تناظر الساعه...وليش مستعجل احدٍ معا خللللللللله ويناظر الساعه

هــيــبــه · 11-22-2004, 06:25 PM

الساعه

لاتخافون من الوعيد اوالترهيب من الساعه
انا اتكلم عن الساعه التي بيدنا اليسرى
التي نعرف بها الوقت
قد تكون احيانا باليد اليمنى نوعا من التميلح او على موضه مرت قبل كم سنه وهي مخالفة اليهود واكتشفنا فيما بعد ان اليهود يلبسونها باليمني(اوالله النكبه)
احس ان الساعه اهم اكتشاف على وجه الارض
اتخيل احيانا ما ذا سيكون الوضع لو لم يكن هناك ساعه
اتخيل بيت الزكرتيه بدون خراشة جدتي موضي
تخيل تنام بالليل ومتى ما قمت تروح للدوام
ليه؟
لانه ما فيه وقت محدد مطلوب منك التوقيع قبل نهايته
طيب واذا طالب متى ما راد الله انك تقوم روح للمدرسه ما يفوتك شي
بس المشكله بالمدرسين لازم ما يطلعون من لمدرسه ينتظرون الطلبه اللي متى ما قاموا يجون
طيب واذا رحت للدوام؟؟؟؟؟؟؟؟؟؟؟؟؟؟
بتلاحظ انك ما راح تطلع بنهاية الدوام
مالك امل
الا لمن تخلص شغلك
يعني يمكن ما تطلع الا بالليل
ليه؟
لانك جيت متى ما ودك ولازم تطلع متى ما وده رئيسك بالعمل

المشكله في وجبات الاكل
متى بنفطر
ومتى بنتغدا
ومتى بنتعشى
مو مهم متى نجوع ....لا
المهم متى يجي وقت الوجبات

طيب قبل ما يكتشوف الساعه كانوا يوقتون على الشمس
يعني اذا جيت اقوم اخوي اقوله قوم لقد بزغت الشمس(احس اني لابسه تاج)

والااقول له قوم قبل ان ينتصف النهار(ما عمره مرعليها منتصف النهار طول عمرها منتصف الليل)

المشكله اذا غابت الشمس
يعني المهم متى العشى (ما همها الا بطنها ذي)
طيب ابي اصير انسانه رومانسيه (مالتس امل) واسهر بالليل
وش يدريني انه الان منتصف الليل(مافيه احد ابخص منتس بمنتصف الليل يا ام السهر؟)
ابي انتظر الى ان يكتمل القمر بدرا واقعد اقول شعر واصيح
طيب اذا ماني عارفه الوقت وشلون بعرف التاريخ
يعني ابطلع كل ليله ادورالقمر هو صار بدر والا رأفت؟(مصاله منقطعة النظير)

يا حلالات مافيه ساعه لمن تقابل حبايبك
ما نقعد نقول بيجي ياخذناالساعه الفلانيه
بس المشكله وشلون باخذ موعد مع الحبايب
بقولهم اذا توسطت الشمس في كبدالسماء
0وبقعد اسولف مع حبيبي لييييييييييييين يتوسط المرض في كبدي

بس فيه مشكله اخرى
لمن يصير عندك امتحان متى تروح تمتحن
بترص تحتري كل الهايتين يجون عشان ما يعيدون الاسئله او يغيرونها
وحتى لو فكرت تستنذل وتجي اخر واحد مافيه مفر بيصير فيه احد انذل منك ويجي عقبك
وش الحل يا زكرتيه
طيب باي سنه انت تدرس؟
ماتدري؟..... ليه؟
لانك تدرس على البركه مافيه سنين ولا توقيت

واذا مافيه ساعه بيصير فيه شي اسمه انتظار؟
(اكرهه يا ناس اطرطع اذا صرت انتظر)
ما اعتقد انه بيصير فيه انتظار
لانك لمن احد يواعدك ماراح يقولك الساعه الفلانيه
بيقولك متى ما قدر الله علي اجي
يعني الامور سااااااااااايحه
البلشه لو انت نحيس وبتنتظر متى الله يقدر عليه يجي
وتهزئه ليه ما قدر الله عليه يجي بدري شوي
وش بدري ذي؟.....مافيه وقت اذاً ما فيه بدري

بس تدرون وش احلى شي بكونه ما فيه وقت؟
انه ماراح يصير في كتب الطبخ .... ادخليها الفرن خمس دقائق ثم بالثلاجه عشرين دقيقه
المطاريس هذي كللللللها مي موجوده
يعني حوس الدعوه كلها وازرطها وريح قلبك

وفيه شي ثاني حلو
ان الاسواق بتفتح على طول والبياعين بيشتغلون بنظام الشفتات
لان الحريم متى ما بغو بيطلعون ما فيه وقت عشان يحددونه لطلعة السوق

بس المشكله العويصه لو مافيه ساعه ايش راح يكون شاشة توقف في جوالك؟
سؤال ارقني كثير
احط ورده؟(بسم الله علي وش قالوا لتس ناعمه؟...والله من زين التهمه)

تخيلوا معاي يا حلوين
مافيه ساعه وبتنامون
اللللللللللللللللللللللله مالك حزه للقومه

ويييييييييييييه تذكرت المضاد الحيوي متى بناخذه
كل دوره للارض حول الشمس؟
هذا للي كل اربع وعشرين ساعه
طيب اللي مرتين باليوم؟

احلى احلى احلى احلى شي بانه مافيه ساعه
انه ماراح يكون فيه احد يقولك الساعه الواحده بالليل بدا اليوم الجديد
اليوم يبدا متى ما نمت وقمت

اعزائي(ما يمديكم على الذرابه)
لقد حان الوقت وازفت النهايه ودقت الساعه(الساعه؟واللي انتي تهربدينه فوق هذا وشو)

لا احد يشره علي تراني شاربه لبن وبعدين شاهي بعدين قهوه بعدين عصير مانجا
يعني المعده خوييييييييييييضه

اشوفكم في الساعه الثانيه عشره بعد منتصف الليل(ذابحتني منتصف الليل هذي)

**ماشي الحال** · 11-22-2004, 09:40 PM

<< يرد في الليل بعد صلاة العشا بحوالي صلاتين تراويح

هههههههههههههه احس انى مااقدر لازم احدد الساعه

<< يشرب زقارة ويمخمخ على الموضوع

اقتباس:

اتخيل احيانا ما ذا سيكون الوضع لو لم يكن هناك ساعه

الوضع عادي جدا جدا مجرد خربطة في برامج التلفزيون

وانقراض كلمة (( كم الساعه )) h1

اقتباس:

تخيل تنام بالليل ومتى ما قمت تروح للدوام

وليييييييييييييييييييييييه انام بالليل

الا بكبتها نومه من الصبح الى الليل اروح اوقع وامشي

اقتباس:

متى بنفطر
ومتى بنتغدا
ومتى بنتعشى

اذا قمت وشفت غمص عيون خدامتنا معناتها وقت فطور

واذا قمت وشفت شناط البزران عند الدرج معناتها اتغدى

واذا قمت ومافيه نوررر ظلام دامس يعنى اروح اتعشى

واذا ماقمت فليشهد التاريخ انى ميت s3

اقتباس:

طيب اذا ماني عارفه الوقت وشلون بعرف التاريخ

ماله داعي تعرفين التاريخ لان راشد الشمرانى

الى الحين حي يرزق >> مصاله لاتطاق s5

اقتباس:

يا حلالات مافيه ساعه لمن تقابل حبايبك
ما نقعد نقول بيجي ياخذناالساعه الفلانيه
بس المشكله وشلون باخذ موعد مع الحبايب

ااااااااااااااااااه انا نفسي ادي دروس خصوصيه << حسن مصطفى ناظر مدرسة الاخلاق الحميده s6

اقتباس:

بس المشكله العويصه لو مافيه ساعه ايش راح يكون شاشة توقف في جوالك؟

احول السؤال لغيري لانى امشي على خط الاستواء << وش دخله >> مدري h1

اقتباس:

ويييييييييييييه تذكرت المضاد الحيوي متى بناخذه

عند اللزوم >> قل قسم h7

هيوبه متأكده انتي ماشربتي غير اللى قلتي

او متأكده من اللى شربتيه مافيه شي ؟

يمكن افيون او حشيون << دلع الحشيش

اهم شي انى جيت وانا مستانس اليوم مدرى ليش

يمكن عشانى بقرأ موضوعك ؟

كثري تكفين من الشراب المخلوط

اذا بيسوي لك كذا ويخلينا نجلجل ونقهقه من الضحك

<<< يناظر الساعه ولا هو مستعجل

ولا تدرين

بايات

ماشيات

الأصيلة · 11-23-2004, 12:47 AM

h1 وكان ما صار فيه برنامج اسمه حديث الساعه >>>جايه مشوووته عشان تقول هالكلمتين ...

وش هالخبال يا زكرتيه ...؟؟

وساعتي ام خمس الاف تقولين كان ما شريته ..؟>> يقالها يعني .. s7

لو بننظر للحياة بدون مؤقت زمني

راحت بين ايدينا الايام والليالي وصارت سبهلله الدعوه ...

هيبه

قلت لك قبل .....لا عمرك تشربين لبن فايت.. s8

يسوي تخمرات بالبطن h6 وتبدا تصعد الى اعلى الراس

بفعل القوى اللامركزيه

الى ان تصل الى اعلى قمة هضابيب الدمجه تبعتك ...

وتتبختر بخيلاء الى عروق الافكار >>>ماتعرف علوم زين

وتبدين تفكرين هالافكار المنفلوطيه اللي مهب لم درب ..

لو ما فيه ساعه

اعترف انني لن اكون

لاني ولدت في هذه الساعه

فكيف انولد اذا لم تكن هناك ساعه

واذا لم تكن فيه ساعه كان ما عطتني صديقتي هديه ساعه تهبل ذاك اليوم
>>>فرحه احد معطيها وجه s7

اقتباس:

قد تكون احيانا باليد اليمنى نوعا من التميلح

>>>

يا حبي لي

من تقليدي لعبدالرحمن العشماوي وانا ما تركتها >>> قدوتها <<<طيب متى ؟؟

اقتباس:

طيب قبل ما يكتشوف الساعه كانوا يوقتون على الشمس
يعني اذا جيت اقوم اخوي اقوله قوم لقد بزغت الشمس

والااقول له قوم قبل ان ينتصف النهار

نحمد اللي فارض علينا الفروض الخمس يا خيتي

والا قومن نحنوو نووحب الغشاوه على عيوننا
بينفرط العمر ما انجزنا حاجييييه ...

وبعدين ماله داعي تقومينه ...

مهب تقولين ننام ومتى ما قمنا نروح لاشغالنا ..؟ s5

انتي ليش تناقضين كلامتس h7 >>>>صادته العمشا خخخخخخخخخخخخخ

>>>>>بدون طراقات بلييييز مبستحملشي هواء >>>يا ناااااااعمه

هيييبه هاااااااااااااااااااه

اررررررحبي

طاعوشتااا وش هالموضوع المحشش s1

انتي صاحيه يوم تفكرين به >>>> اعقلي واتكلي >>>فاهمته خطأ s2

زكــرتي منتـفخ · 11-23-2004, 01:19 AM

هيبه واليالي السرمديه

الله لو مافي وقت يعني محد يقولك قم اسبح اليوم جمعة --> انواع القذاره s3

مسالة الوقت معدومه عندي انا

انا انسان احب التفاح الاخضر كثير واقدر الحياة الزوجية واااجد ولوني حنطي على اشهب وموظف على بند (( متى ماخلصت منك اشوتك ))
8
8

مجلة الناس العدد طعش تاريخ السبله s6

اقتباس:

المشكله في وجبات الاكل
متى بنفطر
ومتى بنتغدا
ومتى بنتعشى

من الناحية هذي اقدر اتحكم فيها لان الدعوة سهالات والوقت كله اكل عادي

يعني في رمضان محد يقولك انتظر متى ماقمت حط رجلك

اقتباس:

ابي انتظر الى ان يكتمل القمر بدرا واقعد اقول شعر واصيح

ونين هذا مو رومانسية h1

اقتباس:

طيب اذا ماني عارفه الوقت وشلون بعرف التاريخ
يعني ابطلع كل ليله ادورالقمر هو صار بدر والا رأفت؟

الحين هم يحطون قلم او عود شجرة عشان يعرفون الوقت

بالنسبة للتاريخ يحطون يد النجر عشان يعرفون دخل سهيل ولا توه --> ثــف غطى عليها h7

اقتباس:

يا حلالات مافيه ساعه لمن تقابل حبايبك
ما نقعد نقول بيجي ياخذناالساعه الفلانيه
بس المشكله وشلون باخذ موعد مع الحبايب
بقولهم اذا توسطت الشمس في كبدالسماء

قسم بالله امرح عندهم

واذا مره مره يعني يبين من الغمص كل ما زاد متانة الغمص كل مااقترب الموعد --> مواعد سباك الحبيب s6

المشكلة اذا ماقي وقت وش راح نكتب في المنتدى

الساعة : ربع نهار

والطامة الكبرى اذا مافيه وقت تدق على الساعة من التلفون :

تشير الساعة الان الى القايلة s6

لو مافي وقت ولا في ساعة كان ماغنى الفنان دريد الاحمر

باقي من القوت ربع ساعة ..

كان قال : باقي من الوقت لي عندك .. --> توهق الشاعر

الظاهر على الموضوع هذا ياهبيه شاريه ساعة جديدة h1

رومانتيــــــــــــك · 11-23-2004, 01:43 AM

8
8
8
هيبه ..هيبه ..هيبه .. زي هذي اللي تقصدينها
ولا الصغنوطه هذيك اللي يدودلونها من بجيوبهم ؟؟ <<---- قديم قبل الطفره

هيبه ..والله اثرك مو بس هيبه ..الا منتي بصاحيه بعد على هالموضوع اللي موبصاحي <<--- ترا مادحها الحين h7

أنا ولله الحمد يا هيبه .. من طلع الجوال ماحطيت الساعه بيدي
مالك علي يمين يا هيبه <<---- من اكل الزعتر والله
مالك علي يمين اهداني واحد ساعة قيمتها 700 ريال <<-- ترا ذابح نفسه بهالسبعمية
.. قلتله ..امشي ولاه .. انا مالبس ساعة ..والله مير واخليه يشيل ساعته على كتيفاتوه يحوول .يالله باليالله يشيلها s4 <<--- بعير مو ساعه
ههههههههه

وبمناسبة هالموضوع السنع من أختنا السنعة هيبه ..
فإني أشكو إلى الله ثم إلى اخواني الزكرت بنات وصبايا ..
مالله عطاني حب الساعة .. ماباها ..ماباها
واذا لبستها اصير بس اتحكحك.. اصير بس مدخل يدي بمخباي مدري ليه ؟
فكرت اروح لدكتور نفساني ..بس قالي واحد من الجماعة :
ترا يرقدونك خمسطعش يوم وحتى برقبتك يربطون ساعة عشان يروضونك على لبسها <<-- بعير الاخ !
ههههههههههههه
بالله عليكم وشوله الساعه اذا اول مادخل البيت ساعه عالجدار وبغرفة نومي خراشين فوق الكبت وخراش اللي يقول بيب بيب ..اكشخ فيه قدام اللي استحي منهم اقولهم تراني اصحى على هذي بس .. وماخليهم يشوفون اجراس الانذار اللي فوق الكبت ..عشان يقولون يااي عليه ..نومه خفيف
ههههههههههه
ايه .. اذا على جدار الصالة وحده ..وبغرفة نومي ثلاث خراشات ورابعه معلقها على الحدار .. هذا غير الساعه اللي بالسياره والساعه اللي بالشارع ..
ايه صح .الحين ترا بعض محطات البنزين والبنوك يحطون ساعات وميزان حرارة بالشوارع ..بالله عليكم أجل ليه اشتري ساعه هاه ؟؟

ابوي الله يحفظه مره من المرات ..قالي وليدي تعال ابيك بسالفة ..
اناتوقعت ابوي بيزوجني اربع .. رحنا لروم لحالنا وقال ياوليدي ابي اشتريلك ساعة وابيك تلبسه وتصير رجال من عرض الرجاجيل s5
هههههههههههه
قلت والله يبوي يابعد حيي انت وميتي .. انا بي حساسيه من الساعات .. قال اجل نبي نعالجك بس شوف اي مستشفى تبينا نعالجك فيه !!

طبعاً انا فسرت الحاح ابوي تفسير موضوعي .. فسرته الله يسلمكم لأنه على ايامهم كان اللي يلبس ساعة وين راسة .. تلقاه لابس خيشه وعقال منتف وشماغ مصنج .. ولابس ساعه ..ياعيني ياعيني .. طبها يعتبر مثقف اللي يلبس ساعة هكالوقت
ههههههههههههههههههه

هيبه اتوقع ارجع لموضوعك
بس خاف مارجع .. بقول أن الساعة أداة كأي أداة ممكن تستعمل كوسيلة وممكن تستعمل كغاية ..وانا اشوف ان اكثر العالم صاروا لا يستعملونا كوسيلة ولا كغاية .. يعني واحدهم بس يدودل راسه ولابس ساعه واذا وقفت جنبه قالك اخوي بالله كم الساعة !! s5
واما سالفة اشيل ساعتين معي وحده بيدي ووحده بجوالي ..معصي
ماشلت اختي الصغيره اشيل ساعة هههههههههه
الحين مواعد واحد عزيز علي ينتظرني

تحيااتي لك
وموضوع روووعه

**سلف خمسة** · 11-23-2004, 02:39 AM

ايوه ياماااشي اسحبه من فوووووق

لالالالالالالا من الزاويه يالدب

اييييه وانا بشيله من تحت

انتبه لايطيح الموضوع ياعنوان الدلاخه

يالله ارفع فوووووووق يالذيب

اييييييييييييييييييييييييوه الحين مكانه مضبوووووط

الحين الموضوع مثبت وجااااااهز

هيبه خانم موضوع عنفواني ومجنون وانبقاطي s4

تثبيت الين ارجع وامخمخ عليه h1

وني وني وني وني وني وني وني وني

ذكريات عزوبي · 11-23-2004, 08:00 AM

تخيل لو مافي ساعة كان اغنيه (باقي من الوقت عندي لوربع ساعه) ماهي موجودة
من جد انت غمت الفضاوه آآآآآآآآآآآآآآآآآآآآآآآآآآيييييييييييييييييييييييي يييييييييي

maiaz · 11-24-2004, 03:05 PM

تسلمين اخت هيبه على الموضوع حلو خاصة الجزئية المتعلقه بالمضاد الحيوي

have a naice week end

maiaz

العاااشق · 11-25-2004, 02:23 AM

مالك امل لو مافيه ساعه كان نحط الساعه الرمليه

<<<<<<<<<<<<<<<<<<<(ناشب صح)

اقتباس:

المشكله في وجبات الاكل
متى بنفطر
ومتى بنتغدا
ومتى بنتعشى

يا حبك للاكل

بالله كم وزنك

اقتباس:

0وبقعد اسولف مع حبيبي لييييييييييييين يتوسط المرض في كبدي

مين حبيبك اعترفي

<<<<<<<<<<<<<<< (يحس انه ملقوف وبينكرش) s7

اقتباس:

(اكرهه يا ناس اطرطع اذا صرت انتظر)

ابوك يا الانتظار

خاصة على الاكل

يقول مقابل الجيش ولا مقابل العيش

اقتباس:

انه ماراح يصير في كتب الطبخ .... ادخليها الفرن خمس دقائق ثم بالثلاجه عشرين دقيقه

توني ادري انك راعية اكل يا الدبه

شاكر ومقدر على الضحكه الجميله

**شباب في رحله** · 11-25-2004, 01:44 PM

يؤ

تخيلت الموضووع صدق

وانصدمت

شلون بكشخ وبكذب على العيال

الساعه الي شاريها بخمسطعش من سوق الحب

وانا اكذب عليهم اقوولهم
انها غاليه

بس غير كذا

جازت لي السالفه

قولي ليه

قلتي ليه<<< بالقوه

اذا مافيه ساعه يمديك تأخر على الدوام
حتى اذا واعدت واحد
وقلت له سوف ااتي لك في عز القايله
يمديك تجيه العصر وتقوول نحنو نسمي العصر عز القايله

بس بصراحه لو ماعرفنا الساعه ماعرفنا الدقيقه ولا الثانيه
ولا الا ربع ولا وعشر
ولا عرفنا ونص وخمس <<< يقهروني الي يقولوونها

كم هائل من المعلومات

كانت بتفوتنا

بس اشوا انهم اخترعوها <<< على هونك يالحبيب

بس خليني بقوولك يا هيبه

ترا الساعه يعرفونها عن طريق الشمس<<< على باله كاشخ يعرف شي مايعرفونه

<<< ياشين انطم

لا بقولك وش الطريقه الي خلتهم يعرفوونها

هذا ياطويلة العمر واحد من جداني هو الي مخترعها <<< مايتعطل

يقوول والكلام له

انه كان جالس ورا صيهد (الصيهد= كتله من الرمال واجد)

يقوول هالكلام في بداية حبي لجدتك موضي
يقوول اخر مره قابلتها
اهدتني خيزرانه <<< يحرء حريش رومانسيتهم

المهم يقوول
قمت اتذكر كلامها يوم واجهتها
وتحمست وحذفت الخيزرانه
وارتكزت في الرمال
وطلع لها ضلال وقمت اطالعه شووي الا تغير مكانه <<< على شحم مهب لازم تكمل السالفه

>>> ابشر

صراحه موضووع يهووووووووس

هيبه
انتي مو هيبه

انتي خيبه

امل اذا حرمتينا من مواضيعك وردوودك

الموهم
ماطاح الي في راسي من الموضووع

برجع انا ويا رومانتك للموضوع
بس عاد لاتزمرين s3

هــيــبــه · 11-25-2004, 07:21 PM

حيالله خيو مواشي ( بدلعك بقوه جت كذا وش اسوي )
اقسم بالله العلي العظيم اني ما شربت غير اللي قلت
بس تدري ايش المشكله
اني دردبتهن ورا بعض بدون فاصل اعلاني حتى
(تقل بحل الواجب)
فالمواد اللي تبي تروح تغذي القلب خربطت وراحت للمخ واللي بتغذي المعده خبط طبلونها وراحت للبنكرياس s4
حوسه ما بعدها
وش رايك بلون الخط مو الاخضر احلى لون
بيجي لي يوم بكتب عن مغامراتي مع الكراث

s6

اعلانات المنتدى