السلامو عليكم
شلونكم كلبوكم واحد واحد
هذي قصيده قديمه ولكن متجدده بالنسبه لذاكرتي
لاني كل ماجا في بالي دخلت عليها وقريتها
يعني انها كانت بجهازي من زمان ويوم جيت اسووي فورمات نقلتها لدي علشان ماتطير والحمد لله انها ماطارت <<< سجع اصلي
الزبده مالكم في الطويله <<< وش عقبه يالحبيب
القصيده
لشاعر اسمه سلمان العتيبي
بصراحه انا ماعمري قريت له الا هالقصيده
ومستواه اكثر من روعه في هالقصيده مادري اذا له قصايد غير ذي
مابحثت عنها صراحه بس الي عنده لايبخل علينا
المهم اخليكم مع القصيده
وتاليها مع قلبك؟ انا ناقص وجع وجدان!! =دخيلك فضي السيره... تعبت انزف معاناتي
تعالي ننهي الماضي ... ويكفينا نكون اخوان =ابطوي صفحة العاشق... واعيد احسب حساباتي
انا المذنب وانا المخطي وانا الاااااسف وانا الغلطان =ويا ليتك يا الزمن ترجع ... واكفر عن خطيئاتي
وانا الجاني وانا المجرم وانا الغادر وانا الخوان =وانا اكبر غبي شافك حديقه في مساحاتي
ما عاد اقوى على الظلمه ولا اقدر على الكتمان =احس انك خنقتيني !! وجت ساعة نهاياتي
يا وجه الله يا وجه الله .... يا وجه الله بشر!! انسان!! =على بالك حجر جامد ؟؟ ...... اجل وشهي كتاباتي؟
نسيتي ساعة اللقيا ؟ نسيتي لمة الاحضان! =نسيتي وشكثر كنتي ... تموتي في لقاءاتي !
نسيتي دفتر اشعاري... نسيتي اعذب القيفان ! =نسيتي كل قلم يكتب ... قصايد من عذاباتي !
نسيتي من رفع قدرك ... وخلى لك مكان وشان ! =وعزيتك وعليتك .... على كل الاميراتي !
نسيتي ذلك البرقع؟ )نسيتي ذلك الفستان؟ =نسيتي ذلك الخاتم .... نسيتي كل هدياتي!!
نسيتي من عجف شعرك... جدايل كنها شرطان ! =وزينتك وبخرتك وقلت امرك يا مولاتي
نسيتي من ربط خصرك... وهو عينه على الرمان =ومدن صدرك تناديني ... تبي اعلن فتوحاتي
ولولا خوفي الخالق ... حبيبي ربي الرحمن =لكنت بساعتي هذي اعض اصبع حماقاتي
تغيرتي ولاعدتي ... مثل اول زهر عطشان =وحناني للأسف كنه ... بقايا من خرافاتي
تكبرتي وتجبرتي ... وصارت شوفتك سلطان =وانا أهبل على النيه ... ما غير ارسل جواباتي
اقول بخاطري يمكن ... تغير عندها العنوان =يا شيخ اسكت متى تفهم! صحيح اني وهم ذاتي
حسبتك مني وفيني ... واهمك لو اجي فرحان =ولكن شفتك بعيني ... تصدين ابتساماتي
حسبتك تفتحي قلبك ... اذا كان الوجد زعلان =ولكن ما كذب خدي ... وهو يشهد بكاءاتي !
فراقك اصبح الغايه ... ولاني عالهجر ندمان =قراري بالبعد عنك ... ترى اسهل قراراتي
وداع الذل يا ذلي ... وداع الموت والأكفان =عطيتك قلبي وروحي ... ولا صنتي اماناتي
وش الحيله اذا فكر... قتيلك يهجر الأوطان =طلبتك زيدي الطعنه ... ابي اشعر بنوباتي
وعلى شاني اذا باقي ... بداخل حضرتك ايمان =ابيها من ورى ظهري .... وانا اتلو صلاواتي
وخنجر طعنتك يصرخ ... ضحيه من بني قحطان =وانا اخر حكي عندي ... فمان الله يا طعناتي
يا من تقدر تعوضني ... عن الضيقه وعن الاحزان =بشرط اني انا الكوكب وهي ابعد مجراتي
يا من تقدر تخليني .... كبير اعظم ملوك الجان =لجل يصعب تحضرني ... قبل تطلب قريناتي
سجى مولخ شرو سادو ... وزنديب الجدي طوسان =طلاسم وحدها تعرف.... نسيمي من عجاجاتي
سمعتوا من قبل عنها ... سمعتوا معشر النسوان؟ =بعيده للأسف عنكم ... مثل قلبي ودقاتي
نبيله..ساميه..عليا.. فضيله ..سوسن ... وأشجان =اسامي تحيي الميت ... ولكن اهلها امواتي
يجوني في صور شتا .... ومعظمها صور غربان =وانا عذري مثل ماهو .... صديقاتي ... صديقاتي
خلاص بذمتي والله ... ما عاد ارجع الى الادمان =عرفت ان الغدر انثى ..... وانا اجمع علاماتي
صفر طيبي.. صفر صدقي ... صفر حتى مع الاحسان =صفر شعري .... وأقلامي ... وممحاتي ومبراتي
صفر ليلي... صفر ويلي .. صفر خافق نطر سهران =صفر دمعي ... صفر شمعي ... صفر بوحي ونبراتي
صفر شوقي.. صفر عشقي ... صفر مغرم.. صفر ولهان =صفر وجدي .. صفر شهدي .. صفر نوحي وزفراتي
بعد كل العمر هذا ... عرفت اني انا الكسلان =حسافه جتني متاخر ... مراحل اكتشافاتي
ولكن ما اقول الا ... خذوني بعد قربان =حقيقه مالها معنى .... اسولف عن حكاياتي
فمان الله ... فمان الله ... فمان الله انا ذبلان =وحسافه تنوجد عذرا تشوف احرف معاناتي
قصيدي لا تواخذني ... مصيري ابعد الشيطان =يكفي اذكر اسم الله ... واجنب عن متاهاتي
وسلامتكم
الطــــــلا ســـمــــــــ <<< جازت لي المده:)
