.....................؟؟؟

**سحابة حب** · 03-03-2005, 01:27 AM

مدخل ,,,,,,

يوم من الأيام اجتعمت مع ثنتين من البنات ..تكلموا عن وحده يعرفونها .. و استلموهاا تقطيع .. طبعاً لأني ما أعرفها ما شاركتهم الكلااام ===> و إلا ما اقصر ..
خلاصة الكلااااام أنهم ما بقوا فيها شيء ما تكلموا فيه ,,,
الللي حصل أن صديقتي بالليل تحلمت بأبو البنت " اللي حشوا فيها " معاه قطعتين لحم سوداء .. و يقول حطيها بثلاجتك ,,,
الحلم كان فيه رسالة صريحة و تنبيه ,,

نخش في الموضوع ،،

هذا الموقف لفت نظري لموضوع الغيبة ,, أو الحش طبعاً هالشيء منتشر بشـــــــكل فضيع مو بس بين البنات حتى بين الأولاد ,,,
يعني ما يجي طاري أحد .. إلا استلموه و قطعوه تقطيع.. و بعد يخلصون عليها .. تجي وحه تقول بصراحة يا بنااااااات هالسخيفة التافهه ما تستاهل تاخذ حسناتنا .. خلونا نقفل على المووضووع ,,, أو تجي الثانية تقول صحيح أنها كذا و كذا بس خلوها بحالها ==> قالها بتدافع عنهاااا ,,

أكيد فيه حل هالموضوع ,,, أنا بالنسبة لي بعد موقف صديقاتي صرت أحاول في نفسي أني ما أحش في أحد ... صحيح أني ما قدرت أمنع نفسي كلياً لكن أحاول مع نفسي ..

نصيحة جربيها مع نفسك كل ما حشيتي في وحده .. تصدقي عنها لأنه و على حسب ما سمعت أن الغيبة لها حقين الأول حق لله ,,, وهذا يكون بالتوبة و الإستغفار و الحق الثاني للي حشيتي فيها .. و هذا إما أنك تروحين تتحللين منها " وهذي صعبة على أغلبنا " و الثاني أنك تتصدقين عن ذمتها

خاتمة ....

هل فيه حل منطقي و عملي علشان نترك هالتصرف ؟؟؟؟؟

العاااشق · 03-03-2005, 04:57 AM

سحابة حب اشكرك على الموضوع الشيق

مسألت الغيبه هذي صارت تسليه في المجالس وبين الشباب والبنات حتى كبار السن مايقصرون

انا اقولك سالفة صارت لي

مره جاني احد الزملاء يقول ترى فلان قال فيك وقال فيك وكان فلان وفلان جالسين ولاسكتوه

مع مرور الايام تأكدة انه هو الي يتكلم فيني ويحش ويطلع اشاعات تافهه

الحل للمشكله هذي هي انك لاتصدقي كلام الناس عن اي واحد لان الحقد يولد التقطيع >>>>>> (الحش)

وحطي في بالك ان حشيتي في واحد مصير الكلام بجيه ويقولوا فلان قال فيك ولا يزودون في كلامك بعد

وهو رد على الي سويتيه بروح يتكلم فيك ويزود ويطلع عنك كلام ماهو فيك تحول من غيبه الى بهت

فالحل هو (ابعد عن الشر وغنيله)

يعني لاتحشي عشان تسلمي من حش العالم

شااااااااكر ومقدر على موضوعك

**سحابة حب** · 03-03-2005, 02:34 PM

العاشق ,,,,,

حيااااك ,,

و سالفة نقل الحكي .. سالفة أفضع من سالفة الحش ,,,

يعني ممكن ينقال بصراحة أنا ما احب احد يتقل لي كلااااام انقال عني حتى لو كان عندي فضول ,, أني أعرفه ,,, لكن نفسياً أفضل لي خصوصاً لو كان حش و تقطيع ’’لأني بدخل في مشاكل و حزازيات ,, و بشيل في قلبي من هالانسان ,, فأفضل لي أني ابعد عن هالمواضيع ,,,

أمـــا إني ابعد عن الحش والله بيني و بينك أنا فكرت فيه من ناحية الحسنات ,, يعني من كثرها حسناتنا نوزعها على خلق الله ,,, بس سالفة أنه احد ينقل عني ,,, ما شلتها في بالي ’’ لني ما اقول إلا شيء موجود في الوحده ,,, يعني ما أفتري عليها و ألف قصص و روايات ,, عنهاااااااا

ألف شكر لك على ردك .. و مرورك

**ياهملالي** · 03-04-2005, 12:11 AM

أهلين أخت سحابة 00

بالنسبة لما ذكرتيه 00 أعتقد أن الجميع يلاحظ إن هالمسألة أو هالمعضلة متوفرة بكل مكان وأصبحت سلعة رخيصة على كل لسان 00

نجد الغيبة في المجالس ، والعمل ، والرحلات ، والسفر ! ، وحتى نجدها متوفرة لدينا هنا بالمنتدى 00

تخيلي تحصلين (( أعضاء )) يتكلموا في أعضاء آخرين دون أدنى سبب فقط لأن الكلام والحكي متوفر عندهم ،

يمكن شطحت شوي عن صلب الموضوع ،،

لكن أرجع وأنبه على خطورة المسألة وقد حذرنا منها الرسول عليه أفضل الصلاة وأتم التسليم بقوله فيما معناه " أن الرجل إذا يتحدث في الرجل وهو غائب ، فإن ماقال عنه موجود فيه فهذا بهتان ، وإن كان ماقاله غير موجود فيه فهذه غيبة 00"

أعتقد من وجهة نظري الشخصية إن تعويد النفس على مراقبة الله عز وجل في السرو العلن وعدم إيذاء الآخرين مهما كانت المبررات سوف يكون له تأثير طيب بلا شك على تهذيب السلوك الفردي وبالتالي ينتقل التأثير إلى المجتمع شيئاً فـ شيئاً إلى أن يتخلص المجتمع بأسره من هذه المشكلة أو هذا الذنب الكبير إن جاز لنا التعبير 00

أشكرك أختي على ما طرحتيه لنا 00

عل الله أن ينفعنا به 00

على الخير دايم نلتقي ،،

**سحابة حب** · 03-04-2005, 12:58 AM

مرحباااا أخوي يا هملالي ...

أنـــــــا معاك في اللي قلته ..

أكيد إذا استشعر الواحد مراقبة الله أكيد بيغير نفسه ،،

بس أكيد أن تهذيب النفس ,, و تغير الطباع البشرية ,,, صعب جداً ,, و يحتاج إلى مجاهدة ,, و تعب ,,

لكن الإنسان إذا نوى على شيء أكيد لا زم يكمل للنهاية ..

مشكور على ردك أخوي ..

**ياهملالي** · 03-04-2005, 01:20 AM

شرايك نشيل كلمة (( صعب جداً ))

ونبدأ

كلنا 00 ماله داعي نستسلم أبد 00

أشكرك أختي ،،

**سحابة حب** · 03-04-2005, 01:35 AM

أتمنى ........

و أنا بديت معي نفسي و صديقاتي معي أننا كل ما حشينا في وحده حطينا ريال نتصدق به عنها ,,

تصدق أنه في أول يوم طلعنا فوق الـ40 ريااااااال ’’

لكن مع الأيام بدت تقل الفلوس .. و بدينا نضبط أنفسنا،،

مشكور على تفاعلك .. و تجاوبك

**المستشار** · 03-05-2005, 12:18 AM

الغيبه واصبحنا نلمع معناها إلى الحش

لن أضيف أكثر مما أضاف الاخوان الذين سبقوني بالرد

خصوصا أخي الفاضل ياهملالي .

لكن من باب الفائدة للجميع وجدت خطبة لاحد المشايخ وفقهم الله

تتعلق بالغيبه وأثرها الشرعي والإجتماعي

لعل الله أن ينفعنا بها جميعا .

واليكم الرابط :

[عفواً يمكن مشاهدة الروابط للمسجلين فقط للتسجيل اضغط هنا]

تحية للجميع ,,,,

**سحابة حب** · 03-05-2005, 12:34 AM

المستشار ....حيااااااااك ..

و مشكور على الرابط ..

و على ردك ..

ألف تحية

السلطان · 03-05-2005, 01:39 PM

احب هالنمونه من المواضيع لي رجعه ,,!!!

وبقولكم اللي في جعبتي من كلام ,,!!

يسلمو سحابه ولي رجعه ,!!!

هــيــبــه · 03-05-2005, 05:06 PM

اخيتي سحوبه

اعتقد عزيزتي ان الغيبه تاخذ مكان الحديث المفيد دائما

يعني اغلب النساء او الرجال اجتماعاتهم بدون هدف لمجرد التسليه
وبغض النظر عن كيفية التسليه

فلو كان الاجتماع لهدف التسليه يجب وضع اسس للتسليه هذي

يعني يكون تسليه مسابقات مثلا ما اعرف غيرها
او العاب

يا كثر الهرج الماخوذ خيره والقعده والبلبطه
الحركه بركه
لازم الاجتماع يكون فيه حركه فكريه وحركه جسديه ليه لا

يعني احس ان الاجتماع يجب ان يكون هدفه اهم واكبر وارقى من مجرد لبس ومنين جبتي هذا وفلانه لبست من المحل الفلاني والمحل الفلاني فتح بالمجمع الفلاني

اعتقد لو كانت مساحة الحديث المفيدكبيره راح تتقلص مساحة الغيبه

وجزاكي الله خير ابي اطلب طلب

ممكن تغتابيني انتي وربيعاتك بكم بكلمه
صراحه اذا عرفت ان احد متكلم فيني افرح
اقول اجر وجاني بدون تعب
الله يرزقني شكر النعمه

**nAmLaT nAjD** · 03-06-2005, 01:18 AM

(ايحب احدكم ان يأكل لحم اخيه ميتاً فكرهتموه)

مجرد التفكر في معنى الآيه وتخيل الموقف

يخلينا نفكره في اللي نقوله

بصراحه تاملي لآيه عظيمه مثل كذا يخليني اشعر بعظمه الغيبه اللي

تهاونا فيها

ولو قلنا محنب نتكلم في سيره احد لو ماتجي الا على الدكتور او الدكتوره

والا حتى الشغاله اوالسواق اللي مستهينين فيهم كلها تعد من الغيبه

في قول لاحد التابعين بما معناه انه لو بغى يغتاب احد

فاولى الناس هم والديه لانهم الاولى بحسناته

وحنا حسناتنا صايره للاولي والتالي الله المستعان<<من كثرهم عاد

ذكرتيني بوحده من المشاريع سووها بنات خالتي والا انا ابطي مااسويها

اي وحده تتكلم في احد قدام الثانيه عقابها تنظف غرفه اختها

طبعاً في البدايه كانت نتايجها حلوة وخف الكلام بس الا مايخق الواحد

ويرجع لعوايده

الاحاديث والآيات كثيره بشأن الغيبه وبالذات للنساء

الله يصلحنا<<احلفي

تشكرات سحوبه

الأصيلة · 03-06-2005, 01:54 AM

الله يجزاكي خير يا سحابتنا المطله بالخير دوما

والمشكله هذي عظّمها انها تجرح الدين وتسيء للعقيدة

وبما معنى الحديث الشريف
وما ينكب الناس على وجوههم في النار الا حصائد السنتهم

لكن ندعو الله ان يقوي ايماننا ولا نضيع عبادتنا وتعبنا بامر نستطيع ان نستغني عنه

ولكن صعوبة تكمن بضعف نفوسنا واتباع اهوائنا

الف شكر لكي يا سحابة الخير دوما

اعلانات المنتدى