اليوم مثل يوم الرحا عجه امزاع=نهار يفرق شملهم عقب تجميع

ياهل الطيور اللي تصيد الثلاثي=تحطيمكم لاكبر عدد مثل الاظغاث
لو تجمعون ذكورهم والاناثي=اكبر عدد ماحطمه غير عبـّاث
النادر اللي في الهدد مايثاثي=لا فرّعه راعيه ماهوب لثاث
عباث في زرق الغلب يوم عاثي=كنه عديماً له على الهوش حثاث
ادلى بربداً في غلبهن بغاثي=للريش من كفه على الروض بثـّاث
وألّحق ثمانية العشر بالمعاثي=واضحى له التفضيل بالفعل ميراث
عذناه بالرحمن مشفي الغلاثي=عن كل شيطاناً للأسباب نفاث
طير الكريم اللي جنابه دماثي=من حل فيه اسقاه ديماً وهثهاث
مهب لحلوحاً حشاطً حثاثي=اخير مايثمر بحرمل وجثجاث
شيخاً بصكات السنين العباثي =أحيا قديم امجاد قوماً بالأجداث
عسايّ ما استعرض عليه الميراثي=آميـن..ياحيً للأموات بعّاث
اليا قيل منهو قلت مدري واعاثي=نايف ملاذ اللي له الوقت غـثّاث
المستغيث اليا التجا واستغاثي=عنده يغاث..وخير اساميه غيّاث

يا ماحلا لا ذعذعن الهفاهيف=وقامت تناقرنا هبوب الصفاري
وهب البراد ودوّحت شوبة الصيف=واوحيت للمقناص والطير طاري
واللي يبي شمة هبوب الشفاشيف=قام يتنبى للبيان الوزاري
يدلى على حزم الجلاميد وطريف=خطايطاً فيها عواين حباري
بعض العرب وده ولو جاه تكليف=يسري ويصبح يم هاك المحاري
الناس يقضون الاجازات بجنيف=ونايف يمضّي رخصته بالصحاري
صحراء العيون اليا غدت كلها ريف=عند الشرك ولا علاوي جداري
لامن عسّاسه عطاه التعاريف=وامسى عن اللي في حراويه داري
نادى بقرناساً اليا حيف ماعيف=فيه الحم الكدري وريشة قماري
وجت للملامس وفيه ماقيل ياحيف=مافيه عيب الا من الريش عاري
وتوابعاً مثل الرماح المعاكيف=وامواس مثل مسللات الشباري
طرح الشبك من نازحات المحاذيف=جابه حدا العتبان ولا المطاري
اما ولد مطلق ربيع المهاجيف=ولا السليس دحيم ذيب الغداري
جابه لشيخاً يرتكي للتكاليف=الله يجيره عن صدوف الجواري
شيخاً تلحفنا حسانيه تلحيف=ماهوب عن حق الخوي بمتواري
شيخاً هواه لاحصل له على الكيف=تعرض النسناس مع كل فاري
ونقل الحرار وهدها بالاطانيف=اما ضحى ولا وروك الظهاري
وليا كفخ حل العصير الطهيريف=ربداً مطيرها الرفيق المباري
اوقف وتبعهن طويل الاطاريف=حراً على بعد المطاليب ضاري
الصافي اللي حاز حلو التواصيف=لـّحاق عزّام الحباري اجباري
واليا انزعج ظاقتبهن المحاريف=وتزبنن قوع الشجر والمذاري
ومن عقب ماهن للعزامة مواليف=قاموا عليهن يظربون البواري
ومضواه في بيتاً كما نايف القيف=في صفح نزواً عايفتها الذواري
اليا شيدوه اللي لبنيه معاسيف=وحطوا مشب النار بين القواري
ناراً حطبها يشترى بالتجازيف=عمال ماتلحق عليه اللواري
ناراً يصاليها دلالاً مهاديف=صهباً وصلوا النار فيهن مواري
صهباً عليها الجور مامنه تخفيف=زاماً لها ليلي وزاماً نهاري
صفراً خنين بهارهن من ورى الليف=يطرد عماس اللي من البعد ساري
اليا درجوهن وادرجن العجاريف=وكل أفلجً بفعول طيره يماري
اقفن هواجيس الظماير مناكيف=والطير عن راعيه شال الطواري
مع ظف اخو نورة بعيد الاشاويف=شيخاً بوسع الخلق ماله مجاري
ولاني بفاخر وتفاخر بتزييف=الا..ولاالبس من ثياب العواري
افخر بحكامن حموا نجد بالسيف=والشعب اشادوا مستواه الحظاري
وافخر بقرب اللي بعيداً عن الحيف=شيخاً بعدله بيننله شواري
ومدحه ماهوب خراط ولاتواهيف=عن عرف والكاذب لعله نياري

الا ياوجودي وجد من ضيع اللحاق=غدا عقب مامنه ذبح عشرفي يومه
على درب قشراً وافقت به مع الاشفاق=بعد خمها فالقاع سابقته القومه
بغت راست المرقاب ودريوله ماساق=وغطاه الظلام وضيعت الطير مقسومة
وتعومس وضاق وقام يلفي على السواق=كثير الحسوف وراعي الطير مالومه
على الصاحب اللي حط بقصى الضمير رواق=الا خطة ياعبيد بالكبد مرسومة
تبعد وانا قلبي على شوفته مشتاق=انا رحت مع قومي وهو راح مع قومه

يا طـير عقبـي كن خاطرك شـاين=خـاطرك شين و غيبتـي عنك يومين
النقـص فـيـك مبـين ٍ له بوايـن=فـي لمعة الريـشه و في ناضر العـين
يا طـير انا ويـاك كنا خداين=بيني و بينـك ولـف ومعامل ٍ زيـن
يوم انت خاوى مع وجيه الظعـاين=و نهمـل سـبوقك في مناكب خسـيرين
و الى شمـال الهضبتين القراين=شرقي طـلال و من سواحيق و يمين
و الى عطـينا سكة التاب لاين=و لاقد عطيناها عليها حراذين
نصبح على طارات شهب المكايـن=بين العـراقـيين و الاردنـيين
في خـايع ٍ به كـن عينـي تعـايـن=ربـد الحباري به علـى أربع و ثنتين
وناخذ لنـا أيام ٍ بـذ يـك الـدفايـن=مابين برقع و الغدف و البسيتين
و نكسر على ما ينحدر من ضواين=ناخذ هناك اسبوع و الا سبوعين
و ننكـف نشاط و سالمين الصخـاين=لو كان نتعب عدنا مسـتريحين
قـدام يطلـع للصقـاره زباين=ناس ٍ تحوش القوبعـه بام روحـين
ليا روحوا بمشحـنات الخزاين=مـافـي نحـاهم ذوقوه الأمرين
و الـيوم مابيني و بينك مدايـن=انا سعودي و انت جاي ٍ من الصين
و اما لقينا للحباري عواين=والـى توادعـنـا وداع المـحبين
الـوقت مـا تاليه معنـا بـزايـن=والبر في حـادورمـن حـين لا حين
أدناه مليان ٍ كـراتيـن فـايـن=و أقصـاه ضـاق و ضيقـو به هـل الضين
وضاقت مناهـج طيبين الضغـايـن=اللـي علـى الـمقناص بالـطير ظـارين
و اليوم كان اللي يحاكيك ماين=هذي سبوقك و انتهـض بالجناحين
و هاجر مهـاجر مبحـرات السـفايـن=للصين و الى اهبـط على ضلع قـزوين
لو كان عنـدي ما فـراقك بهايـن=حناعزاز و لا نهـين الـعزيزين
خلك تـروح ولا تشوف الغبايـن=شـاملك عفو ٍ مثل عـفـو المساجين

ياطير يامقلوع وين الله أغداك=أنا بنيّـة وانت غـادي بنيّـة
اليوم ياغادي الجدى وين ابلقاك=لاصار كـل نحيـّةً لك نحيّـه
ياكثر ماني مجهد النفس لرضاك=ومذلل(ن) لك وحـدةً من يديـّه
ابي مثل هدتك في الواد ابو راك=نمشي تحت فيّـتك نصف أضحويّه
يوم أنت في هدتك حنيّت يمناك=نهـار يهـديك العطـاوي عليّـه
اللي شراك ولا تغالى بمشراك=نعميـن بالمهـديّ ونعـم الهديـه

ياطير ماحدك نصيبك على خير=وراك مسجوناً بوسط الغمااره
حسبي على اللي عزّرو فيك تعزير=تكفخ ويصلاك الحديد بحراره
في موترن مال الولع فيه تأثير=تكسي اجارن مايعرف الا اجاره
حشّرة وحوش البر حتى العصافير=من يوم دوّر من وراها تجاره
مال الغشيم من الولع غير تدمير=دايم عماره صايراً في دماره
ياناقلين الطير من غير تبصير=حصيلكم منه التعب والخساره
اوفوا حقوق الطير ولا اترك الطير=لا تظلمونه ياجداد الصقاره
خلوه لمحمد عشير المناعير=اللي اليا شاله يعرف اعتباره
مقدم هواة الصيد من توه صغير=من خلقته يعطي عليه البشاره
يعطيه حقه في ليال المخاظير=اليا بكر الوسمي ولجلج خضاره
قدام يظهر في نباته نواوير=ينصاه لو انه بعيداً مزاره
مايمنعه دونه ردي الاشاوير=في نجد ولا نازحات(ن) دياره
الطير يبغي له عنايه وتدبير=رجل(ن) يعرف اهانته من وقاره
هذاك ابوتركي زبون المخاسير=سمح الحجاج اللي يذري جداره
يفزع لمحتاج ويكرم مسايير=وغيثاً على من يستجير بجواره
من جاه يشكي من الوقت تقصير=مظهود ولا مستجيراً اجاره
ويطرب لنقل مصخر الخرب تصخير=واطلاقة المسباق شفه وكاره
وينومسه فعل الفروخ المغاتير=ومن كل قرناساً تخيّر خياره
هذا يخل الريش مثل المعاصير=وهذا يشوقه لاحجل في طياره
كم ماقع(ن) قفر(ن) جهمله بتبكير=واثعى بصيده حين يشرق نهاره
وان جا الضحى الضاحي وجت حومة الطير=حوّل بروض(ن) في مفيضه قراره
وصكوا عليه اهل الوجيه المسافير=والقهوجي قدامهم شب ناره
واستانسوا في جو مافيه تكدير=ودارت سوالفهم عناد وعياره
واخذوا لهم مقدار ساعات لاغير= لين الهوا يسكن ويركد غباره
ثم روحوا بين الصلاتين وعصير=الشيخ فك سبوق طيره واداره
مستبشراً بالخير والصيد ماذير=والطير صقاره يحب اختباره
واشرف عل جواً خضاره دواوير=فيه الخزامى والنفل والشقاره
واخذ عن اللي عادته تلة السير=ما يلتفت راعيه يسبر شناره
غلاص طلعاً له على الصدق تبرير=ياخذ على الجو البعيد انحداره
حول على جولن تقافى مدابير=زرق النحور اللي عليها الدواره
الطايره يرسل عليها مشاهير=مثل الجهاز اللي بتوجيه اداره
والدارجه يرسل عليها جزازير=كل افدعاً مع قو ظربه شطاره
يفرا نحرها فرية الدلو في البير=تلقى الفؤاد مظهره من ستاره
في وقتها ينسى وداد الغنادير=وينسى جميع معاملات الوزاره
هذي حقوق الطير ياظالم الطير=مهب حقه سجنته في الغماره

ياسعود كان انك تهدد على النوح=تعال انا ويـّاك ننعـا هـنـيّـا
تعال انا وياك ناخذ عن الـروح=عطني وانا بعطــيك مما تهيّـا
صبري وصبرك عقب فرّاج مشحوح=ماعاد فيها يا البنـاخي كـنـيّـا
ون كان صوتك شح والصوت مبحبوح=خل انهتانك بالخفـايا خفـيــّا
اون واتبع ونة الصدر بـفحـوح=ولافرّجة من ضيقت البـال شيـّا
ياطيري الليا ابرق الريش ذابوح=مبعد على راس راعيه صبح وعشيّا
تعرضّه يوم اظلم اليل ساموح=وعليه ماسيت الفجيـعـه مسيـّا
جيته على جثة احباراه مذبوح=وامست همومي داهيتني دهــيّا
و اصبحت انا عن نقلة الطير مصفوح=ماعاد اللي في نقل غيره شهيـّا
ماراح جعله مايعود على اللوح=ولا عساه اليا رجـع مـا يحيـّا
ليت النقيصه في الرواقي ومجروح=وفي كـل كابوداً سـواة الحديـّا
وليته غدا وارجيه مع كل طاروح=في المقـبله يمـلابه الله يـديـّا
لو هو غدا ياسعود ماحسفّ الروح=بس الحسوفه ميتـتـه هاالسويّا
وفرّاج مشروهه على كل ممدوح=ياخذ قضاه اللي براسه حميــّا

البارحة جفني عن النوم مذهول=طيب المنام ولذته ماحصللي
اليا شتل عيني عن النوم شاتول=أخذت مع هاجوس قلبي تسلـّي
وليا عذل عيني عن السهر عاذول=قلت السهر ياعاذلي جايزنلـّي
مادام الي قلباً من الحب مدهول=ما اشوف في كثر العذل صالحنلي
اتركني اتبع راحت البال واقول=من ماتصور واحضره هاجسنلـّي
خل القلم يكتب من القيل معسول=ابيع واشري فيه واخذ وخلـّي
اخذ من اول صفوة الجيل مزلول=واترك حثال الجيل عنّي يولـّي
عسى يعالج خاطراً فيه نشبول=من ضيقته ضاق الفضا والمحلـّي
كان العزيز يصيح للحب مذلول=فانا الذليل ولاحداً ذلّ ذلـّي
دايم وجيبي بزرق الدمع مبلول=وحالي نحيلاً من الهوى مستخلـّي
حالاً براه الهجر حولاً ورى حول=ياللي يتوق لهجرالاحباب حلـّي
طفلاً طغى ماله بسوق الهوى دول=بحلى صفات المحصنات متحلـّي
راعي هدب عيناً بلا كحل مكحول=والبدر كنّه في الجبين متجلـّي
ما احرزت اجيه ولايجي منه مرسول=بيني وبينه واحداً واقـفـنلـي
عليه قلبي بين الاظلاع متلول=ودايم وهو للبال قبلة مصلـّي

ياروح روحي مهجة الروح تفداك=راحت على مركب غرامك وساقه
واليوم لك غيبات ماعاد شفناك=عقب التقارب صار شوفك شفاقه
ويش اللذي دلهك عني ونساك=هاك السوالف والعلوم الدقاقه
ماهوب حق تقطع عشرة من أغلاك=الحق تجويد الصداقة صداقة
هاجوس قلبي مايخليني انساك=اذكرك في نومي على كل فاقه

ياملّ عيـنٍ يعـلّ الجيـب ذارفـها=اربع وعشرين ساعه تهجل اهجالي
والنوم يا دحيـم عايفتـه وعايفهـا= دارت سنتها على سِهْـر وتملاّلـي
مدري على النوم عيني وش مكلّفها=للسِهْر في نونها ممسـى ومقيالـي
واللي جعل نوم عيني مـا يوالفهـا=واهج لهيب الغرام اللي برى حالي
واحالي اللي طهوم الشوق ناحفهـا=مـابـاقٍ الاّ عظامٍ جسمهـا بالـي
عليك ياللي غلاك الـروح متلفهـا=ياللي محلّك بوسط القلـب نزّالـي
غلاك نفسي عن الخفرات صارفها=لو يجمعن لي من اولهن الى التالي
لك سيرةٍ بالمحبّه ما اقـدر اخلفهـا=لو هي سبايب سهر عيني وغربالي
الاّ رجا ساعةٍ ما اقضي حسايفهـا=والاّ علـى السنّه السمحـا تهيّالـي
رجعت للسالفه واحييـت سالفهـا=الـلـي يقولونها في ماض الاجيالـي
اللي سبب موت ضيف جديع ماقفها=حيـث ان ذبّاح ضيف جديع يبرى لي

انا غرب واللي خاطري ينتحيله شرق=بعيداً وطن مظنون عيني عن اوطاني
حصل في غروب الشمس بيني وبينه فرق=عسى الله يقرب دار من حبه اشقاني
اليا جا لذيذ النوم يسرق عيوني سرق=ذكرته بعيد وعافت النوم الاعياني
الا يالله انك لاتجازي حمام الورق=وراه يتلاحى بالطرب لين يشعاني
قام يتلاحى وشعاني بحلو الطرق=ومن الولف اظنه جاين الورق ماجاني
من اربع سنين ومهجة الروح فيها حرق=نتيجة ندب عيناً سهمها تمثناني
وساع العيون الساحرية طعنهن زرق=لها نظرةً من صابته طاح وجعاني
سقا الله اليا قام يتكاشف علي البرق=وانا اشوف زولة بين ربعي وخلاني
تفتح لعيني يوم اشوفه وساع الطرق=وانا قبل اشوفة مثل يعقوب عمياني
تهشم نظيرة من هميل الدموع الزرق=وعمي لين جابوله قميص ابنه الثاني

يامل قلبٍ يسج وفيه دولاجه=من هاجساً بالظماير قام يدرجّها
في معزلاً عن جميع الخلق وزعاجه=ماسمع من الناس لو تكثر لجالجّها
ما غير ادوج تقول مضيعاً حاجه=واخذ و سنّد على روحي وهرّجها
ودوج لو كان ما رجلي بدواجه=ادله النفس لين الله يفرّجها
يالله يالي بيدك الضيق وفراجه=ياخالق الخلق ياقاضي حوايجها
تفرج لعينٍ اليا غضّت بسوهاجه=تجهزعليها الطواري لين تزعجّها
بالصدر ضيقة ونوم العين هملاجه=عينٍ من العام والسهر متولجّها
نوبً سهرها شديد ونوب نهاجه=مراً تكن الدموع ومرّ تزهجها
عليك ياللي بقلبي كن وهاجه=وهاج نار هوى الغربي يسارجها
راعي ثمانن كما الياقوت لعّاجه=كن البرد يوم تضحك في مفارجها
ياروح روحي وجرح القلب وعلاجه=الطف بحالاً عليك الهم ساهجها
قلباً يناجيك باسلوب الهوى ناجه=يشكيلك الحال داخلها وخارجها
اما التفت له وتم الوصل بمواجه=والا بلا عشرتاً هاذي نتايجها
وش ينفعك من حنين القلب وخلاجه=وجروحاً اسبابها انت ولاتعالجها

مبروك ياعبدالله البيت هولان=ومبروكـةً قيماه لابوعجاريد
عطية اللي ماحسب طول الاثمان=قربلك اللي دونهم نازح البيد
اللي ورى سلمى قصيراً للبرزان=بينك وبينه يطّرد شاسع الريد

يامن هتف لي باالتباريك فرحان=واظهر خفايا خاطره بالاناشيد
واحيا هشيماً مات من خمسة ازمان=واطلق مساجين الظمير المقاييد
ان دار فكري للتعابير طربان=اللي لها في ذكر نايف تماديد
امسيت الساوم في زمرد ومرجان=طرباً ولاهاجوس الاشعار ببعيد
وقطفت من حلو التعابير مازان=قطف الثمر من يانعات العناقيد
غرايباً يصدع صداها بالاذهان=صخايراً ماتنقضب للرعاديد
ماطاعاً الا عقب شكماً بالارسان=ولاراعاً الا عقب طول المطاريد
بنات فكراً للتعابير نشطان=اشباب ماظرياً بلهج المفاريد
تخازراً وسط الظماير بالاعيان=ومن المواقف هاماً الر يد بسعيد
وضحاً على درب الطفوح ام الادشان=اللي تخيرها العطاوي من العيد
عوباً تكف العوب سلسات الاذران=كسّابة الاول مرار وتراديد
تاطى على خفاً وتنهظ بجنحان=وتطوي رهاريه الحماذ الجراهيد
صلفى وانا من طول مسراي صلفان=ومن التلف عادل سواة المعاويد
وتلحفن غرز القرايح بالاكفان=وهاج الجليد وجمد البحر تجميد
يامن فتح فكره للامثال بيبان=وفي مدح نايف خلد الشعر تخليد
دايم وبيتك يابونواف مليان=في مسنداً فيه القرايح مسانيد
اثنيت له بالفضل في كل ميدان=وخصصّت له شعرك حميداً وتمجيد
المدح لو ماله مقراً وميدان=ماصار بالممشى هميماً ولو جيد
ومدحه يزاود للقوافي والاوزان=سمحاً طليقاً مايجيبه عواقيد
نايف ذرى الشعب السعودي اليا شان=وجه الضديد اللي جروحه ملاهيد
شيخاً تهويه المدايح علشان=مافيه عن نطح المواجيب تصديد
وان صار بالاريا سميناً وهريان=يوجد سمين الراي عنده بتاكيد
وهو غيثنا اللي للمحاويج مزبان=ظافي عطاه يبدد الهم تبديد
نفحات جوهده بالمكارم والاحسان=محدن يعد اجوازهن والتفاريد
والله لو يملك من المال وديان=لينفذنـّه بيض اياديه تنفيد
قلته وانا عزمي عن المدح ونيان=ماودي انقص في العبارة ولا ازيد
والله لو امدح بالضحى والمسيان=ما الحق لطيبه بالمدايح تحاديد
وختامها ماغاب نجماً وما بان=يسلم كريم الخيل معطي المقاصيد

هلا باللي نعش روحي بصوته=وهو شوفه غذا روحي وقوته
تفرقنا واحسبنه نساني=وصدت بي وقوتي عن وقوته
وبعد ماكان مندثراً هوانا=زهم واحيا غرامي عقب موته
وهذي عادة(ن) في كل وافي=فرص حبل المواصل ماتفوته
وانا قبله عن العشق متراجع=مهب عياف خوف(ن) من شموته
وهو صار السبب في رجعتي له=نده قلبي وجاوب له صموته
لاجل عينيك يامشعل غرامي=رهين الحب ومعمر بيوته
مادامك رافعاً صرح الصداقه=فـ انا حق(ن) علي ادعم ثبوته
واعمر لك مقاصير بقلبي=واغطيها بعش العنكبوته

يعيش اللي بعد طول سكوته=عبر فوق المحيط بجيلبوته
جمع ماسه ومرجانه ودره=وغير ماحصله غير حوته
ومن حاول يجاري صيد فكره=يبي يحفي على دربه سبوته
جزا الله خير من هيج غرامه=بدعوى العشق طرش له كروته
وخلاه يتغزل في جزاله=وياصف لوعته باوراق نوته
بيوت(ن) ذوقها لسامع احلى=من السكر ومن تمر النبوته
ونظم الصعب منها عنده اسهل=نخزه للقلم من جيب كوته
نبي ياخو سعد نسمع ونقرا=غدرايق(ن) من العام مغموته
محيط الشعر ينقص لاهجرته=ولو زرته غمر موجه خبوته

لقيت الشعر ماتضعف بتوته=مع اللي فاهم(ن) متره وفوته
الا يا ليت كلن مثل غازي=يريح البال يوم اسمع بيوته
اليا حاول يجاري له قريحه=مشت له طوع ماهيب معفوته
ودرّت له قوافيها البخيله=اليا رام البحر ريّم خفوته
ورى بعض العرب شعره مغثّه=تشوته عنك ولا ماتشوته
لو انه موتر(ن) جاك متحادي=تناضح فوق هوباته زيوته
ماركت وارد عراوي=طمع راعيه ثم جارا فروته
الا ياليت للشعر اشتشاري=يصونه قبل يفدعبه طفوته
متى ماشاف له قطاع ساقه=يفك الناس من عصده ولوته

بيوت(ن) قلتها عدة بيوته=بها كل المذاخير محتوته
هقيت اني حكمت وصار حكمي=من خمسين ابوزيد وبلوته
وهقيت اني بدعت وصار بدعه=بيار بالصفا الصم مخروته
عيون الشعر شامت لبونايف=كما شامت لبن سعدون نوته
اله فن(ن) فريد مفارق(ن) له=الي جامع(ن) ثومه وتوته
هذاك اللي جت مع القريحه=سرى فوق اللحن يظرب طشوته
وشعره حادر(ن) له بطن وادي=مثل عمايت الرفل معموته
سوات اللي يحاول في دواها=ويعمي عينها بالعنزروته

كل ماجيت ابسلى عن غرامك واتوب=جددت جرح قلبي لك هبوب الرياح
جت بطاريك عندي كم نسمة هبوب=وانعشت ذكرياتك ماضيات الجراح

هيه ياللي عليك الناس تمشي دبوب=ليت من يدري انته غيم ولا ضياح
كان من ريم نجد ولانت بس بمعروب=واهني من لقفلك بالهوى يارداح
عاشقتك المسامع قبل عشق القلوب=وبلوة الهوى لو ماله البرق صاح
لاتهيج صبابة كل قلب معطوب=اتغزل من الغزلان موت(ن) ذحاح
زدت نار المحبه من حطبكم شبوب=مايطفي للهبها شرب موية نساح
من شرب حب مثلك ماهناه الشروب=لو تسلسل على كبده لذيذ(ن) قراح
كل ماجيت ابنسى الحب غنّى طروب=واستمع للحشاشه له طرب وارتياح
بالغطاريف دوبه ينعش القلب دوب=مثل ماينعش الظميان درب الصباح

هاظني شاعراً محد(ن) لقابه شذوب=من تعرض جديدة راح قدمه طفاح
التفت يم صوت(ن) للمولع جذوب=مثل ماتلتفت للصوت روس الطواح
انت ياللي بحايل وش تبي بالجنوب=خل فالح ينادي بالمحبّه فلاح
لاتخايل بروق(ن) في خشوم النصوب=برق وسماً بعيد وهيظك يوم لاح
يابونايف ترى منت بـ عليه مغصوب=المعافا يحمد الله يوم استراح
انت شاعر واديب و فـالهوى لك اسلوب=مير ركبك مشى واهل الموده شحاح

هيه ياللي يهيظك الطرب والعجوب=وش محرم حصاتك وانت مالك صلاح
احسبنك رفيقي في غيابي ينوب=واثرك اللي على الغرّة يصيبه شفاح
كل مادرت وجه الراحله يم صوب=عارظوني مقاريد العرب بالسلاح
ودي انصحك ياراع الحصان الهذوب=حيث ياجب علي معاملك بالنصاح
الخطا والتعرض منك ماله وجوب=والنصيحه تفيد اهل القلوب الصحاح
وكل وادي على مجراه سيله سحوب=سيل وادي الرشا ماطب وادي رماح

ياشبل يالاهي عن اللي يناديك=توّك على سجات الافكار توّك
بدري عليك الله من الخير يعطيك=ويكفيك بامره سوّ غيرك وسوّك
يمديك كان إن الله امهلك يمديك=لازلت في فترة صباك ونموّك
إن كانها أيامك طوال ولياليك=والله ليلفنك على جال ضوّك
ثم خلها تفتكك حيلك ويدّيك=ويدين من حولك ومشط المشوّك
افكار لأعلى الجاذبيه توديك=وافكار تهويبك حدر من علوّك
وافكار منها الله وانا ابوك ينجيك=جلدك يكش وشعر راسك يشوّك
واشياء كثيره تاتغير هقاويك=توقضك من نومك ولحظة هدوّك
مامرني ماهوب أكيد متعديك=عدو ابوك يصير بكره عدوّك
يبلاك في نفسك ويدهاك ويجيك=لوّك تبي فرقاه وش عاد لوّك
علمي وحطه واحفظه بين أذانيك=وخله على بالك ليا شان جوّك
تذكره, قل قاله ابوي في ذيك=الليله اللي كنت فيها مصوّك

ياشبل وشبك ماتجاوب مناديك=يدعيك أبوك وكنّ سمعك مكوّك
تكفى متى ماأوحيت والدك يدعيك=قل سمّ..سمّ الله معادي سموّك
لاتسفه اللي يلتفت لك ويرجيك=ولرضاه واصل مع رواحك غدوّك
ياشبل لو تدري بما قال باريك=شلته على أعلى ماعلا من علوّك
ولغير ربك لو توجّه تلجيّك=ماتستفيد ولايسرّك لجوّك
يابوشبل يوم إن ربي مقديّك=شعّار قومك تصتلي من صلوّك
لاشك أضن اللي بشعره يجاريك=يلقى تعب حيث أن ماهوب قوّك
أنته معك دايم قرينٍ يباريك=مايعتريك الاّ بحزّة خلوّك
خوي ابن لعبون أضنه مخاويك=يبعد متى تبعد ويدني دنوّك
ولاهان مفتاح القفول المصاكيك=لو ماسهى مالاح براق نوّك
ولاأمطر على راكٍ غصونه مشاويك=عقب الجفاف أصبح ثراه يتلوّك
ولاأثمر بطيّب نادرات المساويك=ومن ذاق له عود من الراك روّك
ياكثر ناس منها انا يامحاكيك=مامنهم اللي مايقوم يتسوّك

ياهل الجيوب السارية دوروا لي=خطـاً يوقف بي على بيت سطام
ماوالله استانس اذا ضاق جولي=الا اليا جاله على النار همهام
اليا قام نجره يزعج الصوت حولي=واحيا السمر بألحاق الابرام الابرام
لو هو يذكرني قديم الفعولي=اللي غدت مثل الهذاري والاحلام
فعول الرجال اللي تشيل الحمولي=نطّـاحت الكايد مفاريس الاخصام
وليا ذكرت افعال هاك الزحولي=ربعاً تقافت دونهم جرد الاعوام
اخذ شوي مغيبن في ذهولي=يعرض لي الماضي كما عرض الافلام
بأطياف ذكرى في خيالي تجولي=تطوفبي بين الحقايق والاوهام
دنياً تزول وماعليها يزولي=الباقي الله وأفضل الخلق مادام
ياحيف ياتفريقها للشمولي=تنشر بيارقها على كل مقدام
وتاطا كبار الجاه وطي النعولي=لين القضا فيهم غرسنابه السام
هذي منازلهم خلياً تهولي=ترثالها في هاك الايام الايام
بلاقعاً شهبً خلياً محولي=تبنيبها هوج الدواليب الاسوام
عقب الجهام وعقب هاك النزولي=تقول محدن حل فيها ولاقام
طرفي بدمعه يوم اجيها همولي=تقرب محاظيبي ولاني بملام
اذكر طربها قبل عشرين حولي=قدام تزلف هاك الايام قدام
ولو صرت من غارات سلمى زعولي=اللي علي العقل تنفيذ الاحكام
واعزي الخاطر بربعاً بقولي=هم نور عيني في غطاليس الاظلام
لولا الاسود معقبين الشبولي=عندي تغلـّق مصدر الانس بلحام
لاجيتهم عقب البطى يسّروا لي=توسيع بال وضيـع الهم الاكرام

ياراع الغر العذاب المباهيـش=بل الكبود الظاميه عن عطشها
ارتخ علي وطمن الرأس بشويش =ورش العروق الذابله وانتعشها
لاتستمع فأهل الحكاء والوشاويش=ناسٍ نقيل النمايم دبشها
ياخشف ريمٍ ذار واوحى شوابيش=بدوٍ طلوع الشمس ذارة وغشها
والعين عين الي جسر عقب توحيش=امير بيتي الحرار ووحشها
طرح الشبك ماقلبوه الطواويش=ولاقرنسوه اهل العشش في عششها
جابوه من عين الشمال الهماميش=ابرك الهادي طرقةٍ قد طرشهـا
جابوه لمثمنٍ طويل المطاريش=شـيخٍ قوانين العـرب مادغشـهـا
محمد مقابل قاصده يالتباهيش=ملفأ الرجال الي جميله غطشها
ومهدياً للي براسه نغاميش=لاشوشت حيات الأرض وحنشها
الايبعد ناسٍ تكبر على ويش=لاشافة الناصـي تلـوت خشـشـهـا
لو يملكون ارقام الاموال حتى ايش=درالحمارة دوب يكفي جحشها
وروس الضباءماذكر فيها عراميش=لو هي على الزيلة كبارٍ شوشها

مايستريح البال والقلب مارتاح=والروح ماترتاح داخل بدنها
يابداح أشوف العود فيه لولاح=والحال ينقص عامل الوقت منها
الرجل يصقل كنه السيف ابولاح=وماطال يمه من يدينً خَبَنها??

ياهني عينٍ تقبل النوم يابداح=ماهيب عينً هاجر النوم عنها
مايستريح البال والقلب مارتاح=والروح ماترتاح داخل بدنها
يابداح أشوف العود فيه لولاح=والحال ينقص عامل الوقت منها
الرجل يصقل كنه السيف ابولاح=وماطال يمه من يدينً خَبَنها??

هواجيس قلبي ذاه رايح وهذا جاي=وروداً صدير ووردهن مايناسبله
واضوي له الافكار من كل رايً راي=مع الفجر الاول ذيب عرقان يقنبله
يجر العوى حتى يجاوب عواه عواي=الى جر صوته في القضيبه يبى العبله
مداهل غزالن مابعد حازه الرماي=عسى المزن لاجا فوقها ينتثر وبله
كما قيطعاً شفي وطالت علي خطاي=على شف ناساً منهم الكبد مندبله
اداوم مع السرّاح واضوي مع الضواي=وادير الروابع والرجا طاوياً حبله
لو اني شرحت الوضع محدأ نظر دعواي=وشكوىً لغير العارفة ويش تحسبله
وبشكي على شهماً يقدر ثمن شكواي=ابو نايف اللي دايم الطيب ينسبله
ابن عون عبدالله لعله ينال رضاي=على حسب ظني ماتجي قومته خبله
اذا خاب فيه الظن ماأملت في رجواي=ترى مابقى لي مثل مافاتني قبله
ابي انخا واناديله ان كانه ماسمع لنداي=ولاصار مايسمع مناداي ابندبله
على متن جيباً لامشى يطرب المشّاي=مديله جديد ومن نظر فيه يرغبله
اليا سرّحه قرمً على غايتي ومناي=مع اول صلاة الجمع قدام تاجبله
على بيت عبدالله يوقف وهو منصاي=ابونايف اللي من يجيله يرحبله
يسلم عليه ويفهمه عن مدى معناي=سلاماً صحيح بخط الاعراب يعربله
معانيه بالترفيع والنقل والاعفاي=هذا اللي نريده يابو نايف ونطربله
انا بنتظر منك الفرج في رجا مولاي=تنظّر شفوقاً لسماء رافعاً شبله

تناجيت مع ليلي الشقى وانتحى مسراي=اطالع شعاع النور وازريت اقربله
يبى الما وعيا لايطول الطويل رشاي=وهريس المضامي كود يسقى ويجذبله
خطايطاً لفتني من سعد كدرت ممشاي=مواريدها من يمة الغرب والقبلة
مواريدها من واحداً شافقاً ما داي=عسى الله يجازي بالنشب من تسببله
شكالي وانا قلبي صخيفاً مع الشكاي=وقصاني عسى الله بالشبب مايشببله
شكالي من الفرقى وبادرت بمواساي=؟؟؟؟؟؟ واحل المشكلة واتطببله
لو ان الفرج والحل ماهوب في مخباي=ابعطيه تعب حق العنوة وبتعبله
ابمشي مع الماشي وبعدي مع العداي=وعسى قومتي تثمر لاجيت ابطلبله
وبركض مع الرجلي وبشعب مع المطاي=وذلولاً لغير العانية ويش تشعبله
وتقبلت موضوعه ومديت له يمناي=وبنصابها اللي قاسي العلم يجذبله
وبطلب له الرخصة والاعفاء والاستثناي=وبقول مجروح الهوى ويش يعذبله
تشاينت عذري قبل اجرب سمين ارياي=وبختار للوقت المناسب وارتبله
وبعد ماصبحت شكواك في حوزتي وحماي=سحبها المراسل مثل ماتسحب الدبله
وانا ماقبل الهدنه بعد ماحمي مشواي=ولا ارخص لغيري لين اغدّيه واحلبله
بعد مازهم رعادها في سما دنياي=وتهامالها الودان لين انبت الربله
وغدى لم سالم وسط ريضانها نوناي=وشذى وردها في كل دارً يهربله
وانا في سعد ماسمع من السامي والحكاي=ولاحط الحواجز في طريقة واعرقبله