الجزء الثالث
قال:نبيك تساعدنا وتريحنا من عصابة (القوس الخضر) مجرمين يجون ويسرقونا ولا أحد يقدر يفتح أفمه
قلت له : كم عددهم
قال:يجيلهم 71 واحــــد تقريباً
قلت له : خير أن شاء الله اتركوا لي فرصه افكر الليله بكر اردلكم طلعت من عندهم ورحت على طول لفراشي
قلت : أجل توهقت ثاني مره ههههههههههه
قال: ايوالله اني توهقت 71 شخص يالعن ام الحاله مذبوح مذبوح مايبيلها اقول الله يرحم الاسد عند هالمصيبه
قلت: وش سويت ماحطيت رجلك وارتحت منهم هههههه
قال: انا صدق خواف والعمر واحد بس ماني دجاجه مثلك
قلت: الله واكبر يومك شخيت على روحك وانت فوق الاسد وش تكون هذي يالشخاخ ههههه
قال: لو انت مكاني كان دلقمته بسروالك (بمعنى جدعته بسروالك)
قلت:المهم كمل سالفتك(قلتها بزعل كني مغصوب اسمعها فشلني الله يفشله)
قال: ليه انا اشتغل عند ابوك او على كفالتك يومنك تزابد علي ماني مكمل (صراحه انا متحمس ودي اسمع بقية السالفه وش اسوى بس مابي اذل نفسي واترجاه )
قلت : اكيد حطيت رجلك عوايدك كذا (احاول انرفزه علان يكمل كلامه)
قال: انا احط رجلي وافرك لالالا مااسويها.
قلت : طيب وش سويت اذا كنت صادق
قال: يوم جاء الصبح الا عيوني حمر كنهن جمرتين من قل النوم تصدق أنه اسرع صبح مر علي بحياتي بثواني انتهاء الليل رحت يم الرجال لقيتهم متجمعين وسلامت عليهم وجلست وكان الجو بارد يصبون لي فنجال القهوه يديني ترجف كود امسك الفنجال بكل اليدين ويتناثر ومن كثر ماترجف يدي بالفنجال زرقن (جحدني) اللي يصب يحسبني اقول بس من هزهزت يدي اما كاسة الشاهي بثواني هي منتهيه من رجف اليدين تصدق عاد
قلت : اصدق وشو
قال :اللي يصب الشاهي اذا اعطيته الكاسة يجلس يراعيله (يناظر)من تحت ويتفقده يحسبها منشقه لانه بثواني وهي منتهية انواع رجف اليدين
قلت : برد الى هالدرجه اعوذ بالله
قال :برد بعينك يابزر ارجف من الخرعه هذولاء 71 شخص وانا لحالي وش اسوي
قلت : لسانك انت متبري منك اعوذ بالله
قال: أعوذ بالله منك انت لااله الاالله رفعت ضغطي الله يرفع ضغط الشيطان(يطالعني وكانه يقصدني )
تنهد وكمل كلامه جلست افكر وانا بوسطهم قلت في نفسي فاما حياةً تسر الصديق او معيار طول العمر
قلت :وش اخترت وش رسيت عليه
قال: الموت ولامعيار طول العمر
قت :كفوووووووا يالذيب (اتفخ رأسه ويتعدل ويكمل كلامه)
قال: وانا اطلب منهم اسرع حصان عندهم
قالوا: بسيطه نعطيك احسن حصان حق شيخنا الله يرحمه وسيفه المشرط وش غيره تبي
قلت لهم: الحصان اصيل وسريع وتكانه هذا شرطي
قالوا : تيربوا يسابق الجن ويسبقهم بس متى ودك تطلع لهم ياشيخ خالد
قلت لهم :اذا جهزتم الفرس
قالوا : ابشر الحين نجهزه لك
قلت له: وبعد ماجهزوا الحصان لك
قال: قلت لهم ركبوني الحصان وركبته واربطوني على الحصان تربيط
قالوا :ليه ياشيخ خالد تبي نربطك انت فارس عسى ماانت خايف تطيح
قلت لهم : تعقبون انا فارس ماطيح من الفرس بس علشان الكر والفر عددهم 71 مو 7 ابيكم تربطون رجليني على الفرس زين ويدنني تخلونهن علشان استخدم السيف على راحتي واذا تبون اربطوا يديني بعد انا فارس ولد فارس
قالوا: اسفين ياشيخ خالد ماقصدنا بس طريقة جديده مايفكر فيها الا اذكى فارس بالوجود
قلت له : ربطوك بالفرس
قال : اول شي حصان اسمه مو فرس ياغبي فيه فرق وكمل كلامه يوم انهم ربطوني قلت له : وجهوني يم ديرتهم وفروا الحصان ومسطه واحد من عند مقفاه الا انا بين السماء والارض من سرعة الحصان هو يركض حاط رجله من المسطه وانا شوشتي (شعره) طاير من الهواء لو يشوفني جني شخ على روحه من الخرعه وانا فوق الحصان جلست ادقق (اشوف) الا فيه جيش مقبلين علي
قلت له: جيش وش جيشه
قال: ياغبي طلعوا عصابة القوس الخضر اثرهم توهم يتحركون يبون يغزون هالمساكين وحصاني يمشي مليون متجهه يمهم
قلت: وانا متحمس وش وسويت
قال: احاول اتفلت ماقدرت وصرت اردد جاك الموت ياتارك الصلاة بعلا صوتي من الربشه وجيش القوس الخضر مايدري وش هاللي جايهم يمشي مليون وبايعها متجه يمهم وانا وسط الربشه مافتتحت اعيوني الا قدامي طلحه كبيره ويابسه
قلت :اكيد شمعتبه هههههههههه
قال: جعله يشمَع فيك راعي التريله اللي محمل تبن اصبر ولاتستعجل (سكتت من الحماس )وكمل كلامه وقال:جتني فكره اني اتعلق بالطلحه اليابسه والحصان مقلع علشان انفلت من الحبال اللي رابطيني فيها
قلت : وبعدين
قال: كل تبن ولاتقاطعني (هزيت راسي من الحماس كني ماسمعت شي) وكمل كلامه وقال: وكل مالي اقرب من الطلحة وجيش القوس الخضر وانا اردد جاك الموت ياتارك الصلاه حسيت انهم صابهم الخوف شوي وانا طاح قلبي بين رجليني يوم قربت من الطلحة وارفع يديني وتمسك بالغصن وحصاني على سرعته الا والطلحه شايلها معي بغيت اصيح من القهر وحصاني يركض وانا شايل الطلحه يوم شافوني قربت لهم وشايل الطلحه اللي مايشيلها الا ثمان رجال رموا اسلحتهم من الخرعه وقالوا اللي شال الطلحه لحاله مو عجزان عنا واستسلموا قلت لهم :قدامي يالصوص بعد ماخليت كل وحد يربط الثاني ورحت بهم يم القبيله وهم مربوطين
قلت : كفووووا ياشيخ خالد وبعدين
قال : رجعت واستقبلوني اللي يحب رأسي واللي يدعيلي طاروبي من الفرحه
قلت: وصرت شيخهم يالذيب
قال:صراحه حسيت اني مااستحق اكون شيخهم و.......
(قاطعنا شخص وقاله قوم كالد يالله دواء بادين نوم)
قال لي : أستاذن جاء موعد الابره وعلاجي مع السلامه
قلت له :فمأن الله وفرصه سعيده ياخالد
قال: طس اقول
قلت : مالك خاتمه (جلس يضحك ويضحك لين راح)
" كان هذا اول دوام لي بالصحة النفسية وأول شخص اتعرف عليه من المرضى "
اتمنى من الله أن تكون القصه اعجبتكم