يا معذبتني ليه ؟؟ هذا الجفا ليه ؟؟ = وأنتي تضمين الثرا من ظلالي
وش ذا الغرور الله يحمد تواليه = ومن وين جالك هالكبر والتعالي
تعالي أنتي دام كل(ن) وماضيه = هالحب .. ماهو بس حقي لحالي
لا تذبحيني بالعتب والمشاريه = والله ما بيدي سوا راس مالي
معزتك .. وأيض القصيد ومآسيه = والضيف لا جا .. والحطب .. والدلالي
وعن حلفي ياللي قلت ، طير(ن) يعشيه = كفه ليا بردت عليه الليالي
يعني ثلاث أشياء أملك من التيه = لساني .. وقلبي .. وطنخة عقالي
أدعيك في كل إسم(ن) يسمونك إيهيه = يأم الحسن وأم الترف والدلالي
عودي لقلب(ن) صار ماعاد يمديه = يرقع اللي راح ... ياهملالي
وإذا إن قلبك وده إني أنا أدعيه = بسلوب(ن) أفضل يرتقي للمعالي
ممكن أحاول آتحضر وأناديه = وأقول له .. إذا تحسن مقالي
يا جمرة الوجد المسمى وطاريه = ويا عقد بأحجار البحر واللآلي
إليا ظهر بدرك مع الليل .. أسريه = وإليا إختفى ماعاد صبحي مثالي
آساور الشك الطبيعي وأناجيه = وأرقى على نجوم الغلا في خيالي
آفارقك في ليه ... وألقاك في ليه = وأحيان أحسك منت داخل مجالي
أحيان أحسك شي .. وأثري مطاويه = وآقاسمك وألقى حلالك حلالي
أقتل خيالك .. وآتحسف .. وأبكيه = وأرثيك .. وأثرك من عيوني قبالي
وأزعل .. وأخونك .. وأذبح القلب .. وأسقيه = وأزعل على نفسي وأدور بدالي
متضارب(ن) بين الغلا والمتاييه = متضايق .. أحس الزمن ما صفالي
وإذا تركتيني أقول اللي أبغيه = با قول لك إنك سبايب هبالي
خلي فؤادك لا يكثر تغليه = يسرع يجيني قبل أشد الرحالي
الخاطر اللي ما توسع مثاليه = ماهوب متحمل على كل حالي
لا تحسبيني من عروقي أغذيه = طبعي جنوبي .. لو غدا أصلي شمالي
طرح الكريم .. اللي وساع(ن) مذاريه = ما ينتهض إلا يشيل الثقالي
من عرض عصمان الشوارب تواليه = اللي ليا غارت .. تدك الجبالي
وأنا .. من فروخ الصناديد يا هيه = عمام .. ولا لنجذبت لخوالي
أبسط نداءاتي لا قالو البيه = ومن أصغر ألقابي .. طويل السبالي
مغرور .. فعل(ن) وأعترفلك ومافيه = عيب إني أفخر وأإفتخر في فآلي
لو قلتلك ياهيه .. ردي بلبيه = ولو طال بالك .. شرط بيطول بالي
كذا نحل المشكله والمشاريه = واضمنلك إنك تراضين الزلالي