يا سفــره ما تمــت (شباب في رحله وعاقد حجانه صيف 2004)->شنكوتي

**شنكوتي** · 06-07-2004, 08:30 PM

يا سفــره ما تمــت

هذا اخوكم (( شباب في رحله )) يروي عليكم تفاصيل مأساته هو ورفيقه ((عاقد حجانه ))..

طلعت الصبح من البيت رايح الدوام ومثل العادة مريت رفيقي الدب عاقد حجانه

ومثل كل يوم رحنا نفطر في بوفيه زين السوداني طلبنا صحن فول,

وانا اكل من الفول حبه من حبات الفول عجزت ابلعها قاسيه واطلعها

حصلت فيها ورقه فتحت الورقه لقيت مكتوب فيها مبروك بوفيه زين للفول تبارك لك

لقد فزت بتذكرة سفر ذهاب واياب الى لندن مع مرافق

و السكن لمدة ثلاثة ايام وافطار لمدة شهر صحن فول قلابه<<---لاحقينا الي لندن ..

قال عاقد حجانه:
اثرالفوال زين مسوي جوايز وحنا فزنا بالجايزة الكبرى هههههههه
<<---اقول ياشينك على رزه هالخشه..

المهم طنشته وقمزت قمزه متهوره.. ماكملت صحني وعطيت زين الورقه وفتح درجه

وطلع التذكرة وكاميرا ووقفنا وسط البوفيه انا و هو و عاقد حجانه

وصافحني زين ومد لي التذكره باليد الاخرى ( حركات )

ونبتسم للكاميرا كلنا وصورنا عامل عنده والصوره علقها في وسط المحل

لا وحاط على صورته سهم وكاتب هذا زين..

وطلعنا من البوفيه وحنا فرحانين و بصراحة لا انا ولا عاقد حجانه عمرنا

سافرنا بس اشوى اني اعرف سبيك لندن<<---الله من زين اللغه

واخذنا اجازة من العمل ورحنا السوق واشتريت انا بدله وشنطه كبيره

و عاقد حجانه اصر انه يروح بالثوب والشماغ لانه يعتز بالزي الوطني هو كرشته..
رغم الاختلاف اللى حاصل بيننا على الموعد في اخر سبعه او اخر ثمانيه الا انا في النهايه اتفقنا

واكدنا الحجز وعرفنا منهم ان الوزن المسموح لنا فيه خمسين كيلو يعني انا 25 كيلو وهو 25 كيلو ..

وادرعم بيتنا وافتح الشنطة واحطها فوق ميزان عندي

وعبيتها هدوم مالها اي لزمه لين وصل الوزن خمسه وعشرين بالتمام <<--- احلل التذكره ..

اما عاقد هون وقال مامن شنطه نتشارك انا وشباب في رحله بالملابس منها اخف لنا ومنها توفير

يتبع

**شنكوتي** · 06-07-2004, 08:34 PM

ويصفي الوزن على 25 كيلو

رحنا الحلاق وحلقنا واسشورت انا شعري ورجعت البيت وسبحت

اكيد الواحد يسبح عقب الاستشوار<<--- لحووول
واتعطر واكشخ بالثري بيسيز ( بدله ثلاث قطع ) واقعد اتميلح قدام المرايه

واناظر عمري بالبدله بس بصراحه اللي مخرب الكشخه

كرشتي طالعه متر قدامي <<----

انا اسمع ان السفر له سبع فوايد انا اقول ثمان الثامنة ان البنطلون يعرفك

على تضاريس جسمك طبعا الثوب مخفي هالشحوم ..

ويكشخ عاقد بالثوب والشماغ الكوبرا <<--الاخ رايح امسيه شعريه ؟؟

المهم وندرعم على المطار ودخلنا صاله المغادره وعند الكاونتر

وزنوا الشنطه خمسه وعشرين كيلو بالتمام طبعاههههههه

**شنكوتي** · 06-07-2004, 08:35 PM

طالعنا الموظف وناظر كروشنا انا وعاقد ( على سيرة الكروش فيه ناس كروشها قدام مثلي

وفيه ناس كروشها ورا وقدام على شكل حرف اس S مثل عاقد حجانه

وفي ناس كرشهم يجي على حرف البي B مثل كرشتي مع البنطلون جايه موديل جديد

كرشه فوق وكرشه تحت ومضغوطه من النص بسبه الحزام )

المراد( بدل المهم وشكرا بدل مرسي ) ان الموظف قال لنا : عندكم اربعين كيلو عفش!!!

قلت: الشنطه مغير خمسه وعشرين !!!

قال : ايه وكرشك خمسة كيلو وكرش رفيقك عشره كيلو رح ادفع الفرق الله لا يهينك..

بصراحه معه حق دفعنا الفرق خمسين ريال واخذنا البوردنق ودخلنا على الجوازات

وياخذ موظف الجوازات جواز عاقد حجانه وناظر في صورته

و قال: الصورة ماتشبهك

قال عاقد حجانه: ايه هذي الصورة قبل ماسبح الله يسلمك

هز راسه وقال: ياخي ثاني مرة ان بغيت تسافر لا تسبح

<<--- معه حق حتى تطابق الصوره مع الاصل والا لا ..

ودرعمنا على التفتيش وكان فيه اثنين من المفتشين واحد دب وقصير والاخر معصقل وقصير بعد

قال المفتش العصقول: طلعوا الاغراض اللي في جيوبكم وانت يا بو بدله ..انا ..افصخ السير والجاكيت (الكوت) والكنادر( تكرمون )..

وادخلوا من هنا, فصختهم وانتظر عاقد يدخل قال لا والله انت قبلي..

قلت له علي حلف انك تدخل قبلي..ويفصخ عاقد عقاله ويرميه بالارض وهو معصب

ويقول: اقول علي الطلاق انك تدخل قبلي..

ويناظر فينا الدب ويقول : اه بس انت واهو داخلين استراحه اقول اخلصوا..وادخل انا ويصفر الجهاز..

وقال الدب للمعصقل : تراهني ان سبب الصفيره من قميصه !!! قال الدب: اراهنك

وقال لي العصقول : افصخ قميصك ولاتفصخ الكرفته خلها عليك !!

فصخت القميص وعطيته عاقد وطلعت الفنيله العلاقي واصله نص سري وسري مستحي يويق من تحت الفنيله

بس صدقوني ان الفنيله اكبر مقاس بس الكرشه اللي رافعتها..

وتوني بادخل مع القده قال الدب: اقيف اقيف مره وحدة افصخ الفانيله خلي سرك يشم الهوا الظاهر ان سري كسر خاطر الدب..

ــــــــــــــــــ(يتبع)ـــــــــــــ

**شنكوتي** · 06-07-2004, 08:36 PM

وانا ازعل وافصخ الفنيله ويقولي عاقد لا تزعل يا شباب في رحله شوف الجمهور اللي وراك يمكن يبتسم لك الحظ

وتقلى اللي يكتشف مواهبك الدفينه..والتفت وراي واشوف طابور من الجماهير المسافره يتفرجون

واقعد اسخن قدام القده والجمهور يصفق وعاقد يصفر واجي مسرع وادخل ابي اسجل قول وصفر الجهاز

وقال الدب للمعصقل : هههههه هالحين دوري تراهني ان السبب من بنطلونة

قال المعصقل: اراهنك عطاني الدب ابتسامه

وقال : يالله نزل بنطلونك
انا كنت مستحي بس الجماهير وعاقد كانوا يشجعوني ويهتفون بصوت واحد .. افصخ افصخ ..

انا بصراحه جاني حماس وانا اللي افصخ البنطلون ويطلع سروال السنه

صحيح انه اصفر بس صدقوني اني غاسله قبل اسبوع وارجع اربعة متر والجماهير تصفر وعاقد يغني نبي قول مدرعم على صفيره الحكم ..

واجيك وادخل بين القدة قووووووووووول واركض فرحان واسوي حركه الكاميروني روجيه ميلا

والجماهير تذب عقلها وشمغها علي وانا احيهم وازحف عندهم على صدري خخخخخخخ

و عاقد خنقته العبره من الفرحه وجلس يصيح.. بس الفرحه ماكملت الدب رافع يده مشر تسلل

<<--- الجهاز صفر بس ماسمعته من صياح الجماهير...

**شنكوتي** · 06-07-2004, 08:37 PM

واضرب في الارض من الزعل واصرخ منهو التسلل ؟؟

وعاقد يهديني ويقول انا ماقلت لك هالمدرب الهولندي مامنه رجا..

قال الدب: كرشتك تسلل وانا شاك فيها..

وهو اللي ينادي يامبروك يامبروك تعال نظف كرشته !!
وجانا مبروك واحدن بعير ياكبره كبراه..

وهو اللي يسحبني من الكرفته انا توني اعرف ليه خلوا الكرفته علي ومافصخوها دخلني مبروك الغرفة

وعطاني كاس وقال لي اشرب جيت ابي اشرب الا طعمه مر قلت وععععع مر

وهو يمسكني بشعري وهو يقول اقولك اشرب وخذ هالحبتين بعد اشربهم مع الخروع

واناظر في الحبتين وحدة لونها اسود والاخرى اصفر قلت اكيد الاخ اتحادي

خلني ادهن سيرة واقعد اطامر في الغرفة واغني ..

اوووة يا اتي ياموج البحر .. ياناس مبروك شاقني ياناس دلوني علية.. اتي اتي ..

ويرفعني مع اذاني فوق وهو يقول اتي مين يابويا انا اهلاوي..

وانا اتلايط واشرب الخروع مع الحبتين وشوي انا ماحسيت في نفسي ومبروك انحاش

جلست في الغرفه اعاني ساعه بالتمام بعدها حسيت اني خفيف

واناظر في جسمي مالقيت لي كرشه اختفت مادري وين راحت !!!

واطلع من الغرفة بدون كرشه ماسك سروال السنه لا ينصل والجماهير تصفر وعاقد يهتف واحيي الجماهير

وارجع ورا القدة خمسه متر والجمهور يصفق ..وحدة وحدة وحدة ...

واصفق معهم واجيك مكيم ودخلت من القدة وصفر الجهاز بانتهاء الوقت الاصلي..

قال الدب : خلاص ضربه جزاء وهم يحطوني مع جهاز العفش ويسدحوني على ظهري

وانا زعلان افكر في كرشتي وصفر الجهاز يوم وصل عند راسي

ويفتحون حلقي ويكتشفون ان السبب الله يسلمكم ضرس فضه هذا الضرس مركبه من العام الله يعمي العدو

ويطبطب على ظهري عاقد حجانه يوم شافني زعلان ويقول هارد لك شد حيلك في مباراة الاياب

وعطاني هدومي وحطيتهم في كيسه مالي نفس البسهم جلست بسروال السنه والكرفته

والشراب اتمشى في المطار ضايق صدري وزعلان على كرشتي اللي راحت واجلس على كرسي

واحط رجل على رجل واومي برجلي واناظر في كرشتي اللي امسحت

وعاقد يطبطب علي ويقول هونها وتهون.....

صدقوني انا ماكان زعلي ان كرشتي راحت لا والله !! اللي كان مزعلني ؟؟؟؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
؟
الخمسه وعشرين ريال اللي دفعتها عفش زايد على كرشتي[/size]

******

مايستفاد من الرواية ::::

السياحه داخل الوطن افضل واوفر ...

الخروع اسرع طريقه للرجيم ...

*****

استنتاج من الروايه حسب روايتها :::

عاقد عنده بعد نظر ووطنيه ممتازه بس ينلعب عليه بالعربي مخفه

شباب في رحله ساقط في الحساب والا واشلون يدفع الفرق وهو ما عليهم فرق

ek:

*****

اعتذار وطلب السموحه :::

من صاحب التوقيع هذااا
v
v
v

لاني اخذت الصور منه دون استذان ---->>>ياهوه يا أدب :o

*****
الروايه :::

على لسان الراوي اذاً انا بري مماااا ورد فيه ;)

*****
تم التعاون مع دكتور في علم الصحافه والاعلام واخ عزيز وغالي

واتمنى ان يلبي الدعوه ويكون معنا هنا في بيت الزكرتيه

0
0
0
0
شن

شن

شن

شنكوتي

[/font][/b]

**شباب في رحله** · 06-08-2004, 07:17 AM

سلام هيه

شنكوتي بدينا في الي ماتفقنا عليه

بدينا في الفضايح

ياخي انا وش سويت لك؟

ماتسوى علي سندويشة البترا الي ذاك اليووم

بعدين تعال سالفتك ذي قديمه ايام الكرشه لا الحين ابشرك خلاص راحت

ماعاد فيه الا عضلات وتمارين وحركات

وحتى مانام الا لين اللبس برمودا

ياخي موضووعك مقلع
وسلمني على الشاهي المغشووش الي شربت منه

وياليت الكل مثلك في كتاباتك من دميجتك

تصدق عاد السنه ذي الظاهر مافيه سفره

<<< العن ام الشطحه

بس ماقوول غير الله لايهينك ولا تحرمنا من هيك مواضيع

والموضووع يستاهل التثبيت

شووكرن خيو شنكوتي

السلطان · 06-08-2004, 10:55 AM

شكل الموضوع ماهوب صاحي
لي باك بس اخلص الاختبار اليوم

معاند · 06-08-2004, 11:44 AM

والله شنكوتي قصه حلوه

بس ماجبت إلي ابيه

يبيله عاقد تعلووووووووووووووووووووووووم اشوي زياده

عشان كم انا قايله

يناظر وجه في المرايه كل صباح

ويغطي وجه في الليل ................ ( لمدة 15 يوم )

خخخخخخخخخخخخخخخخخخخخخخخخخخخخخخخخ

**ياهملالي** · 06-08-2004, 02:01 PM

وانا حسبت إن شباب هو المنتفخ الثاني !!

أثاريهم كثار المنتفخين

بس ياخي تصدق إن الانتفاخ شيء سلبي

ومن سلبياته ما يلي /

عدم الركض بسرعة

عدم التقليل من الأكل

عدم الهرب في الطلعه بشكل سريع

عدم المشي في الجو الحار << عشان الريحه والمشق

عدم تحصيل المقاس المناسب

أخذ مبالغ باهضة عند الشحن

عدم الراحة في ركوب السيارات وخاصة من نوع الأكسنت

الإكثارمن عملية سحب الجلنطات البشرية

التشويش على النائمين

الإسراف في أكل البيض بدون طماط

وغير ذلك من السلبيات

أما الإيجابيات /

كثرة الضحك 00 بسبب أو بدون بسبب

إضحاك الناس أيضا بسبب وبدون سبب

التعجب في خلق الله عز وجل

ودك تشوف الدب وهو يركض

ومشكوووور أخوي ابو الشناكت

بجد أبدعت وفصلت الموضوع تفصيل

تحياتي ،،،

**سلف خمسة** · 06-08-2004, 02:26 PM

صررررررررررررررراحه قووووووووووصة اقلالالالالالالاع

يعطيك العافيه شنكوووووووتي .... ;)

صراحة

ابـــــــــــــــــــــــداع بــــمــــعـــــنـــــى الــــكــــــلـــــــمـــــــة ... وتسلم اخوي على كل حال

تشاااااااااااااااااااااااااااااااااااو ينطح تشااااااااااااااااااااااااااااااااو

**شنكوتي** · 06-08-2004, 05:45 PM

اقتباس:

شنكوتي بدينا في الي ماتفقنا عليه

بدينا في الفضايح

ياخي انا وش سويت لك؟

انت ما تسمع بالحب من اول نظره ;)

وانا من شفتك وانت عاجبني حتى طريقه ردك قمت اقلدهااا بس شكلك مو ملاحظ

يضرب الحب شو بيزل

اقتباس:

تصدق عاد السنه ذي الظاهر مافيه سفره <<< العن ام الشطحه

احلى شطحه

اقصد احلى خبر ...

يعني ماراح بكره تقول اودعكم انا مسافر تدري الفراق صعب

وتسلم خيووو على الشاي وعلى كل شي قدمته لي

ودامك تلعب حديد تراك صديقي

--->>>يمكن نحتاج في مطاقه

اعلانات المنتدى