سألتها قبل انتفارق على خير=وينتهي لليل الفرح والسعاده
هو يلحق العاشق ملامه وتقصير=لمات حبه في بدايه مهاده
قالت سؤالك مايبي له تفاسير=العلم واضح مايبي له شهاده
اسلوب ظالم والحكم صار تعزير=في قلب من حبك وخلى عناده
قلت اسمعي باسوق كل المعاذير=بعطيك عذري دون نقص وزياده
انا غريب ودون حدك محاذير=والمغترب دايم قليل اعتماده
(في غربتي طالت علي المشاوير)=والنفس مطعونه بضعف الاراده
قالت معك باروح من دون تفكير=ما دام قلبي صرت غايه مراده
اهوّن علي قولٍ يجي فيه تشهير=من جور فرقا من ملكني وداده
قلت ارجعي ربعك قروم ومناعير=واصغر ولد فيهم بيقدح زناده
ماني بخايف لكن المسأله غير=وش لي بحبٍ فيه ذم ونقاده
وانا من اللي يرهبون الطوابير=ما همهم قرب العدو وابتعاده
ردّت بصوتٍ مثل صوت المعاصير=صوتٍ يروّع فيه حزم وجلاده
قالت لي اسمع ما ابي اي تبرير=بعطيل علمٍ فيه كل الافاده
لو امي الخنسا وابي سالم الزير= بهواك واحبك يالين الاباده