*
*
*
وهكذا اسدل الستار على اخر فصول القصه بعدما تزوج شادي محبوبته صيته ورزقوا باولاد وبنات واحفاد وحفيدات وابناء احفاد وابناء حفيدات ، نعم نعم لقد عمروا في الدنيا الى ان تعدوا عمر الديناصورات
مايستفاد من هذه القصه :
قاطعني الجمهور الغفير قبل ان اكمل وحبات الطماطم وقشور الموز تتقاذف نحوي
هييييييه يابو الشباب .. صاحي انت ؟؟
انت بعقلك ولا تحت تأثير المخدر
دافعين فلوس علشان ندخل ونسمع قصة وبالاخر جايبين لنا واحد صامخ ينهيها قبل ماتبدأ
وبعد التهزيء والكلام الجارح في حقي .. والعبارات النابيه التي اخجل من ذكرها
ضحكت ضحكة ترقيع وقلت لهم .. هدأوا من روعكم ايها السلنتح ماهكذا تورد البقر
انا تعمدت ان ابدأ من النهايه لان هذا فن من فنون القصص يا رعاع المجتمع << لازم اهزأ علشان يصدقون
فضحك الجميع وضجت القاعه بالضحك والكركره حتى كاد ان ينفذ الاكسجين << يلعن ام السماجه بس
بعد ان انتهت موجة الضحك الهستيريه وعم الهدوء ارجاء القاعه .. تيقنت انني امام مجموعه من الهطف والدلوخ وان جلوسي عندهم مضيعه للوقت وقمت اسب والعن في منسق الحفلات
لكن وقع الفاس بالراس ولازم اهذر عليهم شوي
تربعت على الكرسي وقربت المكرفون من براطمي وتنحنحت معلناً بداية هذه المحاضره الشيقه خخخخخخخ
تدور احداث القصه حول شاب اطخم يشار له بالبنان ( اللي هو انا )
.. لكن على قولة المثل .. الحلو مايكملش
لقد كنت اعاني من عداوه مع شي اسمه فلوووووس .. كان يضرب بي المثل في التفليس واكل التبن
حسبت ان الدنيا ضحكت لي عندما توظفت واظهرت لي مفاتن جسدها
.. لكن اتضح انني كنت ضحية لها وانها لعبت علي وباغتتني على حين غره وكشفت عن مفاتن جسدي بدون علمي وصورتني اوانا في وضع غير محتشم ووزعت هذه الصور عن طريق البلوتوووث
توقفت قليلاً عن الكلام وارتشفت قليلاً من الماء وولعت لفافة تبغ .. وتعالت الاصوات .. كمل كمل يبو ولعبهم يسيل من انسجامهم في القصه .. فابتسمت وقلت لهم صدق انكم شعب سعودي
فضجت القاعه بالضحك للمره الثانيه .. ولكن هذه المره كانت اشد حتى انكتمت من رائحة انفاسهم الخايسه
قمت من مكاني قاصداً الخروج من القاعه لأنها قضت حاجتها معي
<< هذا يسمونه التحايل على القانون
فأمسكوا بيدي وهم يترجوني بأن ارجع واكمل لهم .. فوافقت شريطة ان يتلايطوا وياكلون تبن حتى انتهي من قصتي .. فأخرجوا التبن من جيوبهم واكلوه امامي علشان يرضوني << ام السماجه من جد
رجعت مكاني وجلست جلسة القرفصاء وبدأت برواية القصه ( كل اللي فوق مقدمه )
كما ذكرت لكم بالمقدمه انني اشتهرت بالتفليس .. ومااحس اني انسان حتى يوصل اخر الشهر واستلم راتبي .. الذي يطير في غمضة عين
كان هذا الوضع مسبب لي قلق ..
في احد الليالي ماقدرت انام من كثر التفكير .. الافكار الهدامه اخذت تراودني ذات اليمين وذات الشمال
من ضمن هذه الافكار .. فكرة افتتاح بسطة والمتاجره بالمسابح والمساويك ( تحسون اني انقط برائه )
او اصبح تاجر شنطه .. وابيع مسابح ومساويك << يقال لي غيرت الحين
الراتب الذي اتقاضاه لايسد رمق العصفور فما بالكم بالغزال الشارد
وبينما انا غارق في التفكير ولم انتبه انني قضيت ليله كامله بالتفكير الا بعد ان داعبت اشعة الشمس الدافئه وجنتاي الورديه
.. نظرت الى الساعه ونقزت بحركه رشيقه ولبست ثيابي واغتسلت وماامداني البس نظارتي الشمسيه حتى لامست قدماي الارض خخخخ وانطلقت مسرعاً متجه للعمل .. كنت متأخر على الدوام كما هي عادتي .. واقول بنفسي الله يستر لايكفشني المدير بس
دخلت الشركه .. وتسحبت علشان مايشوفني المدير حتى وصلت الى مكتبي
ماامداني اجلس حتى اتاني من الخلف ذلك الصوت الحنون قائلاً.. بدري مع وجهك
قلت له بدري من عمرك طال عمرك .. بس .. قاطعني وقال : تراك جبت لي الشيب .. انت وش سالفتك .. ياخي نفسي يوم واحد تداوم على الوقت .. بح صوتي وانا اكلمك .. ياخي وش ذا .. حس فيني ولو مره .. وخرجت دمعه من عينه وشعرت بالذنب بغيت اضمه وابوسه واقول له بس حبيبي .. خلاص ماعاد اعيدها
وانا اهم بعمل ذلك .. انقلب ذلك الحمل الوديع الى شيطان ملعون ام
وقال لي هذا الانذار الاخير لك .. وبعدها بطردك شر طرده .. وقد اعذر من انذر
جيت ابي اتدارك الوضع وامتص غضبه .. لكنه سفطني وراح بعد ماشرشحني ومسح فيني البلاط
جلست على مكتبي .. والاخلاق قافله
ورجعت لي افكاري الهدامه .. لازم اتاجر وافتك من الوظيفه ومن ذا الكمخه اللي ممتحني
ولكن قبل مااستقيل لابد العن خيـّره وامسح فيه البلاط .. ابغى اشفي غليلي منه
لكن متى انفذ هذا المخطط واطلع ؟ وكيف هي الطريقه اللي بتبرد حرتي فيه ؟
يعني مثلاً احط غرى على قزاز سيارته .. ولا استأجر قاتل مأجور واخليه يصور فعلته الشنيعه بالبلوتوث لتقر عيني
وبينما انا افكر في الانتقام .. دقني واحد على كتفي الايسر .. التفت ولقيت واحد لونه احمر وله قرنين وماسك شوكه بيده وقاعد يحك اذنه فيها
قلت له وش تبي انت ؟ ترى ماني رايق لك .. ضف وجهك وروقنا ..
قال لي يمه خوفتاااني .. انت ماتبي تلعن خيـّر مديرك وتستقيل .. قلت له وش دراك يبو ؟
قال لي صدق انك دلخ .. انا اللي قاعد اوسوس لك .. انا اللي تاخذ مني الافكار الاجراميه ياهطف
قلت له .. طيب وش تقترح ؟ ترى عجزت وانا افكر .. والمشكله ماعندي مصدر رزق غيره
قال لي .. من ناحية الرزق منت ميت من الجوع .. فيه الف طريقه وطريقه
بعدين اشتغل بالتجاره .. ترى الشغله سهله اي واحد يقدر يتاجر حتى الدلوخ واللي ماعندهم سالفه فما بالك بواحد يمتك من الذكاء والحنكه والفطنه الشيء الكثير
قلت له .. من هذا اللي تتكلم عنه ؟ دلني عليه تكفى
قال لي .. اتكلم عنك يالدلخ
قلت له .. والله انك صادز .. لكن وش اسوي بمديري ؟
قال لي .. الشغله بسيطه .. روح له بالمكتب وادبجه حتى يعض الارض وحط رجلك
وبكذا تبرد حرتك بسهوله وبعدها يصفى ذهنك وتقدر تفكر بمشروعك و تتخذ القرار بشكل صحيح
اقتنعت بكلامه .. وعزمت اني اقوم واروح له بالمكتب لكن حسيت بدقه بكتفي اليمين .. والتفت لقيت واحد لابس ثوب ابيض وله جناحين وفوق راسه دويره لونها ابيض
قلت له .. من وين طلعت لي انت بعد ؟ وش تبي اخلص
قال لي .. بصراحه ماتوقعت انك هطف تتكوك بسرعه .. العمل عباده يابو الشباب وانت تبي تترك عملك علشان اوهام .. مجرد اوهام .. قل لي من وين بتجيب الفلوس حق مشروعك يالذكي .. غير هذا ناوي تغدر بمديرك وتصفقه .. ليييييييش ؟؟ ليييييييش جاوبني
اطرقت رأسي للارض وسكت واحمـّر خداي .. وقلت بصوت خفيف .. صدقت صدقت
نط لي ابو شوكه وقال لي .. الى متى بتجلس كذا ؟؟ الين تشيب ويروح عمرك ؟؟ لازم تحرك نفسك دامك شاب .. يالله اذلف وسو مثل ماقلت لك
قلت له .. تخسي مع وجهك .. واصكه على عينه .. ويرجع ويصكني على خشمي .. واحتدم الصراع حتى مسكنا شعور بعض
في هذه اللحظه دخل المدير وهو معصب .. وقال لي .. وش هالازعاج .. مع من تتكلم انت ؟ قلت هاه لا لا مافيه شي .. كنت اكلم نفسي .. افكر بصوت عالي يعني
قال لي .. الحمد لله والشكر .. شكلك مصخن .. قرب مني وحط يده على جبهتي علشان يشوف الحراراه
وقال .. حرارتك مرتفعه .. روح البيت ريح ومني لك اجازه يومين .. انبسطت وانشق وجهي من كبر الابتسامه
وعندما ديور المدير وعطاني ظهره .. طلع لي ابو شوكه مره ثانيه وقال لي مبسوط اجل ؟ وش رايك انك بتنفصل الحين .. ومسك شوكته واتجه للمدير بحركه سريعه وغرس الشوكه في مكان ماله داعي
واطلق المدير صرخه مدويه والتفت علي وقبل مايسوي شي .. عظيت طرف ثوبي واطلقت سيقاني للريح وركبت سيارتي وابو شوكه يقول لي اصبر بجي معك .. قلت له ضف يابن الــ*** جحدته وركبت السياره وهو يسوي لي حركه بيده مافهمتها .. ويردد بتندم يالدب .. بتندم .. اشرت بيدي متجاهلاً وانطلقت بأقصى سرعه متجهاً للبيت
دخلت البيت ومريت الثلاجه واخذت لي بيبسي علشان انسى
ودخلت غرفتي واستلقيت على السرير وانا افكر .. وش بسوي الحين ؟ واذا بشتغل بالتجاره من وين بجيب رأس المال ؟؟ اخاف ينتهي بي المطاف الى بيع علب المناديل عند الاشارات
فكره تروح وفكره تجي .. ماش ماوصلت لحل .. يأست واسودت الدنيا بوجهي
اخذت علبة البيبسي لعلها تنسيني ماحصل << ناوي يعطب والديها
فتحت العلبه واخذت رشفه منها .. وانا اقول اححححح يازين البيبسي وهو بااااارد .. وبينما انا كذلك ( يمديكم )
وقعت عيني على غطا العلبه .. لقيت مكتوب بها رقم .. فكرت ارسل لهم يمكن تصيب معي هذي المره واحقق حلمي .. لكن ترددت .. ماعندهم الا الدجه ذولا النصابين .. من يوم عرفتهم والجوائز حقتهم نغمات مدري وش تبي .. واذا فسقوا وخربوها .. اعطوك كوره وقالوا انفخها بأقرب بنشر الله لايهينك
رجعت الغطا مكانه .. وشربت البيبسي حتى انتهيت .. رجعت اطالع للغطا بطرف عين .. وقلت ياولد جرب منت خسران شي .. ان صابت كان بها وان خابت تعودنا وراس مالها كم ريال
ارسلت الرقم لذولا الخمه .. وحطيت الجوال قدامي انتظر الرد بفارغ الصبر ...
بعد برهه من الزمن خخخ ارسلوا لي الرد وافتح الرساله بكل لهفه وشوق وموده << وش تبي انت
وماصدقت اللي شفته .. مبرووووك لقد ربحت خمس مائة الف ريال نقداً .. لوووووولووووووليييييي << هذي من عندي
اخيراً بحل كل مشاكلي .. اخيراً بلعب بالفلوس لعب .. اخيراً اخيراً .. وانط بحركه رشيقه وارقص فرحاً ولا رقص فيفي عبده بأيام عزها .. رقصت حتى خارت قواي خخخخ
واستلقيت مره اخرى وانا احلم بيوم غد .. متى يجي .. اخيراً ضحكت لي الدنيا واظهرت مفاتنها لكن هذي المره صرت ذيب وصورتها وانتقمت لنفسي
قضيت هذيك الليله وانا افكر بصباح اليوم التالي .. هذا يوم تاريخي بالنسبه لي .. لا بالنسبه للعالم العربي والاسلامي .. لا لا بالنسبه للعالم اجمع خخخخ
الحلوه دي قامت تعجن بالفجريه .. والديك بينده كوكوكووكووو بالفجريه
كنت قاعد اسمع الاغنيه هذي وانا جالس بالسياره انتظر شركة البيبسي تفتح ابوابها .. مابقى الا دقائق معدوده ويتحقق حلمي .. فجأه انفتحت البوابه والموظفين دخلوا .. وانقز .. وادخل عليهم واعطيهم الادله والبراهين علشان يسلموني الجايزه .. قال لي الموظف بنسلمك الجايزه لكن لازم ناخذ لك كم صوره علشان ننشرها بالجرايد ونعلق صورك باللوحات الاعلانيه في الشوارع .. رديت بدون تفكير .. مش مشكله سو اللي تبي
بعد ماانهيت الاجراءات واستلمت المبلغ .. رجعت للبيت .. دخلت غرفتي ونثرت الفلوس على السرير وقمت اسبح بوسطها ثم جلست بعد ماحسيت اني هطف على هذي الحركات .. وبديت افكر .. وش اسوي بالفلوس ؟؟ ووش هو المشروع اللي بسويه ؟؟ يعني اذا سويت لي بسطة مسابح ومساويك كم الكميه اللي تغطي اسواق المملكه ودول الخليج << يلعن ام الطموح
طيب الفلوس كثيره ليش مااسافر لأي بلد وانبسط .. ولما ارجع افكر في المشروع على رواق وامخمخ صح ..
قسمت الفلوس لقسمين .. قسم للسفره والوناسه .. والقسم الثاني للمشروع بعد ماارجع ..
طيب وين اسافر ؟؟ مافيه الا البحرين خخخخخخخخخخ
لا لا بانكوك اصرف .. قطع حبل افكاري صوت الجوال .. طلع واحد من اخوياي اسمه سعد برطم متصل .. بس هذا وش يبي .. من ايام الثانويه ماحصل بيننا اي مكالمه .. رديت عليه :
الوووو .. هلا وغلا يالله حيوووووه
هلا فيك والله .. وبعد المقدمه المعروفه والممله امثلة وش اخبارك وش علومك ويعدها علي ستين الف مره
قال لي .. مبروووووك الف مبرووووووووك .. قلت له على ايش يبو .. قال لي ياهووووه صورك ماليه الشوارع وانت تستلم الجائزه .. قلت في نفسي الله ياخذ وجهك ياللحجي .. انا اشهد اني انكبت .. وهذولا ماعرفوا الاخلاص في العمل الا عندي
قلت له .. هاه ايه ايه .. الله يبارك فيك عووقبالك يابو << يبي يصرفه
اخونا في الله .. اصر انه يجيني البيت ويبارك لي بنفسه
حاولت اصرفه بكل وسيله مشروعه وغير مشروعه .. لكن كل محاولاتي بائت بالفشل واستسلمت للامر الواقع
التـّم شمل شلة الصيـّع من جديد .. واخذنا نتجاذب اطراف الحديث ونتذكر ايام قد مضت .. يوم كنا والحب طفل ٌ ورغد العيش خصب ٌ العمر فجر الشبابي .. وبعد ماخلصت السوالف
قال .. هاه وش ناوي تسوي بالفلوس .. رديت عليه وقلت .. وش دخل امك قال لي ترى مابي منك شي .. انا ماجيت الا لمصلحتك
قلت له .. ايوه مصدقك .. طيب وش هي مصلحتي ياحكيم زمانك ..
قال لي خلني اكون صريح معك وبلاش نضحك على بعض .. انت من يوم عرفتك وانت ماتنعطى هلله .. ماتذكر ابوك يوم كان يعطيني فسحتك علشانك هطف وماتقدر تتصرف
قلت له وماتذكر يوم غدرت فيني وسرقت فسحتي علشانك انقهرت من المدرسين يوم كانوا يعاملوني معامله خاصه وينجحوني لاني كنت احلى منك
ضحك وقال لي لسه فاكر .. كنا صغار يبو والحين كبرنا
قلت له .. طيب الزبده ؟؟
قال شوف .. انا جمعت لي مبلغ محترم وفتحت شركه انا وواحد يقال له ابو رفعه وشغلنا فلوسنا بالاسهم وبتجارة المواشي ( يلعن ام الفرق ) ويوم توفقنا صاروا معارفنا يحطون عندنا فلوسهم ونشغلها لهم .. وياخذون ارباحها اضعاف مضاعفه .. يعني كأنك مستثمر فلوسك في بنك وتجيب ارباح شهريه .. لكن ارباحنا اعلى من البنك بكثيير
رديت عليه وقلت له خلاص قداااام .. واتفقنا نروح لأبو رفعه وننهي الاجراءات
رحنا لشركة ابو رفعه وشركاءه ودخلنا مكتبه ..نشبت له بالاسئله .. حتى سألته عن اسم امه وبعد مااقتنعت بكلامهم قلت لهم انا بعطيكم نص المبلغ واخر الشهر موعدنا
بعد مرور شهر رحت للشركه وانا ماسك يد خويي عشان مايحط رجله ودخلت عند الراجل و اول ماشافي قام يرحب .. وقبل مايبد بالهذره علي قلت له اخلص علينا وش صار معك ؟
ابتسم ابتسامه عريضه ولمعت عينه اليمنى .. فتح درج المكتب ورمى علي المبلغ اللي اعطيته .. ورمى غيره ثلاثة اضعافه .. فاتسعت حدقت عيني وسال لعابي وبغيت ارقص من الفرحه زي رقصة فيفي عبده ( راجع ماذكر اعلاه )
لكن سيطرت على نفسي وثقلت .. شكرته بحراره وقلت شكلي بتعامل معاك على طول
قال لي .. وماله ياضنايه يشرفنا ان نتعامل مع امثالك ..مدري ليش حسيت انه يسبني
اعمى عيني الطمع وحب المال .. والاكثر من هذا وذاك هو الكسب بدون اي مجهود مني
ماغير اسربت واتصرمح طول يومي .. وفلوسي تزيد مع كل صرمحه وسربته
اتخذت قراري بعدما اطمأنت نفسي لهذا الرجل .. واعطيته كل مااملك ومابقيت لي الا حق البنزين والدخان .. والاكل طبعاً
واتفقت معه اني امره بعد شهر علشان استلم الارباح ..
في احد الصباحات .. كنت اتناول وجبة الفطور بالبيت .. بيدي اليمنى لحمة بتـّلو
وبيدي اليسرى ريموت التلفزيون .. قاعد ابلع واتنقل بين المحطات في بخفه ورشاقه خخخخخ
فجأه تسمرت ونطت عيوني بعد ماقريت مربع صغير خاص بالاخبار العاجله ..
فرار رجل الاعمال المعروف ابو رفعه وشريكه سعد برطم بعد ان نصبا على عدد كبير من الدلوخ وهربا اموال طائله تقدر بملايين الريالات ..
فركت عيوني ماني مستوعب اللي حصل .. اكيد في خربطه بالسالفه
لازم اروح لشركته علشان اتأكد بنفسي .. وماهي الا دقائق معدوده حتى دخلت الشركه والقى زحمه بالداخل .. اللي يلطم واللي يقطع بشعره واللي يدق راسه بالجدار .. سألت احدهم هل صحيح اللي طلع بالاخبار .. قال لي ادخل مكتبه وانت بتعرف .. دخلت مكتبه ومن قوة الوجه حاط شريط فيديو مسجل يواسي فيه المواطنين ويطلب منهم السماح .. وباخر الشريط قال .. انتم السبب .. انتم اللي خليتونا نستهطفكم .. ناس اتكاليين كسولين .. يبون يكسبون المال بدون اي تعب .. هييه يالدب .. ايه انت .. خلاص سكر الشريط تعبت وانا اعيد الكلام من الصبح
لقد غدر بي سعد برطم وطعنني في ظهري للمره الثانيه .. المره الاولى كانت الطعنه خفيفه وماقلت أي .. لكن المره الثاني كانت موجعه من قوتها قلت احححح
<< شيلوا الكيبورد منه
رفع احد الجماهير الغفيره يده وقال لي .. ممكن اتكلم ؟؟
قلت .. انتم لين الحين هنا خخخخخخخخ تفضل تفضل
قال لي .. الحين انت فصلت من عملك وضيعت فلوسك .. طيب وش تشتغل الحين ؟
نقز واحد ثاني وقال .. ايه صح وش تشتغل .. ونقز ثالث وقال .. فين تشتغل هاه ؟؟
قلت لهم .. مثل ماانتم شايفين .. اجتمع بناس دلوخ مثلكم .. واحكي لهم من قصصي وتجاربي في الحياه ليستفيدوا من حكمتي ودهائي
نط واحد ثاني وقال .. بس ممكن تقول لنا كيف جاتك هذي الفكره ؟؟ فكرة الحكواتي يعني ؟؟
قلت له ابد طال عمرك .. كنت جالس بمقهى اعسل .. والتقيت بالصدفه بأحد اصدقائي القدامى
وجلسنا مع بعض وقعدنا نسولف .. سألني وين اشتغل .. قلت له مابعد اشتغلت
وعرض علي فكرة الحكواتي .. ورفضتها في البدايه .. لكنه اصر وقال لي اني مناسب لهذا العمل .. الشغله يبي لها واحد مثلك عنده خيال واسع و متمكن من النصب
كل اللي بنسويه اننا نجمع الناس الاغبياء ونحط تذاكر للدخول وشوية اعلانات .. وماعليك الا انك تجهز لك نصبه ملعونة ام وتمسك فيهم خط
قال لي واحد منهم .. يعني القصه اللي رويتها لنا مافيها اي شي من الصحه ؟؟
ضحكت وقل له .. ولا حرف واحد منها
ماامداني انتهي من جملتي حتى اكتشفت اني جبت العيد .. وان الشعب ناوين يدبغوني
عظيت طرف ثوبي وركضت .. والجمهو يركض خلفي وهم يحذفوني بالطماط وقشر الموز ..
وش خلاني اخذ واعطي معهم
.. اللي مصبرني ان العباقره والمفكرين واجهوا نفس الشي في بداية حياتهم
مايستفاد من القصه :
1 / اذا رُميت بالطماط وقشر الموز .. اعلم انك بدأت بصعود اول درجه من سلم العبقريه
2 / مالها داعي لما تبتلش بالعنوان . ههههههههه
3 / هذه الخانه متروكه للجمهور . خخخخ
4 / ياخي اكتشف الفايده بنفسك يعني لازم اكتبها
ملاحظه مهمه جداً :
تمت كتابة هذا الموضوع بواسطة العبد الفقير الى عفو ربه ( اللي هو انا ) وإضافته في مكانـ(ن) مــا .. اللي ابي اوصله انه من بنات افكاري ولدي صك عليه وأحببت ان أستهل مشاركاتي بهذا المنتدى من خلال هذا الموضوع .. الله الله بالنقد .. البنـّاء طبعاً
دنيا فرنقدس تزرع بر يطلع عدس
مشاركة: دنيا فرنقدس تزرع بر يطلع عدس
.gif)
سعيد < سعيد يكلم سعيده >