السلام عليكم ورحمة الله وبركاته

الحمد لله والصلاة والسلام على رسول الله نبينا ومعلمنا صلى الله عليه وسلم

مساء الخيرات للجميع ....

سوف أخربط لكم قليلاً فأسمحوا لي وهي تعتبر فضفضة أكثر من طرح موضوع ...

لويس طرجم : مواطن سعودي كأي مواطن في هذه البلاد الطيبة حماها الله من كل شر ...

كان لويس يحب أن يخرج دائماً من البيت يذهب لفلان وفلان ويذهب للتمشية

للترويح عن نفسه كحق من حقوقي وحقوق نفسي علي ...

ويذهب للتقضي من المحلات

ولكن أصبح لويس يحب أن يجلس في البيت فترات طويلة حتى أصبح الخروج من البيت هاجس وشئ مر على قلبه ...

الدنيا زحمة كل ما أراد لويس أن يذهب ليقضي حاجة من حوائجه ومستلزماته بالخارج

لا أدري هل سبب كره الخروج هو الزحمة .. أم الشعب المتخلف

دائماً في خرابيطي لا أعمم وعشان مايزعل الشعب السعودي نقول الشعب العربي المتخلف

هل طرحت على نفسك سؤال ...

كم موقف يمر بك باليوم الواحد ( يدبل تسبدك )

تخرج من بيتك تركب السيارة ... ( ألا ورع يمشي سبعة مليون مار على شارعكم الشرهة ماهوب عليه الشرهة على أبوه اللي مسلّمه السيارة)

تنطلق برعاية الرحمن بشوارعنا الجميلة ..

شوارع تكسيها الزهور بكل مكان ... السواقة جميلة جداً تذهب وترجع وأنت بإمان

بما أن جاء طاري السياقة .... نفصل بعض الأمور أو نذكرها بشكل نقاط ..

1- أتمنى وضع لوحة بكل شارع ( كل مطرود ملحوق او كل ملحوق مطرود )

السرعة والمساقط عليك وشطف سيارتك بكل وقت ناس لا تعرف من السياقة إلا معناها ...


2- تنبيه للمواطنين : يوجد بالسيارة أختراع يسمى الإشارة الضوئية ..

السيارة يوجد بها مقود ( دريكسون أو سكان أو طارة ) عند الدريسكون أختراع صعب أستخدامه ولكن عود نفسك عصا صغيرة توديها فوق تدق إشارة
يمين تجيبها تحت تدق إشارة يسار تخليها بالوسط توقف

سهل صح أستخدامه ...

يقولون أحد الشيبان يدق إشارة بالبر يوم سألوا عنه لقوه متقاعد من أرامكو

الله يخلي الأمريكان علمونا الذرابة بالسواقة

3 - الله لا يوفق مصانع السيارات يوم حطت المنبه في السيارة وخاصة بالشتاء حدث ولا حرج هدوء وأسمع أنواع الذرابة بس .. شعب متخلف ..

3 - عندما تنزل بأحدى الأماكن وبنت النور تشتري لك حاجة وتخرج ألا الحيوان <<< أقل وصف

مسكر عليك ورايح مدري وش يسوي وقتها وش تسوي تنتظر نص ساعة لين يجي أبو الشباب .. شعب متخلف

4- توقف عند إشارة المرور تنتظر الأشارة تضيء خضراء حدث ولا حرج

تلتف شوي ترجع رأسك قدام شوي تلتف ألا أبو الشباب اللي جنبك مدري يدور فضولي بوجهك

ودك تفتح الدريشة تقول ( يالأخو ماودك تجي تقلط معي بالسيارة )

ودك تحط لوحة عندك للنوعيات هذي أول مايطالع فيك أكثر من دقيقتين ترفعها عشان يشوفها


اللوحة مكتوب عليها ( على ززززز... <<< آخر حرف تراه ماهوب حرف قاف

أو على ذررررررر<<< كذلك آخر حرف ماهوب قاف أو تكتب وش تدور ياطقعان <<< أحس أنها أهون ...)

ماعليه عبارات لا تعتبر كتابتها الخروج من البرستيج لأنها متوفرة بالبيت بشكل يفوق الوصف

وتعتبر أهون من كلمة ( أحبك ) لأنها تقتل البرستيج

ماعلينا نستمر بالخربطة

كل مكان عندنا يبين سخافة أغلبية الشعب ....

جانب آخر

النظام عندنا هل هو معدوم ......

الصراف الآلي : يالهوتي بس حدث ولا حرج ... أنا شخصياً صرت أحب أروح للصراف من بعد 11 بالليل وناسة الجو رايق بجد

ياليت الشركات نتظر بأمر السحب من البيت كما هو حال التحويلات والتسديد

تجي بوقت مبكر تكره نفسك ..

*** شخص تجلس تنتظر دورك شوي ألا جايك كم واحد من النوعية اللي يمر عليكم ويتعداكم ويدخل يالأخو وينك رايح شايفنا مزهريات ... والا شجر مرتزين هنا ..

في أحد المواقف التي حسيت وتمنيت أني لست سعودياً

كنا ننتظر الدور وكان معنا شخص من جنسية أخرى ألا ذاك العريف بالشرطة لابس لبس الدولة تعدانا ودخل قبلنا وحنا نشوف

الحقيقة نظرات الأستغراب ولكن هذا الأجنبي قام يتكلم وبما أني افهم بعض اللغة عرفت أنه يقول ليه مايلتزم بالنظام ... وترجم أحد الأشخاص باقي الكلام

يقول رجل أمن ويقوم بهذا الفعل ويتخطى النظام جد عيب ..

جانب آخر مظلم من الصرافات .... يدخل بعض النوعيات يقعد نص ساعة داخل

مدري وش يسوي تحس أنه يطق قيم بلاي ستيشن ...

أحد المواقف أمامي شخص الحقيقة تأخر داخل أنا وراي أشغال ماعندي إجازة

أمومة أنتظرك ... تدخلت قلت أخوي أقدر أساعدك قال مو راضية تعطيني فوس

بغيت أقول قدمت معروض ؟؟ يوم شيكت وياه ألا الرصيد لا يكفي للسحب

قلت ياخوي ماعندك رصيد قال ياخوي فلان بن فلان محول لي فلوس ليه ماوصلت حسيت بيجيني طراق ... تبي سلف طال عمرك حاضرين بس لا تطقني ..

من قلّة الأدب بالصرافات .... تدخل تضع البطاقة وبتضغط الرقم السري ألا تحس بظل جنب خشتك يتحرك تلتف ألا واحد قاط معك بالشاشة لا حول ولا قوة إلا بالله وش تبي

شئ مؤلم مضحك ........

غير الحركة الجديدة أول ماتدخل الصراف الا عشرة مادين عليك فواتيرهم يقولون سدد لنا ونعطيك كاش ...

شدعوة ياشباب مكتوب على جبهتي مندوب شركة الأتصالات تصدقون لو تسدد وتأخذ فوائد تربح

الحقيقة الوقت يداهمني وهذه قطرة من بحر سخافة المواطنين المتخلفين عندنا

النقاط كثيرة .. لا أريد الزيادة فيها

ومن أراد أن يطفي حرته الموضوع ملك له يذكر لنا ماشاء دابلة تسبده

وأرفع رأسك أنت سعودي

أتركم برعاية الرحمن أخوكم لويس طرجم