الـزكـرتيه - عرض مشاركة واحدة

**سلف خمسة** · 04-04-2006, 02:23 PM

سلام ..!

ابو جنحان شلونك

هلا بالطيب الغالي

عزيز وشوفتك منوه

اغنيه مغبّره ومعبّره

نخوووش في الموضوع دوغري

مدري شلون يستمتعون بالألعاب في المنتديات الثانيه

بطيخه والشمس والقمر وغيرها من السماجه

وكله يهون الا سالفة ادخل صديقك السجن

مشكله والله تجلس في السجن الين يجبون لك كفاله >> شب

خلني عاد ابوح لك بالسر

بداياتي من زمان قد طحت في هالمنتديات

والله يافقعوا وجهي بالبطيخ الين قلت بس

غشيم منتديات وانبسطوا علي

كل يوم شاقين وجهي بـ بطيخه

الين جا ذاك اليوم وجا دوري قلت برمي البطيخه على المراقب العام

يعنني امون

قالوا المشرف العام ماتقدر ترمي عليه البطيخه لأن وجهه بطيخه اساسا

دور غيره

حسيت اني مضطهد ولاعندهم حرية التعبير وجيت الزكرتيه

فـ هل من مرحب ؟؟

الزبده ان سالفتك سامجه وانا سالفتي اسمج منها

ياويني معلق على سالفة البطيخ ياناه

اقتباس:

بس اني كنت اطخخخخخخخم ومحد قدي .. الشعر متسلسب على الاكتاف

يا والله اللي تخسي

تلعب علينا يالعبد

يعني ماشفتك ذاك اليوم متلمع ومتنمص في السويكت

ومروا عليك البنات وحذفوا عليك عصير يحسبونك درام

وانت تبتسم يعننك شبكتهم

اني والله داري ان اقصى طموحك في الحياه تبتسم لك بنت

لاااااا ويكفيك بعد تشوف عيونها منضغطه من ورا البرقع

وتوهم نفسك انها تضحك لك

مع العلم انها يمكن تكون عافسه وجهها من الشوفه المنكريه اللي قدامها

تدري وش احسن مافيك

ان ملامح وجهك هذي هي ماتغير

مايبين عليك الإحراج ولا الحزن

الا الضحك يبين عليك لان الضروس تقوم تبرق وتلمع

تحس اني جرحتك بالحقيقه

معليش ( وجه يطبطب عليك )

ورح للماسنجر واخذ الرمز ذا (f)

اقتباس:

وكنت كاشخ بالشنطه اللي فيها مقلمه مافيها الا قلم رصاص ومحاية

خخخخخخخخخخخخخ ذكرتني بما قد مضى

يوم شرالي ابوي شنطه حالي حال اخواني اللي يدرسون

دفتر ابو اربعين

قلم رصاص ابو نص اللي مساحته فوقه

برايه ام مرايه

وكل صباح لازم اسنتر عند الباب ولاحظ اني اوقف وانا معلق الشنطه

الين تجي الساعه 8 وتختفي الباصات والعالم كلها في المدارس

ارجع عند امي وابكي

لاتلوموني من يومني صغير وانا مشغوف بالمدرسه

والمشكله اول ابتدائي ساقط في مادتين

على طاري الدراسه والطفوله

خلني اعلمك سالفة الحمامه

هماني ابكي وابي اروح للمدرسه

شروا لي حمامه وحده اقزر عليها وتنسيني المدرسه شوي

المهم اني حبيتها

ومن اول يوم وانا جايب قدر كبير ومليته مااا

واجيب فوطه صغيره واحط الحمامه في القدر واسبّحهااا

والحمامه ترفرف بالجنحان تبي الطقيق

وانا كاتم بلفها وغصبن عنها بتسبح

ويوم خلصنا من الشااور السريع

نشفتها بالفوطه ورحت حطيتها في الدولاب خايف يلفحها الهواا وتمرض

الزبده اني نسيتها الين العصر

ويوم فتحت الدولاب العصريّه ابي العب معها لقيتها مفنقشه

السالفه واقعيه >> ابكيك

اقتباس:

وفيها سندويشة جبنة ملفوفه في قرطاس خبز

رح شف موضوع الزيزفون اللي في المقلط

وتدري ان اهلنا مجحفين بحقنا

جبن وبيض

تحس مافيه في الدنيا الا بيض وجبن

كنت اتمنى تفاجئني وتحط لي في الشنطه تفاحه

الا مره حطت لي زعتر يقال لها بتفاجئني وتكسر الروتين

والمشكله اني ماحب الزعتر ولاتفسحت ذاك اليوم

اقتباس:

راح يكون متأكد اننا عرفنا مقاس ونوع الهاف اللي لابسه

خخخخخخخخخخخخخخخخخخخ منحرف يابو جنحان

اقتباس:

وكانت مولعه بالموسيقى ( طقاقه) ..
وعندها بنت اسمها تهاني

مطلقه

مطلقه وطيران واغاني واسم بنتها تهاني

الظاهر مراهقتك في الثقبه

وعساك ماكنت السبب في تهاني بس

خابرك منحرف وتحب السامري والشغلات ذي

اكيد خرتها على احد مقطوعات موضي الشمراني وارتكبت الجريمه

بعدين ترى الأغنيه حمام جانا مسيّر يابو لحج

اقتباس:

قبل امس وانا راقد جاني حلم ملعون خيّر ..
تحلمت اني في بلد السكان كولهم يرددون نفس الكلام اللي تقوله ...
المهم وصلت عند واحد اقوله السلام عليكم وهو يردد السلام عليكم السلام عليكم السلام عليكم
طبعن يرددها وهو يضحك ..
قفلت الخلاقي قلت له ياخي رد السلام ياورع .. هو ,, رد السلام ياورع رد السلام ياورع رد السلام ياورع ..
قلت خلني اروح عند واحد ثاني الظاهر انه مجنون ... لقيت لي حرمه ..
قلت لها لو سمحتي يا اختي .. قامت هي بعد تضحك وتردد لو سمحتي يا اختي لو سمحتي يا اختي لو سمحتي يا اختي ..

مادريت الا اخوي صافقني كف يقولي وشفيك انهبلت .. قمت انا اضحك واردد اشفيك انهبلت اشفيك انهبلت اشفيك انهبلت ..

ههه

عمري ياتمايمك

اقتباس:

قبل فترة صاير علي حادث

الحمدلله على السلامة يالحبيب

يلعن خيرك انا دعمت في شجره عند بيتنا وتنومت ثلاثه ايام

وانت داعم اربع عمدان وشبك وماصار لك شي

عظيماتك صاحيه

ابو جنحان وقسمن انك رهيب ( اصبع الإبهام مرتكز )

موضوع خفّاافي وماشي حاله

تدري وشو اللي يعجبني فيك يالخمام

انك تضغط على انشاء موضوع وبعدها تفكر وش تكتب

يالبى قلبك

ياجماعه عندكم ذالجلمبوو ستل جناحه

يخربط ويطلع معه اشياء رايقه

كل واحد يجرب يخربط في مستند نص ويشوف وش يطلع معه

واذا زانت الامور يحطه موضوع بالسواق

ترى مو اجباري تكتب موضوع ملعون والدين

نبي موضوع خفيف ومجكنم ويعتبر بدايه حلوه في السواق

وبعدها اذا تعودت على الكتابه الساخره بيطلع معك مواضيع خياليه

>> شغّال نصايح هاليومين

ابو جنحان تعال خلني اخمك يابعد اهل الباحه كلهم

موضوع انتكيه وسقها لاتدمن

مع السلامة ,,

وني وني وني وني وني وني