الـزكـرتيه - عرض مشاركة واحدة - يوجد لغم بالداخل >>> والله لجازي راعي الصد بالصد!!

**سلف خمسة** · 11-23-2007, 03:20 PM

سلام ..!

مايكبرني لقب شلونتس

وين اللغم خلني انط عليه واتقطع حته حته فداء للمواضيع المميزه

دوغري كذا وبدون لفلفه

الأمثله اللي بموضوعتس متضاربه

كل واحد في وادي

يعني المدرس الشديد محد راح يحبه

صح ان حصته تكون هدوء من الخوف

بس محد يدانيه

ولا ينطبق المثل هذا على موضوعتس

والزوجه اللي تقول زوجي مره يبعد ومره يقرب

هذا زوج مايعتبر مقفي يعني هيك وهيك

حرام نقحمه كـ عكس لهذاك اللي يحبها وكل شوي يتصل عليها

بس مايمنع ان موضوعتس إكـّه يابنتي وخقق

اذا بنتكلم عن سالفة الشخص اللي تربطك معه اي علاقه

ويكون فيه شوفة نفس وعدم تنازل عن قراراته وعناد

هذا اول شي يرجع على شخصيتك

اذا انت انسان رايق وحكيم

راح تحاول تنثني له مرتين او ثلاث مع تبيان ذلك له

يعني تهاوشتوا اليوم والسبب انه معنـّد

تجيه بعدها وتضحك معه وتسولف وتكون انت اللي بديت بالمصالحه

سوها معاه مره مرتين كمحاوله منك انك ماتخسره

لانك ماصاحبته الا يكون غالي او يعز عليك تفقده على سالفه تافهه

وهو طبعا انسان عنده احساس ويفهم

طبيعيا بعدها يا انه بيصير ليـّن شوي

والا اذا تهاوشتوا يمكن هو اللي يجي يعتذر

مهب عن شي بس بحكم انه عنيد وشايف حاله

بيعتذر لك عشان ماتصير انت احسن منه في اي شي

والنهايه بتكون علاقتكم رجعت وهذا المطلوب

واذا ما حس وصار يتمادى في عناده وانتهت العلاقه

بتصير انت الكسبان بشكل خيالي

اولا انك واضح مع نفسك

ثانيا انك حاولت كذا مره تعتذر منه وتصير انت الاحسن بس مافيه فايده ابد

والثالثه انك افتكيت من شخص مثل هذا عاله على نفسه وعلى اللي حوله

خصوصا وان الموضوع احتمال يكون مرئي ومسموع من اكثر من شخص

وهذا شي بيكون بصالحك

يعني اللي حولكم لو يعرفون باللي صار بينكم

طبيعي بيعرفون مستجدات الموضوع

ويعرفون انك اعتذرت منه كذا مره وهو اللي مقفـّل

وبكذا بتكون ربحان شي رابع وهو الذكر الطيب والسمعه الزينه عند اللي حولك

بأنك من النوع اللي تقدر وتحشم وماتخسر علاقاتك بسهوله لطيب معدنك

مدري عن الهذره اللي صارت فوق

احس انها بدون شعور

الزبده

الواحد يكون ليـّن شوي

لان الناس نفسياتهم تختلف

فيه احد اذا عصب مايرضى الا بعد فتره يومين والا ثلاث

يعني إلتمس لصاحبك ألف عذر

لاتصير تدور عليه الزله

يمكن عنده ضغوطات تخليه متنرفز ومهب فاضي يسمع منك

او يعاندك لغرض العناد بس

ويمكن عقليته مانضجت بالشكل اللي يسمح له يخاوي واحد مثلك

يعني مو شرط كل اثنين مع بعض تكون عقلياتهم وتفكيرهم زي بعض

بيصير شي حلو لو تصير انت العاقل والسبّاق للأشياء الزينه

ولما اقول انك تصالحه مو كل مره تروح له

يعني اكثر شي انك تصالحه مرتين او ثلاث

اذا حسيت بتجاوب وتحسـن والا منت مجبور فيه .. وعامله مثل مايعاملك بالضبط

عشان تخرج بـ شئ من كبريائك وكرامتك من علاقة هالشخص

مدري انا الحين ماسك الجاده

والا جالس اخبص المواضيع في بعض

الله يستر !!

مايكبرني لقب ماشاء الله عليتس فكره وصياغه وترتيب جنان

تعجبني المواضيع اللي متل هيك

ان شاء الله انها بداية ادهار لتس في المنتدى

>> الذرابه حدها

مع السلامة ,,

وني وني وني