صور من الأرشيف2005

**)( زيــاد )(** · 11-17-2005, 03:39 AM

السلام عليكم

أحببت أن أشارك أخواني ببعض الصور

هذي صور لشعيب محارق قبل سنه تقريباً صراحة لو الصو مو أنا إلي مصورها كان قلت مو في السعوديه ((مداح نفسة نصاب ))

ما أطول عليكم
1- هذي الصورة فيها الجو والشجر والنبات والمويه تحت على اليسار .

2- هذي صورة لنبات البسباس ولا أبالغ لو قلتلكم أن النبات يصل إلى الركبه .

3- صورة للجو وكثرت نبات البسباس شكله روعه سبحان الخالق .

4- هذي صورة لشجرة على اليسار وأنتبه لطير بجنبها وهو يطير .

هذا ما عندي وترنا نحتاج لنقدكم أكثر من مدحكم
>>> نقدكم هو هدفنا <<<
ويعطيكم العافية
أخوكم زيــــــاد

**عبـــودي لا لا** · 11-17-2005, 04:00 AM

وعليكم السلام

يالله حيه

ارحب ياااا زياااد

مرحباااااا مليون في ذمتي ذمه

ياعنكنك سنايدي يالذيب ماعليك من الحتسي ياشيخ

من جد بدايه صاروخيه وتشق الخشوم بعد

وبيني وبينك بيلك تكتكه

وعلى قولتهم عضو زيك لابد ان يحتفى به

وانت من اليوم مطالب بمثل هالمواضيع وبنفس المستوى يعني

(( حسك عينك ينزل مستواك

)) <<< قول أحلف

عموما : يعطيك العافيه ولي ان شاءالله رجعه بعد ما ارفع الصور

على الموقع

وتستاهل يالذيب

برايفت لبو رحله : اسمع يالذيب اخلص علي بالختم خلني ارصع هالموضوع بسرعه

ختاماً

إلى الملتقى ,,,, ابو لا لا خبز وبياله

**ماشي الحال** · 11-17-2005, 04:50 AM

وعليكم السلام والرحمه

ارحب يازياد وشلونك

وشلون شعيب محارق

هو نفسه ذا اللي صور فيه ابو جندل مسلسل عصويد؟

اولا ارحب فيك واقول البيت بيتك ومنور الحته

وعيني عليك بارده ماشاء الله عليك

دخلتك مميزه سواءا بالبرندا او بالدريشه

وصراحه الناس اللي شرواك نحرص عليهم

يعني صراحه واحد ماله الامشاركتين او ثلاث

واشوفه مهتم فينا وحاط رابط الزكرتيه zQrT.cOm

هذا اقل شي الواجب علينا نبادله الاهتمام

ومع مرور الوقت ان شاء الله وان كنت هالمنوال واحسن

ان شاء الله خصوصا مع قرب مفاجآت قادمه راح تكون

من اللي يستحقون التميز ..

وغير هذا الشخص اللي فوقي ابو خبزه وبياله

ماراح يقصر من ناحية نشر الصور هذي عن طريق

قروب الزكرتيه وقروب نواف بيك

سمعت ياعبودي؟

ماتبي مساعده عبودي ؟

عاد نجي للصور انا ماراح اعطيك انتقادات

اخليها لاهل الخبره بس مايمنع اني اعلق عليها بمدح او انتقاد

احس انها تبعث الهدوء في النظره

وراحه في البال يمكن عشان الزاويه اللي اخترتها

خلتها طالعه رايقه والجو بعد يساعد

هذي احس وطبعا من وجهة نظري

انك لو منبطح او مدنق شوي ومقرب اكثر من نبات

البسباس << يازين وجهي وانا اقول البسباس

يعني قصدي تلصق او تقرب الزوم عند كميه بسيطه

من النبات وتخلي الباقي على مداه بس مايبين بوضوح

كان يمكن تطلع زاويه حلوه

عموما زياد بيه اذا هذا الارشيف

تأكد ان حنا نطالبك باللي قبل الارشيف واللي بعد الارشيف

كل ماعندك من صور مصورها

لاتبخل علينا

ويعطيك العافيه

وعساك على القوه

**شباب في رحله** · 11-17-2005, 11:38 AM

سلامو عليكم

اول شي

تم رفع الصور على سيرفر الموقع

والف شكر شنكووتي على رفعها

عبووود تراني رفعتها شد حيلك ارسل الموضووع
ولاتخلي شخص يستخدم النت الا تمر عليه هالصوور

الحين نجي لك زياد

ماشاء الله عليك

مشاركاتك من اول مادخلت تدل على قوة العضو

وهذا شي يفرحنا ويشرفنا ان عضو بهالمستوا انظم لنا

حياك الله خيو بين اخوانك

وجعلنا دووم نشوووف ابداعك

نجي لصوور

جووها غير طبيعي

التصوير مذهل

بس تدري وش ينقصك انت ؟

جودة الكاميرا الي تستخدمها

ياليت تعلمنا شنهي الكاميرا الي تستخدمها

اما الربيع

ياطر جيبي يالربيع <<<< تهيض

ياعيال سهيل طلع
الله يرزقنا بأمطار
على شنا نفلها في الربيع

الله يعطيك العافيه زياد

مبدع فيك شوووي

ابو كرعان · 11-17-2005, 12:58 PM

ارحب يا زياااااااااااااد

من قدك على ذا الصور الزينه على طول نزلوها المعازيب >>>

aaaa:

^
^
^

اقووووووووووووووووول تلايط ولايكثر

زيااااااااد لعنبو من لامني فى حبك يا ولد جبتها على الجرح

يالله يالله يا زكرتيه الهمااااااااااااااااام نبي كشته لجميع

اعضاااااء الزكرتيه >>> جمع مذكر سالم

زياد لبى قلبك مشكوور على الصور

وأبشرك بشاااااااااره تشق الخشم

اقتباس:

تم رفع الصور على سيرفر الموقع

**سحابة حب** · 11-17-2005, 02:37 PM

زياااااااااد ،،

كل يوم و الموقع يزيد مبدعين ،،،

يعني شغلك في التصميم ،، و التصوير ،، شغل مبدعين ،،

الصور ،، روعه ،، من حيث اللقطات أو المناظر ، أو حتى التصوير و الزوايا ،،،،

تستاهل كل خير ،، و يعطيك العافية

**nAmLaT nAjD** · 11-17-2005, 04:26 PM

نبي نككككككككككككككشت

متى يجي الربييييع <<بتصيح

عمو زياد بقوه شوقتني للكشتات مع ان ربيعنا مايجي ربع ذا بس احسن من التدخين:d

وعليكوم السلام ورحمتو الله وبركاتوه <<بدري ياخاله

اول شي انا موضوعك عندنا في البرندا قلت اننا كسبنا مبدع

ولا هو اي مبدع

تجاوبك معنا واهتمامك باللنك حاجه روعه حبيت اشكرك عليها

والشي الثاني هدفك الاهم وهو النقد

.: الصوره الاولى :.

رغم انها زحمه تكوينها رائع واختلاف الالوان ساعد على انها تطلع بشكل مختلف

تمنيت لو انكاخذت اللقطه اقرب للمويه والشجره

.: الصوره الثانيه :.

شكل الورد روووعه والصوره طبيعيه مع اليد

الظاهر نوعيه الورد اللي في برنا غير عن بركم <<قولي قسم

لان الاصفر اللي جوا (مدري وش اسمه) حجمه اكبر عندكم

ذكرتني الصوره بايام البر الله يعيدها

كنت اجمعهم واحطهم جوا اكبر كتاب عندي لما ينشفون واسوي فيها بطاقات

واعمال فنيه <<زمان قبل الزكرتيه :d

.: الصوره الثالثه :.

تعرف لو انك نازل (شوي بس) واخذت الصوره للوردمن قريب وخليت عمق

الميدان هو امتداد الورد اتخيلها بتطلع شي خرافي ..

.: الصوره الرابعه :.

رائعه الصوره بس تمنيت جودتها تكون اعلى

بشكل عام فعلاً كسبنا مبدع، وزي ماقال شباب في رحله

اقتباس:

بس تدري وش ينقصك انت ؟

جودة الكاميرا الي تستخدمها

اقتباس:

تم رفع الصور على سيرفر الموقع

والف شكر شنكووتي على رفعها

عبووود تراني رفعتها شد حيلك ارسل الموضووع
ولاتخلي شخص يستخدم النت الا تمر عليه هالصوور

موضوع يستاهل ..

عمو زياد شرفتنا ونورت الدريشه نيابه عن المعزبات الله يكون في عونهم

وبانتظار جديدك

**شقرديه** · 11-17-2005, 06:08 PM

وعليكم السلام ورحمه الله وبركاته

أهلين اخوي زياد بصراحة انا مالي في التصوير

بس اعجبتني صورك حيل

وخاصة اني من عشاق الربيع والبر

وعقبال مانشوف لك صور من ربيع الشوكي وروضة التنهاة

بالتوفيق اخوي

**)( زيــاد )(** · 11-17-2005, 06:18 PM

أشكر جميع من نقد هذا التصميم والصور وأقول نقدكم في محله

أما بالنسبة لرفع الصور أشكر جميع من بذل فيها جهد وأبشرو بكل جديد

وأمابالنسبة للكامرا فأنا صراحة مضعف الدقة في التصميم لكن في الأصل دقتها عالية لأن مثل ما تعرفون الحجم الكبير يتعب ف تحميله وفي الصفحات من حيث فتحها ولكن من أرادها بدقة عالية يا مر أمر بس يعطيني خبر ويبشر وصراحة ما توقعت أن الردود ستكون بهذة القوة
ومشكورين يا خواني

وأشكر من شاف هذي الصفحة ولو لم يرد

وبشرو بكل جديد

أخوكم زيــاد

**البَــتول** · 11-17-2005, 10:09 PM

وعليكم السلاام ورحمه الله وبركاته

مرحبااا فيك اخوي

زيااد

منور الدريشه

مع هالمنااظر الطبيعيه الحلوه

+++++++

الصووره الثانيه عجبتني اكثر شي

لانها تبين الورد بوضووح

صرااحه الورد سبحان الله
شكله يجنن

بس اسمه ما يركب عليه <<<<طار تفكيرها لشي ثاني

بالنسبه للصوره الثالثه
لو انك مطبق اللي قالو عليه
(ماشي الحال ــ ونمله نجد )

بتطلع من صج روووووووووووووعه

بعد المسااحه كبيره ،، تساعد على هاللقطات

:: زيااد ::

الله يعطيك الف الف عاافيه على هالصوور

في انتظاار جديدك

**)( زيــاد )(** · 11-19-2005, 12:57 AM

مشكورة يا البتول

والله يفرج لك كل ما تبين

وبشرو بكل جديد

أخوكم زياد

ريمــا · 11-22-2005, 01:58 PM

أخي زيـــــاد

تصويرك رائـــع ..

ماشاء الله عليك ..

ماتحتاج اي نقد..

ريمــــــــــــــــــــــا

**Remaan** · 11-24-2005, 06:44 AM

وعليكم السلام والرحمة ..

يا مرحبا بك اخوي زياد مبدع ويانا ..

ماشااء الله الجو كان شكله حلوو ..

<<< ودي ازووور مكان حلوو جيه

حبيت الصورة الثالثة .. تدرج الالوان فيها حلو .. ^^,

دمت مبدعا خيوو ..

ريمان

اعلانات المنتدى