وعليكم السلام ورحمة الله وبركاته


هلا المستشار ..


كلنا بخير ولله الحمد

أعجبني أسلوب طرحك للموضوع

وتقسيمك للعلاقات .. لتوضيح المعنى المقصود


يوم شفت الموضوع .. كنت مع صديقاتي ..

فقلت لهم : به موضوع عن الميانه ببيت الزكرتيه ..

استغربوا من كلمة ميانة وما عرفوا معناها

وكنت ابي اوضح لهم المعنى .. واللي صار اني توّهتهم

قلت : لما اقول لتس يا فلانه أنا ما أمون ؟.. وش اقصد بكلمة أمون ؟

ردت وحده : أمـّون دلع اسم آمنه .. !

بغيت اشد شعري من قلة الحيلة

وبالأخير .. عرفت معناها وحده منهن .. وشرحتها للباقيات باسلوبها


اعتذر على المداخلة .. >> اتمنى ما تكون غثيثة

اقتباس:

المشاركة الأصلية كتبت بواسطة المستشار 4- العلاقة بين الأخت وأختها : ربما لدى العضوات توضيح اكثر لماهية العلاقات بين الأخوات وإن كنت أعتقد انها لاتختلف إلى حد كبير عن العلاقات بين الأخوة .

أنا معك أخوي المستشار .. يمكن علاقة الأخوات ما تختلف كثير عن وصفك للعلاقة بين الأخوة

ولكن أعتقد بأن الأخوات يكون بينهن تحفظ أكثر من الأخوان ببعض

ولا أعلم السبب . . . !

اقتباس:

المشاركة الأصلية كتبت بواسطة المستشار ثانياَ : العلاقة بين الأصدقاء : عندما ننظر للعلاقات بين الأصدقاء نجد انها لاتخلو من الميانه المتناهية ولكن قد تتعدى الحدود المفترضة فتتجاز هالمرحلة التجريح الشخصي , وأيضا تعريض البعض لمواقف محرجة والحجة الدائمة ( الميانه )

صديقتي .. تحرجني أمام الملأ .. وتقول أنا امزح

هي تعرف انها تمون وتعرف اني احب المزح

لكن الظاهر ما تعرف ان لكل مكان مقال

وإن الاحترام مطلبي الأول ..!



الخطأ يكون في تحديد مفهوم الميانة مثل ما قال ماشي الحال

يعني تخطي الحدود للوصول لمرحلة التجريح

كل إنسان لازم يوضح للناس الحدود اللي يوقفون عندها في تعاملهم معه

طبعا الأصدقاء يختلفون من شخص لآخر

يعني أنا صديقاتي ثمانية أو تسعة تقريبا >> ما شاء الله

لكن ثنتين بس اللي اعتبرهن من المقربات ..

لهم خاطر عندي غير الباقين .. ويمونون علي أكيد


يمكن تكون ميانة متناهية ..

ولكن المفروض انها تتقيـّد بشروط

وهذي غلطة نرتكبها دايم بعلاقاتنا

وهي عدم توضيح الخطوط الحمراء اللي لازم الصديق يوقف عندها



تجرحني مرة ومرة باسم الميانة **** واقول باكر خير وارتاح بعدين

واللي يسلمك كافي ذل وإهانة *** تضحك على قلبي وأنا اقول مسكين

اقتباس:

المشاركة الأصلية كتبت بواسطة المستشار 1- هل الميانه هي الشفافيه في العلاقات ؟

ايه .. أكيد هي الشفافية في العلاقات ..

يعني الانسان يتكلم ويتصرف بأريحية تامة

ولكن حبذا لو كانت مغلفة بغلاف الاحترام

اقتباس:

المشاركة الأصلية كتبت بواسطة المستشار 2- هل من الضروري أن تكون علاقاتنا ذات ميانه ؟ أم انها تعتمد على نوعية هذه العلاقات ؟

ايه .. لازم تكون علاقاتنا ذات ميانة ..

أنا ما احب اكون رسمية ومتحفظة للآخر ..

احب اتصرف بأريحية مع الناس

ولكن بنفس الوقت هذا يعتمد على نوعية العلاقة

اقتباس:

المشاركة الأصلية كتبت بواسطة المستشار 3 - ماهي المعايير التي على ضوئها نحدد مسار العلاقة لتغليفها إما بالتحفظ او بالميانة ؟

الثقة

الاحترام

الحب


هذي أهمها .. واللي هالحين يحضرني

اقتباس:

المشاركة الأصلية كتبت بواسطة المستشار 4- لو صادفك شخص حاول ( يقط الميانه ) وانت لا تستسغيه فهل ترفض هذه الميانه صراحة أو تجاريه وتتحمل تبعات تصرفك ؟

أرفضها .. إذا كان ما به أحد معنا ..

لأني ما نيب ملزمة اتحمل أي انسان وأنا ما استسيغه



أجاريه و أجامله في حال كنا بمجتمع و قدام الناس

والله يكون بعوني اتحمله ..

واتحمل اللي بيجيني من ورا هالمجاملات والمجاراة .. !


هذا ما لدي ..

ولا عاد تطول علينا يا مستشارنا






تحياتي ..

ريــانـــــــــــة الــعــــــــــووود