الجزء الثاني :
كمل كلامه وقال: قررت ارحل لقرية مافيها احد يعرفني وارتاح وعلى طول لفيت عزبتي الله واكبر عزبتي فنجال وكاسة شاهي وابريق
قلت:كاسه وابريق شاهي فهمتها بس فنجال بدون دله وش تبيبه
قال : هههههه والله انك عليمي الفنجال علشان السكر ههههه (ماله داعي تبريده الوجه) وكمل كلامه وقال ومن الجهمه وانا طالع من القرية
قاطعته وقلت :معليش ياخالد بس وشي الجهمه (قلت يمكن تكون من العزبه)
قال: لاحول يعني شقت الفضاء يعني طلعة النور يعني ست ونصف الاخمس بالشتاء فهمت(هزيت راسي ) وكمل كلامه من يوم طلعت وانا افكر وين اروح وصرت امشي وامشي وامشي وامشي وامشيوامشي
قلت :وبعدين
قال: تعبت وجلست (جلست اضحك اضحك اضحك الين قال انطم وخلني اكمل )
قلت:طيب وانا اضحك
وكمل كلامه وقال: شبيت النار وصلحت شاهي وجلست افكر وش هالحالة للي انا فيها لو أني ماخذ شي من اللي عرضوا علي كان اغتنيت وانضبط وضعي او اني موافق اصير شيخهم كان وناسه فضربت الفكره برأسي واشتغلت الشياطين وجلسوا يفكرون معي جلست افكر افكر وقررت اني ارسم سهم واكتـــــب

.
.
.
.

v
هذا الشيخ خالد قاهر الفرسان
وحطيت راسي ونمت هنا
ماصحيت الا فوق رأسي ناس يجيلهم اربعطش رجال
قلت : وش يبون
قال: اول ماقروأ الشيخ خالد قاهر الفرسان جلسوا يحبون رأسي ويلزمون علي أني أروح معهم مارديت لهم طلب لأنه مايرد الكريم ألا اللئيم
قلت: بعد مارحت معهم
قال: جلست عندهم وتعشيت لين ماطلع مع خشمي وقمز واحد منهم وقال: ياشيخ خالد حنا طالبين فزعتك ان حليت مشاكلنا تصير شيخنا بعد موت شيخنا ابو تماضر الله يرحمه .
قلت : وش مشكلتكم وحده وحده عطوني الاول ان حليتها وان شاء الله اقدر تعطوني اللي بعدها
قال: الاسد ذبح غنمنا وكرهنا بالديره وهذا المكان الوحيد اللي فيه العشب الطيب
قلت:ابشروا قلتها غصبً علي ماادري وشلون طلعت مني متعود على الفزعه
قلت : اجل توهقت (جلست اضحك).
كنه ماسمعني وكمل كلامه وقال: طلبت منهم اسرع حصان وبارود لاني اذا لحقني الاسد اقدر اراوغه
قلت :وبعدين
قال: سألتهم عن مكان الاسد ودلوني على مكانه وانا اركب الحصان صراحه انا شجاع بس هذا اسد مايمزح بدت ركبي تراعد واحول امسك نفسي قدامهم لانه فشيله توعد ناس لو اموت اهون
قلت: كفوووووا ياخالد رحت وبعدين
قال: ركبت الحصان وانطلقت وقبل مكان الاسد بكيلوا بدت الرجلين تراعد غدا الحصان هزاز (فطست من الضحك ) وكمل كلامه وحسيت اني دايخ لاني مانمت من البارح وانا افكر وقفت عند شجره رقيت الشجره من الذله وجلست قلت انام ساعتين وارجع اقول مالقيته
قلت :صعدت الشجره ونمت
قال: ايه نمت واثاري الاسد جاء عند الشجره وانا بسابع نومه الحصان هالمسكين حط رجله الله يلوم اللي يلومه هذا اسد مو لعبه وتمدد الاسد تحت الشجره شبعان شكله قال اخذ غفوه.
قلت :وانت نايم مادريت .
قال: ماحسيت فيه والا انا ذيب ماتفوتني هذه بس من السهر لعبي ونمت.
قلت: وش سويت
قال: صحيت ورأسي يدور ماشبعت نوم قلت برجع بقول لهم مالقيته بكر ادوره نزلت من الشجره وانا اركب الاسد على أنه احصاني دايخ ماشوف حسيت بشعر يدخل خشمي حصاني طايله شوشته وش السالفه دايخ مادري ماوعيت الا على زئير هالاسد وانا امسك بشوشته ويقوم من مكانه واتشعبط به لاني لو طحت كلاني قلت :عنبوك وش سويت (وانا منشد مع سالفته)
قال : صرت اشد بشوشته كل ما اشد ينجن ويركض زياده وانا متشعبط به لو ياصل زحل ماتركته وصار يركض بكل جهه الين توجهبي يم ديره اللي يبوني شيخهم
قلت : وانت متمسك فيه .
قال: وانت الصادق متشعبط من يوم قربت على أخويانا كان فيه واحد واقف على حدود المضارب يوم شافني راكب الاسد ويقلع يم الربع ويعلمهم ويطلعون كل العالم صرت امر من عندهم وهم يصفقون عيال الكلب وانا بغيت اسويها على نفسي
قلت : يعني سويتها على نفسك (واضحك)
قال: قال لا ماسويتها يابزر الله حق نقَط اشوي (وجلس يضحك)
قلت: شلون افتكيت من الاسد
قال: مثل ماقلتلك صار يمر من عندهم وانا فوقه وكل مااجر شوشته ينهبل وانا يطيح قلبي والعالم تصفق الحريم والبزران اليــــن جاب الله واحدمعه بارود والله ويصوب على الاسد وهو يركض ويرجفه الا صاير من صيد امس
قلت : وانت ارتحت يوم مات
قال: تدري وش سويت
قلت:لا
قال:قمت على طول رحت يم الجماعه بعد مامات الاسد اول ماوصلت لهم قلت منهو ابن الكلب اللي رمى الاسد
قالوا: ليش ابن كلب ياشيخ خالد قلت لهم انا جالس اروضه ترمونه حرام ضاع جهدي يوم بغيت اروضه تذبوحونه وانا اقول بيني وبين نفسي ياالله تدخله الجنه اللي رمى الاسد وادعيله بكل صلاة اعتذرو لي وجلسوا يمدحوني واحتفلوبي طول الليل واخر الليل قمز واحد منهم جعله يقمز عليه جني وقال:باقي ياشيخ خالد طلب ثاني بعد ماذبحت الاسد واثبتت شجاعتك .
قلت: وش طلبكم.