هلا فيك مصرقعه

بدايه احب اقولك اني ماني عضو في لجنة التحكيم في شاعر المليون



يعني لست في موقع يعطيني الحكم عليها

لكن لي رأي فيها مثل ماكان لك اعجاب بالقصيده ونقلتي ابياتها لنا

ذكرتي في بداية موضوعك انها قصيده لشاعر غير معروف !!

ومااستغرب هالشيء لان القصيده ماتساعد شاعرها ان يشار له بالبنان وتقول هذا شاعر القصيده الفلانيه

لاني حاولت اني اجيبها على كذا لحن وطاروق ومافيها فايده غصب اطلع من اللحن

مادري المشكله في الوزن ولا لساني ماعرف يقولها او انها القصيده على بحر له لحن وطاروق انا ماعرفه

الله اعلم

واذا اتسع صدرك ودي اخذ منها كم بيت نناقشه مع بعض


ليه لو ظنيت بك خير ظني بك يخيب
كان ظني بك غلط ليه ما بتصححه

الشاعر يقول لو ظنيت ؟؟ ولو مثل مانعرف تجي على شيء في الماضي لم نفعله
يعني ان الشاعر ماظن فيه خير اصلا شلون يقول ان ظني فيك يخيب وهو اصلا ماظن فيه

وبعدين يقول ليه مابتصححه!

مابتصححه اعتقد لغة ركيكه جدا

يعني لا هي على شعر حديث بلهجه اهل الجزيره العربيه ولا قديمه

مابدي ومابدك.. دخيله على عموم لهجة اهل الجزيره العربيه

ربعنا طاحو فيها من تالي على اساس الوحده العربيه


ليه تخفي ما بداخلك وانت امرك مريب
امر لو حاولت تخفيه عينك تفضحه



شلون نقول لشخص انت امرك مريب الا اذا كان هناك شيء يخفيه

يعني مجرد ان امره مريب يغني عن السؤال ليه تخفي مابداخلك؟؟

وفي الشطر الثاني من البيت الشاعر يذكر ان عينه تفضحه

زين اذا عينه تفضحه شلون قدر يخفيه وشلون صار امره مريب اذا كانت عينه فاضحته وانت عارف شفيه!!



كم سهرت الليل لجلك وانا متعب صويب
اشتكيك لدفتري والقلم والمسبحه



الشاعر يقول انا سهرت لاجلك وانا متعب وصويب !!

زين اذا انت صويب بيجيك النوم ؟؟

مستحيل بتقعد تهوجس وتفكر

وينتفي معه ان يكون السهر من اجل الشخص اللي يخاطبه الشاعر

يعني هو سهران من العتب وانه صويب قال يالله بالمره اسهر عشان حبيبي

على قولة العرب حج وحاجه !!

وبعدين كلمة المسبحه صراحه مادري شنو دخلها في السهر

يعني القلم والدفتر اوكي عشان يكتب ويعبر بس مسبحه صعبه شوي مالها مكان ابدا

واعتقد وجودها بس عشان يختم اخر البيت بكلمه تناسبه




كم سهرت الليل فكري يودي لك يجيب
مره اجمع في الخطا منك وامرار اطرحه

اجمع في الخطا منك !!

شلون تجمع الخطا منه هل الشخص المخاطب هو مستودع للخطايا عشان تجمعها منه

ولا تطيح منه وانت تجمعها !!

وبعدين جمع امرار هذا انا ماسمعته قبل الا في اغنية احلام اللي تقول ياطير ناديت لك مره ومرات وامرار

واعتقد الشاعر تأثر بأغنيه احلام في البيت اعلاه ومافيها شي الشاعر انسان حساس ويتأثر بمحيطه اللي حوله

الله لايجعلنا لا نتأثر الا بطاعته قولي آمين




ما اذكر اني قد تلفظت بالفاظاً تعيب
كنت اذا شفت الخطا منك اجر النحنحة




بعد ابيات الشاعر السابقه في نصح المخاطب في القصيده

يقول انه يجر النحنه وهنا يرجع يوظف كلمه مالها مكان بس عشان يختم فيها

البيت مره ثانيه بكلمه تناسبه وهذا دليل على ان الشاعر يشكي من فقر

في المفردات وهو المفروض انه يكون بحر لها ولا يجبر البيت بكلمه

مالها داعي

لان ماحد يجر النحنه الناس تقول يجر الصوت يجر الحبل يجر سياره لكن يجر نحنه !!



وان خسرت اليوم لا بد بكره تربحه
يا لبيب اسال مجرب ولا تسأل طبيب



الشاعر له ساعه ينصح اللي يخاطبه وقبل لا يختم القصيده يناديه بقوله (يالبيب)!!

زين اذا هو لبيب ليه ضيعت نص القصيده وانت تقول انك علمته لكن مافيه فايده

اذاً صاحبك هذا مو لبيب !! أو انه لبيب وانت اللي ماعرفت تشرح ؟؟




كل مغروراً بنفسه غروره يذبحه
السعاده والهنا ما لنا فيها نصيب



شلون يصير مغرور وانت في احد الابيات تقول انه

كان يعتذر عن افعاله بوصفه انها عن حسن نيَه


ثم تخطي فيه وارجع واعيده واشرحه
واعتبرها حسن نيه -على قولك- وطيب



الشخص المغرور مايعتذر عن افعاله بالعكس ياكبر ويصر على انه صح

يعني الحين الشخص اللي يخاطبه الشاعر غير وصفه اكثر من مره

1)مره مايفهم ولا يعرف لانه دايم يشرح له ويوضح لكن مافيه فايده

2)ومره لبيب

3)ومره مغرور


يعني الشاعر اقرب مايكون انه هو اللي مايدري وش الطبخه ومافهم الشخص اللي قدامه

او ان قدرة الشاعر الاستيعابيه صادفت شخص اكبر منها واصبح يخاطبه

بأكثر من وصف حتى يبرر قطع علاقته فيه بآخر القصيده



افرح احزاني ولو شفت حزنك بفرحه

هذي بصراحه حاولت اترجمها يمين يسار ماجت معي

وكتبتها بيدي قلت بيتغير شي ماكو فايده خصوصا ان شطر البيت ماقدر يكمل لها أي معنى

وفي اخر الابيات يذكر الشاعر انه فارق المخاطيب في القصيده

بعد ان علمه انه ماينحني راسه وانه صليب راس وانه ماهمه

مع انه يقول انه مو غريب انهم يفترقون وكأنه متوقع هالشي من البدايه << اجل ليه العلاقه ووجع الراس؟



موغريب انا افترقنا ولكن الغريب
ليه اذا جابوا لي اسمك مسكت المسبحه


وهذي صفه عند اغلب الشعراء اني ماهمني وانك انت الخسران واني انا

ماحبيتك وانك انت اللي تموت فيني

وهذا طريق يسلكه اغلب الشعار عشان يلقى فيه عزاء لنفسه

لكن علة الاكباد هالمسبحه ليه يمسكها اذا طرى عليه حبيبه!!

واعتقد يامصرقعه انك في غنى عن شرح كلمة (طف)

لان القصيده اذا ذكرت يذكر معها فقط مناسبه او سبب للقصيدة اللي قيلت فيها

ومايذكر معها أي توضيح لغوي لان هذا يعتبر ترقيع للقصيده

ويزيد من ركاكتها


هذاي رأي يامصرقعه من شخص اكبر مايقال عنه انه عضو في بيت الزكريته

واقل مايقال عنه انه مايعرف كوعه مو بوعه

وتحياني لك يامعزبتنا واتمنى اشوف جديدك