أيامنــا واللـيالي .. كم نعــــاتبها=شبنا وشــابت وعفنا بعض الأحوالي
أيام في غلبــــــها وأيام نغلبها=وأيام فـــــيها سوا والدهر ميالي
تاعد مواعيد والجـــــاهل مكذبها=واليوم الأول تراه أحســن من التالي
إن أقبلت يوم مـــا تصفي مشاربها=تقفي وتقبل ومادمت على حالي
في كل يومٍ تورينا عجايبها=واليوم الاول تراه احسن من التالي
جربت الأيام مثلي من يـــجربها=تجريب عاقل وذاق المـــر والحالي
يضحك مع النـــاس والدنيا يلاعبها=يمشي مع الفــي طوع حيث ما مالي
كم من علوم وكــــم آداب نكسبها=والشعر مــــازون مثقال بمثقالي
أعرف حروف الهجا بالرمـز وأكتبها=عاقل ومجنون حــاوي كل الأشكالي
لكن حـــظي ردي والروح متعبها=مافادني حسن تأديـــبي مع أمثالي
إن جيت أبي حــاجة عزت مطالبها=والعفو ماواحد في النـــاس ياوالي
قوم ليـــــا جيتها رفت شواربها=بالضحك وقلوبها فــيها الردى كالي
وقوم ليــــا جيتها صكت حواجبها=وأبدت لي البعض في مقـفاي وإقبا
ماكني إلا مســــوي حال مغضبها=والكل في عشرته مـــاكر ودجالي
ياحيف تخفى أمـــور كنت حاسبها=واللي على بالهــــم كله على بالي
الجار جافي وكــــم قوم محاربها=والأهل وأصحــابنا والدون والعالي
والروح ويش عذرها في ترك واجبها=راح الحسب والنسب في كثر الأموالي
نفسي تبا العز والحــاجات تغضبها=ترمي بها بين أجــــاويد وأنذالي
المال يحي رجال لا حيــــاة ابها=كالسيل يحي الهشيم الدمـــدم البالي
عفت المنازل وروحي يــوم أجنبها=منها غنيمة وعنها البعــــد أولالي
لاخير في ديرة يشقى العــزيز ابها=يمشي مع الناس في هـــم وإذلالي
دار بها الخوف دوم مايغــــايبها=والجوع فيها ومعـها بعض الأحوالي
جوعى سراحــــينها شبعى ثعالبها=الكلب والهـــــر يقدم كل ريبالي
عـــز الفتى راس ماله مع مكاسبها=يامــرتضي الهون لا عز ولا مالي
دللت بالروح ليــن أرخصت جانبها=وأنا عتيبي عـــريب الجد والخالي
قوم تدوس الأفـــاعي مع عقاربها=والها عزايم تهــــد الشامخ العالي
خل المنازل وقل للبـــــين يندبها=يبكي عليها بدمع العــــين همالي
لا تعمر الدار والقالات تخــــربها=بيع الردي بالخسارة واشتــر الغالي
ماضاقت الأرض وانسدت مذاهــبها=فيها السعة والمراجل والتــــفتالي
دار بدار وجيران نقــــــاربها=وأرض بــأرض وأطــــلال بأطـــلالي
والناس أجانيب لـــين انك تقاربها=وتكون منهم كمـــا قالوا بالأمثالي
الأرض لله نمشي في منـــــاكبها=والله قدر لنا أرزاق وأجـــــالي
حث المطايا وشرقها وغـــــربها= وأقطع بها كل فــــج دارس خالي
واطعن نحور الفيافي في ترايـــبها=وابعد عن الهم تمــسي خالي البالي
من كل عملية تقطع براكـــــبها=فدافد البيد درهــــــام وزرفالي
تبعدك عن دار قـــوم ودار تقربها=واختر لنفسك للمــــنزال منزالي
لومت في ديرة قـــــفرا جوانبها=فيها لوطي الســـباع الغبس مدهالي
أخير من ديرة يجــــفاك صاحبها=كم ذا الجفا والتجــــافي والتعلالي
دوس المخاطر ولا تخــشى عواقبها=الموت واحد وبعد العــــز يجلالي
إن المنايا إذا مدت مخــــــالبها=تدركك لو كنت في جو السمـا العالي
ماقرت الأسد في عالي مراقــــبها=تسعى على الرزق ماحنت في الأشبالي
والشمس في برجها والغيم يحــجبها=تقفي وتقبل لها في العرش مــجدالي
رب السموات يامحصي كـــواكبها=يامجري السفن في لجات الأهــوالي
ضاقت بنا الأرض واشتبت شــبايبها=والغيث محبوس يامعبود يـــاوالي
يالله من مزنة هبت هــــــبايبها=رعادها بات اله في البحــر زلزالي
ريح العوالي من المنشا تجـــاذبها=جذب الدلي من جبا مطوية الجــالي
ديمومة سلبت وارخــــت ذوايبها=وانهل منها غزير الوبــــل همالي
تسقي دياراً شديد الوقـــت حاربها=ماعاد فيها لبعض النـــاس منزالي
ياجاهل اسمع تمـــــاثيل مرتبها=فيها معاني جمــــيع القيل والقالي
مثل المحابيـــب زادت في قوالبها=في صرفها زايدة عن قـرش وريالي
يارب توبــــه وروحي لا تعذبها=يوم القيامة اذا ماضـــاقت أعمالي
وأزكى صــلاة على المختار نوهبها=شفيعنا يوم حشــــر فيه الأهوالي