الـزكـرتيه - عرض مشاركة واحدة

**سلف خمسة** · 05-02-2006, 10:18 AM

سلام ..!

لويس شلونك

مبطين من مواضيعك ياحلوو

انا مع قيادة الصغار للسياره بشرط

اذا كان في حضن ابوه

اما يجي طوله متر إالا وحاط لي مخده سدو تحته

ويضطر انه يضحي بالدركسون والطبلون والا بـ البانزين والبريك

اذا نزل بيدعس بانزين ماتشوف راسه

واذا ارتفع يبي يشوف الدرب رجله ماتلحق البانزين

مايوصل مشواره الا معرق ومنهك وحالته حاله تحس انه رايح القويعيه مشي

مدري وش تبي القويعيه بس عديها ياشوء عديها

والغلط طبعا اولا واخيرا على الأب

اللي بيكون اكبر عياله الى الحين مابعد وصل السن القانوني لحمل الرخصه

وهو مشغول دائما برا البيت وموكل المهمه لـ ولده يقضي اغراض البيت

والولد اذا استلم السياره

يصير مشوار خمس دقايق عنده ساعتين

ربع ساعه يجيب اغراض البيت

وساعتين الا ربع تفحيط وهياته في الشوارع

طبعا الولد ماعليه لوم ابد لانه صغير سن ولايدري وش جالس يسوي

ولا يدري انه بسرعته وتهوره بيعدم ارواح

ماراح يعرف الا اذا انكسرت رقبته

طبعا الأب من هالناحيه

يمكن مانلومه

نبي نقول له حط سواق وارتاح ويمكن يكون متعصب من هالناحيه او ماعنده قدره ماديه

طيب نقول له علم ولدك شلون يسوق وخلك معه اول بأول الين يتقن السواقه

يعني اول اسبوع خله يسوق وانت معه وشوف هل هو متقن وراكد والا جلمه

واذا حسيت انه يعرف يسوق

يصير عندك اخر شي تسويه وهو الإطمئنان على مستقبله ومستقبل اللي في الشارع

وهو انك تتابع تحركاته وين يروح و وين يجي

اذا عطيته المفتاح يقضي لزوم بالسياره

حاول تتبعه وتشوف وش سالفته

طبعا ماياخذ منك الموضوع اكثر من يومين الين يتكون عندك فكره عن ولدك وحركته بالسياره بعيد عن رقابتك

هل هو متهور والا راكد

اذا راكد زين على زين

اما متهور تقرب منه وتحووكه براشدي وتسحب المفتاح

والله يعينك ياللي فتحت لك بيت واسره انك تقوم بطلباتهم

اقتباس:

- أتمنى وضع لوحة بكل شارع ( كل مطرود ملحوق او كل ملحوق مطرود )

الا الله لايهينهم يحطون مطبات

معروف ان السرعه المسموحه في داخل المنطقه ماتعدا ستين او ثمانين

يعني حط مطبه بكل شارع تمنع المتهورين من السرعه الجنونيه

منها تضمن ان نظامك ماشي صح

ومنها تضمن انهم يخففون اجباري للمطبه اللي بتكون رادع

يعني يمر عليك واحد ويشطفك يمشي مليون

وتحس ان موعد طيارته بعد خمس دقايق والا معه حاله طارئه

واخرتها رايح يشتري خبز

مصخره وقسمن

اقتباس:

يوجد بالسيارة أختراع يسمى الإشارة الضوئية

من جد تمشي في امان الله ماتاخذ الا البريك في وجهك

لاتضايق ولاتهتم

هذا واحد يبي يلف

يا انك تدعمه

والا تتفاداه وانت تحلطم وتأشر له بيدك

طيب عطني خبر انك بـ تلف علشان اخفف والا اروغ منك

تتعب وانت تقول همج

وفيه بعد اللي يرفع الضغط زود

انت واقف في تقاطع وسياره على الشارع الرئيسي

انت واقف على اساس الحبيب بيروح سيده ومايصير تطلع في وجهه

الين يقرب عندك وتفاجأ انه بـ يلف

هذا وش تسوي معه

والمشكله مو في تاخيري اقل من دقيقه وانا واقف انتظر

المشكله انه ابله ولايدري ان فيه شي اسمه اشاره لازم تستخدمها لتحديد اتجاهك ياعطيه

لا وفيه شي ادهى وامر

صاحبنا يدق إشاره اوكي

لكن مايخليها اقل من ثانيه

يعني نفسيا بس يدق الإشاره ويرجعها مره ثانيه

كأنه يقول اهم شي اني عطيتهم خبر

طيب يمكن ماشافك اللي وراك

خلك داق إشاره الين تلف الله يصلحك ( ماشي شلونك )

اقتباس:

يوم حطت المنبه في السيارة

ابتسم فأنت في الحساا

تدري متى يدقون هرن

اذا الإشاره المقابله صارت برتقاليه

يعني مابعد تصير خضرا اشارتهم يبدأ الشباب في الإدهار بالهرنات

تحس انه فايز فريق الفتح

مايعرفون يقنعون انفسهم

ان اول واحد واقف عند الإشاره اللي هم واقفين وراه

انه مستحيل يوقف عند الإشاره عباطه والا نحاسه

اصبر ثانيتين وتشوفه محرك

لازم تزعج خلق الله بالهرن

تصدق عاد اني مستخدم طريقه رهيبه تصلح لك

اللي يدق هرن وراي ما امشي واجلس امشي بشويش الين تطفي الإشاره

ونكايتن فيه عادي اني اوقف معه عند الإشاره اهم شي اقهره

غير كذا

الواحد يالله المستعان ماعاد يحتال ينزل من سيارته

يجي عند البيت وهات لك ياهرنات وازعاج

ينتظر خويه يطلع من البيت

طيب انزل دق الجرس والا طق الباب

لا يجيك معلق على الهرن ولا يدري اذا بيت من البيوت اللي حولهم

فيه مريض والا غيره من الحالات اللي تتطلب الهدوء

الله يصلحهم

اقتباس:

عندما تنزل بأحدى الأماكن

ياكثر ماتصير هالشغله

تطلع من السوبرماركت وتحصل سياره مسكره عليك

يا انك تنتظر الحبيب متى يجي

والا انك تخمّن هوو اي محل داخل علشان تروح تطلعه بإذنه ويغير محل سيارته

المشكله بعضهم ماعنده حيااا

اذكر اني مريوس وطالع من الموقف الا الحبيب صافط وراي على طول

ونزل بسرعه وهو يأشر لي بيده يعني يقول ( شوي بس )

نزلت له قلت انا مريوس بطلع تعال محلي واجلس ساعتين

قال دقيقه بس يقولها وهو متوجه يعني ماطق لي خبر

لاقيني انت ؟ ارجع الله لايهينك لأدعمك

ويرجع الأبله ويطلع سيارته

لاااا والمشكله انه متضايق

ناس همج مايرتاح الا اذا سميت بدنه بكلمتين علشان يتأدب

اقتباس:

مدري يدور فضولي بوجهك

خخخخخخخخخخخ قديم فضولي

فيه نوعيات يقط معك بالسياره مدري وش يبي من جد

ودك تأشر له تقول تعال اركب

بس بعضهم ترى تفهيه يا اخ لويس

اغلبهم يكون مفهي ويفكر وعينه تكون يمك

وعقله مهب معه نهائيا

هذا اللي يخليك ترحمه وتنقد عليه في نفس الوقت

اما اللي يطالعك وهو مركز هذا ودك تفتح الدريشه وتسوقه باحد الشرطان اللي معك

اقتباس:

الصراف الآلي

الحل سهل اذا قط معك بالشاشه يبي يشوف

ماعليك الا توقف شغلك وتلتفت عليه وانت ساكت وتطالعه

طبعا النوعيات ذي لاعب فيها الفضول وده يعرف كل شي

حتى ماله شغل بالموضوع لازم يحشر عمره

وهذولا مرضى نسأل الله لهم الشفاء مما هم فيه

الشخص اللي يمر عليكم في السرا وكأنه مايشوف احد

هذي للأسف تحصل واجد

وبيني وبينك تعود للشخص اللي واقف بالسراا

يعني انا احيانا

اذا قدامي سرا طويل اجيه من النص

اذا محد تكلم اوقف واموري اوكي

ياخي مانيب مسؤول عنهم اذا اللي بالسرا هطق

اخلص شغلي وامشي

فيه مثل اعجبني

يقول :: اذا جعلت شخصيتك دوده تزحف على الارض فلا تلم من يدوسك بقدمه ::

انتهى كلام ايمرسون ( وجه مايدري منهو )

يعني لازم يكون عندك جرأه انك تدافع عن حقك وماتكون جبان

وانه يجي واحد قدامي في السرا ويشطفني كأني مزهريه

هذا كلام محد يرضاه

يعني لك لسان تقول له وينك رايح يالحبيب

ارجع وامسك سرا الله لايهينك والحق بيكون معك طبعا

غير كذا فيه شغله متكرره على طول

وهي شغلة الزحمه عند البنوك ايام الإكتتاب

ماتحصل لا رجال شرطه يفكون الإشتباكات اللي تحصل بين المكتتبين

ولا حراس امن ينظمون الجمهور الغفير اللي يبي يكتتب

المكتتبين فوق بعض

طبعا هذي امور نقول الحكومه ماوفرتها

طيب انت يالمكتتب ليه ماتصف مثل الناس وتنتظر دورك الين يجيك وتخلصون كلكم

انا خابر السرااا يكون بشكل طووولي

الحين السرا صار بشكل دائري كلهم متجمعين عند باب البنك

ولا خلصوا بسرعه وسببوا فوضى غير طبيعيه

صراحه اغلب المجتمع السعودي فيه روح الهمجيه والدفاشه

لوووويس بالحضن ياراقل

قسمن موضوع رايق وتوووحفه

عيبك تبطي ماتنزل مواضيع والا افكارك وصياغتك خياليه

نوع نشاطك يالكديش تراني خابرك

تملك الكثيررر من الإبداعات بس مدري وشفيك مقل في كتاباتك

يعطيك العافيه حبيب ألبي على هيك موضوع

مع السلامة ,,

وني وني وني وني وني وني