الـزكـرتيه - عرض مشاركة واحدة

**بيـــــــــش** · 10-24-2006, 10:27 AM

وعليكم السلام ورحمة الله >> نغزة

بابا مستر علاوي

كرابم كديع >> اقراها بعكس اتجاه عقارب الساعة

عيني عليك باردة على هالدقه الزمنية والمصداقيه في ترتيب الأحداث

حسيت اني عيدت معك أمس

شفت الوقت اللي كنت جالس جنب اللي زايد عنده معدل الحشيمة؟

كنت أنا واختي جالسين في الحوش ننتظر واحد من البزارين يرجع من البقاله

أرسلناه يشتري لنا شراقيات وعلى قولتكم طراطيع >> أحسها غلط

عاد يوم جا وماأحط في ذمتي وأقول لك كم كانت الساعه

توهقنا وشلون نشغلها وأنا واختي مانعرف نولع الكبريت

وتمت الاستعانه بولد الجيران البالغ من العمر 6 ربيعات

يعني مو تظنه كبير وأرسلنا له بزر يناديه وجا وقف عند الباب من برا

وحنا ورى الباب من داخل

ومدينا له الكبريت بنعومه وخذاه على استحياء

ومو تظن اني أنا واختي واقفات ورى الباب وكل وحده تنغز الثانية

ولا قلنا له اننا نخاف نمسك الشراقي وهي تشتغل

علشان كذا طلبنا منه انه يشغلها ويمد يده علشان نشوف وشلون تفرقع

وما صرخنا بنعومة وخبث بعد مافرقعت وهو ماضحك علينا

ولاشفناه من ورى الباب

:::::::::::::::::::::::::::::::::::::::::::::::

اذا ماوراك شي بابا علاوي ترى عادي أكمل

<< عجبتها القصه

الصدق الصدق ان العيد كان يوم يجنن

والأجنن لما كنا بيت جدي وجات وحده من الجيران تعايد على خالاتي

طبعا ارتزينا كلنا حنا البنوتات نسلم عليها

خصوصا بعد مادرينا ان عندها ولدين على وش قواز

وخسارة زينة العيد تروح ببلاش.. فقررنا نحللها

لاحظنا وحنا نسلم انها حاطه عينها على وحده منا وبتركيز شديد

والمحطوط عليها العين مابعد جا دورها تسلم

طبعا رحنا باركنا لها مقدماً

ولما راحت البنت تسلم على أم خطيب المستقبل جابت العيد

الحروف تبادلت المواقع على لسانها وكل الردود السلامية حاست أمها

ألين وصلت عند (وانتي بصحة وعلامه)

ولكَ أن تتخيل عزيزي القاريء كيف كانت وجيهنا المضغوطة بالضحكة

تكاد تنفجر لولا عناية الله

العيد بكل تفاصيله حلو ويجنن

وكل واحد منا صارت معه مواقف تنطبع على جبهة التاريخ >> على شحم أعياد

المهم

بابا علاوي قص علينا حدوتة يوم العيد

وعن اذنه بفتح موضوعه للزكرتيين والزكرتيات كلهم

يجون ويقصون علينا أحلى مواقف وسوالف العيد الطريفة (وجه قناة السعودية الأولى)

وكل واحد راح يشارك مرة وحده بس >> صارمة يالقوانين

يعني الدعوى ماهيب شات ترى

اقتباس:

سبحان الله بالمجالس دايم ما يسولف الا المطاوعه .. الزكرتيه يسكتون ما يسولفون !

بتشوفهم وشلون يدهرون المطاوعه والزكرتيين والداجين والعاقلين >> على نفس الشحم حق الأعياد

بابا علاوي

اسلوبن حلو وماضوعن مرتب ومهندس

عساك من عواده وكل عام وانت بخير

اقتباس:

عند الساعة 9:25 ص .. استاذنت ..

ليه ماكملتها ألين النص؟

المواعيد حلاتها بالنص والربع تحس ان لها هيبة >> ماعندها شي تقوله

وكل عيد وانتم كلكم زكرتيين