قريت في وصف الغنادير هاله=كل(ن) يقول انا أمير المحبين
هذا قطع عذقه وبهـّــر دلاله=وهذاك ينثر من غلاها رياحين
وغالب الشعار لا جا مجاله=محبوبته ترجح بكل الموازين
إلا أنت يا كل الشعر والجزاله=ما ينصفك قاف وبحور وموازين
مع ان قافي وافي بكل حاله=لكن في وصفك عجز يوفي الدين
كل ما يحاول جاه أمر الإزاله=باسباب تيهي فيك لا قلت بيتين
لكن هالمره رجيت العداله=وإن كان ما جادت جزال(ن) مزايين!
من شان غرشوب(ن) يطيب العنا له=بسهر وبكتب له بدم الشرايين
اللي على قلبي خذا له وكاله=تشمل معاليقي وشوفي من العين
وصار كلي عايش(ن) من خلاله=يصرخ بطيفه قاهر العسر باللين
يا بسمة الدنيا وأجمل رساله=وأعذب هديه من ورود البساتين
يا فلسلفة كل الحكي يا دلاله=أعشقك فرحانه وأهواك تبكين
في طلسمة بوحك عشقت الجهاله=وبقولتك بابا كرهت المغنين
تخسى نوال وثم تعقب أصاله=مع طلتك ولّت جميع الشياطين
لو جاد شعري ثم طابت خصاله!=لك يا روان الكون من حين الى حين
يبقى يحاول طيب الله فاله=في وصفك اللي ما تفيه الدواوين