السلام عليكم ورحمة الله وبركاته


صباح الخير والاحساس ..

للزكرتيه .. يا كل الناس ..


تسيف الحال .. والأحوال .. ؟؟


سمعت ان الأجواء لطيفه تقريبا على جميع أنحاء المملكه

الله يديمها إن شاء الله .. أمطار خير وبركه ..


نبدأ بالموضوع

تكلم الشعار والكتاب عن الغنج

او الدلع بلغتنا العاميه ..

وتغنى المغنين عن الدلوعات


دلوعتي .. كل الحلا فيها ..

دلوعتي .. ماني معلم باسمها

مدام حلوه يا قلبي .. دلوعه لازم تصير ..

ادلع يا كايدهم .. << وهذي كرهتها بعد ما شفت عروس منزفه على كلماتها

مدري اشلون عروس .. وتمشي بزفتها على انغام .. يا كايدهم ..

يعني بالله بتعزم الناس عشان تكيدهم بعرسها !

لكن صدق من قال ( أهل العقول في راحه ) !!



نرجع لمحور الموضوع .. ألا وهو الدلع ..

هالموضوع كان في بالي من زمان .. ونسيته

ولا ذكرته الين شفته بمجله قبل يومين ..

كاتبين موضوع عن تقليد بناتنا لـ دلع الفنانات


و طرا الموضوع في بالي أساسا ..

إن أختي دخلت مدرسه جديدة ومرحله جديدة

يعني زميلات جدد .. وأول مره تشوفهم ..

البنات طبعا أشكال وألوان ومن مختلف القبائل و الجنسيات ..

وبما انها مرحلة ثانوية .. وجايين البنات من أكثر من متوسطة

وبعد اسبوعين من بداية الدراسة .. جات تقول لي عن بنت معها بالفصل

البنات يسمونها .. الدلوعه .. وتقول أختي إنها بأول يوم وبأول اسبوع

كانت تظن ان البنت تمزح معها .. لأنها شوي غريبه

ومخفوفه .. على قولتها .. لأنها تطامر بمشيتها

وتحط واحد من اصابيعها بفمها اذا انتهت من كلامها

وترخي راسها مسويه فيها مستحيه ..والعيون ترامش

وخجلانه من صديقاتها اللي تعرفهم من تسع سنوات

هذا غير الدموع .. كل ما كلمتها أي ابله ..

قامت تردد في عبرتها .. يقالها تبي تبكي


لكن بصراحه ..

موب بس اختي استغربت من تصرفات هالبنت

لأنه حتى انا استنكرت حركاتها ..

وحاولت اني استنتج ليش يسمونها الدلوعه

وما قدرت .. لأن حركاتها وتصرفاتها ..

ما لها أي علاقه بالدلع .. وإن كانت

هي تشوف انها بكذا تصير دلوعه ..

فـ الله يعين صاحباتها عليها ..



خلونا بالأول نتفق بأن الدلع لايق وبالدرجة الأولى للبنات

وان الأولاد المدلعين ما لـ دلعهم أي سنع بالحياة

ولا نقدر نقول غير .. الله يهديهم وإيانا ..


دلع البنات الطبيعي .. والتدلع ..

نادرا ما نلقى بنت ما تكون مدلعه بطريقه أو بأخرى

ويمكن دايم أول بنت وآخر العنقود يكون لهن الحظ الأوفر من الدلع

و من دلع الأب بالذات


وفيه دلع حلو .. وغنج أحلى

وفيه بعد دلع ما ينبلع ..

دلع يصل لدرجة الميوعه والمصاله الغير مهضومه

ناخذ كـ مثال .. العجوزه .. هيفاء وهبي ..

كل حركاتها مصطنعه .. ودلعها من النوع المرفوض من قبل كثير من الناس

وبالذات حركة الأصباع اللي تحطه بفمها كل شوي

وكأنها طفله .. هذا غير حركات الكتوف .. ونظرات العيون

بصراحه باين ان كل شي تسويه .. من باب تصنـّع الدلع

وما ننسى بعد .. " ابي أمي .. ابي أبوي .. ابي زوجي "


صاروا كل البنات هالحين يقلدونهن تقليد أعمى ..

وما نبي نفتح مجال للكلام عن التقليد الأعمى وسلبياته

لأنه ممكن يكون بموضوع مستقل ونبحر في أعماقه ..


نرجع للفنانات والمذيعات .. ودلعهن ..

بعضهن مدلعات بالفطرة ولايق دلعهن

وبعضهن من اللي يصطنعون الدلع ..

وموب أي دلع لأنها تصطنع الدلع المتكلف

اللي ما يكون لايق عليها ولا على طبيعة شكلها

أو عمرها أو طبيعة المكان اللي هي فيه ..

و مدى مناسبة الحالة للدلع .. والناس اللي معها


والمفروض على بناتنا ما يقلدونهن ابد ..

وأنا اشوف ان دلع البنات ما يكون مع كل الناس

يعني لازم تفرق بـ الحالات ..

مثلا ..

أنا لما اتدلع على ابوي وأخواني ..

موب مثل لما ابي اتدلع على زوجي

ولما اتدلع على أمي وأختي ..

موب مثل لما اتدلع على صديقاتي ..


واتخيل اني لو بجي اكلم وحده من صديقاتي

و اسمجها معها مثل ما اسوي مع اختي ..

اكيد بتنتقدني .. وبتشره علي ..


ولو جيت لواحد من اخواني .. وتغنجت بالكلام معه

أكيد ما بيسكتني إلا الكف .. اللي يكسر ضريساتي


ودايم كنت اسمع أبوي ( الله لا يحرمني صوته ) يقول

انه ما يحب البنت الغنوج ..

وهو كان يقصد البنات اللي يشوفهم

يتمخطرون بمشيتهن عند المدرسه ..

والبنات اللي يتقصدون ينعمون اصواتهن

بالتلفون وبغير التلفون ..


وبالنهاية ..

احب أختم الموضوع بكم سؤال

حتى تتفضلون علي بالمشاركة



1-ما هو الفرق بين الدلع والغنج برأيكم ؟

2-هل هناك علاقة بين الدلع والخجل ؟

3-هل هناك ارتباط بين الدلع والنعومة ؟ يعني هل البنت الناعمه شرط تكون مدلعه ؟ أو العكس ؟

4-هل يستحب أن يكون للدلع أوقات معينه ؟









تقبلوا مني ..



أطـــيـــبـــ تـــحـــيـــة ..