السلام عليكم
عن نفسي مااتوقع ان اوكرانيا تصب عسل غضبها علينا >> عسل = جام هيهيهيهيهيهي
ماتلاحظون عندنا ثقه نوعا في المنتخب
طبعا ربطناها بمستوى المنتخب مع تونس مع مستوى اوكرانيا مع اسبانيا
انا معكم من ناحية اداء لاعبين وتقديم مستوى كنا افضل من اللي قدموه اوكرانيا
بس من رايي ان اسبانيا ذا السنه وخصوصا بالتشكيله هذي مرشحه بقوه توصل
لدور الاربعه يعني منتخب مايستهان فيه وهو السبب الرئيسي اللى ماخلى اوكرانيا
تقدم اللي عندها ..
مع منتخبنا مباراتهم حياه او موت وهذي نقطه مفروض نجيرها لصالحنا بالتكتيك المناسب
الخوف ان مدربهم يوجهم لنقطة ضعفنا اللي هي (( ارفع وبس ))
مشكلتنا الكبيره في الكور العرضيه او العاليه بشكل عام
يعني لو انا مدرب اوكرانيا بقولهم ارفعوا ولا تنقزون مع مدافعين السعوديه
بتجيكم الكوره الين مكانكم
باكيتا يوم سألوه عن الكرات العرضيه قال لان بالاساس بالدوري السعودي
ماتعتمدون عليها عشان كذا تصير عند اللاعبين شي جديد وماتعودوا يتصرفون صح
لا زالت اغلب الاهداف علينا تجي اخطاء قاتله يعني نقعد نقول لو ذا ما سوى كذا
كان ماجا الهدف ...
الاغلبيه يحمل رضا تكر الاهداف السعوديه
انا يمكن اقول تكر له ذنب بس لازم ننظر ان اللاعب هذي امكانياته وهذي عقليته
بس مانظلمه مره وحده الرجال مجتهد والدليل احسبوا كم كوره يطلعها
او بالمعنى الاصح تكر دايم في الوجه ليه؟
لان هذي مهمته واكيد لو انا العب وتجيني 20 الف كوره بخطي في وحده او ثنتين او اكثر
وجايز تكون قاتله بس وين دور اللاعبين الباقين ؟
منتشري الله يهديه مايبين يعني اذا بغيته مالقيته
الهدف الثاني حق تونس كل مجموعه وجهت اللوم على لاعب
اللي قال على تكر واللي قال على الدوخي واللي قال على عبدالغني
ومنتشري ومبروك وعزيز مانقز صح
طيب هم كانوا لاعبين بس الجزيري والجعايدي << كرهته
وحنا كنا خمس لاعبين كل شخص مسؤول
مدري وش جاب سالفة الهدف بس جات خلاص >> منقهر من الهدف الى اليوم
عموما مباراتنا مع اوكرانيا لو فزنا ماراح اعتبرها مفاجأه
ولو انهزمنا ماراح اعتبرها مفاجأه لان منتخبنا واضح انه يطبق تكتيك حلو
المباراه اشوف انها في يد لاعبينا اذا طبقوا تكتيك باكيتا اللي واثق انه قرا اوكرانيا صح
فيه واحد من جماعتنا كويتي يقولي وش توقعاتك مع اوكرانيا
قلت اذا لعبوا صح بدون اخطاء اتوقع نفوز واكثر من هدف
قعد يضحك قال اموت واعرف على وش الثقه هذي
الظاهر منتخب اوكرانيا الهند وانا مدري
قلت لو سالتني مع اسبانيا اقولك يمكن ننهزم باكثر من ثلاثه
لاني رديت على حسب اللي شفته من اسلوب اوكرانيا مع اسبانيا
وان شاء الله مايتغير مستواهم الى الاحسن ونكون حنا الضحيه
اصعب اللحظات اول الدقايق واخر الدقايق اذا عدت على خير
وعدنا هنا ان شاء الله نتبادل اليوزرات فرحانين بالفوز << على اساس يتبادلون الفنايل بعد المباراه
انا حليبي نك سلف خمسه
احس اني قعدت اهذر بس وناسه السوالف عن كل شي في كاس العالم
راعي السيكل يعطيك العافيه ووعدنا ان شاء الله ليلة الثلوث
مع فوز اخضر بإذن الله
اخوكم نبيل نقشبندي << امحق معلق
هل بتصب اوكرانيا غضبها على السعودية ؟!
)
