السلام عليكم ورحمة الله وبركاته


شباب وصبايا .. يا من تسكنون

الجنة الزكرتية .. << شلونتس ميس بيش ؟!


صباح الخير

وصيفكم ان شاء الله غير

صباح الدوام اللي ماله داعي




<< إدارة .. طلب بسيط الله لا يهينكم

نبي وجه تعبيري نسائي .. يحمل جوال .. أو سماعة تلفون


<<






خدمات حلوة بس نعرف نستخدمها ..


جميعنا شهدنا التطورات اللي حصلت في العقدين الأخيرة ..

وأهمها كان الاختراع المسمى الهاتف ..


قبل عشرين سنه .. كان فيه بيت واحد بس في حارتنا اللي عندهم تلفون

وكنا نعتبرهم ناس ياي .. ومن أغنى العائلات.. بس لأن عندهم تلفون ..


وكم سنه وصار التلفون بكل بيت ..

بعدها كمان كم سنة .. تقريبا عشر سنوات


وجا اختراع الهاتف الخلوي ..

الجوال على قولتنا .. والموبايل على قولة المصاريه


وكانت الشريحه أيامها بـ 3000 ريال تقريبا ..

وشهدنا جميعا .. مراحل تخفيض سعر الشريحة

وأنا عن نفسي أذكر إني انتظرت الين صار سعر الشريحة بـ 800 ريال وشريتها << محد سألك

وبعدها بأسبوع صارت 500 ريال .. << قهر والله .. يا شين العجلة


المهم ما لنا بالطويلة

نخش بالموضوع ..



أحلى شي بالجوال ..

هو خدمة ظهور رقم المتصل ..

يعني ما يحتاج نطلب خدمة الكاشف .. ولا هم يحزنون

و أي متطفل غلطان .. يكون غرضه الأذية فقط لا غير

يتخزن رقمه باسم ( غبي ) .. ولا عاد ينرد عليه .. إلا اذا كان أبوي موجود


<< بجوالها أربع أغبياء .. ( غبي 1 ، غبي 2 ، غبي 3 ، غبي 4 ) و


وفيه شي يرفع الضغط .. وهو الناس اللي زايد عندهم معدل الغباء

يتصلون .. ولا يتكلمون .. ويقعدون من دقيقة إلى دقيقتين ساكتين

طيب ليش تتصل وتسكت .. يعني موب عارفـ / ـه إن الرقم ظاهر عندي



نرجع لموضوعنا

واللي أحلى من خدمة ظهور الرقم .. وكثير يشوفون انها خدمة عادية

يعني وجدت .. أو ألغيت .. يمكن ما تفرق مع ناس كثير ..


قلت اللي أحلى من خدمة ظهور رقم المتصل ..

هي خدمة .. ( اتصل بي ) ..

اللي جواله مفصول .. أو قرب على الحد الائتماني

يرسل رسالة للي يبي .. ببلاااااااااااش .. << كم الف بالكلمة السابقة ؟!

وينقذ نفسه .. هذا إذا كان متورط .. ومحتاج لهذا الاتصال


كلنا نتفق على إن هالخدمة حلوة .. وخدمت ناس كثير ..

يعني شخص جواله مفصول.. ولا عنده اللي يسدد الفاتورة.. إلا بعد أسبوعين مثلا

وكان محتاج انه يكلم صديقه .. أو أخوه .. فما عليه إلا انه يرسل رسالة ( كول مي )

أو كـ مثال ثاني .. لمستخدمي بطاقة سوا ..

فرضا شخصه ( مؤنث شخص) رصيدها منتهي

فـ كل اللي تسويه إذا احتاجت .. هو إنها ترسل رسالة ( كول مي ) بعد


هالخدمة انتشرت بشكل كبير ..

وما في أحد ما يعرف طريقتها

حتى لو ما احتاج لها بيوم ..

وتقريبا .. ما لها إلا سنة بس من يوم ظهرت عندنا

<< أكيد عند الغرب لها سنين ودنين ..

لا تسألوني وشو دنين .. !!


المهم .. نرجع لـ اتصل بي

أيام الدراسة .. نادرا ما تجيني رسايل

وصندوق الوارد يقرقع .. ما فيه إلا ثلات رسايل ..


وحده .. نكته .. من أختي .. وراسلتها من جوال الماما

والثانية .. لغز من أخوي اللي أصغر مني ..

وأبشركم للحين ما عرفت حل اللغز .. << من زود الذكاء

والثالثة .. بيتين من قصيدة و موب لازم تعرفون من مين .. << الله من شين الأخلاق


المهم ..

بمجرد ما أسمع صوت نغمة الرسالة ..

أجي أركض .. على بالي فيه أحد راسل لي أبيات شعرية

أو آخر نكته .. أو أي شي .. المهم كلام ينكتب وينرسل لي


فـ المفاجأة تكون لما أفتح الرسالة

وألقاها رسالة ( اتصل بي ) ..


الخدمة توها مكملة عامها الأول

يعني توها تخطي على أقدامها .. و ما بعد فطمتها أمها ..


وأنا بصراحة أحس اني كرهتها .. وكرهت اللي اخترعها


الناس من قبل كانوا .. يرنون رنة .. ويسكرون

يعني يا اللي جاتكم الـ رنة .. بليز اتصلوا ..

وهذي اسمها .. شحده واضحة و صريحة

وأنا أشوف ان خدمة كول مي .. مثلها ولا تقل عنها

ولكنها شحدة محترمة .. تلبس ثوب الكرامه


وأنا عن نفسي .. إذا وصلتني هالرسالة ..

نادرا ما أرجع واتصل .. << يا بخلتس

واتصل بس على الناس اللي يستاهلون ..

يعني به بنات ما تكون فيه أي ميانة بيني وبينهن

ويرسلون لي رسايل كول مي ..

وفيه بنات .. وفيه بعد حريم كبار .. وأعرف انه عندهم فلوس وااااااجد << ما شاء الله

وإن جوالاتهم بعمرها ما انفصلت ويرسلون رسالة كول مي ..

وهذا لأنهم كانوا من قوم ( أبو رنة ) ..


هذي النوعية من الناس .. لا يمكن اني ارجع واتصل عليهم ..

ما هو بخل .. لكن تأديبا لهم .. ولأجعلهم عظة وعبرة لغيرهم


بتقولون ما ارسلوا إلا اكيد كانوا من جد محتاجين .. أو من هالكلام

بقول لكم وحدة من صديقاتي .. لها سنة كاملة .. ما اتصلت علي

من الصيف اللي فات الين هذا الصيف .. وهي ترسل لي رسالة كول مي إذا بغت تكلمني


ونادرا إذا بغت تتصل .. تتصل من جوال امها .. وتقول لي اتصلي على جوالي

والله عالم غريب عجيب .. وصدق اللي قال .. ( عش دهرا ً .. ترى عجبا ً ) ..



وما ننسى بعد خدمة موجود .. وأختها موجود اكسترا ..


خدمة مذهلة .. وقليلة فيها كلمة روعة ..

يحتاجها أكثر الناس اللي تكون دواماتهم بأماكن ينعدم فيها الإرسال

ويستفيد منها بعد .. الأشخاص اللي تعودوا يقفلون جوالاتهم اذا ناموا


لكن فيه ناس أساءوا للخدمة باستخدامها في كل الأوقات ..

اذا كان المزاج موب رايق .. يروح على طول تحويل مكالمات .. و 4000 ويكبر المخده

يعني بالعربي .. اللي نبيه نرجع نتصل عليه .. واللي ما نبيه نخليه يصدق بأن الجوال مغلق

طيب هي نفسها .. لا ترد عليه .. وخله يفهم انك ما تبي تكلمه ..


لكن فعلا .. إن كل اختراع حلو وجديد .. لازم يشوهونه الناس باستخدامهم الغلط للخدمة



وقبل أنهي كلامي ..


ما أنسى اذكر بعد خدمة الـ waiting

الانتظار ومساوئ الانتظار ..

بالأول كانت خدمة كثير مفيدة ..بالذات بالتلفون ..

وصحيح إننا نرد على خط الانتظار واحنا موب عارفين منو المتصل ..

وهذا الشي اللي يميّز الجوال عن التلفون .. إنه يظهر حتى رقم الخط الثاني


نرجع للتلفون .. فيه ناس مشغلين الخدمة للزينه فقط ..

يعني كمالة عدد .. أو كمالة خدمات ..

كاشف .. مع الانتظار والجماعي .. واجتمعت الخدمات .. والسلام

واللي يقهر لما اتصل على أحد ويرن اربع مرات .. وبعدها ينشغل

يعني الحلوين عندهم خدمة الانتظار .. وما يبون يردون على الخط الثاني

طيب ليش مشغلين هالخدمة على الفاضي .. خلوه يجي مشغول وانتهينا

والله العظيم شي يرفع الضغط ..


هذا غير حكايات ومشاكل التحويل .. واللي يطول الكلام فيها ..


نرجع للانتظار

بالجوال يختلف الوضع مثل ما قلت بأن رقم الخط الثاني يظهر لي ..


والمفروض من باب الأدب والذوق ..

بس يظهر عند المتصل كلمة ( انتظار )

ينهي الاتصال .. حتى ما يزعج المتصل عليه ..


يمكن اللي يتكلم معاه مكالمة ضرورية ولا يقدر ينهي الاتصال

أو مشغول بسالفة ولا يبي يقطعها عشان يرد على الخط الثاني


لكن .. لا حياة لمن تنادي ..




بالختام ..



ما أدري إذا تتفقون معي أو لا ..

بأن هـ الخدمات وغيرها اللي متوفرة بالجوال حلوة ومفيدة

لكن كثير يشوهونها .. بإساءة استخدامها .. !!





تحية طيبة ..



وكفى الله جوالاتكم شرور السرقات


<< ما نست جوالها اللي انسرق قبل خمس سنوات وكان توه جديد