صور .. مذكرات .. أوراق قديمة .. عطور .. أماكن

أشياء كثيرة توقظ الذكريات من سباتها العميق ..



الصور بالذات من أكثر الأشياء اللي تثير الذكريات ..

لي ثلاث صور وأنا صغيره .. وكل صوره لها ذكرى روعه ..

وكل ما شافوها هلي .. قعدوا يتذكرون مناسبتها ويضحكون عليها

<< وش رايكم .. تبوني انزلها ؟؟!




[لوحة13]برايفت الخاتمة [/لوحة13]
صار كل اختباراتس غش .. ؟؟!

واحلالاه لو اني صديقتس بذيتس الأيام .. تسان علوم

بس تخيليني من الصديقات اللي يا حليلي معتس ..

ويا زيني مع الابلات .. لما اعلمهن على البنات اللي يغشون


واحلالاه بعد .. لو ينقلوني ويحطوني بمدرسة أختي ..

تسان انسيها هي وصديقاتها شي اسمه غش ..


<< موب تسني خرجت عن الموضوع



ماجد المنيع ..


مبدعنا الزكرتي الجديد

ولا تدري .. انت خلاص من أهل البيت ..

هذا انت متصدر المجلس ..

وعقبال ما نشوفك بالبرندا .. موب كلش قاعد بالدريشه << وش رايتس فيني نموله ؟؟


المهم ..

موضوع روعه .. وخيالي ..

والأروع انك نقلت اللي بالورقه مثل ماهي مكتوبه .. من غير تعديل

>> أنا شفت الورقه


حلو ان الانسان يفتخر بماضيه الطفولي المشرف ..

حتى لو كان مـ ....... بعض الشي


وحلو اننا نذكر ذكرياتنا الطفوليه .. ونجد لها كل مسمع وقارئ

مثل ذكريات كاتب الورقه .. شباب في رحله .. ماشي الحال .. والخاتمه


أعادتني إلى سنوات مضت .. عشتها وكأني كنت ولد

ايام ما كنت اعترف بشي اسمه العاب بنات .. من أدوات مطبخ أو عروسه

كنت ما افوّت لعب الكوره بالعصريه مع اخواني واولاد الحاره (وجه خجلان من نفسه )

وذكرني بمهاوش امي .. يوم نعدم البيت .. او نكسر اللمبات بالكوره

طبعا بعد ما كبرت شوي .. كانت أمي لا عصبت علينا .. وتجي تبي تطقنا

يشردون اخواني للشارع .. وأنا اللي آكل الطق كله ..


وأذكر بعد يوم كنت صغيره .. كانوا دايم يقولون بندخل ريانه و عبد الصمد للمدرسه مع بعض

مع بعض ويقصدون بها يعني بنفس السنه .. مع العلم بان عبد الصمد اخوي اللي يصغرني بسنه


المهم .. جا أول يوم بالمدرسه وتلبسني امي المريول وتاخذني للمدرسه

ويروح عبد الصمد للمدرسه مع اخواني اللي اكبر مني .. وكلهم بالابتدائي طبعا

وأنا اللي افحط في المدرسه بالبكا .. وافشل أمي يا جعلها للجنه

ما ابي مدرسه بنات .. ابي اروح للمدرسه مع اخواني .. هماهم يقولون بندخل ريانه مع اخوها


فـ الغريب بذاك اليوم .. ان كل البنات الجدد يبكون خايفين من شي اسمه مدرسه

وأنا ابكي .. ابي مدرسة أولاد .. والمدرسه اللي يدرسون فيها اخواني بالذات


كثير مواقف حلوه ما تتنساش ..

وأكثر شينه مضحكه .. اتمنى غيري ينساها



لكن ملاحظة بسيطه ..

أحلى شي بالذكريات .. اننا المفروض نتذكر الأشياء حلوه .. والمواقف الزينه

اللي تخلينا غصب نبتسم اذا ذكرناها ..

و نحاول ننسى الذكريات المؤلمه .. ونعترف بأن النسيان نعمه عظيمه على الانسان




موضوع للفضفضه .. وانا ما انعطى وجه بـ هالسوالف

يعطيك العافيه مستر ماجد








تحياتي


ريـــانــــــ الـــعـــود ــــــــة