حنا هل العوجا ولابه مراواه= شرب المصايب مثل شرب الفناجيل
حنا مريض القلب ندرك مداواه=وندرك على الشدات طيب الرجاجيل
عادتنا ماطال للمجد نرقاه=وصيةٍ معنا لجيل بعد جيل
تاريخنا بالدم ياما كتبناه=والليوم صار مداده الورد والهيل
وان كابرونا مالنا ند نرضاه= الا السحاب اللي به الويل والسيل
حنا سنام المجد والعز والجاه= وفرسانها لا ركبوا الجيش والخيل
قمنا بشرع الله وذدنا عن حماه= دستورنا القران ماعنه تبديل
صغيرنا يولد ومجده بيمناه= الله خلقنا للصعيبات تذليل
درب الخطر بقدامنا كم وطيناه=ماهمنا العثرات ونعدل الميل
نرفع شعار الدين والبيت نحماه= فيما فعلنا ماعلينا مداخيل
حنا الذرى من حده الوقت ينصاه= من فضل من رد ابرهه راعي الفيل
افضل طريق للعداله رسمناه= للناظرين اوضح من الجدي وسهيل
كم فعل طيب نفعله ما حكيناه=نبي رضا من نزل الذكر تنزيل
من يفعل اللي بالملاقى فعلناه=ومن مثلنا بالفضل من غير تفضيل
حنا الى لحق الخطر منتهى اقصاه= نقلط عليه مجردين المساليل
يشهد لنا الاجرب وشامان زكاه= وشلفا فهد والرمح والخيل والليل
نظامنا شرع العدل والمساواه=اللي تنزل به على الناس جبريل
نشري ثمين المجد لو غلى مشراه =في ساعة فيها السبايا زعاجيل
سرنا بدرب المجد حتى وصلناه=احرار ماتفرض علينا الاقاويل
حنا علمنا فـ المنابر رفعناه=في كل دوله غير دولة اسرائيل
حنا الدروع اهل السيوف المحناه=ريف الضعيف ودرة في نهرنيل

حنا من عادانا بالرجلين ناطاه = نذكر كلمه الله ونعليّ التهاليل