::روووق البال ،، مع المبدع ماشي الحال:: - الصفحة 5

**ماشي الحال** · 09-09-2005, 04:50 AM

تعبت

نملتنا تسمحين اعطيك اشكل ولا اجاوب عليك

قولي ايه اسمح

يالله قولي

هاه قلتي ؟

قولي يالله عشان ماعاد اخوفك

هاه قلتي؟

شكلتس تقولين خلاص مسامحتك وفي داخل قلبتس

تقولين وش معنى حبكت علي انا

الله يعين نبدأ

طيب ماتبون اعلمكم سالفة المودم يوم خرب وطفشني

تكفون قولوا علمنا

عشان اقولكم لا منيب معلمكم

هاه قلتي ؟ مسامحتك؟

<< ناشب

الله يعين خلاص ببدأ

طيب ماتبون اعلمكم سالفة المودم يوم صلح واستانست

<< احيان يحس انه ماينعطى وجه

خليني اقرأ اشوف السؤال وشهو

هاه قلتي؟ خخخخخخخخخخخخخخ

اقتباس:

الانطباع اللي خذته عن حضرتك انك تخوف

يعني لا شفت يور نيم ارتاع مدري ليه احسك رقابه واحسن لك تعترف

حتى لا قلت شي يضحك اكتم ضحكتي لين تطلع على شكل عطسه او كحه

فـ هل كيف <<ركز على هل، الانطباع اللي اخذته عنك صحيح والا تسذبه وصدقتها؟

ايه اخوّف انتبهي تقعدين تمشين بالمنتدى اخر الليل

ماتاخذين الا انا طالعلك واقولك بووووووو

ليش نقول بووووووو اذا جينا نخوف احد

يعني ماينفع نقول ؤوؤوؤوؤوؤو << اللي فيه خير ينطقها متشابكه

لاتخافين مصدقه كذبه انتي

يتراوالك بس ولا انا احب الدجاج واجد >> يسمع بالتمويه هع هع

اقتباس:

حلم تتمنى تحقيقه بس مستحيل الوصول له

يعني كل ماذكرته تسمع واحد يقول لك طريقوكا مسدودون مسدودن مسدووود

مستحيل

مستحيل

مستحيل

<< رجل المستحيل

تدرين وناستي يانملتنا اذا لقيت في السؤال

ثغره افرك منها من الاجابه

انا دايم احب استبدل كلمة مستحيل الى صعب

لان المستحيل راح يدخل ضمن الخيال

ومادامك قلتي حلم مستحيل معناتها صار خيال مو حلم

الاحلام صعبه بس فيه أمل لتحقيقها

وش رايك نملتنا بالنحشه من السؤال يمديك؟

اقتباس:

حدث غير مجرى حياتك

دخولي للجامعه

<< بس ؟

>> بسييين

اقتباس:

ايه على طاري الطراره تبع الاسئله ذا ويسمى هديه العدد>>اصلح مشروع طرّاره؟

وفيها نشدة شيخ بعد؟

تفضلي يانملتنا الطريق امامك مفروش بالاميج ريدي

<< ناوي يرجع للبرندا هع هع

ينطيج العافيه والله يكثر من امثالك ويقلل من امثال المصريين

اللي على أأفا من يشيل

عندهم على كل سالفه مثل ماشاء الله تبارك الله

ألأرع لما استوى أأل للخيار يالوبيا

**ماشي الحال** · 09-10-2005, 04:45 AM

عقودي صديقي اللذي طالما اشتاق اليه

ولكن يحول بيني وبينك النوم وكرت الجزيره

اقتباس:

يلعن أم النحاسه
أدري انه أحساس بالقوه لكن هل فكرت كثير في قفل الدردشه؟
ولا قلت يلعن ام السالفه وقفلتها ؟؟؟؟؟؟؟؟؟؟؟

مهب انا سلف اللي قفلها

اقتباس:

ههه حسون الملعون من جزيره الكنز يحدثكم

عبسي ليش أخترت هل الأسم

عبسي يوم تواجهت مع عدنان ولينا هل أنك غرت من حب عدنان للينا والعكس صحيح وش رايك بالجمله
ليش ماتحب القطان نامق عشان شنبه مثلاٌ

ليش رابط شعرك بمغاطي ليش مو بكله

شلون قدرت تمسك عدنان بصبعين يوم أنه بغا يطيح من فوق القلعه

ماهو سر حبك لتربية الخنازير؟

أخر سؤال وأنت تشاهد تيمون وبومبا وشوهو شعورك....

أرجو الأجابه ان تكون صريحه يعني من جد
طيب أسال زي الناس عاد وش أسوي هذا الي طلع معي

الحين ماتقولي وش دخل دين امك في الاسئله انت ؟

خخخخخخخخخخخخخخخخخخخخخخخ

<< يتذكر ابو بندر

اقتباس:

أرجو الأجابه ان تكون صريحه يعني من جد

مافيه اجابه صريحه ولا كذبيه وش عندك ؟

ياعمي اطلع منها راسي مصدع وانت قاعد

تقول حسون الملعون وعبسي

تعال وش اسم قهوتنا اللي ذاك اليوم ضيعت اسمها

تيرا تاوه ؟

شكله غلط صح

عاقد وخر شوي بس

ايوووه كذا تمام

**ماشي الحال** · 09-10-2005, 04:56 AM

هلا اخوي قلين وشلونك

نخش دوغري بالاسئله الوقت راح وانا راقد

اقتباس:

"الباب إلى يجي منه الريح سده وستريح"
أ‌- هل تطبق هذا المثل في غالب حياتك؟ ارجو طرح بعض الامثلة.
ب‌- أرجو توضيح سلبيات و إيجابيات المثل بالحياة الاجتماعية و العملية.
ت‌- وهل تؤيد مسح هذا المثل من واقعنا؟ و لمذا.

مهب كل باب يجي منه ريح نسده ونستريح

فيه ابواب مانقدر نسكرها ان سكرناها توهقنا

أ- صراحه اطبقه بالغالب مثلا عامل

هندي يرفع ضغطي ودايم يجيب مشاكل يرجع لديرته ونجيب غيره

والامثله واجد ماودي اقعد اطول

بذكر الامثله وهي واضحه >> نصاب مخه قفل

ب- السلبيات والايجابيات تختلف من الناحية الاجتماعيه والعمليه

سلبياته بالمجتمع احس انه يكون فيه شوي من

الانانيه للشخص اللي يطبق المثل هذا

لانه فضّل الجانب المريح بالنسبه له دون التفكير

في تصليح الباب اللي يجلب الريح هذا

وطبعا هذا في مواقف معينه وليس في كل المواقف ..

والايجابيات ان تكون حياة الشخص افضل

وأكثر بعد عن المشاكل ويكون فيها هدوء

وراحة بال ...

بالنسبه للحياة العمليه اشوف ان السلبيات قليلة جدا

ونتائجها تتحول الى ايجايبات اذا

كان المقصد سير العمل بالشكل المناسب

وان تعدت نتائجها نطاق العمل فإنها تعود على المجتمع

مثلا كــطرد موظف غير كفؤ ... بعد الطرد يصبح باب في وسط المجتمع

وهكذا المسأله

تتفاوت على حسب طبيعة الموقف ...

ج-صراحه لا أؤيد مسح المثل لاني اشوفه قريب عند الحكمه اكثر من وصفه بالمثل في بعض الاحيان

حاله حال (( ابعد عن الشر وغنيله ))

اقتباس:

أ‌- في طلعات البر, هل تكون عامود خيمة أو علاقة جوال؟

علاقة جوال ؟

افا

لا في هالوقت وطلعات الشباب الكل أعمده

لكن فيه بعض الامور تحتاج ان المبادر فيها يكون

الاكبر سن فينا ..

اقتباس:

اين كنت في شهر مايو 1985 م؟

العصر او بعد المغرب؟ ياليت تحدد

اذكر كان فيه زواج لعمّي تقريبا قريب عند التاريخ

يعني اكيد كنت في الخياط اطلع ثيابي >> ايام زرار واحد للرقبه

اقتباس:

- كم مرة سافرت إلى هولندا, و متى أخر مرة سافرت إلى هناك, و أطول مدة قضيتها هناك؟

ولا مره بس عندي مراسل هناك

اقتباس:

سؤال لم استطيع إيجاد أجابه!!!!!!

كما تعلمون, تما إثبات أن الضوء عبارة عن مادة. والمادة تشعل حيز من الفراغ..أرجو الرجوع إلى نظرية ارخميدس بتعريف المادة..

أ‌- عند قطع التيار عن المصباح الكهربائي, أين يذهب الضوء اللي في الغرفة؟؟؟؟

انا بعد فيه سؤال محيرني

الصوت وين يروح

اصوات جدي وجدك الله يرحمهم وين راحت ؟

اقتباس:

كما تعلمون ضعفي في ألغة العربية لذا طرحت السؤال التالي:
أ‌- ايش جمع اسمك "ماشي">>>>اختبار ذكائك الغوي

هرولة >> ينكت

ترى حتى انا مو بعيد عنك باللغه العربيه يعني شرحك سرا

بس اتوقع جمع ماشي (( مشاه))

الله يعطيك العافيه اخوي قلين

اسئله رايقه ويشرفني تواجدك

**ماشي الحال** · 09-10-2005, 05:06 AM

وهج بنتوون حلوه للغايه

يونس يرعاها بعناية

من يونس ؟

يونس شلبي طبعا

تذكرونه ذا المسلسل ؟ هلا مع يونس

وبعدين ليش قلتي اليوم ليندي

يمكن عندتس انتي

انا عندي سامودي << مايذكرتس في هايدي؟ << بالغصب يركب يعني يركب

يالله اسئلي ايتها النذلة الطيبه

اقتباس:

لو كنت متضايق كيف يكون تعاملك مع من حولك ؟؟؟

احس انك كازووونا <<< اقول ياكثر الاحاسيس عندتس

وانا احس انك مادونا وانا انريكي

ونغني اغنية دويتو عن البطاله في السعوديه

اذا صرت متضايق التعامل يكون بالصمت

مااتكلم واجد لان غيري ماله ذنب باللي فيني

بس الحمدلله الفتره ماتطول بس البلى اذا كان فيه

واحد مايحس اني متضايق

وجلس يهذر فوق راسي

احتمال يكون فيه حالة وفاه لحظتها

اقتباس:

انت الحيين تتهرب من واحد من ربعك وهو عاد ثقيل طينه نشبه

وفي هاالحظه انت طلعت من بيتكم عندك مشوار ومستعجل تروح

وتوك تركب سيارتك الا وجاك وقالك وينك انت من زمان خبري فيك

ولصق فيك وش راح يكون شعورك ؟؟؟؟؟

خخخخخخخخخخخخخخخخخ

<< يتذكر سالفه صارت نفس كذا

من زمان قبل الجوالات واحد كان علة اكباد ناااشب

بكل ماتعنيه الكلمه المشكله انه اتصل من البقاله اللي عند بيتنا

وانا اللي رديت وحسيت انه ماعرف صوتي

واستغليتها فرصه وغيرت صوتي بزياده قال وين فلان قلت مسافر

قال سيارته موجوده

قلت راح مع رجال وخلاها هنا

قال متى بيرجع قلت مدري يمكن

بعد شهر قال عنده رقم هناك << انشهد انه ناشب

قلت لا والله

اوكي في امان الله

انا ماطرى على بالي انه يتصل من البقاله توقعت من بيتهم

طلعت اشغل السياره توني منزل راسي ادور شريط

وحسيت ان فيه سياره جمبي رفعت راسي

واشوفه يبتسم

بغيت اغمض واسوي نفسي نايم

طبعا في خاطري اقول العن امها حاله مع ذا الناشب

وانزل لازم سلام مجامله وقعد يقولي

انه كلم ورد عليه اخوي وقاله كذا وكذا

قلت ايه رجعت اليوم وهو مايدري

باخذ اهلي وبرجع اسافر وانا انتظرهم يطلعون >> يعني فارق

المهم بعد التصريف الصعب راح من هنا وانا حركت من هنا

الرجال صراحه طيب فوق المعدل

بس عديم احساس وغثيث >> يمدح ويذم

ماعلينا من خوينا

نجي لشعوري لحظتها اكيد تقفل معي

بس بسرعه اصرفه وان مافيه فايده الله يعين نضغط على النفس شوي

اقتباس:

هل انت من النوع الذي يسرع وانت تقود السياره؟

اول ايه ومااحب اني اسوق دايم اخلي غيري يسوق

بس الحين الحمدلله السواقه راكده

لا اسئلتك ماهي مكرره ولا شي

بس لون الخط مكرر عندك >> يبي يتعبها ترجع وتقعد تدور

ميرسي بوكو وهج ويشرفني تواجدك واسئلتك اللزيزه

بون وي

**ماشي الحال** · 09-10-2005, 05:20 AM

قاهرة حمدالله على السلامه

اقتباس:

*ماذا تقول لكل من هؤلاء*

*بورحلة :: لوح البيت قصدي عمود البيت

*سلف خمسه :: << اقمل حاقة ياروحي انك توأم روحي

*هملالي << انتاااااااا منتااااا الاولاني

*جموره :: لديها الكثير ولكنها اتوقع لم تدرك ذلك

*هيبه :: طلتها لها هيبه

*غرام احباب :: نموذج للنشاط المؤثر في أغلب الاقسام

اقتباس:

من هو العضو ...:
* الذي تفتقده

أي عضو يفرض نفسه ويغيب بالتأكيد افقده

الذي يجعل ضحكتك تخرج و أنت تقرأ تعليقاته..

كذا شخص بس بالغالب سلف

يحرجك بكلامه

no body

اقتباس:

-**اذا قررت انك تسوي مشروع مثلا ً وتسرعت فاتخاذ القرار .. وفالنهاية

فشل هالمشروعفماذا بتكون ردة فعلك ؟؟؟ تنـدم؟؟ ... أو تحاول تصلح

الموقف وتتفادى الضرر ؟

الندم مايودي ولا يجيب شعور وقتي مايطول

اكيد راح احاول اتدارك الموقف وان الفشل ليس نهاية المطاف

ويعتبر اولى خطوات النجاح

اقتباس:

**-ماذا تعني لك الأمور التالية:

1- السماء : الصفاء

2-المرأة : النصف الاخر للرجل

3- القمر : دعوة للسهر

4- البحر : الغدر

5- الحرية : حلم

6- الغروب : صلاة المغرب

7-الشعر : عدو الصلع >> فاهم غلط

ترجمة أحاسيس

اقتباس:

**شو موقفك من الحب ؟وهل جربته ؟ هل تأمن بوجوده ؟

الحب كذبه وصدقناها

قاهره مره فوق تقولين ازيك ياقدع واخر سؤال تقولين شو

كم دوله سافرتي بالصيف اعترفي

يعطيك العافيه قاهره وشاكر لك تواجدك واسئلتك اتوقع اخر وحده انتي

صح سحابه؟

سحابه قفليه بالشمع الاحمر

اعطوني حريتي اطلقوا يديا

وبحكم توقعي ان هذا اخر شي

اشكر كل من سأل واللي ماسأل بعد اشكره

وانا لكم وانتوا لي وكلنا لبعض

ويالله نروح هناااك

فينيش

أدوات الموضوع
مشاهدة صفحة طباعة الموضوع أرسل هذا الموضوع إلى صديق
تقييم هذا الموضوع
تقييم هذا الموضوع:

الذين يشاهدون محتوى الموضوع الآن : 1 ( الأعضاء 0 والزوار 1)

اعلانات المنتدى