أهلاً بكم في عزبتي المتواضعة ....

عاميها · 04-15-2005, 03:01 PM

أول شي السلام عليكم وش اخباركم عساكم طيبين إن شاء الله ...

المهم خلينا ندخل في المضمون :

تقول الحكمة : ’ ربّ صدفةٍِ خير’’ من الف ميعاد

وأنا أقول ’ربّ جردة خير’’ من الف ميعاد ...

في يوم من الأيام واحد من العيال جردبي (( يعني صفّني أو طنشني ))

المهم كنا متواعدين على ساس نخرج سوا ... طبعا أنا أستنيت استنيت والله

ياولد ماعندك أحد بس خليني اروح والله بالفعل قلت لنفسي خليني اروح الف كم لفة بالسيارة ... أضيّع طفش فكان ماكان وحدث ماحدث ؟؟!!!

رحت لمنطقه عندنا يكثر فيها الشباب وكان ذاك اليوم زحمة من جد زحمة وشفت اللي ماينشاف ...

ونيت من اليمين وونيت من الشمال وحاااااااااال لا ولاتنسوا الكرسيدا الثمانين

المهم الونيتات اشكال والوان اللي طارح الوجه من قدام ومشغّل الكشافات الصفر
ومعبي الونيت كله استكرات (( من قوة الكبت النفسي )) وحااااااااااااال الله لايوريكم

تلقاه حاط لمبة حمرة في سقف السيارة ومشغل مزعل فرحان ولاّ فتى نجران ويا الله إدهار وجنان ووسوسة لااااااااااا وأهم شي عندهم اللمبات الصفر والبرتقالية هذي أهم شي عندهم .. وش تعرف هذي الديكور عندهم
وعلى فكرة تراهم ’رتب يعني كل واحد ووضعه هااااااااااااا وش عاد تعرفوا انتم

وعلى ساس يكون عندكم خلفية عن كيفية معرفة الرتب أنتبهوا

ترى اللي منكّس الطاقية تنكيسة خفيفة هذا ملازم واللي منكسها تنكيسة خفيفة على اليمين هذا ملازم أول ...

والنقيب عاد اللي منكسها ورى ونافخ الطاقية من النص والرائد اللي منكسها ورى بس مو نافخها هاااااااااا وش عاد تعرفوا انتم ولسة الفضايح اكثر واكثر بس اصبروا

المقدم تلقاه منكّس الطاقية على اليسار والشعر تلقاه متناقز من عند الأذاني ...

العقيد عاد أخر روقان تلقاه حاط الغترة على كتفه وشعره متطاير والشنب مرمي من الأطراف ويسوق الونيت وهو مو شايف أحد ..

العميد عاد شغل بزنز وش عاد تعرفوا تلقاه طارح الطاقية ومنكّسها من قدام وأهم شي مغبّر الونيت ... ورافع صوت مزعل فرحان طبعا هذا لازم عاد عيب مايصير لازم يسوي كذه

اههههههههههههههههههههههه نسيت شي عن المقدم المقدّم عاد هذا تلقاه راكب جنب العقيد
ومميّل السيجارة من طرف فمه ..

أما اللواء عاد هو الداهية : تلقاه طارح الطاقية على جبهته ونافخها أصلا تلقاه يشتري اكبر مقاس وتراه يحط الشماغ على كتفه اليسار ويمده الين كتفه اليمين وأهم شي عنده التحرّش بالناس وتقفيل القزاز ولمبة حمرا في السقف ...

المهم والله كنت أدور ذاك اليوم وأنا بطني من الضحك خلالالالالالالالالالالالالالالالاص
ماغير اضحك واضحك الين بغيت اصدم في واحد لواء عماني بنور الكشفات الصفر

طبعا الرتب هذولا يختلفون من منطقه ومنطقه مثلا تلقى بعضهم يبرّز الكفرات ويرش أمها فيري وعاد على حسب ....

من جد ذاك اليوم لاينسى وكان أحلى من الف ميعاد ...
وعلى فكرة الترقية عندهم على حسب المصايب اللي يسونها مع الخلق
مثلا الأركان هذا عاد قمة في العربجة أصلا هذا اذا شفته احسلك تمسك المسار اليمين وتولّع فلشر واذا كان عندك كشافات هالوجين شغلها لاتوفرها وخصوصا اللواء ركن بعّد عنه نصيحة لايقرّب منك ....

الطريف في الموضوع كله أني شفت عقيد مشغّل في سيارته هاني شاكر طبعا هذا أكيد حبّيب درجة أولى ...

والله كان يوم من جد فلّة مابعدها فلّة تسمع صوت الكسرات من كل جهه وتراهم مايسمعون في أم كلثوم يحبونها أكثر من الونيت والطواقي الكبار ...

بعدها حسيت بجوع وحبيت أني أوقف وأشتريلي شي أكله وياليتني ماوقفت

نزلت أشتري لقيت اللي يبيع أخس والعن منهم والله ثم والله أنه فجعني من جد فجعني عاد ما ابغى اقلكم على ساس لاتجيكم جلطة ...

لالالالالالا وانا مسوي فيها قاعد أمشي بشويش بالسيارة وداخل جو مع ميادة الحناوي وهاجد ومروّق وشويه ما اسمع الا ططاااااااااااااااااااااااااااااات وصوت الشكامين !!!!!!!!!

وييييييييييييييييييييييين احنا ياخلق وين بس الصراحة انبسط وضيعت طفش على الأقل جلست أتأمل في ملكوت الله وفي الناس هذي اللي من جد ماهي فيه على وجه الأرض وطبعا التأمل في مخلوقات الله عبادة .....

والله شكلي طولت عليكم بذي السالفة اللي مالها داعي لكن عاد هذا اللي صار معايا .. وحبيت أني أفضفض لكم من قوة القهر .....

كله كوم ويوم ينزلوا من سياراتهم يسولفوا مع بعضهم كوم تلقاهم مقشعين السراويل والسيقان باينة وحااااااااااال لاااااااااااااا والثوب مصفّر ....

الله لايبلانا اي والله واستروا ماواجهتم وسامحوني على الإطالة على الأقل أحسن من أني أجلس مع حبّيبة في عزبة الله لايكتبها عليكم .... أنتم بس اتخيلو منظرهم وكل واحد ماسكله ركن وداخل جو مع تخيلاته الوردية عفوا البرتقالية وإذا كلمته قالك هاااااااااااااااااااااااااااااااا ومو داري هو وين لحووووووووووووووووول

أعتقد إن ما أحد فهم وش أقول

لكن عشان لا تقولون عاميها أتعبنا بالقراءه على غير فائدة

راح أهديكم هذي القصة الحزينة

7
7
7
7
7
7
7

**شباب في رحله** · 04-15-2005, 06:49 PM

محجوز حتى ننظر في الموضووع

**مخربها** · 04-17-2005, 12:01 AM

ارررررررحب يا ذا ..

وشذا الزين كله .. وينك عايشً فيه .. القطب الشمال التاسع عشر

قريت قوصتك وحسيت اني عايش في الجراديه .. وحياتي كلها تتن وشاهي

اول شئ يالسربوت وش وداك عندهم .. ؟؟ هاه .. علمني .. ؟؟
وإلا تبي شئ من ابو لمبه حمراء ..

وبعدين وشذا الرتب عندهم .. ياخي ابي اعرف متى دورتهم .. شكلها في عز القيظ وايام الطفره .. واااوهـ ..

وياكرهي حقين الكسرات .. لي قال : ياليل دانه ياليل دان .. ياخي ودي اطفي المسجل واخذ الشريط واخريه تحت الكفر والعن امه بواحد

------------

فالحقيقه قوصة تطرب الكرشه .. تحس انك تسمعها من خويك
يابحني لك يا عاميها
وباين عليك ان عندك خيال واسع فالقوصص ..
لا تحرمنا يا بعدي من هالزحفان .. نبيك تعميها صدق

لاهنت يا حوبي

عاميها · 04-17-2005, 03:45 PM

شباب في رحله

أنت كل شئ عندك (( ننظر ))

ننتظر نظرتك الثاقبة

عاميها · 04-17-2005, 03:51 PM

هلا والله بالزاحف الماحط المقلع مخربها

أقول يا مخربها صلحها قبل كل شئ

وش تقول وأنا أخوك الطفش يودينا للمهالك

بعدين وش ذي الكلمة سربوت !!!!

تراني زعلت و تمغطت على الكرسي ولازم آخذ بحقي

على العموم عزيزي القارئ مخربها

ترى أبو لمبة حمراء يسلم عليك ويقول وينهم

راح أخليه يشترك معنا يمكن يعجبك

عاميهم

الأسيرة · 05-24-2005, 07:54 AM

خخخخخخخخخخخخخخخخخخخخخخخخخخ..
الله يرجك ياخي...
بس تعبتني... واتمنى اكون فهمت شئ من اللي كتبته...

المملوح · 05-26-2005, 02:02 PM

القصة حلوة...
ما شاء الله.. عندك موهبة جميلة في القصص
على العموم ما قصرت ويعطيك العافية

سعيدان المقلع · 05-28-2005, 10:37 PM

شكلك متأثر من افلام ام بي سي 2
لاعاد تشوف افلام الخوال اللي يجيبونها الا ومعاك ولي امرك :d

علي خيال تسنك في شارع العصارات بالثقبة ياحبي لك بس

أدوات الموضوع
مشاهدة صفحة طباعة الموضوع أرسل هذا الموضوع إلى صديق
تقييم هذا الموضوع
تقييم هذا الموضوع:

الذين يشاهدون محتوى الموضوع الآن : 1 ( الأعضاء 0 والزوار 1)

اعلانات المنتدى