يا مـزوني ابرقـي ثم ارعدي=وإن هطلتي شعر طقي ببردي
وأروي الحـال المعنا من سيولك=وإرثي الخفاق والحـظ الردي
في هنوف(ن) ما توفيها القـصايد=لو أنا والقــاف نرجي مـاردي؟
اعتذر ..وبكل أدب ( ما فيه حيله )=ماني أبواصله لو أعـدي عدي
قلت انا شاعر وهالمره عـوافي=إستريح ولا تفـارق مقعـدي
بس ..أبي رأيك بعد بدع القصيده=قال تآمر.. بس.. منين ابتبتدي ؟
قلت ما فيها كلام أبدأ بروحه=ومن طيـوف الروح للقلب الندي
والطباع اللي تميــزها الطهـاره=شامله للدلو مع برج الجدي
والجمـال وطوله الفارع وقـّده=والعيون اللي طرفهــا ساهدي
وحالي المنطوق في عذب الخواطر=جامع(ن) كل الحروف الشرّدي
ماردي ! فعلآ معاك الحق.. وانتي=يا قصيـده أسهـري ثم أهجدي
ما تخثر من حروفك جرح نازف=ولا غفت عيني بليل(ن) سرمدي
يا حبيبي روح جعل السعد فــالك=تدري إن الأمـر ماهـو في يدي
والعزا؟ ما به عزا بعد المفارق=لو جمعت الشعــر قبــلي وابعدي
ولو مزون الشعر هلـّـت كل ليله=مـا رثت قلبي ولا الحـظ الردي