السلام عليكم ورحمة الله وبركاته...
ما كو أشهر من هالقصه ابد ... ومافيه فلم كرتون إلا جابها وحط عليها سيناريو ومشاهد غريبة عجيبة..
بس هالمرة جبتها لكم بشكل غير....
بشكل تصلح للكبار مثلكم مو حقت البزارين..
أهم شي التركيز......نوم بالفصل مانبي... نبي الفايدة تعم.
هذا ياطويلين العمر و البقى....
سلحفاة وأرنب سووا تحدي سباق بينهم.....
الأرنب معتمدن على سرعته النفاذه و مكبر الوسادة....
وعارف ان السباق بمخباته....
امراد بدا السباق ومغط الأرنب وشغل التيربو.....
وخلى الفرق كبير الى انه بدا ما يشوف اختنا السلحفاة...
لبق على جنب وخذله كبست بخاري و علبة لبن....
وملى الكرشه ونسدح تحت الشجرة...
مرت السلحفاة تمشي شوي شوي ...وأخينا نايم
وصلت السلحفاة خاط النهاية والأرنب راح عليه الرهن...
وش نستفيد من هالسالفه::
ان الواحد حتى لو صار بطئ بس ثابت ممكن يفوز
ارنوب....
درى انه خسر السباق بسبب كسله والثقة الزايده عن حده...
ورجع للسلحفاة وطلب التحدي مرة ثانيه...
طبعا بكل تواضع سلحوفه .....قالت ولا يهمك...
ارنوب أول ما اطلق الحكم الصفارة فحط وبكل سرعته انطلق
ولا وقف إلا عند خط النهاية...
طبعا مقروص من الجولة الأولى
وسلحوفه ما زالت تمشي....
وش نستفيد من هالسالفه::
ان الواحد إذا عطاه الله موهبة وسخرها مزبوط وصرا ثابت المسيرة
راح ينجح ويفوز...
البطيء ما راح يأكل عيش معه...
احترت سلحوفه..... وقالت نبي نتسابق مرة ثانيه...
بكل ثقة ارنوب قال يالله......طبعا أبفوز قبل لا يبر فنجال الشاهي...
قالت بشرط نغير المسار ... قال ولا يهمتس سوي اللي تبين...
بدا السباق وانطلقوا ....
طبعا مثل العادة ارنوب شغل التيربو وانطلق....وما امداه يركض شوي إلا وذاك النهر اللي بوجهه.....راح يمين ...راح يسار ما قدر....
إلا واختنا السلحفاة جايته تمشي يوم وصلت النهر وتقطعه سباحة وتكمل المسيره الى خط النهاية....
وش استفدنا من هالسالفة::
ان الواحد حتى لو كانت إمكانياته بسيطة .....لازم ما ييأس ...ويشغل مخه وغير من استراتجياته عشان يحقق النجاح.... وما يقول خلاص ما راح أفوز لان الثانين أسرع مني...
ارنوب قال... سلحوفه ,وش رايتس بشي مزبوط...
خل نتسابق جميع ونفوز جميع ....بدال سالفة تسبقينن واسبقتس...
قالت وشلون ...
قال اشيلتس وننطلق بسرعة....وإذا وصلنا النهر تشيلينن...
وعقب اشيلتس وناصل جميع... وبأسرع وقت ممكن..
قالت تمام......قوم (ن) تعاونوا ما ذلوا...
وبكذا صارت السلحفاة سريعة و الأرنب يقدر يقطع النهر...
وش نستفيد من هالسالفة::
الناس يكملون بعضهم .... وممكن يكون عندك إمكانيات كبيره بس عندك نواقص ممكن ترجعك وراء...
المغازي من هالقصة كثيرة و الفايدة كلن راح يشوفها بشكل مختلف....
لذلك حبيت اشاركم مشاركه ان شاء الله تجد عندكم القبول....
ونستفيد من مساهماتك بالتعليق و التعقيب... لان فيها دروس كثيرة نستفيد منها بحياتنا العملية و الاجتماعية.....
تقبلوا تحياتي..
الأرنب و السلحفاة... بنظرة زكرتيه
