السلام عليكم ورحمة الله وبركاته

تسان ياما تسان <<< وجهن وده يرقد

كنا وخالي الحرفي ووبن ( مضيع بين ولد وأبن = حاسهم ودهم يتميلحون على الإملاء ) خالتي أبو زريف خان ليميتد فول أوبشن أب داون إس لحه

نحب المرقوق وأثناء الأكل كان يناظرنا خالي ببقبقة عينتاه اليمينا واليسراه ويقوم بدربحة الحنيني ( ماهوب الجاهز حق هالأياام - اللهم أشفي والدتي ووالدي ) اللتي هو من تزبيط والدتي << وجهن لو يقدم الأخبار ماحد جاه غلفة

ويخون خالي التصويب ( في بوؤه وده يسف الحنيني ويجي << أحمدوا ربكم مانيب مدرس عربي ) أذا وده يزرط الحنيني فكانت مرةً من المراريت تلامس وجهي الأغر وتارةً تلّمع وجه أبو زريف الأطخم وأنا فاطسون من الضحك وكانت أمي تمسح بالدهن اللذان كان مغرق كرة الحنيني ويلصق في وجهينا كامل الوجه حتى نفتك من المشق <<< الله يرحمك يامذن حارتنا من أول ان كانه متوفي وان كانه حي الله يعطيه الصحة والعافيه ( كان هالشايب اذا تغدا عندنا وخلص من الأكل يمسح بالدهن رجيلاته وأكواعه عسى الله يجزاه عني وعن عيال حارتنا الجنه )

وذي المعاناة كانت السبب الرئيسي في إحترافي المصاقيل والهروب من المدرسة << وجهن به عبرة محبوسة تمتحني << بيت مسروق

فكنتو اقفز في مدرسة البنات اللي قدامن من بيتنا الطين << وجهن مبسوط ماكان ذيك الأيام في الشارع كله إلا بيتنا اللي فيه لمبة على الباب

واسرق مقصف البنات وكان يساعدني في تلك الزمان سليمان ولد حارتنا ( ورد ذكرة في قصة سابقة - وإلا ودكم أعلمكم بسالفته من جديد )

وكانت طبولتنا ( على وزن طفولتنا ) بريئة وكنت طبلاً لا يتجاوز كوابيس الأطبال الآخرين كثيراً بأن يحمل شهادة الرابعه الإبتدائية ويفرح أميمته وأبيه ( الله يطول بعمر والديّ ووالديكم ) نخمد من الساعه عقب العشاء ( ماعرف ان فيه توقيت واليوم مقسم إلى ساعات إلا وعمره سططعش - وماعرفت أن فيه توقيت عالمي إسمه قرينتطش إلا من البارح الله يهديهم ماعلموني ) <<<< وجهن ولع الزقارة

ونباشر أعمالنا الطبولية الفطوليه ( الفطوليه = البطوليه ) فيالها من أيام
7
7
فاصل شعري
7
7
ألا ليت الطبولة تعود يوماً = فأحكي لورعاني أيام الفطولة

( إرجع سطرين لفهم المعاني يالسطل )
7
7
7
عدنا

كنتو اذا زغردت العصافير إبتداء يومها قد وضعت في ذلك الفاه المربع لقمتن وأنا عارررن للشارع لكي لا يفوتني أوطه مزغططه مارتن بالشارع وإلا حمامةن مستلقيه على جدارن تتشمس إلا وصار أقوى أكشن لها في حياتها التعيسه

قكانت القطوة تعاني من خداع ووبن خالتي يشير لها بيد ليرغبها ويناديها بـ تزا تزا تزا ( بصراحه مدري وش لون أكتبها بس عشان ماتقولون قال كلام مو زين = سو بثمك كنك تنادي قطوة عشان تعيش القصة ) وانا أتغافلها وأسفها بالحصاة وتفلق ووبن خالتي على وزن خالي والخال جذاب
ونرجع إلى البيت نضحك ثم ياتي سليمان ونمسك عبيد ولد جيرانا ونحربهو برضاً ( ترجمه = Heat Him Alot ) << قالك غير عشان المثقفين - وجهن يدربح له شين اخضر طري

أيامووون كانت الفلقه مرهمها حفنة من القهوه أو المسمار أو الهيل يلطسون الجرح بها وتقعد تقامز من حرارة القهوه وتنسى الصعرور والشق اللذي في دمجتك ( أحيانا الوالدة الله يجزاها عني بالجنه تغلط في قوطي القهوه وتاخذ قوطي الفلفل الأحمر المطحون - بالله عش في جو الفلقه وأنت راسك مليان فلفل بالغلط = خطاً طبي لو ناسيه مقص في راسي ارحم ) << تأذوا الهنود كل ماشفت واحد ألقط خشمه احسبه خالي من حرارة الفلفل والله يهديها الوالدة كانت تتوصى أذا جتني فلقه عشان يوقف الدم

ومن مسلسلة ورعان الحارة كان الكمخه ووبن جيراننا حمد البرميل ( الله يذكره بالخير ) هو الخواف فينا ماكان يغامر لانه ماكان يشوف تمثلية ستيف والسيارة السوداء << ماعليكم منه

نكمل المغامرات ودربحة خالي للحنيني

كان من ضمن الأشياء اللي كنا نعملها ( على فكرة ترا راسي بعد احصائية الفلقات لعام 1427 هـ -2006 قبل الميلاد وصلت إلى 23 فلقة في راسي ولين الحين ماني داري وين التنسيم منه )

عدنا

كان من ضمن الأشياء اللتي نعملها ( ياربي لا تواخذنا وأغفر لنا ولوالدينا وللمسلمين أجمعين ) كنا نمسك قطو ونحطه في قوطي نيدو وندربيه لين نوصل غنم ابو جيرانا الله يرحمه وكان حاط شبك قدام بيته وحاط كم غنمه فيه يسرحهن بعد العصر في الحارة

كنا مانوصل يالمهابيل الثلاثه ( على وزن أنا ووبن خالتي ووبن جيراننا ) لهالحوش إلا والقطو مطرش وسط القوطي اللي تغذاه لمده شهر ودايخ كل ماعليك بس تحط فتحة القوطي على باب الحوش وتفتح للقطو وهو يتولى الحوسة وسط الحوش وانت تتمرغ في الحياله من الضحك


وينتهي يومنا من المغامرات الساعه بين عشاوين عائدين إلى المنزل حفاة شهب لهب ونأخذ العلقة اليوميه من أبي ومن هو متواجد هاك اليوم من الناس المسيرين علينا ( نوع من أنواع الضيافة من أول أبوك أذا ما أمداه يمسطك لين رجعت من الشارع أقرب واحد يم الباب يلحقك اللي جنبه عشان ابوك صديقه = المشكلة انت وحظك العقال أمداه عليك زين ما أمداه يمدي الزبيريه ( أعزكم الله ) ) ونغدوا إلى فرشنا ونخمد لنواصل في الضحى مسلسل الإرهاب الطبولي الفطولي

نتابع معكم في حلقةن أخرى فوتكم بعافيه

7
7
7
7
مايستفاد من القصة خلك ذرب مع القطاوة يحبونك عيال الحارة

وتصبحون على خير

صباحاً

وتتمسون على مثلة مساءاً

8
8
8
8
8
ماله دخل العنوان بالقصة لعبت عليكم

( قصة قصيرة = من سلسلة روايات الكاتب : أداجا تربل سيكستي - ترجمه بالعربيه : د جـ هـ 666) دال جيم هاء الرياض



أعتذر عن عدم تنسيق الموضوع وذلك لأنه وليد اللحظة
( واللي ييفهم شي من القصة لاينسانا بالشرح عساها في موازين أعماله <<< وجهن يحك راسة )

دمتم بود ومحبة