اس اس السلام عليكم
<<<<<<<<<< متحمس منذ مبطي ماكتب موضوع
دايم نسمع من اخواننا طلاب الجامعات اسطوانه يرددونها كل يوم الا وهي
(الدكتور ....... حاقد علي ويبي يسقطني )
المشكلة ان اغلبية الطلاب يقولون نفس هذه الجملة وكأنهم نوابغ في اقسامهم
وهو دايم غايب عن المحاضرات واذا حضر ماينتبه للمحاضرة بس شاطر في العاب اللي في الجوال والا في البلوتوث قاعد يرسل لخوياه في القاعة
واذا طلعت النتايج الا هو راسب في المادة
المشكلة انه يطلع زعلان مو على نفسة الا على الدكتور ويقعد يردد نفس الموال (الدكتور ....... حاقد علي ويبي يسقطني )
طبعاً ماقول كل الطلاب انا اقول الاغلبية
مع ان في طلاب اذا رسبو يعترفون بأن التقصير منهم مو من غيرهم
انا ودي اقول لخوي الطالب
اقعد مع نفسك شوي واحسب كم غياب غبته في المحاضرة وكم واجب حليته
والبحوث اللي يطلبها الدكتور هل انت اللي تسويها بنفسك ؟ وهل انت تذاكر اول بأول ؟
واذا جت الاختبارات هل انت مخلص في المذاكرة؟
نلاحظ ياخوان ان الطالب اذا جا يذاكر ماعنده اخلاص للمادة
تشوفه يذاكرها من دون نفس
صدقني ماراح تفهم شي ياشيخ اقص يدي اذا حليت شي في الامتحان <<<<<< تحمس
والله صحيح اصلاً وشلون يكون لك نفس تذاكر وانت على هالحاله
ماتقدر تحفظ ولا تقدر تفهم
وتسحب سيفون على بعض المواضيع وتقول مو مهم ماراح يجي في الاختبار
وش دراك , انت تعلم الغيب؟
وتشوفه يذاكر نص المنهج ويقول والله ذاكرت والباقي على ربك
والله ماراح تنجح وانت على هالحاله هذي
وفي وقت الاختبار تشوفه يفحط على مسألة يبي يحلها مايقدر
وتشوفه اذا طلع من الاختبار يقول ( الله يلعن ام الدكتور ....... عطانا اسئلة ملعونة والدين )
ياشباب لازم ننتبة لأنفسنا
ولازم تلوم نفسك قبل ماتحط اللوم على غيرك
والدكتور والله مافكر فيك
ياخي اذا على قولتك الدكتور حاقد عليك اسئل نفسك ليش
اما انك ماتحترمه او انت اذكى منه
ياخوان انا ماكتبت هذا الموضوع الا من شي جربته
والمثل يقول اسئل مجرب ولا تسئل طبيب
انا كنت اقول ان الدكتور حاقد علي
لكن بعد مأنتبهت لنفسي لقيت ان انا اللي غلطان مو الدكتور
واذا ذاكرت اخلص للمذاكرة حتى لو اني مأحبها
اغصب نفسي على حب المادة علشان افهمها
والحمدالله طلعت النتيجة ايجابية
تدورن وش سويت
اقولكم
1:احل الواجبات
2:اقدم البحث في الموعد المحدد
3:احضر المحاضرة وماغيب الا اذا كان عندي شي اهم من المحاضرة
4:اجي الدكتور في مكتبة واحشره اسئلة في المادة حتى لو كانت تافهه بس علشان ياخذ عني فكرة حسنه
صدقني اذا اخذ الدكتور عنك فكرة حسنة والله انه راح يساعدك بعدين وتلقاه دايم في صفك
اتمنى انكم تتقبلون موضوعي بصدر رحب
ومأبيكم تزعلون من كلامي لأني ماكتبته الا لشي واحد وهو مصلحتكم و مثلكم عارفين الامتحانات على الابواب
وعسى الله يوفقنا ويوفقكم
اخوكم
عموشفرة