اللي يمون على المستشار يدخل , واللى مايمون بعد يدخل :)

**المستشار** · 12-31-2005, 09:26 PM

السلام عليكم ورحمة الله

كيفكم زكرتيون وزكرتيات

الموضوع اللي راح اتكلم عنه منتشر بمحيطنا الإجتماعي

وكلنا نعيشه ونلمسه في علاقاتنا مع بعضنا البعض

وأرغب بطرحه وتحليله بمعيتكم وننظر له من جميع الجوانب

سواء إيجاباَ أو سلباَ

الموضوع بإختصار هو :- (( الميـــــــانــــــة )) .

لاشك أننا جميعا مرتبطين بروابط أسرية واجتماعية متعددة

وبالتأكيد أن هناك علاقات قريبة من البعض

وبالمقابل هناك علاقات متحفظة مع البعض الأخر .

ولكن أعنقد أننا نختلف في تحديد نوع علاقاتنا ومن نضعه في

خانة االعلاقات المقربة أو نضعه في خانة العلاقات المتحفظة

إن جازت لنا التسمية .

ولكي تتضح لنا الصورة أكثر دعونا نقسم العلاقات الإجتماعية

ونحلل كل علاقة على حده لنتمكن من الوصول لمعطيات

تساعدنا على تشخيص محور موضوعنا

اولا : العلاقات الأسرية : وتندرج تحتها عدة علاقات تشتمل مايلي :

1- العلاقة بين الزوج و الزوجة :

لاشك أن العلاقة بين هذين الطرفين هي الأهم بالعلاقات

الأسرية على الإطلاق فهي قاعدة للعلاقات التي تنبثق منها

كعلاقة الاب بابنه او ابنته وعلاقة الاخ واخته وجميع العلاقات

التي سوف اوردها بالتفصيل , بظني أن العلاقة بين الزوج والزوجة

يجب ان تكون ذات ميانة متناهية ولأبعد الحدود ويكون

كل طرف كتاب مفتوح للطرف الأخر

وأن لاتكون هناك حواجز او خطوط حمراء بينهما

إذا شعرا فعلا أن كل منهما يجسد الأخر فبالتالي نتحاشى الفتور

والخلافات التي قد تطرأ على الحياة الزوجية بعد فترة قصيرة

من الزواج ولجوء كل طرف إلى حلول قد لاتكون مستحبة وتؤدي

أحيانا لتفاقم المشاكل بدلا من حلها .

2 - العلاقة بين الأب وابنه :

برأيي الشخصي يجب ان تكون العلاقة بينهما بميانة ولكن

دون المساس بمكانة الأب عند الإبن وأن لاتتحول الميانة إلى تجريح

أو قلة إحترام من كلا الطرفين .

وماينطبق على العلاقة السابقة ينطبق على العلاقات بين الأم

وابنتها والأم وابنها وبإمكان الأعضاء الأعزاء التعليق

على هذه العلاقات بتوسع أكبر .

3 - العلاقة بين الأخ وأخيه :

هنا نلمس التباين في هذه العلاقة فبينما نجد أن بعض

الإخوة تكون العلاقة بينهما مقربة جدا وخصوصا لمن هم في

مرحلة سنية متقاربة نجد البعض علاقاتهم

يسودها التحفظ والجمود ولو راقبناهم ماالذي يعمل كل

منهما على حده مع أصدقائه لوجدنا العجب فسوف نرى كل

منهما يكون على سجيته يمازح هذا ويضحك مع ذلك

وبكل أريحية دونما أي تحفظ .

4- العلاقة بين الأخت وأختها :

ربما لدى العضوات توضيح اكثر لماهية العلاقات بين

الأخوات وإن كنت أعتقد انها لاتختلف إلى حد كبير عن العلاقات بين الأخوة .

ثانياَ : العلاقة بين الأصدقاء :

حتى نتحدث عن هذه العلاقة يجب ان نحدد مفهوم الصداقة

فكل أمرء منا له تعريفه الخاص للصداقة ومن الذي نطلق عليه

صفة الصديق وحتى لانتشعب في الموضوع لننقبل مجازاَ

جميع المفاهيم الخاصة بالصداقة حيث انها ليست محور طرحنا الرئيسي

عندما ننظر للعلاقات بين الأصدقاء نجد انها لاتخلو من الميانه

المتناهية ولكن قد تتعدى الحدود المفترضة فتتجازوها

لمرحلة التجريح الشخصي , وأيضا تعريض البعض لمواقف

محرجة والحجة الدائمة ( الميانه ) حتى أننا نرى ردة الفعل

لبعض الناس وبالعامية ( انت ماتنعطى وجه )

أو (الشرهه علي اللي عطيتك وجه )

فتتحول (الصداقه ) إلى خصومة ومشاحنة , كذلك

نجد البعض يكون في قمة احترامه بالتعامل مع زملاء العمل

او الأشخاص الذي يرتبط بهم إرتباط محدود بينما نجده

وقحا وبذيء اللسان مع أصدقائه المقربين والحجة الدائمة ( الميانة ) .

في ختام طرحنا المتواضع لاشك بأن هناك تساؤلات تدور

بالذهن وتبحث عن إجابة شافية :

1- هل الميانه هي الشفافيه في العلاقات ؟

2- هل من الضروري أن تكون علاقاتنا ذات ميانه ؟ أم

انها تعتمد على نوعية هذه العلاقات ؟

3 - ماهي المعايير التي على ضوئها نحدد مسار العلاقة لتغليفها

إما بالتحفظ او بالميانة ؟

4- لو صادفك شخص حاول ( يقط الميانه ) وانت لا تستسغيه

فهل ترفض هذه الميانه صراحة أو تجاريه وتتحمل تبعات تصرفك ؟

تحيه للجميع ,,,

[لوحة8]برشلونة في قلوبنا[/لوحة8]

**Buffy** · 01-01-2006, 10:26 PM

السلام عليكم ورحمه الله وبركاته ,,
أخوي المستشار موضوعكـ فنتاستكـ..

ذكرتني بوحده مصريه تقول إيـه يعني ميانه ،، قلتلها يعني ميانه ماعرفت شلون اقولها <<<< فسر الماء بعد الجهد بالماء..

لـــــــــــــــــي رجعه عندما اعطل >>>>>>>>>>>>> مسكـت معي على ذا الكلمه ..

**ماشي الحال** · 01-02-2006, 03:41 AM

السلام عليكم

واخيرا المستشار رجع لهوايته المحببه / طرح المواضيع

بس هنا اشوف انك طرحت موضوع وتبي تطرح الميانه

لا ياحبيبي يبي لك وقت عشان

تطرح الميانه معنا ( واحد تفكيره دايم غلط )

بتكلم بعشوائيه عن الميانه بشكل عام وبعدين برجع لاسئلتك

من المعروف ان مسمى الميانه اوجده المجتمع ويندرج تحت هذا المسمى

تعاريف تختلف من اشخاص لأشخاص الكل حسب مايراه يصلح له

انا اشوف تعريف الميانه:: انه كسر للحواجز بين الاطراف

والتعايش براحه أكبر ..

بس كلمة (( راحة أكبر )) تختلف من شخص لاخر

فيه ناس تشوف راحتها انه يقول اي كلمه يبيها وصخه

او مهب وصخه

وعذره انه يمون ومفروض ماتزعل ياللي قدامه ..

وناس راحتها في انه يطيح الميانه مع اللي يرتاحلهم ومايبي الجلسه

فيها كلفه ابد بس عارف الخطوط الحمراء عند كل شخص قدامه

لان اختلاف الاطباع شي اكيد بين كل واحد يعني لو قلت لمحمد

يالوح عطني الريموت ادري انه مهب زعلان ولا هو مفكر فيها ابد

بس ماراح اقول لفهد يالوح لان شخصيته ومدى تقبله لبعض الكلمات

فيها حساسيه نوعا ما ومع هذا فيه ميانه بيني وبينه ....

وخلنا نتكلم بواقعيه أكثر وفضفضه اكثر

عن نفسي اعيش بمجتمع يخلط بين البدو والحضر حنا عاد مانقول حضر

نقول حساويه وانتبه ترى البدوي اللي في الحسا

مايرضى تقوله انت حساوي؟

الحساويه بينهم بين بعض يقولون كلام هم يتقبلونه عادي ويوصل

للالفاظ اللي ماتعود انه يسمعها البدوي وتوصل احيانا للشرف

والحق يقال انهم يقولونها بدون نيه سوداء يعني مايقصدونها بنفس معناها

بس تعودوا عليها .. ولو حصل ان بدوي عاش معهم احتمال تصير صدامات

قويه وتنتهي بزعل وهذا يجي مثل ماقلت من التعود على سماع الالفاظ

الى الوصول انها ماتعني له شي او ينصدم بكلمة تطلق عليه لاول مره

طبيعي ردود الافعال تتباين من شخص لشخص ولكن المتفق عليه هو

حاول تعرف خطوطي الحمراء ووقف عندها تلقاني تلقائيا اعاملك بالمثل...

طبعا ذكرت شي من اشياء تحدث في مجتمعي اللي اعيش فيه

واحتمال العكس حساوي مايتقبل مزح البدو يعني المثاليه في الميانه

مهب حكر على فئه عن فئه تعتمد على الشخص وحسن تعامله مع من حوله

فيه شغله ثانيه ::

الحين انا امون عليك يالمستشار وامون على سلف خمسه

بس انت وسلف ماتمونون على بعض ابدا وحصل انكم اجتمعتوا عندي

تخيل اني جلست احط عليك واستلمك تهزيئ طبعا امون عليكم اثنينكم

بس انت التزمت الصمت احتراما لوجود سلف

وش تسمي تصرفي في ذا الحاله ؟

مندفع بلا حدود

عديم احساس << قلتها لاني مفروض استغرب سكوتك وانك مارديت علي

يمكن تقول مالها دخل بالميانه بس لو حصل وسألتني

ياخي مالك داعي قدام سلف تقولي كذا تدري اني بسكت وبحترم سلف؟

اجابتي راح تكون عادي يارجال امون عليكم

وهذا يسحبني الى نقطه ذكرتها انت واعجبتني لانها موجوده بكذا شخص

اللي هي ::

اقتباس:

بينما نجده

وقحا وبذيء اللسان مع أصدقائه المقربين والحجة الدائمة ( الميانة )

وهذي المشكله اللي نشوفها عند البعض

تلقى لسانه وصخ وعنده كميه هائله من الكلمات الساقطه

وتصل لتجريح الاطراف اللي قدامه بالعربي هو طبعه كذا

هذا متعته عند خوياه اللي تعودوا عليه وعطوه مساحه كبيره

لاخراج ما لديه ..

ولو تقوله مشينا عند مجلس فلان يقولك لا ياخي ماامون عليهم

طبعا ما قال كذا الا انه داري ان شخصيته راح تنلغي وبيكون ماله كرت عندهم

ولا له اي تواجد يذكر لانه مهب قادر يتكيف مع جلسه جديده وفيها احترام

والغالب الحجه بالرفض انه مايمون والقبول عند خوياه انه يمون

اقول سلملي على الميانه اللي كذا

حاقة تانيه اووستاز موستشار

يجيني شخص يقولي ابيك بسالفه اقوله اوكي

والله ياماشي انت عارف ماجيت الا اني امون ولو ماامون عليك ماجيتك

*ايه يارجال مايحتاج سم امر وش بغيت ؟

والله رجال يطلبني فلوس وانا متوهق وانا ماامون الا عليك انت من العيال

*بس ماطلبت شي ولا يهمك

نفس الرجال في مكان ثاني وبعد فتره مع خوياه

يارجال ماشي مافيه خير ولو فيه خير كان مالقيته يسوي كذا

و يقول كذا يالربع انا تعبت مع ماشي ماله طب طبيب

اتوقع هنا ما حش فيني الا انه يمون ولا لا اخوي المستشار؟

سلملي على الميانه مثل هيك

انا يمكن تكلمت عن السلبيات اكثر من الايجايبات

بس يمكن عشان السلبيات او الاخطاء عموما

هي اللي تبرز اكثر من الايجايبات

لان خط سير الحياه ماشي صح ومانوقف الا عند الاخطاء..

وقلت لك انا بتكلم بعشوائيه عشان كذا يمكن

تحس فيه لخبطه بس عدّيها يااسطى

نجي للاسئله ::

اقتباس:

1- هل الميانه هي الشفافيه في العلاقات ؟

والله تختلف على حسب الانسان نفسه ومفهومه انا عن نفسي

احاول في علاقاتي تكون الميانه شي اساسي ولكن بضوابط

ماتكون الدعوى سايبه واخسر اللي كنت افكر اني كاسبهم ..

اقتباس:

2- هل من الضروري أن تكون علاقاتنا ذات ميانه ؟ أم

انها تعتمد على نوعية هذه العلاقات ؟

الشق الثاني من سؤالك يجاوب على الشق الاول

يعني اغلبنا علاقاته مع الناس تلقاها واجد بس الميانه مع اشخاص معدودين

فيه ناس تحكمني بيني وبينهم علاقة عمل وبحكم قرائتي لهم انهم

مايصلحون اتمادى معهم بالعلاقه واطيح الميانه اخليها في حدود معينه

ويمكن يصلح واحد منهم امون عليه ويمون علي

يعني مااشوف انها من الضروره

لان تكوين العلاقه مااتوقع مقرون بالميانه

اقتباس:

3 - ماهي المعايير التي على ضوئها نحدد مسار العلاقة لتغليفها

إما بالتحفظ او بالميانة ؟

ياخي بعض اسئلتك الظاهر بتخليني ارجع للدخان

بالبدايه يكون ارتياح متبادل من الطرفين نوعا ما محسوس

وخلال هالفتره راح اقرأ الشخصيه اللي قدامي وهو بعد نفس الشي

ومن الاطباع والصفات نحس انه فيه تقارب افكار

شوي يلحق شوي ورا شوي تلقى الميانه طايحه الف

او اشوف انه مايصلح وتصير الدعوى فيها تحفظ بيني وبينه

يعني المعايير اختصرها في المعطيات اللي اشوفها من الشخص

ان كان صاغ سليم او جنط منعوج

اقتباس:

4- لو صادفك شخص حاول ( يقط الميانه ) وانت لا تستسغيه

فهل ترفض هذه الميانه صراحة أو تجاريه وتتحمل تبعات تصرفك ؟

ماارفضها بشكل صريح احاول اعطيه اللي مايضرني

يعني اذا كنت واثق اني لو فليتها معه وطيحت الميانه بتعب

بحاول بطريقتي اني مااكون جلف معه وازحلقه عينك عينك

ولا اعطيه ذاك الوجه اللي يخليه يتجرأ كل شوي

يعني اعطيك مثال

تخيل انا بكره داخل العمل توني داخل عليهم الصباح

وينقز لي ذا اللي ماادانيه ويقولي بوجه تملأه الضحكه والنيه

في تطييح الميانه :: هاااه فازوا عليكم الوحده وطلعوكم من الكاس يالجلم ؟

شي بديهي بيكون تصرفي بلتفت عليه بقول يستاهلون والله

الا فلان وينه ابيه بسالفه؟ << اقولها وانا مدبّر ( مقفي )

المستشار بتغيب وتروح راح تبئى ياحياتي

بالأأألب والروح والاااااه بغنّياتي

غبت ورجعت والى الحين لياقتك full

المستشار لو اقولك سقها بحكم الميانه

راح تقولي الميانه خلها بيني وبينك

يعني الميانه مو بكل مكان حتى لو كنت امون عليك وامزح معك

فيه اماكن نوقف عندها شوي

وهذا يدفعني لسؤال اوجهه لك

هل الميانه في الغالب تعتبر عدم احترام

تصدق طرى على بالي الحين وانا بختم ردي

نشوف البعض يقول ياخي الميانه خلها بيني وبينك

قدام الكل مهب زين

طيب مادام الميانه حلوه بين المقربين ليش ننحرج منها عند الغرباء

طبعا الاساس هو الاحترام هل الميانه بمفهومها تسوي خلل نوعا ما

بالاحترام ؟

اقتباس:

ولكن أعنقد

[لوحة1]انا لا أعنقد [/لوحة1]

بويو << بحريني عنده لغة

**ريـانـــــة الـعـــــووود** · 01-05-2006, 07:47 AM

وعليكم السلام ورحمة الله وبركاته

هلا المستشار ..

كلنا بخير ولله الحمد

أعجبني أسلوب طرحك للموضوع

وتقسيمك للعلاقات .. لتوضيح المعنى المقصود

يوم شفت الموضوع .. كنت مع صديقاتي ..

فقلت لهم : به موضوع عن الميانه ببيت الزكرتيه ..

استغربوا من كلمة ميانة وما عرفوا معناها

وكنت ابي اوضح لهم المعنى .. واللي صار اني توّهتهم

قلت : لما اقول لتس يا فلانه أنا ما أمون ؟.. وش اقصد بكلمة أمون ؟

ردت وحده : أمـّون دلع اسم آمنه .. !

بغيت اشد شعري من قلة الحيلة

وبالأخير .. عرفت معناها وحده منهن .. وشرحتها للباقيات باسلوبها

اعتذر على المداخلة .. >> اتمنى ما تكون غثيثة

اقتباس: