشجار )
هالصوره حطيتها لان مقفا الفيل يذكرني بمقفا فهد 
ركوب الفيل على الطريق بين دامبولا وكاندي ومن جد ممتع ويكلف
20$ لمدة ساعه
الصوره هذي من البلكونه في فندق امايا هيلز في كاندي
[color=#6D5423]من نفس الفندق لكن من غرفه ثانيه [/color
]<-- راح اوضح ليه تم تغيير الغرفه
من فندق هوناس فالز في كاندي
هالشجره اللي قدامكم موب اللوح اللي قدامكم الشجره ,, هالشجره لو تلاحظون في
الصوره راح تشوفون فروعها وش كثر اذا عرضها 60م قليل.. منتشره بشكل ما تصورون "
هالمزيون انا بس الكرش ليه بارزه كذا مدري "
حظرة سموي بعد ما دقيت في الفطور نزلت اتمشى في فندق فوناس فالز فيكاندي
اثناء التمشيه في نفس الفندق على فكره هذي جنب الفندق
هذا هو التك تك وهو التكسي المتعارف عليه هناك تلقى صديق مزيت الشعر ويكد على الطريق بين كاندي ونوراليا
هذي بعد على الطريق بين كاندي ونوراليا
كما ذكر فوق على الطريق
سيم سيم
حظرتي على جال البحيره <-- على جال يعني ولا ما يحتاج ؟؟
عذي في نوراليا والجو في نوراليا بارد لدرجة انك في الليل تسكر النوافذ وتشغل السخان بس وش رايكم في الغيوم ؟؟
الحديقه هذي من افضل الحدائق في سيرلنكا بعد الحديقه اللي في كاندي
هذي على الطريق بين نوراليا و بنتوته والطريق مثل ما قلت ممتع لاخر درجه لما تفك ما حتصك
سيم سيم
اخر صوره من بنتوته
..................
باختصار موجز وهو عباره عن رأي شخص
كولمبو ماتنفع بريال فيها مجمع واحد ولا تحط في بالك انه مثل مجمعاتنا وهو اوديل
انصح بـ نيقمبو لقربها من المطار واجمل من ناحية الفنادق وكونها ساحليه وسياحيه
دامبولا للي يبغا يشوف صخرة سيقيريا مناسبه وفندق امايا ليك ممتاز
كاندي جمال الطبيعه وانصح بفندق فوناس فالز وكما قلت ساوضح سبب تغيير الغرفه في كاندي او تغير فندق امايا هيلز لان التكييف مش ولابد وكثرة الباعوض مع العلم بان فندق فوناس فالز ابعد لكن افضل.
نوراليا سحر الطبيعه عاصمة الشاي كان السكن في فندق تي فاكتوري لكن عيبه بعده عن المدينه وسوء الطريق انصح بفندق قراند وسط المدينه والغرف نفس مستوى غرف تي فاكتوري
بنتوته مدينه ساحليه وسر جمالها في جمال شواطئها بصراحه اثناء الحجز ما كان عندي نيه اني ازورها لكن بعد زيارتي لها تمنيت اني اجلس فيها لمدة ليلتين او ثلاث.
وسلامتكم اتمنى ان التقرير يحوز على رضائكم كما ارجو منكم تقييم الموضوع.
رحلتي الى بلاد الخادمات كما سموها (( سـيريـلانـكا ))
مشاركة: رحلتي الى بلاد الخادمات كما سموها (( سـيريـلانـكا ))
يا حرام يا بحرنا مدري وش سالفته 
وش اسوي 
>>وحده داخله تهاوش 
>>>عطته عيييييين 
