أحباب الله . .

**ريـانـــــة الـعـــــووود** · 03-05-2006, 12:46 PM

السلام عليكم ورحمة الله وبركاته

اشلونكم ؟؟ وش اخباركم ؟؟

أنا شفت إننا من زمان ما قعدنا بالصالة ..

فـ حبيت اناديكم عشان نتقهوى اليوم بالصالة

على قهوة أخونا لويس طرجم

وحلا أختنا شهوده التشيز كيك

موضوعي عن الأطفال

أحباب الله

جاتني فكرته من لولو .. حبيبة ألبي .. بنت أخوي

صغيرونه .. وتوها فهمت معنى كلمة لا

كل ما جات تلمس براد الشاي .. صحنا عليها كلنا .. لا لا لا

لا لعبت في المويه .. قلنا لها لا لا لا

لا مسكت سكين .. طرنا فيها بـ لا لا لا

لا بغت تطفي التلفزيون أو تسوي أي شي غلط

نفس الحكاية .. كلنا وبصوت واحد لا لا لا

صار كل شي ممنوع ..

وصارت الكلمة الوحيده اللي تنطقها لا لا لا

طبعا مع حركة الراس يمين ويسار

نناديها .. لولو تعالي .. ترد : لا لا لا

اجي بشيلها أو العبها .. تقول : لا لا لا

امد عليها حلاوه او بسكوت .. نفس الشي : لا لا لا

وبصراحه تموتني ضحك يوم تقولها اسم الله عليها

ومن كثر حبي لها .. ومن كثر ما افكر فيها ..

صرت اتأمل تصرفات الأطفال وحركاتهم ولعبهم

وليش سبحان الله من صغرهم الأولاد يختلفون عن البنات

الأولاد مثلا من صغرهم .. يحبون المفاتيح ..

يحبون يشيلونها بجيوبهم أو يمسكونها بيدينهم طول الوقت

مفاتيح الأبواب .. مفاتيح الدواليب

وبالذات مفاتيح السيارة ..

احسهم يعشقونها عشق مو طبيعي

والبنات .. يحبون الأمشاط والبكلات

ويفرحون بالأرواج إذا لقوها طايحه

يقعدون يرسمون بوجيهم أنواع اللوحات التشكيلية

يحبون يلبسون الجزم – وانتو بكرامة - اللي كعبها عالي

و عندي مقطع فيديو

بأول يوم مشت فيه لولو

و كانت تحاول تلبس جزمة عالية

وطاحت يا جعلني افداها

وطبعا ما ننسى حبهم للعباية .. وجلال الصلاة

لا شافوا أي وحده لابسة عباتها قاموا يصيحون

ويرفعون ايدينهم .. يعني يله خذونا معاكم ..

ما يهمهم وين يروحون .. المهم انهم ينشالون وبس

حبهم الغير طبيعي للتلفون .. وللجوال بشكل جنوني

من يوم يرن التلفون .. يركضون يبون يردون

والجوال يصيحون الين ياخذونه

يبونه يقعد في ايدينهم حتى لو ما كلموا

المفيد .. أو الزبدة .. بالموضوع

اللي عندهـ / ـا موقف حلو وطريف

صار لهـ / ـا مع أي طفل

أو صار لـ طفل قريب لكم

يا ليت يجي أو تجي ..

وتقطونه هنا

وتشاركونا جميع

بمواقفهم الحلوه والمضحكه

وما ننثى أبو رحلة وولد اخته ..

اللي يحب يتأثف على كل حاجه يثويها

بانتظاركم

تحياتي

ريــانــــــــة الــعـــــــــــووود

**SHAHAD** · 03-05-2006, 01:02 PM

وعليكم السلام و رحمة الله و بركاته

" ريـانـــــة الـعـــــووود "

*
\
/
/
\
*

اقتباس:

اشلونكم ؟؟ وش اخباركم ؟؟

حنا بخير و نعمه ... أنتِ شلونتس ؟!!
عساتس بخير !!

*
\
/
/
\
*

اقتباس:

أنا شفت إننا من زمان ما قعدنا بالصالة ..
فـ حبيت اناديكم عشان نتقهوى اليوم بالصالة
على قهوة أخونا لويس طرجم
وحلا أختنا شهوده التشيز كيك ..

أي و الله بس اللي ما يشرب قهوهـ
يتفرج عليكم و لا عادي يجيب له عصير ؟!!

*
\
/
/
\
*

اقتباس:

موضوعي عن الأطفال
أحباب الله

أحلى شئ بهالدنيا قال تعالى : ( الْمَالُ وَالْبَنُونَ زِينَةُ الْحَيَاةِ الدُّنْيَا ) .. سورة الكهف ..

*
\
/
/
\
*

اقتباس:

جاتني فكرته من لولو .. حبيبة ألبي .. بنت أخوي ... صغيرونه .. وتوها فهمت معنى كلمة لا
كل ما جات تلمس براد الشاي .. صحنا عليها كلنا .. لا لا لا
لا لعبت في المويه .. قلنا لها لا لا لا
لا مسكت سكين .. طرنا فيها بـ لا لا لا
لا بغت تطفي التلفزيون أو تسوي أي شي غلط
نفس الحكاية .. كلنا وبصوت واحد لا لا لا
صار كل شي ممنوع ..
وصارت الكلمة الوحيده اللي تنطقها لا لا لا
طبعا مع حركة الراس يمين ويسار
نناديها .. لولو تعالي .. ترد : لا لا لا
اجي بشيلها أو العبها .. تقول : لا لا لا
امد عليها حلاوه او بسكوت .. نفس الشي : لا لا لا
وبصراحه تموتني ضحك يوم تقولها اسم الله عليها

ربي يحفظها و يخليها لكل عين ترجيها .. ( ما ودك تخلينها تسجل معنا بإسم لولو لا لا و بعدين نكنسل عبودي و نحطها مكانه ) ...

*
\
/
/
\
*

اقتباس:

المفيد .. أو الزبدة .. بالموضوع
اللي عندهـ / ـا موقف حلو وطريف
صار لهـ / ـا مع أي طفل
أو صار لـ طفل قريب لكم
يا ليت يجي أو تجي ..
وتقطونه هنا

إن شاء الله بس أذكر شئ أقطه هنا

*
\
/
/
\
*
ريـانـــــة الـعـــــووود
تسلمين على هالموضوع
و الله لا يحرمنا تواجدك الرائع ...

*
\
/
/
\
*

شهووودهـ

**ريـانـــــة الـعـــــووود** · 03-05-2006, 02:08 PM

حي الله SHAHAD ..

هلا والله وغلا ..

تعالي اجلسي هنا بجمبي ..

صار ما تشربين قهوه يا يبعدي

هالحين اجيب لتس من عصير المانجا

اللي سوته سحابة حب .. الله يردها لنا بالسلامه

وناكل من الحلا .. يا كل الحلا انتي

إذا على لولو .. ترا ما تعرف إلا للخراب ..

تحب المطبخ ومو لله هالحب

بس تدخل المطبخ تبدا تفتح بالدواليب السفليه

وتظهر كل اللي فيها .. من باب الأذية

يعني بجيبها وادخلها مقلط الحريم تخرب عليكم

تسلمين شهودتنا على المرور ..

ولا تنسين تمرين علينا بكرة ومعتس سالفة زينة

تحياتي

الخاتمة · 03-05-2006, 07:10 PM

هلا والله
بريانة العود

موضوعك حلو مرة
حبيت اسجل اعجابى

لانى مستعجلة
واول موقف بسدحة عندكم فى ذا!!!

فى امان اللة
اختك

**ريـانـــــة الـعـــــووود** · 03-05-2006, 09:30 PM

ويا مية هلا ومسهلا بـ الخاتمة

حياتس الله يا خاتمتنا ..

بإنتظارتس يا بعدي انتي وشهودة

تجوني باتسر .. بالضحى .. بالعصرية

بأي وقت تحبون .. المهم انكم تجون

تحياتي

**معذبه** · 03-06-2006, 01:04 AM

مرحبا

لالالا <<< هذي الكلمة أهون

عندنا طفلة ما كملت السنتين

تعلمت كلمة ( تفو عليث ) من الاطفال اللي تلعب معاهم

وكنه مافيه قاموسها الا هالكلمة

عند اي سبب ترد .. تفو عليث لووووووووووووووووووول

بس بالتاكيد ما تعرف شنو معناها

تحسبها لعبة

سوينا المستحيل عشان ما تقولها

بس ماكو فايدة

مصره على تفو عليث

يعني نصيحة لا تخلون اطفالكم يقعدون مع اي احد

بس المشكلة اذا كانوا هذول الاطفال من عائلتك ولابد ان الطفل يلعب معاهم

ميرسي خيو

**شباب في رحله** · 03-06-2006, 09:39 AM

اقتباس:

المشاركة الأصلية كتبت بواسطة ريـانـــــة الـعـــــووود

وما ننثى أبو رحلة وولد اخته ..

اللي يحب يتأثف على كل حاجه يثويها

^
^
^
ياحياتي يابو رحله

دائماً تكون مصدر الهام كبار الاقلام والكوتاب

ياحبي للمبزره قسمن

طيب الحين السؤال لتس ريانه

انتي تفضلين الورع يكون بنت ولا ولد <<< العن ام السؤال

الله يعطيتس العافيه ريوونه موضووع لزيز اووي

**ريـانـــــة الـعـــــووود** · 03-06-2006, 12:53 PM

حي الله اختي .. معذبه

اشلونتس يا بنية .. ؟؟

تعالي اقعدي هنيه بـجمب شهودة

وتقهوي يا بعدي ولا تنسين تحلين

واعذريني يا خيه لأني ما رحبت فيتس

يوم الفيتي لبيتنا ..

صار تقولين ..

اقتباس:

عندنا طفلة ما كملت السنتين

تعلمت كلمة ( تفو عليث )

يا جعل ربي يسعدها ..

متخيله هالكلمة تطلع من فمها مثل العسل

اقتباس:

عند اي سبب ترد .. تفو عليث

هذي والله الفشيلة

بالذات لو قالتها قدام ناس أغراب

اقول لا تاخذونها معكم لأي مكان تروحونه الين تهون عن هالكلمة

اقتباس:

سوينا المستحيل عشان ما تقولها

بس ماكو فايدة

انتم اتركوها براحتها ..

الين هي تنساها بنفسها ..

هي هالحين فرحانه اللي حفظت لها شي تقدر تقوله

وتفرح اكيد لا شافتكم كلكم تكلمونها وتحاولون فيها عشان تتركها

حياتس الله يا عذّوبه << وش رايتس في اسم الدلع ؟

والله ونستينا بسالفتس يا خيه

ومشكورة على النصيحه ..

والله يخليلكم بنيتكم .. وتشوفونها عروس يا رب

بس طبعا بدون كلمة ثف عليكم ..

حي الله شباب في رحلة .. معزبنا الكبير ومُـلهمنا

انت يا بو رحلة اتفضل اقعد بأول الصالة لا هنت

الين يجون باقي الشباب ويقلطون معك

وهذي القهوة .. هالحين تجيك مع سلف ( أخوي الصغير

) < امون صح ؟

اقتباس:

انتي تفضلين الورع يكون بنت ولا ولد

أنا والله افضل الورع لما يكون ورع .. والبنت لما تكون بنت << احلفي

وأفضلهم اثنينهم حدهم صغار .. وما يفهمون

أما لا كبروا يبيخون .. احسهم يصيرون سامجين

يعني من بعد تقريبا سن الـ 5 سنوات

تصير أنواع السماجه والدلع الغير مهضوم << غيرت الموضوع

حياكم الله يا معذبة انتي و أبو رحلة ..

نكمل سواليفنا إن شاء الله لا جو الباقين

هلا ومسهلا

**nAmLaT nAjD** · 03-06-2006, 01:41 PM

لي رجعه ان شالله

**SHAHAD** · 03-06-2006, 05:03 PM

بــــــاكـ

*
\
/
/
\
*

" ريـانـــــة الـعـــــووود "

*
\
/
/
\
*
هذاني رجعت لكـ بسالفة طازهـ أمس اللي صارت
*
\
/
/
\
*

هذي سلمتس الله أختي الصغيرهـ تنامـ عندي طيب و طبعاً متعودهـ تمسك يدي و هي نايمة

*
\
/
/
\
*

المهم أمس أنا كنت خرمانة نوم و مالي خلق لها يوم مسكت يدي إلا طرت بها المسكينة أقولها خلي إيدي ابي أنامـ

*
\
/
/
\
*

بكل برائه تقولي طيب إقطعيها و عطيني إياها
و يوم قلت لها بس بعدين ما يصير عندي يد

*
\
/
/
\
*

قالت لي لا بكرا أروح أشتري لك يد جديدهـ لونها أخضر

*
\
/
/
\
*
و بس خلاص

*
\
/
/
\
*

شهووودهـ

**nAmLaT nAjD** · 03-06-2006, 05:03 PM

وعليكوم السلام ورحمتو الله وبركاتوه

اهلين يافتاه ..

موضوع حلو من جد ..

ورجعني لايامنا اول مع هيبه جعلها الصلاح

كنت من جد استمتع بالمواضيع اللي مثل هالنوع ..

ممم انا عندي اخو فله مو صاحي

<<البتول تعرفه زين

عليه حركااات .. بسم الله عليه يتكلم كانه كبير وطوله مايجي ربعي

<<تكفين يالعماره بس

احد مواقفه ..

دايم لما يكون جوعان وعصافير بطنه تسولف اقوله هذا البيبي اللي في

بطنك

.. وصدّق .. قبل فتره جلس مع جدي ويطالع بطنه وسااكت ..

سألوه الموجودين وش عندك؟

قال في بطني ولدين وامهم جالسه تلبسهم

ضحكوا عليه وكشخ الولد <<يحسب انه جد خفيف دم

مادروا الا الولد يتقلب ويتشقلب ومابقى حركه ماسواها

ولما سألوه ليه يسوي كذا قال وبكل جديه

جالس العبهم

يوم قالوا لي عنه اذكر اني غفلت من الضحك ..

الصغار فيهم براءة تجنن وتصرفاتهم تجي تلقائيه بدون تفكير

او تصنع ومرات كلامهم يصير كبير عليهم تسنتس تشوفين رجال طوله نص متر

لا شفت تصرفاتهم كذا ماودي يكبرون <<بينتظرونتس ياخاله بس

ريانه موضوع روعه .. وهذا شغل الصاله سواليف وفله حجاج ..

بعطيتس العافيه ياحلوه .. وننتظر الباقين ..

اعلانات المنتدى