في الغابات الواسعه الكثيفه

والادغال الغامضه المخيفه

تطل عليكم محبوبة الجماهير ام القنبر لتحكي لكم احدى حكاويها

فاجتمعوا هونيهتن وانصتوا والقوا مسامعكم لما يحكى

شاكرتن لكم حسن السيره والاصغاء . .
8
8
صفقوا لاختنا المقدمه

ومن ثم اسفطوها

وتعالوا نخش في الموضوع
7
7

في قايله من القوايل كان الجو مره راااايق..طلعت اتمشى في سطوح بيتنا

عشان اقزقز عيال الجيران فبديت باستخدام انواع التميلح والحركات السداسيه الرباعيه

ومن زود الفلاحه ماخذه معي سطل مليان ملابس على بالي انشر الهدوم مثل نانسي عجرم<-يا قدمتس

وبالرغم من كل هالحركات الفولاذيه العيال حقروني وماعطوني وجه

عاد انا قربت اطرطع لولا ان هبت علي ذيك النسمه اللي ترد الروح فقلت يا بنت احقريهم بس

وضيعي وقتس بشي اكثر فايده..وترن براسي فكره هائله الا وهي..

هذا احسن وقت للتقشيم!!

واروح الله يسلمني واجيب بساط سدو وتكايه واجلس واتوسد خيشة الحب واقعد اتفصفص

واتقشم واقصد ذيك القصايد السنعه في نفسي وفي جدايلي وانا رايحه فيها ومنسجمه

لدرجة اني سويت مزرعة فصفص في سطح بيتنا مالها اول ولا اخر

المهم مالكم بالطويله..

ما امداني استانس بنفسي الا اشوف غبرة ضرسي الكبير وهو ناقز مترين ونص قدامي

وفي حاله من الذهول بدت الدمان تصب وديان والنخارير تهل سيووول كثيفه وامطار عميقه

وازعق لكم ذيك الزعقه اللي تصمخ الاحول

يماااااااااااااااااااااااااااه

وابزر عيوني بحقد على حبة الفصفص اللي كسرت ضرسي واعصب عليها

وامسكها في يدي واقعد افرك خشتها بالارض بحركة تثبيت الكتفين <-تأثير المصارعه

وهي تقول:

تكفين يا ام القنبر داخله على الله ثم عليتس ارحميني

وانا مسويه عمتس اصمخ..اضربها مره واعفط يدها مره..وانتف كشتها مرتين

مادريت الا تقوم حبة الفصفص بحركه بهلوانيه وتشق بطنها نصين شنق عاليمين وشنق

عاليسار وفي الوسط ورقه مسفوطه!!

قلت لها :

اقول سكري بطنتس واتركي عنتس هالحركات بضربس يعني بضربس

وبعدين وش هالورقه ؟؟طلاق وماني مطلقتتس !!

<<-مع العصبيه كل شي يجوز عندها

قالت:

هذي الورقه فيها تعويض عن ضرستس المخلوع اقريها وصدقيني وما راح تندمين

واتل منها الورقه واتمقل فيها الا مكتوب في وسطها:

مبــ ـروك لقد ربحــ ـت تذكرتين سفــ ـر الى مقاديشــ ـو..تذكره لك وتذكره لمن تحب!!

ومير انا اطير من الفرحه..تذكرة سفر مره وحده؟؟

يعني اخيراً بسافر وازور فصيلتي الرخويه ؟

يعني اخيراً بسافر خارج ربوع المملكه؟

يعني اخيراً بركب الطياره؟

يعني اخيرا بتعدى عتبة باب بيتنا؟

يعني ويعني ويعني..........الخ

مع ان ضرسي ما يسوى قرش راس ماله كله سوس وسرو من راسه لساسه!

المهم..

بعد ان عبرت عن مشاعري وفرحي الشديد بهذي الدعوه الي ما قد خطرت على بالي ابد

اقوم لكم وآخذ حبة الفصفص واحطها على سور السطح وابنط فيها تبنيطه مو صاحيه

<-انواع الجحده

واروح هوى على مكتب الطيران واخذ منهم التذكرتين وسيده عالبيت اجهز الشنطه وابدا

بترتيب الثياب وتلطيش سراويل السنه حقت اخوي عشان اكشخ عندهم كأنه شورت

وطبعاً خيشة الفصفص ما نستغني عنها وكم حبة طرطعانه عشان اشبهن في خشوم

بزارينهم وبعدها نقزت على طول على المطار..

واروح لكم طيرااااااان على القاعه الا يقول لي راعي التفتيش:

التذكره الثانيه حقت مين ياختي؟

قلت:

مدري تذكره لي وتذكره اممممممم بعد لي احتياط <-ام الانانيه

قال:

طيب وش اسمتس لو سمحتي؟

واطلع له العجرا من مخباتي واقول له:

وشو هذا الناقص ياعيوني ماعندنا بنات يعلمن اساميهن!

<-كذابه بس مفتشله من اسمها

قال لي:

بتقولين الحين ولا ترى بتنطقين هنا ومانتي شايفه الا غبرة الطياره قدامتس؟

قلت:

لا لا وانا اختك بقول اسمي انا محسوبتك ام القنبر نوير عباس عبدوووه آل بو دلهي

مادريت الا السكرتي يتصل ويبلغ علي!

الو الو الشرطه تعالوا بسرعه مسكت اكبر مزوره بالشرق الاوسط معها تذكرتين مزوره

ومعها بضاعات مسروقه ناويه تهج فيهم وما عندها اثبات هويه واضافه الى ذلك انها تحمل اسلحه

نوويه في مخباتها <-انثبر بس وربي انه نصاب كلها طرطعانتين

<-عايشه القصه بقووه

وما امداه يسكر السماعه الا والشرطه جارين كشتي على شنق ويسحبوني مع قنازعي مثل العنز

وانا اقول:

برييييييييئه وربونا برييييييييئه يخرب بيوتكو برييييييييييييئه

ويركبوني السياره حقتهم وينطلقون فيني وانا انبح صوتي من كثر النباح ومافيه فايده

واخيرا استسلمت للأمر الواقع ومير حطيت راسي وقعدت اشاخر عليهم ..

ويوم وصلنا لمركز الشرطه قطوني في الزنزانه واصدروا علي حكم الاعدام ضرباً حتى الموت

واقعد انوووووووح عليهم وانووووووووح ولا احد عطاني منهم وجه

يا ناس يا عالم اتقوا الله فيني..وهم ماعندهم فيني عمهم اصمخ ومحد حولي

وجا وقت تنفيذ الحكم وطلبوا استدعاء الشخص اللي بلغ علي عشان ينفذ الحكم فيني بنفسه

مادريت الا وحبة الفصفص جايه وجاره بناتها معها وفي راسها صعرور كبييييير

وتأشر علي وتقول:

ايه هذي هي يا حظرة الضابط اللي طيحتني من فوق السطوح

وانا قاعده اجدل شعري ومسويه بريئه ولا اعرفها

قال لها الضابط :

يالله خذي حقتس منها ولا تردتس الا يدتس

وتروح الشينه وتاخذ السوط وتقعد تلشط فيني وتخبطني على راسي وبناتها ماغير يقرصون فيني

وانا قاعده اصررررررررررررخ

لاااا لاااااا النار ولا العااااار
<-؟؟

وتقعد تكفخ فيني تكفيخ مو صاحي وتكفخ وتكفخ وانا دماني تصبصب وتطشر

في كل مكان ومع هذا ما زلت حيه!

فقلت في نفسي يمكن اني جنيه وما يقدر احد يقتلني..اكيد فيه كلمه سحريه تخليني اختفي

من هالمكان وبالتالي انفذ بجلدي من هالسعلوه وبينما انا افكر بالكلمه المزعومه

الا تجي حبة الفصفص تركض وتصوب الفاس على راسي بكل قوه ويوم قربت تنحرني

الا اقول بسرعه :

هاكــــــونا ماتاتـــــــــاااااااااااا!!

وما وعيت الا وانا في السطوح واصارخ:

هاكونا ماتاتا هاكونا ماتاتا هاكونا ماتاتا

وتجي لي امي تركض من المطبخ ومعها مضراب الهريس وتهبدني فيه على راسي

وقامت تحنش علي وتقول لي:

هكنتي في جهنم بلا هكنتي في جهنم <-اقتباس من هاكونا

قومي قمه تقومتس لا شغل ولا مشغله ماغير تقزقزين في عيال الجيران وليت احد عطاتس وجه

على كل هالترزز في السطوح..يلا اكنسي السطح من هالغثا اللي انتي تلهمينه

عاد انا ماصدقت اني رجعت السطح وافتكيت من حبة الفصفص الا واطمر ذيك الطمره واحب راس امي

واقول لها :

الحمدلله انتس انقذتيني من حبة الفصفص والا كان الحين انا ميته

وتجيني ذيك الركبه اللي عرفت بعدها ان الله حق!



وتوته توته خلصت الحودوده