حلو لي مشكلتي :( - الصفحة 2

مقهورة · 11-04-2004, 05:45 AM

اهلين اخواني ...

طيب انا اشوف اكثركم قال امك امك امك ...

طيب ابي طريقه تكون مااتأثر علي ولا على امي في اني اقول لها ... غير اني اكتب لها رساله لأنها صعبه

ومشكوررررين

**سلف خمسة** · 11-04-2004, 03:00 PM

السلام عليكم

اخت مقهوره

وصلت الردود الى 15 رد

واتوقع الحلول المطروحه اقرب للواقع بل هي المناسبه

واتوقع لو كان عندك حل ثاني ماجيتي تستشيرين الأعضاء

لكن اللي حبيت اعلق عليه عدة نقاط وهي ...!

الأولى :-

اقتباس:

انا ابغى اكون بنت طبيعيه حالي حال غيري من البنات

اذا انتي طرحتي مشكلتك هذي علينا بغرض

انك تبين ترجعين بنت طبيعيه حالتس حال كل البنات

انا اقول من الحين (( ماعندنا حل ))

ناخذ الأمور بالعقل؟

مايقدر على هالشي الا الواحد القهار سبحانه

انتهى ,,

الثانيه :-

اقتباس:

وحتى الملف الحكومي الخاص كل شي يسجل فيه يعني مالها داعي احد يقرا مصيبتي من اللي يشتغلون

وشو اللي مالها داعي الموظفين يقرون حالتس؟

انتي في ايه والا ايه؟؟

تعرفينهم؟؟

يعرفونتس؟؟

انتي حاله من مئات الحالات اللي توصلهم يوميا

وماراح يلحقك اي ضرر لأنك ماتعنين لهم شي اساسا

عفوا اخت مقهوره العذر هذا (( مرفوض جملة وتفصيلا ))

ثالثا :-

اقتباس:

اتوقع الخاص بيكون احسن لانه كل مادفعت زياده رح يسترون عليك زياده .... وانا الحمد الله ماابيهم يسترون علي من بلوى انا سويتها

^

^

ركزو في كلامها وتدرون ان الدعوى كلها خلطبيطه

معقوووول .. انتي طارحه مشكله وتبين لها حل

واخرتها تقولين .. مابي احد يستر علي من البلوى اللي انا سويتها؟

مادام انك ماتبين الستر من احد الا من رب العالمين

ليه تكتبين مشكلتك اصلا ؟

وليه ماواجهتي اهلك وخلصتي

خصوصا وانك تعرفين ان المشكله واقعه لامحاااله

استاذه مقهوره .. هذي الهفوات كانت في رد واحد فقط على احد الأعضاء

وصدقيني لو انا مشتغل تمحيص في جميع ردودك علينا كان

طلعت بما هو ادهى وامر .

عمووووووووما ..!

لست بالشخص الذي يكسر المجاديف او يقطع الآمال

ولكن من متابعتي لمشكلتك وردود الاعضاء

اتوقع ان (( ماكان بالأمكان احسن من اللي كان ))

اغلب الاعضاء طرحوا ارائهم وحلولهم

التي كانت واقعيه ومرضيه في نفس الوقت

وللأسف لم تأخذي بأي من الحلول السابقه

اتمنى الا تكوني ممن (( لايعجبه العجب ))

فمان الله

مقهورة · 11-04-2004, 10:33 PM

واتوقع لو كان عندك حل ثاني ماجيتي تستشيرين الأعضاء

اخوي سلف خمسه ياليت تقرا ردي اللي كتبته قبلك .. ورح تعرف انت بنفسك اني بديت اتقبل الوضع في اني اقول لأمي ... وسئلت عن احسن واسهل طريقه

انا اقول من الحين (( ماعندنا حل ))

انا داريه ان ماعندكم حل ... لمى كتبته كنت اقصد بالهشي بالظبط وفي اشياء كثيره كتبته ..ان اي ولد في المنتدى او خارج المنتدى بس يتصفحه ياخذ العبره ويدري ان هالشي يحر قلب البنت وانه يعور قلبها بعد .. فانا لو ابغى استشارة وبس كان سئلت لكل واحد بالخاص مايحتاج احط بالعام ..انا ضربت عصفورين بحجر .. ياليت تكون فهمت وش اقصد ..

وماراح يلحقك اي ضرر لأنك ماتعنين لهم شي اساسا

بكلامك هذا تحسسني انك ماتعيش في مجتمع سعودي اهم ماعليه الفضايح والكلام في الناس بلزمه وبدون لزمه واتوقع اذا انت تعرف وش اقصد ... وبالذات مجتمع الحريم مايسكت ... انا مااعني لأي احد بالنيا شي بس انا اعني لنفسي شي مااحب احد يمسني بكلمه وحده ...

ركزو في كلامها وتدرون ان الدعوى كلها خلطبيطه

مشكور اخوي ... يمكن لمى كتبت انا ماابيهم يسترون علي من بلوى انا سويتها .. يمكن خاني التعبير وماكملت الجمله المفروض اني كتبت

انا ماابيهم يسترون علي من بلوى انا سويتها بس سلوى ربي بلاني فيها ابيهم يسترون عليها ...

اخوي سلف خمسه انا ماحطيت كلمه (( اللي )) انا كتيت بلوى انا سويتها ... بس ماكملت الجمله وكتبت بلوى صارت لي ,,, وزي ماقلت لك خاني التعبير

اخوي سلف خمسه اتوقع انت اول واحد رديت علي وكنت فنان في ردك ... بس مع الاسف القاك الان القاك تتهمني .. ماادري غريبه حالك ...

يعني انت تتوقع بنت تسوي بلوى لنفسها تجي تقول ساعدوني .!!!

العموم مشكور اخوي وماقصرت

**nAmLaT nAjD** · 11-05-2004, 12:29 AM

الاخت مقهوره

كثير من البنات مروا في حالتس هذي وواجهوا مشاكل يمكن اصعب

انا اعتقد ان انتي قاعده تستسلمين لوضعتس وماعندتس استعداد

انتس تحركين ساكن..حبيبتي..عمر الحل ماراح يوصل لتس للبيت

انتي لازم تبذلين الاسباب..

الموضوع واضح والكل ماقصر يمكن يكون تنفيذ الحلول صعب لكنه هو الموجود

ايهم افضل في نظرتس؟؟تبتلين تردين كل من تقدم لتس ومن غير سبب

وتصيرين عانس؟؟؟وتتحملين كلام الناس؟؟ اصلا هي تحب! اصلا هي لعابه!

اصلا ...واصلا..واصلا...

لما تواجهين الواقع تلقين قدامتس واحد من اثنين

يانتس تبتلين على ماانتي عليه وتردين كل من جاتس

او انتس تكلمين امتس وتروحين للمستشفى

انتي قلتي بنفستس المجتمع مايرحم ويدور الكلام..يعني في كل الحالتين

المجتمع ماراح يرحمتس،،

لكن الفرق انتس لو رحتي المستشفى وعرفتي وش انتي عليه

ذيك الساعه تقدرين تشوفين حل لروحتس..وقولتس ممكن احد

يعرفتس من اللي في المستشفى هذي نسبتها ضعيفه

واذا كان عندتس ملف في اي مستشفى بيكون الموضوع اسهل..

وامتس في كل الاحوال لااااااااااااازم تصارحينها

بس بالاسلوب المناسب...

فيه حل ثاني اتوقعه هو الانسب لتس..

شوفي اذا فيه احد قريب منتس مره وتامنينه على اسرارتس

اخت،قريبه،عمه ،خاله...اي شخص قريب منتس وعقله كبير

ومتفهم وانتي تثقين فيه..

حاولي تجيبين طاري القصه هذي له كانها حصلت لاحد غيرتس

واساليه عن حلول واذا احتاجت المسأله قولي انها لتس

انا فهمت من كلامتس ان سمعتس مرره كويسه واهلتس وقرايبتس

استحاله يطري في بالهم انتس ممكن تغلطين فـ ان شالله راح تصدقتس

وتفيدتس

اخيراً...لاتنسين اهم جزء من الموضوع وهوالتوجه لربتس بالدعاء...

واستغلي العشر الآواخر بالدعاء والاستغفار..واحتسبي الاجر..

واكيد ماراح ننستس من دعواتنا..

اتمنى اكون وضحت لتس وجهه نظري والحل السليم مثل ماانا اشوفه..

**ياهملالي** · 11-05-2004, 01:24 AM

^
^

اللي يعرف كم (( تس )) في الرد اللي فوق

له جائزة عندي ،،

**nAmLaT nAjD** · 11-05-2004, 01:38 AM

خخخخخخخخخخخخخخخخخخخخخخخخخخخخخ

الله لايشقينا الا بطاعته

بس تراهم 39<<عجبتها المسابقه وابي الجائزه :d

**سحابة حب** · 11-05-2004, 02:23 AM

سلااااااااااااااام .. شوفي أختي مقهورة ..

دائماً الصراحة هي الحل والعلاج لأي شيء ...

إذا كنت متأكدة من كلامك .. و كان ابن عمك هو الفاعل ,, فالحل ,, أنك تصارحين أمك .. بكل جراءة .. علشان أمك تتكلم مع أبوك .. يجي أبن عمك ( مثل منيب قايلة ) و يتزوجك رسمي قدام خلق الله .. و أكيد أهلك مابيعملون فيك شيء لأنكنت أيامها طفلة .. لكنه هو كان عاقل و مراهق ,,

حكاية مستشفى صعبة أنك تروحين بدون علم أمك ...

فالخطوة الأولى هو أنك تصارحين أمك .. صديقيني هي اللي بتساعدك ...

اتمنى لك التوفيق في حياتك

الأصيلة · 11-05-2004, 03:32 AM

خلاصة كل الي الردود اللي قريتها واللي استشفيتها من بعضهم .....

انا بقول رايي الآن واتمنى يكون لك عين حقيقيه ورأي مفيد ...

اختي مقهوره

اتجهي لله فقط ...

لا غيره ...ولا لسواه ملتجأ ...

بثيه نجواكي وأسري اليه بسرك العالم به ...بقلب خاشع طاهر ..

ولا تفكرين بمستشفى لانها مو سهله اعتقد المساله

ولا تفكرين بسرك يطلع من صدرك

ولا لأمك ولأي لاي مخلوق من خلقه

فقط بينكي وبين الله رفيق الوحده وسنيد المؤمن

هذه ايام خير اختي ايام رحمه ومغفره وعتق من النار

فلجأي له وأطلبي منه الستر وصدقيني سوف تنجين من اي سوء

وبالاخير أقبلي من ترضين دينه وخلقه

لان ما صار ليس هو الحياة

بل هو البداية والمقبل ينهيها ويختمها ....

تقبلي حبي ودعائي لكي

بفك كربتك ...واسعادك بحياتك مثل اي فتاة .....

وخلي في بالك ...

انتي مثل كل البنات الطاهرات

فلا تقنعي نفسك بغير ذلك ....

حياكي الله

اقولك على فكره

تعالي شاركي معنا بالمنتدى الزكرتي

مو بس عشان مشكلتك

لا انتعشي معنا وتنسين روحك وحياتك ....وتنبسطي بيننا

حنا أخوان وأخوات حبوبين >>>>تكلمي عن روحك بس خخخخخخخخخ

يا هلا بك خيتووو

**شباب في رحله** · 11-05-2004, 04:31 AM

سلامو عليكم

ازيكم ياجدعان

بالنسبه للموضووع

خلونا نتكلم ونلتقي على وضح النقا <<< تتعبون على ذس

اول شي بتكلم مع سلووفتي

حوبي وعزيزي وكل شي

خلنا نمسك الزاويه انا وياك
ونبعد عنهم ونتكلم

والكلام لي ولك

لو نفرض ان البنت تكذب وتختلق هالقصه

اول شي وش الهدف من كذبها
وثاني شي وش الي اكد لك
وثالث شي ليش محرق رزك

ورابع شي لها من يحاسبها اذا كانت تكذب

اما بالنسبه لو نفرض انها صادقه
انت سويت الي عليك والكل سوى الي عليه وقال رايه
والهدف من هالكلام كله
الالتقاء والرقي بأفكارنا والمساعده ان حصل
طبعاً
مو كل واحد راح يكون بيده الحل بس عند الاجتماع وابداء الاراء
شي طبيعي بيطلع لو واحد بالميه شي صحيح او تصرف صحيح

طيب نرجع ونقوول
ان البنت تكذب
ومامرت بهالتجربه
بس فيه شخص متصفح للمنتدى او عضو او اين كان مار في هالموقف او يعرف احد ما في هالموقف
قرا الموضووع والردوود واقنع في
جزء من الردوود والحلول
توقع مارح يستفيد ويمكن يكون جازاء الافاده الدعاء ؟

حووبي سلف خمسه
بقوولك شغله

انا واعوذ بالله من كلمة انا بتكلم عن نفسي شووي

انا جيت وقلت رايي او الحل الي عندي بعد تفكير
ولا اهتميت بالمصداقيه او اختلاق الموقف

مثلها مثل التصدق
شي طبيعي ماراح تصدق وتشووف
صدقتك وين ترووح او وش صار عليها
او اتابع مسيرتها
انت تصدقت ومقتنع انك سويت شي
يزيد من اجرك وهذا بحد ذاته كفايه
لكل تهمه تجوول بخاطرك

زبدة الموضووع
انا معك في مصداقية النت بكبره
بس دام فيه مجال بنفع شي طبيعي ماراح اتردد لو ثانيه
وهذا يكفيني ويريح ضميري

وبكل امانه حبيت متابعتك لموضووع
وهذا يدل على حرصك على كل زاويه في المنتدى او المكان الي تنتمي له

وياجعلني ماذوق حزنك

واما اطلب منك الا انك تدعي لها ان الله بفرج كربتها
وان كانت تكذب شي راجع لها

والف شووكر
والي معجبني فيك صراحتك
s7

**ماشي الحال** · 11-05-2004, 06:09 AM

^
^

عايش الدور صح ابو رحله

معليش مقهوره انا عندى مداخله على بعض النقاط

اول ماقريت مشكلتك وشفت اول رد للاخ سلف خمسه

قلت خلاص اهم شي الوصول للحل او لهدف معين يعنى كلامة نفس كلامي

المسأله اللى اشوفها انك طرحتي مشكله وتنتظرين حلول لها

والحلول ماقصروا الاغلبيه قالوها لك

وانتى رافضه أغلب الحلول او مصعبتها الى درجة الاستحاله

مع العلم ان اغلب الحلول ليست من اختراع الاعضاء انا متأكد انها

كلها مرت في بالك بس انتى تطلبين الحل الاكثر طمأنينه بالنسبه لك

وانتى خايفه اكثر شي من ردة الفعل من امك او ابوك او اهل بيتك

ماداام الشخص واثق من نفسه انه ماغلط او انه مظلوم هذا اكبر دافع

انه يتكلم بوجه قوي ويتأكد ان الله عز وجل معه انشاء الله ..

انا ماراح اقول لك وش الطريقه مع امك وشلون تعلمينها

انتي ادرى الناس بنفسية أمك وانتى عارفه الامور النفسيه وتكوين الشخصيه

لها دور في ردود الافعال ..

بس ودي اقولك شغله كل انسان لابد تواجهه في حياته مشاكل

وبالذات المشاكل التى يكون فيها مفترق طرق يعنى اكون او لاأكون

يعنى تتطلب من الشخص تحدي الذات والمواجهه بكل ثقه

فأنتي ماعليك الا انك تدرسين الوضع الانسب لمصارحة أمك ومن ثم

التوكل على الله والإ قدام على هذه الخطوه وتنتهي ان شاء الله

جميع الصراعات التى تجول في داخلك التى هي من مداخل الشيطان عليك

يجعلك تفكرين ساعات طويله في ردة فعل امك او ابوك او اياً كان

الشيطان يريد الوضع معك ان يطول وان لاتجدين حل

والله عز وجل مبين لك الطريق الوحيد للحل

وأنتي اختاري ان تحققي رغبة الشيطان

أو تختاري الطريق الصحيح والمبين من عند الله عز وجل

ومن ثم يعود عليك بالراحه الطويلة ان شاء الله ..

تحياتي

مقهورة · 11-05-2004, 06:10 AM

اخوي شباب في رحله مشكوووور على وقفه معاي

وحتى لو كنت اكذب على قولته ,,البلا موكل بالمنطق ,,, يعني لو اكذب على مفسي ربي بيبلاني

اخوي او اختي غرام احباب ... ردك لي يثلج الصدر وهذا اللي انا مسويته الحين بالذات اننا في العشر الاواخر .. ويشهد الله علي اني بكل سجود ادعي ... الله يتقبل
اخوي غرام احباب لو تصير بنفس موقفي بتصير صريح

سحابه نجد ونمله نجد مشكورين ... واذا ضاقت فيني الدنيا مالي الا اقول لأمي

بس مااتوقع انشالله بتضيق فيني وانا متجه لربي

اما بالنسبه لاني اشارك في المنتدى اتمنى ومشكورين انكم دعيتوني ..بس والله ظروفي ماتسمح الاول ان اغليكم يعرف بقصتي الثاني الدراسه صعبه علي اني اتفرغ للمنتدى

Davidoff · 11-05-2004, 06:54 AM

السلام عليكم ..... اخواني الاعضاء ... اخواتي العضوات .... بصراحه .. افجعني موضوع (مقهوره) ..... لما فيه من الجرأه ... بتسألون ليش؟؟؟

اولا ً :

متى بنيت الثقه ... بين اعضاء المنتدى وبين (مقهوره) حتى تطرح موضوع كهذا هل في هالمشاااركات .... القليله جدا ً ؟؟؟

ثانيا ً :

وجود بعض التناقضات .... واتوقع الاخت (هيبه) كفّت ووفت.... ؟؟؟

ثالثا ً :

الهدف .. من طرح هذا الموضوع ..(خالف تعرف) ...؟؟

اخيرا ً ...

اشكر بعض اقلام المنتدى الذهبيه ... على الحماس الزائد في الرد على (مقهوره) مع اني ارى لو انهم ... ادخروا طاقاتهم لمواضيع اكثر اهميه .. بل اكثر واقعيه ... لكان ذلك افضل ..

انتهى .

تم تحرير بعض الكلام من قبل شباب في رحله

اعلانات المنتدى