إنها قصيدة(لاميّة النبط) وهي في رثاء تلك الحية الميتة إنها من روحي الى روح اليتيمة الطاهرة أنها مني ألى المسكينة المغلوبة على أمرها. لليتيمة الطاهر للنقية الزكية التي دنستها ايدي اهل الجبروت والطغيان عليهم من الله ما يستحقون الشاعر ناصر الفراعنة

الف ليل مع الزين ليل وليل"="مع سوى الزين عن الف ليل وليل
ليلي الزين ينقص مع الثلث ثلث"="وليلي الشين ياخذ مع الليل ليل
يا حمد لا جواب لمن لا سأل"="ولا به احد بيعطى وهو ما سأل
بسم (مفردعلم)لا يعرف بأل"="ويل ويله على فجعتي عزرئيل
ليت من يسأل الهاشمية سؤال"="كيف امسى بلا حال حال وآل
عذرها ويش اذا جاء يوم السؤال"="عند من لا عزب عن عيونه ضئيل
جادل علقت في خفوقي خبل"="مثلهاما خلق لا بعد لا قبل
جادل بحة الصوت منها تهبل"="من شذا زنجبيل وما سلسبيل
يعقد السحر منهاعلى اربع حبال"="سحر من كل ما لا خطر لي ببال
زلزلتني ولا زلزلتها الجبال"="اشعم الشمع الاشعل واكن السبيل
كم على العين منها قضية قتل"="حي ابو شارب لافتلت له فتل
ظبية التل تلت حشا الجوف تل"="في غنجها ختل قاتل للقتيل
فاتر اللحظ منها سبايا تتال"="سرجتها المنايا ليوم القتال
يا حمد لو تبي تهلك اول وتال"="غضة الطرف منها بمضرب فتيل
شمعلانية مثلها ما مثل"="مثل ما قال راع المثل بالمثل
سندس من كسا نورس امتثل"="يا مثل لا يمثل بمثله مثيل
نصفها نار والنصف نور مثال"="ومن سنا نورها الساري اقرب مثال
بارق في سما نجد اله امتثال"="استخيله وانا صوب بيضا نثيل
يا رجل انت لو شفتها في عجل"="اقسم بربي فلا تشيلك رجل
وكان ما جابت آجلك ماني رجل"="وان تجاوب حجل كل واد هجيل
عندل صال عنها حديث وجال"="ما لقى الحسن مع حسنها له مجال
فتنة للنسا خل عاد الرجال"="تزرع الشك عند الف جيل وجيل
اكحلا ما ذكر يوم حطت كحل"="كيف بالله تبي مثلها يكتحل
كيف بالله والكحل وهو الكحل"="يشحذ الكحل منها لطرف كحيل
مثلها لابتعد له تشد الرحال"="صفوة الخمس بين الرشا والمحال
نقوة الست من كل حال وحال"="سابعة سبع من عالم المستحيل
في نهدها دخيل بوجهي دخل"="لافترش صدر صدر وصدر خذ وخل
يا حمد لو طلع فوق راسي نخل"="ويش فيها ارض جردا وسقاها مخيل
آه ويلي وويلاه تكفى ياخال"="شفت بالخد منهاسميك ياخال
حب خال على الخد منها استخال"="واستخلته بدم عين ما هو بخيل
في حشا الصدر منها حمام هدل"="حط فينا مع الهجعه ولا عدل
به على طلع رمانتين استدل"="من سبل ذيل شقرا غذوا له جديل
في تمايل جسدها وهو في اعتدال"="شكل حرفين جن عكس دال ودال
ولااعترض شفت رقم اربعة لا جدال"="تقل عن كل عظم اعطي غصن بديل
سابق السيف منها العذل وانخذل"="دونها عاهل جاب شعر القذل
نفث ساحر مراكش وحطه جذل"="بين حرة ثقيف وحرة هذيل
ما درى ان الهوى بذل ليس ابتذال"="فطرة بين غمَر قلوب تذال
نشوة تجعلك بين وامن وذال"="سامية ما تخلي من الراس ذيل
آه يا من لها هاش قلبي ورلَّ"="واتشقلب عليها تشقلب غرلَّ
نبضةالقلب مني بصرخة درلَّ"="كن ينفض عظامي عليها دريل
تقل في داخلي شغلوا سنترال"="لا تذكرت اسم ربوة الميترال
انتهض مثل جندي رأى الجينرال"="لأسم من جدولت حجة في بريل
فتنة منذ ماض الأزل لم تزل"="موطن الحسن من حيث تنزل نزل
عزلة المعتزل بابتسامة غزل"="تقلب الأرض طول وعرض وتزيل
صدرها في ارتحال وهو في انتزال"="خصرها في اكتمال وهو في اختزال
وركها في اجتماع وهو في اعتزال"="في جزالة هزيل وهزالة جزيل
فتنة زلت الأنبيا والرسل"="مرّ ترياقها في عيوني عسل
حبها غاسل مخ ناصر غسل"="عادة الحب للمخ الابلج غسيل
مع سفر وجهها وادي العرض سال"="دونها البيض من فيض غيض تسال
ما عقب نوم طاهر جسدها اغتسال"="وكوثر الخلد مع ما عرقها يسيل
آه يا ليلة صحت للقلب شل"="شل معي شلك الله من قلب شل
صوب عذرا بيدها عطتني وشل"="بنهشل مثلنا مثل ناس هشيل
يا حمد من بسفع من الليل شال"="لعنبو لايمه يوم غنى وشال
شاف من لبست الليل بشت وشال"="من على نور يدها قرت ما تشيل
ليتني من كتاب بيدها فصل"="حرف ولا على الحرف همزة وصل
يا حمد ان حصل شي او ما حصل"="قدرها هو هو لوّ ما من حصيل
بس دقيقة وصال ولو بأتصال"="غاية القصد لو فوق صفر تصالَ
حصة الغوص من خالصات الخصال"="صدت العوص من دونها بنت اصيل
ساد منها هل السرد والشرد ظل"="بردة المرد والجرد من ذي الفضل
قارىء الورد بالنرد فاضل وضل"="يوم ضايل على الخد منها مضيل
من صفا هي شفا كل داء عضال"="آية تاب من حسنها كل ضال
ما تجي الا بمية عام من النضال"="وجت لي بفضل ربي بشهر فضيل
ما وطت بارض الا مطرها هطل"="صدرها طفل يسمع بقصة بطل
مستقل مقل مظل مطل"="اهيف الوسط منه بعذاب مطيل
فتنة طال بالعمر منها المطال"="قصر الله بها عمر من قد اطال
صدر,ردف,وبالوسط وسط مطال"="دائرة,دائرة,بينهن مستطيل
كل خد برمش كساه استظل"="خاف لا تحرقه شعلة لا تظل
فالجبين تعلق نارها وبتظل"="بالفلق عذتها من هضيل نضيل
لو مشت في خلا قفر خالي مضال"="ما به من الونس فضلة من فضال
شفت من حولها الفين ضولة تضالَ"="ضولوا كود انا دون ضولي مضيل
جادل يا حمد بالفعل بالفعل"="بأسم ولا فعل هي قول وفعل
لو بيوم ادري مني بيجيها زعل"="ياحمد مت قبله مع اول رعيل
ربة الحسن طود على راس عال"="كوكب يشتعل في سماه اشتعال
لو بيد بس تحدته قالت تعال"="لطفى واختفى من معال ومعيل
جادل مااستغل الهوى تستغل"="اشرب الغل منها واقفي بغل
حركت خافق ميت واشتغل"="وذيرت في خفوقي نعام بغيل
غالية وافتدوها ثمانين غال"="ضاحكات الليالي عليها تغالَّ
هيه من وين للقلب عنها انشغال"="وهو لها عن سواها بشغل شغيل
هبت الريح منها هبايب نفل"="سكرة ساهر العين معها غفل
طفلة والفت في خفوقي طفل"="كل لغابت جفل من محله جفيل
وهي بعد كل ما غاب جاها جفال"="من حراير هل الغرب الاقصى غفال
كني اسمع بجوفي طبول احتفال"="لااقبلت وانتهض (عامر بن الطفيل)
يا حمد ثقل صدق لقالوا ثقل"="بالمقل لو تطالع سفيه عقل
كم الى رحمة الله منها انتقل"="من فقيد بحد سيف طرف صقيل
تعطي الموت فال فكيف العقال"="وصفها(ولكل مقام مقال)
فوق ما قد يقال(و) ومالا يقال"="مثلها ما يوصف بقال وقيل
بالشكل ما على شاكلتها شكل"="واهج الشوق اكلني عليها اكل
اببعض بعض فاقت حسن كل كل"="وحاربت(حاشد)من بهاها(بكيل)
اتكالي على الله فيها اتكال"="في عزوم اليها ومنها تكالّ
لو هواها على من هواها نكال"="ولو يكيلون لي جاير الهم كيل
أيها الربع هل من سناء طلل"="جادك الغيث لا غيث خطب جلل
كن تساقط مزونه تساقط هلل"="لا نفض مشلح المزن فوقك شليل
من جلال دقاق دقاق جلال"="في الرعد منه يذّن ثلاثا بلال
كن تتابع نصوبه جيوش احتلال"="لجل خاطر سنا مع صهيله صليل
شاعر جا يبي وصفها وش عمل"="شافها ومات ما كمل اربع جمل
حظ من ليس له ناقة اوجمل"="من هواهاولا بالامل سار ميل
غاية في الدلال آية في الجمال"="كاملة كل ولله كل الكمال
من بدت له شمال يصلي شمال"="راهب شاف من ذا جمال جميل
اشرف الساقي من التراقي من الـ"="غالية غادة الغيد لا لم انل
وصل مخمورة اللحظ لحظة ف(نل)"="يا فؤادي من الهم ما لا انيل
طالت القاصرة واستحال المنال"="ويل ويلي متى من (طلال) بأنال
من عدو ننال الصحيب ننال"="دونه ابرص وحقرص ومقرص ونيل
باتمنى وبعض التمني جهل"="يا حمد ليت اهلنا واهلها اهل
في وعر في سهل صعب ولا سهل"="لو علي ابعد من الجدي عن سهيل
عند من حسنها شد بالا وهال"="نظم لاميتي يبتهل ابتهال
بمية زدتها سبع سبع تهالّ"="انقص الما وازيد اشقر البن هيل
جادل عن سواها بعيني حول"="مااصخت الضحك مع نخولة كل خول
غمزة العين منها تزلزل دول"="ويل ويلي عليها وويلي وويل
جادل حاربت بالعمام الخوال"="يا حمد مختصر سالفتها سوال
وش طوال قصار قصار طوال"="رح لها واتعرف وش قصير طويل
يا حمد صابني طلق بندق عيل"="يا حمد حل موتي ولا من حيل
إنه(و) حكم من لا بحكمه ميل"="مير قم سوّ قبري ثم اعول عويل
صبوا الدمع فوقي سوات الخيال"="وشقوا الثوب فوقي وقل للعيال
لاادفنوني يصيحون عشرة ليال"="عقبها روعوا في خليل خليل

لو بيوم ادري منـي بيجيهـا زعـل""ياحمد مـت قبلـه مـع اول رعيـل يا حمـد ثقـل صـدق لقالـوا ثقـل""بالمقـل لـو تطالـع سفيـه عقـل

فيه حاجات ما نقدر نسويها مالنا غير نجلس ونتحراها أجمل ايامنا تسكن وننفيها وكل ما نكبر شوي نتناساها بين الايام حاضرها وماضيها جمرةٍ خايف امشي واتوطاها وخايف آكحـّل الأحلام واعميها لا انتهت بي وانا توي بمبداها والليالي لو تسولف مآسيها شفت الاحزان تركض في شفاياها ياحبيبي .. حبيبك راح بــ يديها ما بقى له سوى جملة تهجـّـاها فيه حاجات لو نقدر نسويها كان ما نجلس كذا ونتحراها

ولو ترجعون للقصيدة بتلقون كل أربع أبيات سار فيها على نفس هالنمط ونظمها على حروف الهجاء وبترتيب بداية من الهمزة الى حرف الياء ماعدا أول بيتين واعتقد ان هذا هو المقصود بالنظام المربوع او القصيدة المربوعة تراني اقول اعتقد ماني متأكدة يمكن قلبت روسكم بهذرتي بس من جد اعجبتني طريقة نظمه