مشكله لصرت من تهواه مغرور وعنيد=لو تحاول تقنعه والله صعبٍ تقنعه
دايم متغطرسٍ منغر واحساسه بليد=وان بغى يفتن يحرك للمصايب زوبعه
فنان في طرق الهوى دكتور في قطع الوريد=خبير في رسم الخدع حريف لبس الاقنعه
ماتعجعبه الحان رابح صقر والاطرش فريد=كل الاغاني مايبيها لو تجيه منوعه
ماينبسط الا على نوحي ونغمات النهيد=يرقص على لحن الحنين وفيه يطرب مسمعه
دايم يعاندني ولا ادري من عناده وش يريد=كل يوم يمر انا وياه حده واقرعه
ان قلت له هذا قديم يقول لا هذا جديد=وان قلت له هذا شماغ يقول هاذي قبّعه
وان قلت له هذا ذهب يقول لا هذا حديد=وان قلت ذا راس الضبي يقول هاذي اصبعه
كل مازود عناده حبه بقلبي يزيد=بس مدري ويش اسويله على شان اردعه
قلت انا بهدده بفراقنا وابقى بعيد=يمكن اني من ورى التهديد احصل منفعه
قال قبل انك تهددني ترى فرقاك عيد=كم شجيعٍ قد نوى قبلك وضيع مرجعه
قلت انا بشب ناري يمكن يذوب الجليد=بقدح زنادي وبالقوه بحطه وارفعه
قال ريّح لا تشب النار وتزيد وتعيد=خلك على حبل الرجا من قبل لا اقوم اقطعه
واصبحت انا محتار بين القلب والعقل الرشيد=عقلي يقول انساه ولا القلب ردد اتبعه
والنهايه يوم صار الفكر من عقلي شريد=والقلب دمي في عروقي حالفٍ مايدفعه
طاوعت انا قلبي وصرت امشي معه مثل العبيد=وانا اشهد انه طوعني وانا عجزت اطوعه

المشاركة الأصلية كتبت بواسطة هــيــبــه رائعه جدا جدا رائعه في فكرتها رائعه في صياغتها رائعه في وزنها رائعه ف يكل شي فعلا وصلت لدرجة الإبهار صح لسانك يالضغط العالي يالله ان تحيوه بالصاله تقهوى وسمعنا علومك الطيبه