نعم افتقده وانا اردد:فاقدن لي خلي غالي فاقد الزول الجميل
فاقده والعين تدمع والضماير في ونين
خايف ان البعد ياخذ بيننا عهد وسنيين
انشد القمرا وادور في السما برج الدليل
وانشد الطير واقوله وين هذيك السنين
اين انت فحياتي بدونك اشبه بليلٍ غابت كواكبه
ورياح الحزن تعصف بجوانحي وتحطم كل غصن للفرح
روحي ككهف مهجور والثواني تمر كالدهور
واليأس ينقض على نفسي كوحش مسعور ليفتك بمابقي من أمل وسرور
عُد لما هذا البعد والجور فأنت أغلى عندي من عطر ريف دور>>شطحة
لم اصدق اني هذه الليلة على موعد معه
كنت ارقب الثواني قبل الدقائق
ياااااااااه كم انا في شوق لرؤياه
مرت الساعات ولم يصل لابد ان مكروهاً قد حدث
لالا لن اسمح لهذه الأفكار ان تتبادر الى ذهني فهي افكار قاتلة
اتجهت الى غرفتي وانا انتظر قدومه ولكنني كنت على يقين بأنه لن يستطيع
الحضور قبل منتصف الليل بعد ان يخلد الجميع الى النوم
كم اكره الانتظار لو كان الانتظار رجلاً لأكلت تبن وماقلت له شي
وضعت رأسي على وسادتي الوثيرة>>امحق وثيرة الاّ مندقة من كثر النوم والسعابيل راسمه خريطة لأهم الأنهار في العالم
غفوت من شدة التعب وعندما انتبهت ونظرت الى ساعتي واذا بها تشير الى الرابعة والنصف صباحا >>ماصارت غفوة
نهضت من سريري واتجهت الى الدور الأرضي لابد انه اتى وهو الان ينتظرني
توجهت الى المجلس فتحت الباب فاذا به يجلس على الأريكة اتجهت له
ضممته بقوة وقبلته لم استطع ان امنع دموعي من الهطول
اتجهنا نحو غرفتي
اغلقت الباب ونظرت اليه قلت له وانا ادافع العبرات :كم اشتقت لك كم افتقدتك كم احبك يا........لاب توبي"
كل هذا عشان اقول لكم ان جهازي رجع بالسلامة وبهذه المناسبة السعيدة قررت انزل موضوع في السواق
عاد بعدها يا أنكم بتقولون اشوا ان جهازتس رجع او ياليتنا من جهازتس سالمين
والأن اسحبوا على اللي فوق ودحدروا معي تحت
- - - - - - - - - - - - - - - -
القوووووووووووووصة
هي مستوحاة من الأدب "السمرمدي" أي مابين العصر الجلمباوي والعصر الهطفي
كومباااااارس :
فهيدان : الشقيق الأصغر , يشتهر بعض الأرصفه وسرقة النعله من المسجد
هواياته : تجميع القواطي وملاحق القطاوة
شهادته : ثالث ابتدائي منازل
طموحه : الحصول على جائزة اوسكار في الحفر والتنقيب >>>
مسامح : ابو طلق ,اشتهر ببيع التيوس واحياناً يخربها ويبيع دجاج
سياسته : اذا كبر ولدك العن والديه
ثقافته : ليسانس بيع وتأجير التيوس <<تصدقون انه مره لقوه كاتب على تيس ( لتقبيــل لعدم التفرغ)
هيلة : ام طلق , مشهورة عند العزوبيه اكثر شي لأنها تجيب لهم بنات<<لحد يفهم غلط
خطابــة وتجيد قرائة الكف
هوايتها : سرقة ملاعق وشوك عند زيارة الأقارب <<المخزن
أبطال القصة :
1- طلق: فتى لاله ولاعليه يعني يباري السيسان من الحيا
نحيف البنية عريض المنكبين صغير الراس طويل الأذنين >>مسخ مو آدمي
تكثر في وجهه الحبوب وخاصة في الجبهة واول ما طلعت يحسبون اهله انه جايه عنقز بس يوم صار يطري العرس دروا وش السالفة
لفحته شمس الجزيرة الحارقة بأشعتها فأكسبته اللون البرونزي المحروق>>البلا من التسدح في هاف مون
ولد طلق بين البرادين عام 2007 ق0م آب ،ايلول ،حزيران >>تهقون ليه سموه حزيران هقوتكم تهب فيه رياح محزرة ؟؟؟
ولد طلق في الشهر السابع أي انه خديج عجل على الطلعة مادرى ان الدنيا بتتفل في وجهه
2-شالح الملقب بالنمرود :فتى ملكع يحب تقليب العلوم افكاره سوداويه
الحسنة الوحيدة اللي يملكها ان فيه غميزتين في خدودة
عاد ما أدري هي خلقه ولا من أثر مطاقة قديمة
وكان النمرود كل شهر لازم يبات في السجن 29 يوم ويوم ثلاثين يطلع ويعملوه عمله ويرقع السقن تاني
ومن كثر مايدخل السجن صار يمون على العسكر حتى من زود الميانة صار يتوسط للي يوقفون ويطلعهم
3-00000000000 بعدين تعرفون منهو رقم ثلاثة
وعلى الرغم من اختلاف الطبائع الا انهما اصبحا صديقين وكان يجري بينهما
مايجري بين محبين وكل منهما يعتبر الآخر توأم روحه >>لا احد يروح تفكيره لبعيد
كانت علاقة شريفة ماغير تتن ومخدرات وحشيش وخمر وهيروين وسطو
على بعض المنازل>>كل هذا وعلاقة شريفة
وفي حزة من المرات كان طلق والنمرود يدوجانبالسيارة ويسيران على غير موضي >>موضي وهدا كلهم اسماء بنات
والنمرود يقص على طلق مغامرته ويعطيه من الرخيص والأرانب تناقز من درايش السيارة أخذ طلق
جوال خويه نمرود واستأذنه ان يتصفح الاسماء المخزنة عنده>>هذي الناس الذربة اللي تستأذن مو وحده تعرفين عليها اليوم تلقينها بكرة قارية الرسايل ومخلصه شحن البطاقة قال ايش قال تمون
قام طلق يقرا الاسماء التفت على النمرود وقال له
طلق:وش سالفة الاسماء اللي عندك كلها "في الحديقة،في السقف،في البحر،في السماء،@
رد عليه النمرود:هذولا خوياتي وانا مسميهم كذا عملية تموية عشان لو طاح الجوال في يد احد اخواني مايكشفني
يعني عندك في الحديقة هذي عبير لأن العبير وشو ريحة الورد والورد وين نلقاه فيه في الحديقة
في السقف هذي نورة لأن النور وين يجي منه من اللمبة واللمبة وينها فيه في السقف
في البحر هذي حصه لأنهم يقولون ان حصة معناها اللؤلؤ واللؤلؤ وينه فيه في البحر
في السماء_هذي مانيب معلمتكم منهو الشاطر اللي يعرفها وله جائزة عبارة عن تذكرة سفر ذهاب بدون عودة لجدة >>هذا حدّها
@ هذي توني متعرف عليها-الكلام طبعاً لنمرود- عن طريق النت ومابعد علمتني اسمها
أطلق طلق >>ياعيني على الجناس الناقص
ايه اطلق طلق تنهيدة حارة خرجت من معاليق قلبه
وقال:ياحظك يانمرود تصدق ماعمر وحده عطتني وجه ولاعمري سمعت صوت أنثى الاّ امي اذا صارت تدعي علي او لحجيه في الحرم تقول سدقة في سبيل الله
التفت عليه النمرود وقال:افا قل غيرها وراك ماقلت لي انت ماسمعت المثل القائل صديقك صديقك لاضاق صديرك
عندي وحده مسميها البلشة هذي ما أكلمها الاّ اذا بقى في رصيدي عشرة ريال عشان تسدد فاتورتي ميخالف الشكوى لله بتنازل عنها لك وتراها جتك هديتن مامن وراها جزيه>>نشمي هالرجال
ومن الفرحة طمر طلق على النمرود وتشعلق في رقبته وانحرفت بهم السيارة وبغوا يروحون عفش مطلقة لكن الله ستر وطلعوا سالمين والسيارة ماجاها الاّ شوي فلقات >>جبهه مهيب سيارة
المهم كملوا دوجانهم وقال النمرود لطلق:بس شف براي لله تراني ماشفت البنت يعني ما أدري هي زينه ولاّ شينه
قال طلق في استغراب وعلامات الاستفهام تدورحول رأسه:طيب وشلون تعرفت عليها
رد عليه النمرود :متنازل عنها لي عبيد ولد خالي قبل خمست اشهر
رد طلق:ايييييييه يعني الدعوى تعاقبوها ياحمير القايلة >>رحم الله امرءا عرف قدر نفسه
اخذ طلق الرقم وطلب من النمرود انه يوصله للبيت
قال النمرود:وراك عجل تونا ما أروعك والليل باول شبابة يوم زان السهر وش عجلك بالرحيل تونا تونا>>ورا ورا عااااااااااااااشوا يارايق معكم دهن عود ياجماعة الخير البنت استنزلت
قال طلق:لا بس ودي ألحق اكلم البنت قبل ترقد >>غشيم في هالأمور
وصل طلق لبيتهم وقابلته امه هيلة في الصالة واستوقفته قائلة :وين جيت منه يالسمرمديىغريبة اليوم ماسكرت مع دشيرك لتالي الليل
قال :لا يمه بس احس اني مصيخين وطلع من مخباته باغة فيها علاج "لزوم التموية عن رجعته مبكر"
الاّ على طاري التمويه
اذكر يومني في سادس ابتدائي
سكنوا جنبنا ناس >>احلفي عاد
وطقيتها صداقة مع بنتهم شيخة
وفي عصر يوم من الأيام كنت اسألها عن اهلها بحكم انهم توهم ساكنين عندنا واسألها عن ابوها وامها واخواتها واخوانها لين وصلنا لأخوها
صويلح-ياطر جيبي- قلت لها :شيّووخ>>لزوم التميلح والتمصلح والتفلطح ماشية على الوزن خلوها
اخوتس صالح وش هواياته
قالت:والله ما أدري بس انه يحب البليلة وبسكوت ابو ميزان وعلك ابوطبعة
وانا اللي التفت عليها بغيت اطبع الهندسة ام كرتون اخضر على جبهتها >>ناسيتها في مخباتي عقب المدرسة وماغيرت مريولي
بس تذكرت صويلح وانها بعد كم سنة بتصير عمة عيالي تعوذت من بليس وتفلت عن يساري ثلاث مرات>>جزمت انها تاخذه
قلت :لا يعني وش يحب ؟؟يحب يلعب كيرم او يحب يلعب كورة او التعارف وتبادل الصور>>كنت مركزة على الثنتين الأخيرات
ردت شيخة :توها فاتحة خشتها بترد علي الاّ هذا صويلح مقبل على سيكلة فيلبس الأصلي مقاس 17
المهم يوم شافنا وهو اللي يربط فرامل وتوهق لأنها خربانه ويوقف السيكل برجله وتحك في الزفلت >>بحكم ان العيال مايعترفون بش اسمه نعال
وهي اللي تقدح شرار وانا اللي اقعد اتفل على رجله عشان تبرد عليه ويوم رفعت راسي ولا عيونه بازرة حول ماتناتق من مكانهن وهو اللي ينزل ويحط حرته في اخته ويتوطى في بطنها عشانها طالعة في الشارع وانا اللي انحاش لبيتنا قبل مايعطيني المقسوم من الطق
ويوم جا حزة مسيان وانا اللي اروح لهم"شين وقوايه عين"
واتمشى انا وشيخة في بيتهم وندخل غرفة صويلح وأشوف اشرطة
فيديومتنثرة على الكمدينة قلت في نفسي خليني اشوف وش يحب عشان اجيب له شريط هدية واناظرهن
ولاهن درب الزلق وقريندايزر ومنوعات خليجية واحد محكوك اسم الشريط
ويوم جينا نطلع وأشوف دالوب صويلح مفتوح وفيه اشرطة قلت لشيخة:وش ذا الاشرطة
قالت:هذولي اشرطة كورة ماخذهن صويلح من ربعة ومحذرنا لاناخذهن
ولانشوفهن والاّ ان يلعن والدا والدينا
وانا اللقافة تلعب في عبي قلت فرصة خلينا نشوف وش يشجع
الشريط الأول :الهلال xالنصر 5-0>>تعصب حتى وهو نصب
الشريط الثاني:الاتفاق xالرياض2-0>>عشان خاطر حبايبنا اهل الشرقية
الشريط الثالث:هجرxريال مدريد8-0>>
وانا اللي امعط الشريط الثالث قلت بشوفة ودخلناه في الفيديو ونشب الشريط
وانا اللي اتله بقوة وينقطع الشريط وتقعد اخته تصيح وتسطر خدودها يحق لها بتنجلد قلت ولا يهمك الليلة الشريط عندك
وانا اللي اقمز لبيتنا واقول لأخوي ابي شريط هجرxريال مدريد
قال اخوي الحمدلله وش جاب هجر لريال مدريد هجر حدة الحمادة والجبلين
ونجران والفيحاء ويخب"راجع جدول الدوري لأندية الدرجة
الأولى ">>بتتكفخ الليلة الله لايعوق بشر
عاد هينا السؤال :تهقون وش كان الشريط
عكة سمن :هذاني واقفة قدامك لي ساعة-تو ساعتين - ماشفتني جعلك العمى اللي يعمي عيونك >>اكيد يعمي عيونه اجل خشمه
ويوم برّق الا هذي عكّة وهو له ساعة يناظر فيها ويحسبها شبك تبرعات
بالملابس من الطبقات والالوان اللي لابستهن وخاصة انها لابسه
العباة القديمة اللي ترفع على الذراع وكل شي طالع لدرجة ان الواحد يمدية يرسم موديل الثوب
المهم وهي اللي تركب معه وينطلق الى احدى حواري عتيقة الغير بعيدة
التفت عليها طلق وقال:وراتس ياكافي معطتني ظهرتس وريني وجهتس الصبوح>>مأمل الأخ
ردت عليه عكة سمن بضحكة خجول وصوت تقل صوت اللي يحفرون بها في الشوارع اللي لها زقم
وقالت:بصوت يتصنع النعومة هذاني فاتشة من ركبت معك
طلق:يالله عاد بلا سخافة وريني وجهتس جعلتس لابو الوجيه>>امحق غزل
وهنا رأى دائرتين حمراوين في منتصف ماكان يعتقده غطوة
واثرها عيونها تقلبت من الحنق
وتوسوس له نفسه انه ينحاش ويوم جا يفتح باب السيارة مسكتة عكّة
وقالت:على وين يالحبيب دخول الحمام مو مثل خروجه>>مالت على امثال تعرفينها
وفي هذه اللحظة طبت عليهم الهيئة واقتادتهم للمركز وزج بهما في السجن
ومازال طلق يقضي فترة العقوبة
وضاع عمره والسبة عكّة سمن
مايستفاد من القصة:
1- ان جميع ماذكر اعلاه لايمت الى الحقيقة بصلة من ابطال واحداث>احلفي
2-على الأب ان لايسكر امام ابناءه لأن هذا سينعكس سلبا عليهم>>ومن وراهم مايخالف
3- اللي يعرف احد يتوسط لها الضعيف المنطول في السجن
4-قصتي مع شيخة وصويلح خرطي انا ماعرفت يوم اني صغيرة الاّ محمد العبدالله - الله يرحمه- المؤذن في مسجدنا
اذا جا وقت الصلاة ارتزيت عند الباب عشان يعطيني حلاو برميت
5-البطل فهيدان اخو طلق واللي ذكر في اول القصة هو راعي السيارة الكابرس اللي راح فيها طلق للموعد المشؤم
لن أعيش في جلباب عكّة سمن
