تم استلام رسالة Bluetooth

**ماشي الحال** · 05-21-2006, 05:00 AM

السلام عليكم

الظواهر في هذا الوقت كثيره

اذا قلنا انتشرت هذه الظاهره انتشار

كبير ليس يعني هذا اننا حكمنا عليها

سلباً او ايجاباً نحن فقط ذكرنا حجم انتشارها .. !

من المعروف في أي مجتمع اذا اكتمل باب

سد الحاجات الاساسيه يتم الالتفات تلقائياً للكماليات

وما دمنا كأفراد يتكون منا هذا المجتمع

فبالتأكيد نحن من نعطي صوره وانطباع عن مجتمعنا .

ولنهبط على ارض الواقع ونقول بصوت واحد ::

الكماليات اصبحت الان هي الاساسيات

نؤمن جميعاً بأن العجله تدور وأن المتغيرات

في حياتنا أمر طبيعي لان دوام الحال من المحال

يقابل هذه المتغيرات ردود فعل متقاربه الى حد كبير

نجد انفسنا نندمج تلقائياً وبرغبه منا على الانضمام

الى المدعو / جديد في حياتنا

والاهداف بالتأكيد تختلف من طرق باب هذا الجديد

بالبدايه نريد ان نكون مثل غيرنا

ولو اخذنا على سبيل المثال (( الانترنت ))

بداية تفعيل الخدمة لدينا كنا ننظر له عالم غريب

نريد ان ندخل هذا العالم او بالمعنى الاصح تجربته

دخلنا هذا العالم واستوقفتنا علامة الانترنت

بعد ان نضغط عليها الى اين نذهب ؟

الو هلا عبدالله ياولد انا دخلت الانترنت وتوهقت

وين اروح او وش اسوي ؟

ياخي اكتب chat واختار اي شات تبي وادخل فيه

مشكور ابو عابد

بعد فتره اتصال جاني من صديقي المتأخر دائما عن

دخول اي متغير بالحياه

الو بسرعه علمني انا قدام النت الحين وين اروح؟

تعال تلقانا في الشات الفلاني

نحن هنا اصبح لدينا الانترنت= شات

وفئة اخرى لديها الانترنت= علم واستفاده

وكل فئه اصبحت تنظر للانترنت حسب حاجتها منه

هذا بالبدايه وبعدها ندمن ونبدأ بالتغيير

في توجهاتنا ولكن في نفس عالم الانترنت ربما بسبب

الملل او لطرق ابواب جديده ..

لن اتكلم عن مساوىء استعمالنا للاشياء فهذا امر

مفروغ منه الا فيما ندر ..!

فما ذكرته عن الانترنت يعتبر مثال توضيحي لما سوف

اتطرق اليه ...

------------------

يبه

* لبيه

ابي جوال

* هههههههه ليه وش تبي فيه

حمود ولد عمي ناصر معه جوال وكل ماجيتهم يقهرني

عشان ماعندي جوال

* زين رح نام الحين وبكره يصير خير

راح الولد ينام ويفكر في اسعد لحظاته بتصير بكره

قام ابوه وامه يسولفون وقال الابو

* ترى الولد الظاهر بشتري له جوال

قالت ترى ان شريت له اخته بتزعل وتبي مثله

* ماعليتس منها بتزعل يومين وترضى....

اليوم الثاني ::

دحوم فرحان بالجوال وراح عند حمود يبي يعلمه انه شرى واحد

اخته زعلانه طول الوقت وحالتها ماتسر

والام طبعا رحمتها وراحت للابو

قالت البنت زعلانه اشتر لها يابن الحلال حالها حال اخوها

وبنات عمها وخالتها ولا ترى بشتري لها انا

* زين خلاص لاتزعجيني بكره بشتري لها

لاتنسى ترى تبي جوال الدمعه نفس بنت خالتها

* زين خلاص ..
---------------

محد ينكر طبعا ان هذا اللي يصير وانها تحصل بمجتمعنا

الظاهره هذي انتشرت والاغلب عند عياله

وبناته واخوانه وخواته والعيله كلها

من صغار السن جوالات من الانواع الجديده واللي فيها مميزات كثيره

منها ( كاميرا , بلوتوث ) << وهذا اللي يهمنا في الموضوع

من المعروف ان الصغار مايعرفون عن الحب الا التعلّق وعشان كذا

نشوفهم يحبون اجهزتهم لدرجة تكون هي وسادتهم

اغلب الناس سواءا كبار او صغار عند دخولهم اي عالم جديد

لابد يمرّون بالتبعيه هذي ::

دخول >> انبساط >> ملل >> تغيير

طبعا التغيير يمكن يكون للاسوأ واحتمال للاحسن

الحين وفي ظل هذي الظاهره هل تشوفون

انها وجاهه اجتماعيه بان نسمح للابناء الصغار الذين

لا يميزون بين الصح من الخطأ بأن تمتلك هذه الاجهزه ؟

والذين لا يفرقون بين المشاهده العفيفه من الآثمه بأن يمتلكون

هذا الجهاز بما يحويه من مشاهد بلوتوثيه منقوله لهم بالرضا أو بالغلط ؟

وليس الخطر فقط من مشاهد بلوتوثيه حتى لايتم التركيز عليها فقط

هناك شي اسمه كاميرا وشي اسمه التقاط صوره

اتوقع الكل شبه متفق ان الاستخدام السيء لجهاز الجوال وتقنيته

خطر مع الكبار فما بالنا مع الصغار ؟

قال حكيم ::

هل يمكن أن تطرق باب الحرية بيد

دون أن تغلق باب الفضيلة باليد الأخرى ..؟

وأنا أتسائل معه ايضا ... هل يمكن ان نعطي ابناءنا ثقة بكل شي

لدرجة أن نعطيهم المسدس محشوو

ونقول لا تضربوا به فهو خطر ..!

الابناء بنظرهم انه تسلية ولعبة لذلك هم طلبوه وأصروا عليه

ولكن اولياء الأمور هم من يدركون خطورته وسلبياته

ويرون ضرورته للمستخدم ...

مادري البعض يمكن يشوف إن الأمر كبير

والآخر يقول يارجال عادي سهالات

بزران ومعهم جوالات خلهم يستانسون كل العالم معها جوالات ..!

:: قبصة ::
ماودي تركزون على الاسئله بشكل كلي

الاهم هو الفضفضه كل واحد يبحر بكلامه عن الظاهره هذي

سواءاً من مواقف شافها او سمعها ورأيه الخاص بالتأييد او المعارضه

لاتنسون حنا في الصاله الرجال يقط غترته ويسولف

والمره تحط جلالها وتسولف

ونشوف بعد الاراء ونتفق هل هذه الظاهره سلبيه ام ايجابيه ..!!

سيبتكم بعافيه

**ماشي الحال** · 05-21-2006, 05:05 AM

وش دعوى القراء صفر والردود صفر؟؟

صراحه ما توقعتها

خخخخخخخخخخخخخخخخ

<< يبي يخلق مشكله وبس

موت الاقلام · 05-21-2006, 08:53 AM

هههههههههههههههههههههههههههههههههههه

لي عوده ماشي الحال

بس الحين انا رايح الدوام

مع الشواكيش

**ماجد المنيع** · 05-21-2006, 12:10 PM

وعليكم السلام ورحمة الله

اما كلامك عن الجوالات فهو فعلا نفس ما يدور في بالى

بس الموضوع اشمل من الجوالات

والا نترنت

والفضائيات

وحتى قيادة المرأة للسسيارة

كلها أشياء قادمة وبقوة

والمشايخ ما قصروا حذروا من عواقبها

وتكلمو في كل وسيلة اعلامية مسموحة لهم

بس .. اخشى ان السيل اقوى من السد

والمنع يمكن ما عاد يصلح

يعني تخيل عندك مزرعة ما تهتم فيها

والشجر صاير هزيل جدا

اكيد اذا سمعت بسيل قوي بتخاف عليه

لانه يمكن يقتلع كل اشجارك

بس لو اعتنينت بالشجر من الاساس

وصار قوي وكبير

ما راح تهتم كثيرا بالسسيول

لانها لن تضرك

او ضررها لا يذكر

هذا هو المجتمع اذا كان قوي بإيمانه

واتباعة لدينه

ما تهزه الفتن

بالعكس يتكون بعيدة عنه لانها تخاف من المواجه

شف المنافقين في عهد الاسلام القوي وش كان موقفهم

وكيف الحين موقفهم

الان يتكلمون بكل وقاحة و يطرح افكاره كانها هي الصح الذي لا يقبل مناقشة

وان راي غيره متحجر ومتجمد ومتصلب وكل شي يابس في الوجود

وهذه القوة الي يتمناها لمجتمعنا ما يقدر يصنعها شخص واحد

بل هو عمل جماعي

قال صلى الله عليه وسلم : " كلكم راع وكلكم مسؤول عن رعيته " .

شكرا ماشي حاله

موضوع في الثمنيات

مكسر تكسير · 05-21-2006, 01:48 PM

ولو اخذنا على سبيل المثال (( الانترنت ))

بداية تفعيل الخدمة لدينا كنا ننظر له عالم غريب

نريد ان ندخل هذا العالم او بالمعنى الاصح تجربته

دخلنا هذا العالم واستوقفتنا علامة الانترنت

بعد ان نضغط عليها الى اين نذهب ؟

الو هلا عبدالله ياولد انا دخلت الانترنت وتوهقت

وين اروح او وش اسوي ؟

ياخي اكتب chat واختار اي شات تبي وادخل فيه

مشكور ابو عابد

بعد فتره اتصال جاني من صديقي المتأخر دائما عن

دخول اي متغير بالحياه

الو بسرعه علمني انا قدام النت الحين وين اروح؟

تعال تلقانا في الشات الفلاني

نحن هنا اصبح لدينا الانترنت= شات

اعجبني الكلام هذا منك

والله ياحنا رايحين في خرايطها قدام العالم والتطور الي حاصل فيه

انا الان في مكان كل مارحت لاي شخص فيه عنده ويب سايد ويخلص كل اموره منه

اتوقع المشكلة عندنا مزدوجة بين ضعف الخدمات عندنا وجهل الشعب

اما سالفة البلوتوث الله يكفينا الشر بس

مشكور ماشي الحال على الطرح الحلو

**عميد الزكرتية** · 05-21-2006, 04:45 PM

نيابةً عن الاخوات مشرفات الصاله

هـيـبـه الله يسكنها الجنه وسحابة حب

اسمحوا لي بتثبيت موضوع القنبله ماشي الحال

ماشي الحال

شخص لم يقدر ثمن قلمه

فلم نقدر نحن ثمن هذا الكاتب الفذ

ماشي الحال شخص غامض

يحيرني بين بلاهته العفويه واسلوبه الساخر

ماشي الحال اذا اراد ان يكتب كتب

واذا اراد ان يخرس خرس

وليته مايخرس؟؟

ماشي الحال اذا رأيته قلت ماهذا الافدغ

وان نطق بأي حرف شرط ان لايكون من حروف العله

قلت ماهذا النابغه !!

واذا نطق بحرف من حروف العله وبانت السنون قلت ياعلتي

ماشي الحال انسان غير طبيعي

ماشي الحال لايقدر بثمن

ماشي الحال ياصديقي العزيز تعال بالحضن ياحبيبي

كيف حالك فديت

ماشي .. صراحة اتعب واقول اسلوب

اتعب واقول طرح للموضوع ملعون خير

نرجع لصلب الموضوع

البلوتوثيات مالها وماعليها

مادام البلوتوث موجود

فسوف يصل ليد الصغير والكبير

اذا انا وياك منعنا صغارنا من البلوتوث

فيه غيرنا ماراح يمنعون صغارهم

يعني ادا بتقطع اقطع عن العموم

وفكرة اقطع عن العموم انا رافضها والسبب

اني من الناس اللي ما يقدر يستغني عن البلوتوث

بسبب بحثي الدايم عن جديد القصايد

وخاصةً قصايد الشعّار الخاصه

اللي يستحيل نشرها الا عن طريق البلوتوث

هذا ما احببت ان ادلو به

وافسح المجال لباقي الاخوان للمشاركة

واحبك ياماشي يابو اسلوب مهب صاحي

**سحابة حب** · 05-21-2006, 09:52 PM

اقتباس:

المشاركة الأصلية كتبت بواسطة عميد الزكرتية

نيابةً عن الاخوات مشرفات الصاله

هـيـبـه الله يسكنها الجنه وسحابة حب

اسمحوا لي بتثبيت موضوع القنبله ماشي الحال

خيو عميد ،، خذ راحتك ،، البيت بيتك ،،

خيو ماشي والله رحام عليك ،،

كل ذا الأسلوب ،، و تحرمنا منه ،،

نجي لموضوعك ،،

الفكرة العامة عننا إننا شعب نستخدم التكنولوجيا غلط ،،

الانترنت أول ما دخل ،،

و خلينا من كلمة أول ما دخل ،،

أي واحد مننا أول ما تعلم على النت ،، وش كان يسوي غير الشات ،، و مواقع الأغاني ،،

قبل فترة وحدة تتكلم معي عن النت ،، كانت تسألني لأنها ناوية تدخل مجاله ،،

قلت لها شوي في البداية كنت ادخل ساعتين ثلاث اربع ،،

و بعدين اسكره

وش استفدت ،،

وناسة ،، ايه

تضيع وقت ،، ايه

شيء مفيد لا ،،

حالياً أنا اشوف نفسي تغيرت ،، في استخدامي للنت ،، يمكن عشان صار عندي خبرة اكثر ،،

يمكن عشان مليت من الشات و الماسنجر و الشغلات ذي

يمكن عشان كبرت و حسيت نفسي تعديت المرهقة و تفكيرها

كل ذي اسباب تخلي الواحد يغير اتجاهاته النتيه

نجي لموضوع البلوتوث ،،

و هذا يبي له تربيعه و كوب شاهي عشان اتكلم فيه ،،

يا جماعه ولد سنة خامس عنده في جواله لقطات فضيعه ، مريعه ،، وش ذا يا فهودي ،،

قال ،، امس وصلتني على البلوتوث في المقهى ،، لأني كنت مسمي نفسي اسم بناتي ( أحلاكم اتحداكم )

خير وين حنا فيه ،، الشرهه مب عليك

الشرهه على أبوك اللي شراك جوال ،،

قال لي وين انتي فيه خويي سعود عنده جوالين الدمعة و إن سبعين ،، و إذا نجح ابوه شرى له لاب توب ،،

واحده سنة اولى متوسط عمرها 13 سنة ،، بالسوق متقطعه مليونين قطعه ،، لأنه واحد رقمها بالبلوتوث و ارسل لها أنا احبك ،،

الشرهه مب عليك الشرهه على امك اللي مهيتتك لوحدك بالسوق و معك جوال ،،

وإذا كلمت الأبو أو الأم قالوا عيالنا وش يفرقهم عن عيال الناس ..

ياجماعه وين السلطة ،،

و بيني و بينكم ،، الحين مرض البلوتوث حتى الكبار مب بس المراهقين مدهرين فيه

مسيو ماشي ــ

موضوع مأنتك ،، و متكتك ،،

تسلم يمناك

Abo Turky · 05-21-2006, 10:04 PM

هههههههههههههههههههههههههه
الله يعطيك العافيه على المووووضووع

**سحابة حب** · 05-21-2006, 10:10 PM

اقتباس:

المشاركة الأصلية كتبت بواسطة Abo Turky

هههههههههههههههههههههههههه
الله يعطيك العافيه على المووووضووع

يا جماااااااااااااااااعه ،، أحد قال شيء يضحك ،،

تراني ضايق صدري الليلة ،، و ودي اضحك ..

**عميد الزكرتية** · 05-21-2006, 10:31 PM

ابوتركي من العصر وانت تقرا الموضوع

شايفك انا قبل ما ارد

الله يرج ابليسك يابوتركي

ههههههههههههههههههههههههههههههه

ومن العصر الى الساعه عشر

و هههههههههههههههههههههههههه

صدق هههههههههههههههههههه

**شباب في رحله** · 05-22-2006, 01:08 AM

اقتباس:

المشاركة الأصلية كتبت بواسطة Abo Turky

هههههههههههههههههههههههههه
الله يعطيك العافيه على المووووضووع

^
^
^
^
رايي من راي اخوي بو توركي

فيه واحد البارح متلاج انا وياه

يقوولي ليش ماتعطي الجدد وجه وتخليهم يبدعوون

قلت فيه جدد عن جدد

قال شلون

قلت فيه عضو جديد لكن بموضووع واحد او رد

توقف احترام لرده او موضووعه
يعني بوادر حرووفه تقوول ان ذا مصيبه

وفيه جلم
مثل الاخ العزيز ابو تركي
اللي حاط توقيعه كبر وجهه
يجيك
وماغير يقوول
يعطيك العافيه او يسلمو

نعنبو غيرك ياللي تلاجيت معي البارح ماتجي تشوووف ذا النمونه
وقتها تعذرني صدق

ابو تركي

ام العفن اللي تدرم وجهك

ماشي الحال

راجع لك ياوحش فيقا

مثبت <<< على شحم

مصرقعه شِيك · 05-22-2006, 02:15 AM

بسم الله الرحمن الرحيم..
تحيه طيبه أخوي(ماشي الحال))
موضوع بل قضيه مهمه..
أصبحت في وقتنا الحالي هي((السالفه))
الصغار قبل الكبار..يشترون أخر الجوالات اللي نزلتــ
وياكثرها القصص اللي عشتها عن جد مآآآآسي..
أتذكر قبل فتره صديقتي قالت لي أنو أخوها(( فرابع إبتدائي))
وركز على الصف أنت عشان تقدر حجم المصيبه اللي حااصله
المهم..
كانت صديقي تقلب جوال أخوها..
لقت كم مقطع من((...........))
تقول أنها عجزت تتحمل..
كيف بعقلية طفل عمره ماتعدا الـــ10 سنوات
هي انجنتــ ماتدري تزعق عليه..تتكلم بهدووء..
راحت ونادته قالت ايش هذي المقاطع..
لو تدري ايش رد عليها..
قالها لاتزعجيني مو مني..روحي ووقفي عند المطعم الفلاني<<هذا المطعم..بشارع عام..
لمن توقفين هناك يجيك العن من كذا..

قلت بقول لأمي وأبوي
قال:طيب وعبد الله ولد عمي صالح
ليه هو كبير وعنده زي كذا ومحد قاله شي ليه انا!!!!!!!!!!!!
يألله تقول البنت عجزت ارد عليه
مدري الوم اهلي مدري الوم البزر مدري من الوم
سكت..ومسحت المقاطع وعطيته الجوال..
عن جد..صار الجوال هذا أذييييه..وربي أذييه..
الحين أن قلت..ماراح تدخل فبيتك
قنوات مو كويسه او حتى تحرمهم من النت..
البلوتوث بحد ذااته دمـــــــــــــــــــار
لعقليات الكبار وش عاد عقلية طــــــــفل..
أنــا أعتبرها جريمه..بس الجانـــي..مخفي..والمجني عليه
الجمــــــــــــــــيع..
اااااااه..والله العضيم جد أوجعني راسي..
لي عوده للإكمال..
أتمنى أن كلامي..أعطى فكره معينه..
أو حتى شي بسيط..
ماشي الحال..
لكــ ولــِطرحك..
أطيبــ المنى..
صرقوووعه..

اعلانات المنتدى