جيت المكان اللي جمعنـا وسلمـت
لو كـان غايـب بالتلاقـي حدينـا
وقفـت ساعـة عاجـزٌ ماتكلمـت
هنـا تحاكـت بالتصافـح يديـنـا
هنا على مـا فـات منـي تعلمـت
يومـي دخلـت بسكـة العاشقينـا
قابلتها والعين قالت عـن الصمـت
وين انت غايب من قديـم السنينـا
من حكيها بأفراح عمري توسمـت
وضنيتها عن غربة الـروح مينـا
وحبيتهـا لا والله الا بعـد همـت
واهديتهـا القيفـان والياسميـنـا
سكنتها في جوف قلبـي وصممـت
قصرٌ لهـا مـا يسكنـه ساكنينـا
من شانها حاربت وقتي وخاصمـت
وناستـي فـي هرجـة العاذلينـا
من خلقتي ما والله اذكـر تندمـت
الا بعـرف اللـي هقيتـه ثميـنـا
راحت وانا في عز كسري بعد شمت
وياليت جاني بـس عـذر سمينـا
اليوم يا جرحـي بنزفـك تأقلمـت
خل المكان ونزف جرحـه سرينـا
تدرون وش يعني لا قالوا تحطمت؟؟
ومتى عرفت انّا خـلاص انتهينـا
ساعة لمحت عيونها ثـم تقدمـت
وصدت نست ما فات بنـت اللذينـا
تدرون وش يعني لا قالوا تحطمت؟؟
